Ɨnjosi sya Joosefu
37
Jaakobo aatʉʉgalaga nkiisʉ ɨkya mu Kaanani, muno ʉgwise aatʉʉgalaga mbʉheesya. 2 Ɨsi syo nongwa ɨsya lʉjungu lwa Jaakobo.Joosefu bo alɨ nɨ fyɨnja 17, aatiimaga ɨngʼoosi pamopeene na bakʉlʉ abaa banna abangɨ, abaana baa Biliha na baa Silipa abakasi abanandɨ abaa gwise. Joosefu alɨnkʉmmbʉʉla ʉgwise ɨsya kajɨɨlo akabiibi akaa bakʉlʉ. 3 Isilaɨli, ʉjʉ ɨngamu ɨjɨngɨ jo Jaakobo, aalɨnnganile Joosefu ʉkʉkɨnda abaanaake boosa, paapo aapaapiigwe pakabalɨlo akaa mbʉkangale bwake. Aalɨnsoniile ʉnselekesye ʉntali. 4 Looli abakʉlʉ bo baagile ʉkʉtɨ ʉgwisabo annganile Joosefu ʉkʉkɨnda abeene, balɨnkʉmmbenga nʉ kʉsita kwangala nagwe kanunu.
5 Joosefu alɨnkʉgogwa ɨnjosi, looli bo abapangiile abakʉlʉ, po abeene balɨnkʉkɨndɨlɨla ʉkʉmmbenga. 6 Aababʉʉlile aatile, “Namupɨlɨkɨsye ɨnjosi ɨjɨ ngogilwe. 7 Twapinyaga ɨngose mu ngʉnda, nakalɨnga ɨngose jangʉ jɨlɨnkwɨma, ɨngose syɨnu silɨnkwɨma nʉ kʉjɨsyʉngʉʉtɨla ɨjangʉ, silɨnkʉjiinamɨla ɨngose jangʉ.”
8 Abakʉlʉ balɨnkʉnndaalʉʉsya balɨnkʉtɨ, “Bʉle, nalooli ʉgwe aakʉtwɨmɨlɨlaga ʉswe? Pamo aakʉtʉlongosyaga ʉswe?” Po balɨnkʉkɨndɨlɨla ʉkʉmmbenga kʉnongwa jaa njosi na masyʉ gaake. 9 Alɨnkʉgogwa ɨnjosi ɨjɨngɨ, alɨnkʉbabʉʉla abakʉlʉ alɨnkʉtɨ, “Namupɨlɨkɨsye, ngogilwe ɨnjosi ɨjɨngɨ, ndɨbwene iisʉba, ʉmwesi nɨ ndondwa kalongo na jɨmo filɨnkʉʉnyiinamɨla.” 10 Alɨnkʉmmbʉʉla ʉgwise na bakʉlʉ, ʉgwise alɨnkʉnkemela alɨnkʉtɨ, “Njosi nki ɨjɨ ʉgogilwe? Bʉle, ʉne nʉ nyoko na baamyɨnu, aatukwisa kʉkwinamɨla mpaka paasi?” 11 Abakʉlʉ balɨnkʉmmbonela ʉbʉʉfi, looli ʉgwise alɨnkʉlɨbɨɨka iisyʉ ɨlyo mu ndumbula.
Joosefu ikʉʉlɨsigwa na bakʉlʉ
12 Iisikʉ lɨmo abakʉlʉ baa Joosefu balɨnkʉbʉʉka kʉkʉtiima ɨngʼoosi sya gwisabo kɨfuki na kʉ Syekemu. 13 Po Jaakobo alɨnkʉmmbʉʉla Joosefu alɨnkʉtɨ, “Abaamyɨnu bikʉtiima ɨngʼoosi kʉ Syekemu. Isaga ngʉtʉme ʉkabakeete.” Joosefu alɨnkwamula alɨnkʉtɨ, “Ngʉbʉʉka taata.” 14 Jaakobo alɨnkʉmmbʉʉla alɨnkʉtɨ, “Bʉʉka ʉkabakeete lɨnga balɨ kanunu pamopeene nʉ ntiimo. Gwise ʉʉmbʉʉle.” Po alɨnkʉntʉma ʉkʉfuma nkiisʉ ɨkɨtelamu ɨkya mu Hebuloni.
Joosefu bo alɨ kɨfuki ʉkʉfika mu Syekemu, 15 ʉmundʉ jʉmo alɨnkʉmmwaga Joosefu bo ikʉsyʉngʉʉtɨla ndʉkʉbo mula. Ʉmundʉ jʉla alɨnkʉnndaalʉʉsya alɨnkʉtɨ, “Kʉlonda fiki?” 16 Joosefu alɨnkʉmmwamula alɨnkʉtɨ, “Ngʉbalonda abakʉlʉ bangʉ. Taata, ʉbagiile ʉkʉʉmbʉʉla kʉno bikʉtiima ɨmitiimo gyabo?” 17 Ʉmundʉ jʉla alɨnkʉtɨ, “Basookilepo apa, mbapɨliike bo bikʉtɨ, ‘Tʉbʉʉke kʉ Ndotani.’ ” Po Joosefu alɨnkʉsookapo pala, alɨnkʉbakonga abakʉlʉ baake, alɨnkwakʉbaaga kʉ Ndotani.
18 Balɨnkʉmmbona kʉbʉtali, bo akaalɨ ʉkʉfika apa baalipo, balɨnkʉjobesania ɨsya kʉnngoga. 19 Balɨnkʉjobesania balɨnkʉtɨ, “Keeta, ʉngogwa njosi jʉla ikwisa. 20 Oko, tʉnngoge tʉnsope mbwina, tukwakʉtɨgɨ kwa taata ɨkɨnyamaana ɨkɨkalɨ kɨnndiile. Po tukʉkeetaga ɨnjosi syake sikʉjaga bʉleebʉle.”
21 Looli Lʉbeni alɨnkʉpɨlɨka amasyʉ gaabo, alɨnkʉlonda ʉkʉmpoka, alɨnkʉtɨ, “Tʉlɨnganngoga, 22 mulɨngoona iilopa lyake! Namunsope mbwina ʉbʉ ʉbwa ndʉngalangala, looli mulɨngamfulasya.” Aajobile bo ʉlo ʉkʉtɨ ampoke Joosefu mmaboko gaabo, anngomosye kʉ gwise.
23 Joosefu bo afikile kʉ bakʉlʉ, balɨnkʉmfuula ʉnselekesye gwake ʉnnunu ʉgʉ aafwele, 24 po balɨnkʉnsopa mbwina. Looli ʉbwina bʉla bʉkaalɨ na mɨɨsi.
25 Bo batʉʉgeele pakʉlya ɨfindʉ, balɨnkʉbabona aBaisimaɨli bikwenda ɨnjɨla ʉkʉfuma kʉ Giliati ʉkʉbʉʉka kʉ Misili. Ɨngamila syabo syapɨmbile ɨfilʉngo, ʉlʉbani nʉ nkota. 26 Juuta alɨnkʉbabʉʉla abaamyabo alɨnkʉtɨ, “Aatukʉkabamo ɨfiki lɨnga tʉnngogile ʉnnuguna gwɨtʉ nʉ kʉbʉfisa ʉbʉgogi bwɨtʉ? 27 Paakipo tʉmmʉʉlɨsye kʉ Baisimaɨli aba, namanga ʉmwene nkamu gwɨtʉ, ilopa lyɨtʉ.” Abakamu balɨnkwitɨkana nagwe. 28 Balɨnkʉkɨnda pala abakyulusi abo aBaisimaɨli, aba baalɨ Bamityani. Abakʉlʉ baa Joosefu balɨnkʉnsoosyamo Joosefu mbwina, balɨnkʉmmʉʉlɨsya kʉ Baisimaɨli kʉ ntengo gwa ndalama ɨsya feesa amalongo mabɨlɨ. Balɨnkʉbʉʉka nagwe kʉ Misili.
29 Lʉbeni bo agomokiileko kʉ bwina, alɨnkwaga Joosefu akajamo, alɨnkʉnyaafulania ɨmyenda gyake kʉ bʉsulumanie. 30 Alɨnkʉbʉʉka kʉ baamyabo, alɨnkʉtɨ, “Ʉmwana akajako, ʉne mbʉʉke kʉʉgʉ?” 31 Balɨnkwega ʉnselekesye gwa Joosefu, balɨnkʉboola ɨmbene nʉ kʉjubɨka ʉnselekesye mwi ilopa. 32 Po balɨnkʉbʉʉka nʉ nselekesye gʉla, balɨnkʉntwalɨla ʉgwisabo, balɨnkʉmmbʉʉla balɨnkʉtɨ, “Tʉgwagile ʉnselekesye ʉgʉ, po tʉtile ʉgʉkeete ʉkʉtɨ gwa mwanaako pamo mma.” 33 Ʉgwisabo alɨnkʉgʉmanya, alɨnkʉtɨ, “Go nselekesye gwa mwanangʉ, nalooli ɨkɨnyamaana ɨkɨkalɨ kɨnndiile, kɨnnyaafuleenie Joosefu.” 34 Jaakobo alɨnkʉnyaafulania ɨmyenda gyake, alɨnkʉfwala amalogotaa mu nsana, alɨnkʉnndɨlɨla ʉmwanaake amasikʉ mingi. 35 Abaanaake abalʉmyana na balɨndwana balɨnkʉbʉʉka kʉkʉnsʉʉbɨsya. Looli alɨnkʉkaana ʉkʉsʉʉbɨsigwa alɨnkʉtɨ, “Hɨmma, ngʉnndɨlɨlaga ʉmwanangʉ mpaka bo nsulwike kʉ ngolongo.” Ʉgwise alɨnkwendelela ʉkʉnndɨlɨla.
36 Po aBamityani bala balɨnkʉmmʉʉlɨsya Joosefu kʉ Misili kwa Potifa, ʉjʉ aalɨ nkʉlʉmba gwa basikali baa Falao.b