Juuta na Tamali
38
Akabalɨlo kala Juuta alɨnkʉbaleka abaamyabo, alɨnkʉbʉʉka kʉkʉtʉʉgala nʉ mundʉ jʉmo ʉMwandulami, ɨngamu jaake Hila. 2 Bo alɨ kʉla, Juuta alɨnkʉmmbona ʉndɨndwana ʉmwana gwa Syua, ʉjʉ aalɨ Nkaanani. Po alɨnkʉmmwega, alɨnkwenda nagwe. 3 Alɨnkʉja nɨ kɨfuba, alɨnkʉpaapa ʉmwana, alɨnkʉmpa ɨngamu jaa Eli. 4 Alɨnkʉja nɨ kɨfuba kangɨ, alɨnkʉpaapa ʉmwana, alɨnkʉmpa ɨngamu jaa Onani. 5 Alɨnkʉpaapa ʉmwana kangɨ, alɨnkʉmpa ɨngamu jaa Syela. Ʉjo aalɨmpaapiile kʉ Kesibu.6 Juuta alɨnkʉmmwegela ʉnkiikʉlʉ ʉmwanaake ʉgwa kɨpanda, ɨngamu jaake ʉnkasi ʉjo jo Tamali. 7 Looli Eli ʉmwana gwa kɨpanda gwa Juuta aalɨ na kajɨɨlo akabiibi kʉ NTWA, po ɄNTWA alɨnkʉnngoga. 8 Juuta alɨnkʉmmbʉʉla Onani alɨnkʉtɨ, “Gwingɨle ɨkɨlɨngo kʉ nkasi gwa nkʉlʉgo, ʉmmwege, ʉmpaapɨle abaana ʉnkʉlʉgo.” 9 Looli Onani aameenye ʉkʉtɨ abaana abo aabatikʉja baake, bo ikwaganila nʉ nkasi gwa nkʉlʉ alɨnkoona paasi ɨmbeju, ʉkʉtɨ alɨngampaapɨla abaana ʉnkʉlʉ. 10 Ɨsyo syalɨ mbiibi kʉ NTWA, po ɄNTWA alɨnkʉnngoga joope. 11 Juuta alɨnkʉmmbʉʉla Tamali ʉnkamwana alɨnkʉtɨ, “Ʉgomoke kʉ bapaapi baako, ʉkajege mfwɨle ʉkwakʉfika apa ʉmwanangʉ Syela bo akʉlile.” Namanga Juuta aatile alɨngafwa joope bo ʉlwa bakamu. Po Tamali alɨnkʉbʉʉka, alɨnkwakʉtʉʉgala kʉkaaja kaa gwise.
12 Amasikʉ mingi galɨnkʉkɨnda, ʉmwana ʉndɨndwana gwa Syua, ʉjʉ aalɨ nkasi gwa Juuta, alɨnkʉfwa. Juuta bo amalile ɨɨfwa, alɨnkʉbʉʉka kʉ Timuna kʉ bandʉ aba baaseenyaga ʉlʉsyoja lwa ngʼoosi syake, aalongoseenie nʉ nnine Hila ʉMwandulami. 13 Tamali bo apɨliike ʉkʉtɨ, ʉnkamwana gwake ikʉbʉʉka kʉ Timuna kʉkʉseenya ʉlʉsyoja lwa ngʼoosi syake, 14 alɨnkʉfuula ɨmyenda gyake ɨgya bʉfwɨle, alɨnkwiniembeteelela ɨmyenda ɨgɨngɨ. Alɨnkwikinga kʉmaaso, alɨnkʉtʉʉgala pa kɨfigo kya kwingɨlɨla mu Enaimu, kɨfuki nɨ njɨla jaa kʉbʉʉka kʉ Timuna. Tamali aabombile bo ʉlo paapo aameenye ʉkʉtɨ Syela ʉmwana gwa Juuta aakʉlile, looli Juuta akaalɨmmwitɨkiisye Syela ʉkʉmmwega Tamali.
15 Juuta bo ammbwene alɨnkʉtɨ gwamalaja, paapo aaliikingile kʉmaaso. 16 Alɨnkʉbʉʉka apa alipo pambalɨ pa njɨla, alɨnkʉtɨ, “Ʉʉnyiitɨkɨsye ningɨle kʉmyako,” namanga akaameenye ʉkʉtɨ nkamwana. Tamali alɨnkʉnndaalʉʉsya alɨnkʉtɨ, “Aakʉmba ɨfiki lɨnga gwingiile kʉmyangʉ?” 17 Juuta alɨnkwamula alɨnkʉtɨ, “Angʉkʉtwalɨla ɨmbene ɨjaa mu ntiimo gwangʉ.” Tamali alɨnkʉnndaalʉʉsya alɨnkʉtɨ, “Bʉle, kʉmba ɨfya kʉkola mpaka bo ʉtwele?” 18 Juuta alɨnkwamula alɨnkʉtɨ, “Ngʉpe ɨfiki ɨfya kʉkola?” Tamali alɨnkʉmmwamula alɨnkʉtɨ, “Ɨnyambo syako ɨsya mmakosi ɨsi silɨ nɨ kya kʉkolekela, nɨ ngili jaako ɨjɨ ʉkoliile.” Po alɨnkʉmpa, alɨnkwingɨla kʉmyake, Tamali alɨnkʉja nɨ kɨfuba. 19 Tamali alɨnkʉsookapo, alɨnkʉbʉʉka kʉmyabo, alɨnkʉfuula ɨmyenda ɨgɨ aaliikingile kʉmaaso, alɨnkʉfwala kangɨ ɨmyenda gyake ɨgya bʉfwɨle.
20 Juuta alɨnkʉtʉma ɨmbene ʉkwendela kʉ mmanyaani gwake ʉMwandulami, ʉkʉtɨ akeege ɨfi aakolile ʉnkiikʉlʉ jʉla, looli akaalɨmmwagile. 21 Alɨnkʉbalaalʉʉsya abandʉ abaa pabʉjo bʉla, alɨnkʉtɨ, “Alɨ kʉʉgʉ ʉgwamalaja ʉjʉ aalipo mu Enaimu mumbalɨ mu njɨla?” Balɨnkʉtɨ, “Akaalipo ʉgwamalaja apa.” 22 Alɨnkʉgomoka kwa Juuta alɨnkʉtɨ, “Ngammwaga, na bandʉ abaa pabʉjo bʉla batile akaalipo ʉgwamalaja.” 23 Juuta alɨnkʉtɨ, “Nndeke ʉmwene eege ʉtʉndʉ twangʉ, tʉlɨngiisa kʉkosigwa ɨsoni, keeta nʉntwaliile ɨmbene ɨjɨ, leelo ʉkammwaga.”
24 Bo gɨkɨndile ɨmyesi mitatʉ Juuta alɨnkʉpeeligwa ɨndʉmi ʉkʉtɨ, “Ʉnkamwana gwako Tamali gwamalaja, kangɨ akabile ɨkɨfuba mmalaja.” Juuta alɨnkʉtɨ, “Namunsoosye akosigwe mmooto.” 25 Bo bikʉnsoosya panja, Tamali alɨnkʉtʉma ɨndʉmi kʉ nkamwana gwake, alɨnkʉtɨ, “Ʉne mbeeliigwe ɨkɨfuba nʉ mundʉ ʉmwene tʉndʉ ʉtʉ, po ʉtʉmanye ʉtʉndʉ ʉtʉ twani, ɨnyambo ɨsi ɨsya mmakosi nɨ ngili ɨjɨ.” 26 Juuta alɨnkʉtʉmanya ʉtʉndʉ tʉla, alɨnkʉtɨ, “Ʉmwene Tamali ngolofu ʉkʉngɨnda ʉne. Nalooli ngammwegesania nʉ mwanangʉ Syela.” Juuta akaalyendilemo kangɨ na Tamali bo sikɨndile ɨsyo.
27 Akabalɨlo akaa kʉpaapa Tamali bo kafikile, balɨnkʉmanya ʉkʉtɨ alɨ nɨ kɨfuba ɨkya mapasa. 28 Akabalɨlo kaa kʉpaapa, ʉmwana jʉmo alɨnkʉsoosya ɨkɨboko panja. Ʉjʉ antʉʉlaga ʉkʉpaapa alɨnkwega ʉbʉʉsi ʉbʉkeseefu, alɨnkʉmpinya nkɨboko, alɨnkʉtɨ, “Ʉjʉ jo gwa kɨpanda.” 29 Looli bo mbasa agomwisye ɨkɨboko kyake, ʉgwamyabo sinde alɨnkʉsooka. Po ʉjʉ antʉʉlaga ʉkʉpaapa, alɨnkʉtɨ, “Keeta ʉgwe ʉkɨndile kʉ maka?” Kʉnongwa ɨjo balɨnkʉmpa ɨngamu jaa Pelesi.a 30 Alɨnkʉsooka mbasa piitaasi, aalɨ nʉ bʉʉsi ʉbʉkeseefu, ʉmwene balɨnkʉtɨ jo Sela.b