Ʉkʉsyɨligwa kwa Jaakobo
50
Joosefu alɨnkʉgʉgwɨla ʉmfimba gwa gwisabo, alɨnkʉnndɨlɨla, alɨnkʉmfipa. 2 Po Joosefu alɨnkʉbabʉʉla abaganga baake ʉkʉtɨ, bapake ʉnkota ʉmfimba gwa gwise ʉkʉtɨ gʉlɨngabola, balɨnkʉgʉpaka. 3 Ɨmbombo ɨjo jaabombiigwe kʉ masikʉ amalongo mana, paapo lo lwiho lwa Bamisili ʉkʉpaka ʉnkota ʉmfimba. ABamisili balɨnkʉlɨla ɨɨfwa jaa Jaakobo amasikʉ 70.4 Amasikʉ gaa kʉlɨla ɨɨfwa bo gamaliike, Joosefu alɨnkʉbabʉʉla abandʉ baa nnyumba jaa Falao alɨnkʉtɨ, “Lɨnga mwikyeliile na niine, mukaanjobele kwa Falao. Mummbʉʉle ʉkʉtɨ taata aatile ndape, aajobile kʉmyangʉ aatile, 5 ‘Ʉne ndɨ kɨfuki ʉkʉfwa. Ʉkaasyɨle mwi ipʉmba ɨlɨ naakʉmbile nkiisʉ kya mu Kaanani.’ Ngʉsʉʉma ʉʉnyiitɨkɨle mbʉʉke ngansyɨle taata, po ngwakwisa.”
6 Falao alɨnkwamula alɨnkʉtɨ, “Bʉʉka ʉkansyɨle ʉgʉʉso, bo muumo gwalapiile ʉkʉbomba.”
7 Po Joosefu alɨnkʉbʉʉka kʉkʉnsyɨla ʉgwise. Balɨnkʉnsindɨkɨla ababombi boosa abaa Falao, abakʉlʉmba baa nnyumba jaake, pamopeene na balongosi boosa abaa nkiisʉ kyosa ɨkya mu Misili. 8 Joosefu alɨnkʉlongosania na bandʉ baa nnyumba jaake, abaamyabo na bandʉ baa nnyumba jaa gwise. Beene abaanaabo baasyele mu Gosyeni, pamopeene nɨ mitiimo gyabo. 9 Kangɨ baalɨnsindɨkiile abasikali abingi, aba baaliitogile ɨfalaasi na mageleeti. Kyalɨ kɨlʉndɨlo kɨnywamu fiijo.
10 Bo bafikile pa kɨbanja kya kʉpʉʉlɨla nkaaja akaa mu Atati, kwi isɨɨlya ɨlya lwɨsi Jolitani, balɨnkwilɨlɨɨsya kʉ bʉsulumanie fiijo. Ʉko ko kʉno Joosefu aalɨliile ɨɨfwa jaa gwise kʉ masikʉ mahaano na mabɨlɨ. 11 Abenekaaja baa mu Kaanani, bo bajɨbwene ɨɨfwa pa kɨbanja ɨkya kʉpʉʉlɨla ɨkya pa Atati, balɨnkʉjoba balɨnkʉtɨ, “Ʉkwilɨlɨɨsya kwa Bamisili kʉkʉlʉmba fiijo!” Fyobeene ʉbʉjo bʉla kwi isɨɨlya lya lwɨsi Jolitani, balɨnkʉbʉpa ɨngamu jaa Abeli-Misili.a
12 Abaana baa Jaakobo baabombile bo ʉlo bo muno aabalagɨliile ʉgwisabo. 13 Balɨnkʉgʉtwala ʉmfimba gwake nkiisʉ ɨkya mu Kaanani, balɨnkwakʉnsyɨla mu mbako ɨjɨ jaalɨ mu ngʉnda ʉgwa mu Makipela, kɨfuki na kʉ Mamule. Ʉngʉnda gʉla Abulahamu aalyʉlile kwa Efuloni ʉgwa kɨkolo kya Bahiti, ʉkʉja bʉjo bwa kʉsyɨlapo abandʉ baake.
14 Joosefu bo amalile ɨɨfwa, alɨnkʉbʉʉka kangɨ kʉ Misili pamopeene na baamyabo na bandʉ boosa aba baalɨnsindɨkiile kʉkʉnsyɨla ʉgwisabo.
Joosefu ikʉbahobokela abakʉlʉ
15 Abaamyabo baa Joosefu bo baagile afwile ʉgwisabo, balɨnkʉjoba balɨnkʉtɨ, “Baagwɨtʉ, Joosefu abagiile ʉkʉtʉkalalɨla nʉ kʉtʉbukɨsya ɨmbiibi ɨsi twalɨmmbombiile.”
16 Po balɨnkʉntʉmɨla Joosefu ɨndʉmi balɨnkʉtɨ, “Ʉgʉʉso bo akafwa, aajobile aatile, 17 ‘Mummbʉʉle Joosefu ʉkʉtɨ, ngʉnsʉʉma abahobokele abakʉlʉ kʉ mbiibi syosa ɨsi baalɨmmbombiile.’ Po tukʉkʉsʉʉma ʉtʉhobokele ʉswe twe babombeli baa Kyala gwa gʉʉso.” Po Joosefu bo apɨliike, alɨnkʉlɨla.
18 Abakʉlʉ balɨnkʉbʉʉka kʉmyake, balɨnkʉnngwɨla ʉlʉpi balɨnkʉtɨ, “Keeta, ʉswe tʉlɨ batʉmwa baako!”
19 Looli Joosefu alɨnkʉbaamula alɨnkʉtɨ, “Mulɨngatiilaga, ʉne ngaja ne Kyala. 20 Ʉmwe mwalondaga ʉkʉʉmbombela ɨmbiibi, looli Kyala aabɨngɨliile ɨnunu ʉkʉtɨ sije bo ʉlʉ, abandʉ bingi bikʉpokigwa. 21 Po mulɨngatiilaga! Ʉne angʉbapa ɨfindʉ pamopeene na baanɨɨnu.” Alɨnkʉjoba nabo kanunu, balɨnkʉhoboka.
Ʉbʉfwe bwa Joosefu
22 Joosefu alɨnkʉtʉʉgala mu Misili pamopeene na bakamu boosa. Ʉmwene aatʉʉgeele ɨfyɨnja 110. 23 Joosefu bo aliko kʉ bʉʉmi, aababwene abaana na biisʉkʉlʉ baa Efulaimu. Kangɨ aababwene abaana baa mwisʉkʉlʉ gwake Makili, ʉmwana gwa Manasi. Alɨnkʉbambɨlɨla ʉkʉja baanaake.
24 Joosefu alɨnkʉbabʉʉla abaamyabo alɨnkʉtɨ, “Ʉne ndɨ kɨfuki ʉkʉfwa. Looli nalooli Kyala ikwisa kʉbatʉʉla ʉkʉbasoosyamo nkiisʉ ɨkɨ, nʉ kʉbatwala nkiisʉ ɨkɨ aafingile kwa Abulahamu, Isaka na Jaakobo.” 25 Po Joosefu alɨnkʉbalagɨla abaana baa Jaakobo ʉkʉlapa, alɨnkʉtɨ, “Nalooli Kyala ikwisa kʉbatʉʉla, mukʉlondigwa ʉkʉfitwala ɨfifupa fyangʉ kʉkaaja.”
26 Po Joosefu alɨnkʉfwa bo alɨ nɨ fyɨnja 110. Balɨnkʉpaka ʉnkota ʉmfimba gwake ʉkʉtɨ gʉlɨngabolaga, balɨnkʉgʉbɨɨka mwi ibokosi, mulamula mu Misili.