Joosefu ikʉlɨngaania ɨnjosi
40
Akabalɨlo bo kakɨndilepo, ababombeli abakʉlʉmba babɨlɨ abaa Falao baatʉlile ɨnongwa kʉ malafyale gwabo. Jʉmo aalɨ nkʉlʉmba gwa kwɨmɨlɨla ɨfya kʉnwa, ʉjʉngɨ aalɨ mpɨɨji ʉnkʉlʉmba ʉgwa fisyesye. 2 Falao alɨnkʉbakalalɨla ababombeli baake abakʉlʉmba bala, 3 alɨnkʉbabɨɨka mu nyumba jaa nnyololo ɨjɨ jɨɨmɨlɨligwaga nʉ nkʉlʉmba gwa balɨndɨlɨli muno aapinyiigwe Joosefu. 4 Ʉnkʉlʉmba gwa balɨndɨlɨli alɨnkʉnsala Joosefu ʉkʉja gwa kʉbabombela ababombeli abakʉlʉmba bala. Po balɨnkʉja mu nnyololo kʉkabalɨlo.5 Ɨkɨlo kɨmo bobabɨɨlɨ, ʉnkʉlʉmba gwa kwɨmɨlɨla ɨfya kʉnwa nʉ mpɨɨji ʉnkʉlʉmba gwa fisyesye, baagogilwe ɨnjosi. Ɨnjosi ɨsyo syalɨ nɨ ndʉmi ɨsi sikafwana.
6 Nʉlʉbʉnjʉ Joosefu aabʉʉkile kʉkʉbakeeta, aabaagile basulumeenie. 7 Po Joosefu alɨnkʉbalaalʉʉsya alɨnkʉtɨ, “Fiki ʉmwisyʉgʉ musulumeenie?” 8 Balɨnkʉmmwamula balɨnkʉtɨ, “Tʉgogilwe ɨnjosi, leelo akajapo ʉgwa kʉtʉsanukɨsya.” Joosefu alɨnkʉbaamula alɨnkʉtɨ, “Bʉle, ʉkʉsanusya ɨnjosi jɨkaja mbombo jaa Kyala? Namuumbʉʉle ɨnjosi syɨnu, Kyala ʉjʉ asimeenye syosa, aikʉndʉʉla ʉkʉsanusya.”
9 Ʉmwɨmɨlɨli ʉnkʉlʉmba ʉgwa fya kʉnwa alɨnkʉmpangɨla Joosefu ɨnjosi jaake, alɨnkʉtɨ, “Mu njosi jangʉ ndɨnkʉgʉbona ʉmpiki gwa maafiilʉ nkyeni mmyangʉ, 10 gwalɨ nɨ samba itatʉ. Nakalɨnga gʉlɨnkʉtʉlʉla amaani, ʉbʉlenge bʉlɨnkwanda ʉkʉboneka, ɨseke sya maafiilʉ silɨnkʉbɨfwa. 11 Naalɨ nɨ kɨkombe ɨkya Falao mmaboko, ndɨnkʉpaata ɨseke sila ɨsya maafiilʉ, ndɨnkʉkamɨla nkɨkombe kɨla, po ndɨnkʉmpapo Falao.”
12 Po Joosefu alɨnkʉmmbʉʉla ʉmwɨmɨlɨli gwa fya kʉnwa jʉla alɨnkʉtɨ, “Ʉkʉsanusya kwa njosi jaako ko ʉkʉ. Ɨsamba itatʉ go masikʉ matatʉ. 13 Mmasikʉ matatʉ Falao aikʉkwabʉla nʉ kʉkʉgomokesyapo pa mbombo jaako. Kʉmpaga Falao ɨfya kʉnwa, bo ʉlʉ gwabombaga ʉlʉtasi. 14 Looli pakabalɨlo aka ɨmbombo jaako jikwendaga kanunu, ʉngʉmbʉkege ʉkʉʉmbombela ɨnunu, ʉkaanjobelege kanunu kwa Falao ʉkʉtɨ aasoosyemo mu nnyololo. 15 Ʉne baalɨɨnyiibile ʉkʉfuma nkiisʉ ɨkya Bahibʉli, kangɨ nkiisʉ kya mu Misili moope ngatʉlamo ɨnongwa najɨmo ɨjaa kʉʉmbɨɨka mu nnyololo.”
16 Po ʉmpɨɨji ʉnkʉlʉmba ʉgwa fisyesye ʉgwa Falao, bo apɨliike ʉkʉsanusya kwa njosi ʉkwa Joosefu ʉkʉja kʉnunu, alɨnkʉtɨ, “Na niine ngogilwe ɨnjosi. Mu njosi jangʉ naaliitwɨkile ɨfiibo fitatʉ ɨfya fisyesye. 17 Nkiibo ɨkya pamwanya, fyalimo ɨfindʉ fya lʉko lwingi ɨfya Falao. Looli ɨnjʉni syalyaga ɨfindʉ ɨfi naaliitwɨkile.”
18 Joosefu alɨnkʉmmbʉʉla alɨnkʉtɨ, “Ʉkʉsanusya kwa njosi jaako ɨjɨ ko ʉkʉ. Ɨfiibo fitatʉ fila go masikʉ matatʉ. 19 Amasikʉ matatʉ bo gakɨndile Falao aikʉkʉsoosyamo mu nnyololo, aikʉkʉbuuta ʉntʉ gwako, aikʉkʉtʉlɨka mu mpiki, po ɨnjʉni aasikʉlyaga ʉmbɨlɨ gwako.”
20 Amasikʉ matatʉ bo gakɨndile, pi isikʉ lya lʉsekelo lwa kʉkʉmbʉka ʉkʉpaapigwa Falao, Falao aapɨɨjile ɨfindʉ fya lʉsekelo kʉ babombeli baake boosa. Aabasoosiisye ʉmwɨmɨlɨli gwa fya kʉnwa pamopeene nʉ mpɨɨji gwa fisyesye, aabatwele nkyeni mbabombeli baake boosa. 21 Po alɨnkʉnngomokesyapo pa mbombo ʉmwɨmɨlɨli gwa fya kʉnwa, ʉkwɨmɨlɨla ɨfya kʉnwa ɨfya Falao. 22 Looli alɨnkʉntʉlɨka mu mpiki ʉmpɨɨji ʉnkʉlʉmba gwa fisyesye, bo muumo aasanukiisye Joosefu ɨnjosi jaake.
23 Looli ʉmwɨmɨlɨli ʉnkʉlʉmba gwa fya kʉnwa alɨnkʉsita kʉnkʉmbʉka Joosefu, aalɨmmwibiibwe loosa.