Joosefu nʉ nkasi gwa Potifa
39
Po Joosefu bo bantwele kʉ Misili, Potifa ʉMmisili ʉmbombeli gwa Falao, ʉjʉ aalɨ nkʉlʉmba gwa basikali, aalɨmmʉʉlile kʉ Baisimaɨli aba baalɨntwele kʉ Misili. 2 ɄNTWA alɨnkʉja pamopeene na Joosefu, alɨnkʉnoga, alɨnkʉja nnyumba jaa ntwa gwake, ʉMmisili. 3 Potifa alɨnkwaga ʉkʉtɨ ɄNTWA alɨ pamopeene na Joosefu, nʉ kʉtɨ ɄNTWA antʉʉlaga syosa ɨsi aabombaga. 4 Joosefu alɨnkʉnkyela fiijo Potifa kʉ mbombo syosa ɨsi aabombaga. Potifa alɨnkʉmmbɨɨka ʉkʉja mwɨmɨlɨli mu nyumba jaake, fyosa ɨfi fyalimo alɨnkʉfibɨɨka mmaboko gaake. 5 Potifa bo ammbɨɨkile ʉkʉja mwɨmɨlɨli gwa nyumba jaake nʉ tʉndʉ twake toosa, ɄNTWA alɨnkʉjɨsaja ɨnyumba jaa Potifa kʉnongwa jaa Joosefu. Alɨnkʉfisaja fyosa ɨfi aalɨ nafyo, nnyumba na mmigʉnda. 6 Potifa alɨnkʉfileka fyosa ɨfi aalɨ nafyo mmaboko gaa Joosefu. Akaakongeesyaga ɨmbombo syake nasimo ɨsya pakaaja, looli fyene ɨfindʉ ɨfi aalyaga ʉmwene Potifa.Joosefu nʉ nkasi gwa Potifa
Joosefu aalɨ mundʉ nnunu na kʉmaaso aalɨ nnunu. 7 Po piitaasi ʉnkasi gwa Potifa alɨnkʉnnyonywa Joosefu, alɨnkʉmmbʉʉla alɨnkʉtɨ, “Isaga gwende na niine.” 8 Looli Joosefu alɨnkʉkaana, alɨnkʉmmbʉʉla ʉnkasi gwa ntwa gwake alɨnkʉtɨ, “Ʉne mbeeliigwe ʉbʉlongosi nnyumba ɨjɨ, ʉntwa gwangʉ atikʉbomba nasimo nnyumba ɨjɨ, kʉkʉtɨ kandʉ aka alɨ nako ambeele. 9 Akajako ʉnkʉlʉmba nnyumba ɨjɨ ʉkʉngɨnda ʉne, akangaanisya akandʉ nakamo looli ʉgwe. Namanga ʉgwe ʉlɨ nkasi, ngabagɨla ʉkʉbomba ʉbʉbiibi ʉbo, nʉ kʉtʉla ɨnongwa kwa Kyala.” 10 Ʉnkiikʉlʉ ʉjo alɨnkwendelela ʉkʉnhaha Joosefu amasikʉ goosa, looli Joosefu aakaanaga, aalekile nʉ kʉja kɨfuki nagwe. 11 Iisikʉ lɨmo alɨnkwingɨla nnyumba nkʉbomba ɨmbombo jaake, akaalimo najʉmo ʉgwa mbombo nnyumba mula. 12 Ʉnkiikʉlʉ jʉla alɨnkʉkola ʉmwenda gwa Joosefu, alɨnkʉtɨ, “Gwende na niine.” Joosefu alɨnkwipukunyula, alɨnkʉnndekela ʉmwenda gwake, alɨnkʉbopela panja. 13 Ʉnkiikʉlʉ jʉla bo aagile ʉkʉtɨ anndekiile ʉmwenda nʉ kʉbopela panja, 14 alɨnkʉbakoolela abandʉ abaa nnyumba jaake, alɨnkʉjoba nabo alɨnkʉtɨ, “Namukeete, ʉndʉme gwangʉ atʉtwaliile ʉNhibʉli ʉjʉ ʉkʉtɨ atʉsʉʉsye. Ingiile kʉmyangʉ ʉkʉtɨ ende na niine, nguutile. 15 Looli bo apɨliike iisyʉ lyangʉ ngʉkuuta, agʉlekile ʉmwenda gwake kʉmyangʉ, abopiile panja.”
16 Po alɨnkʉgʉbɨɨka ʉmwenda gwa Joosefu mpaka bo ʉndʉme iisile nnyumba. 17 Alɨnkʉmpangɨla amasyʉ gala alɨnkʉtɨ, “Ʉntʉmwa jʉla ʉNhibʉli, ʉjʉ gʉntwele kʉmyɨtʉ, ingiile ʉkʉtɨ aanyasye. 18 Looli bo nguutile, agʉlekile ʉmwenda gwake kʉmyangʉ nʉ kʉbopela panja.” 19 Potifa bo asipɨliike ɨnongwa sya nkasi ʉkʉtɨ syo ɨsi ʉmbombi gwake ammbombiile, alɨnkʉkalala. 20 Potifa alɨnkʉnkola Joosefu, alɨnkʉmpinya mu nnyololo, muno baapinyiigwe abapinyigwa baa malafyale.
Joosefu alɨ mu nnyololo
21 Looli ɄNTWA alɨnkʉja pamopeene na Joosefu, alɨnkʉnndɨndɨlɨla. Joosefu alɨnkʉkaba ʉbʉkʉndwe kʉ nkʉlʉmba gwa nnyololo. 22 Ʉnkʉlʉmba gwa nnyololo alɨnkʉmmbɨɨka Joosefu ʉkʉbɨɨmɨlɨla abapinyigwa boosa. Syosa ɨsi syabombigwaga mu nnyololo syabombigwaga kʉ bʉlagɨli bwa Joosefu. 23 Ʉnkʉlʉmba gwa nnyololo aalɨnndekiile Joosefu ɨmbombo syosa ɨsya kʉbɨɨmɨlɨla abapinyigwa, namanga ɄNTWA aalɨ pamopeene nagwe nʉ kʉntʉʉla.