Abaana baa Esabu
36
Ʉlʉ lo lʉjungu lwa Esabu, ʉjʉ ɨngamu ɨjɨngɨ jo Etomu.2 Esabu aalyegile abakasi nkiisʉ ɨkya mu Kaanani, ɨngamu syabo syo ɨsi, Anda na Oholibama. Anda aalɨ mwana ʉndɨndwana ʉgwa Eloni ʉNhiti. Oholibama aalɨ mwana ʉndɨndwana ʉgwa Ana, aalɨ mwisʉkʉlʉ gwa Sibeoni ʉNhifi. 3 Kangɨ aalɨmmwegile Basemati, ʉmwana ʉndɨndwana ʉgwa Isimaɨli, iilʉmbʉ gwa Nebajoti.
4 Anda alɨnkʉmpaapɨla Esabu ʉmwana ɨngamu jaake Elifasi. Basemati joope alɨnkʉpaapa ʉmwana ɨngamu jaake Lweli. 5 Oholibama alɨnkʉmpaapɨla abaana batatʉ, Jeusi, Jalamu na Kola. Abaana abo boosa, bo baana aba Esabu aapaapile nkiisʉ kya mu Kaanani.
6 Po Esabu alɨnkʉbeega abakasi, abaanaake na bandʉ boosa abaa nnyumba jaake. Kangɨ alɨnkwega ɨmitiimo gyake gyosa, nɨ kyʉma kyake kyosa ɨkɨ aakabile nkiisʉ kya mu Kaanani. Po alɨnkʉsaamɨla nkiisʉ ɨkɨngɨ ɨkɨ kyalɨ kʉbʉtali nʉ nnuguna Jaakobo. 7 Aabombile bo ʉlo paapo ɨmitiimo gya Esabu na Jaakobo nɨ fyʉma fyabo fyabeele fiijo. Po nkiisʉ ɨkɨ baatʉʉgalaga mbʉheesya kɨkaabafwene ʉkʉtʉʉgala pamopeene mula, kʉnongwa jaa mitiimo gyabo ɨmingi. 8 Po Esabu, ʉjʉ ngamu ɨjɨngɨ jo Etomu, alɨnkʉbʉʉka kʉkʉtʉʉgala mfyamba ɨfya nkiisʉ ɨkya mu Seili.
9 Ʉlʉ lo lʉjungu lwa Esabu, ʉgwise gwa Baetomu abenekaaja abaa mfyamba ɨfya nkiisʉ ɨkya mu Seili.
10 Ɨsi syo ngamu sya baana baa Esabu.
Elifasi apaapiigwe kʉ nkasi Anda, na Lweli apaapiigwe kʉ nkasi Basemati.
11 Abaana baa Elifasi baalɨ bo aba,
Temani, Omali, Sefo, Gatamu na Kenasi. 12 Elifasi aalɨ nʉ nkasi ʉgwa mbʉtiitʉ, ɨngamu jaake Timuna. Ʉjʉ aalɨmpaapiile ʉmwana ʉnnyambala ɨngamu jaake Amaleki. Abo boosa bo biisʉkʉlʉ baa Esabu kʉ nkasi Anda.
13 Abaana baa Lweli baalɨ bo aba,
Nahati, Sela, Syama na Misa. Abo boosa bo biisʉkʉlʉ baa Esabu kʉ nkasi Basemati.
14 Abaana baa Oholibama ʉnkasi gwa Esabu, ʉjʉ aalɨ mwana gwa Ana kangɨ aalɨ mwisʉkʉlʉ gwa Sibeoni, baalɨ bo aba,
Jeusi, Jalamu na Kola.
15 Aba bo banyafyale aba baafumile ndʉjungu lwa Esabu.
Elifasi ʉjʉ aalɨ jo mwana gwa kɨpanda ʉgwa Esabu, aabapaapile,
Temani, Omali, Sefo, Kenasi, 16 Kola, Gatamu na Amaleki. Abo boosa baana baa Elifasi, ʉmwana gwa Anda. Baalɨ banyafyale baa mfikolo fyabo nkiisʉ ɨkya mu Etomu.
17 Abaana baa Lweli, ʉmwana gwa Esabu baalɨ bo aba,
Nahati, Sela, Syama na Misa. Abo bo biisʉkʉlʉ baa Basemati ʉnkasi gwa Esabu. Baalɨ banyafyale baa mfikolo fyabo nkiisʉ ɨkya mu Etomu.
18 Abaana baa Oholibama ʉnkasi gwa Esabu baalɨ bo aba,
Jeusi, Jalamu na Kola. Abo bo baana baa Oholibama ʉmwana ʉndɨndwana ʉgwa Ana. Baalɨ banyafyale baa mfikolo fyabo.
19 Abo boosa bo biisʉkʉlʉ baa Esabu, ʉjʉ ɨngamu ɨjɨngɨ jo Etomu. Baalɨ balongosi baa mfikolo fyabo.
Ʉlʉjungu lwa Seili
20 Abaana baa Seili, ʉNholi, abenekaaja baa nkiisʉ ɨkya mu Etomu bo aba,
Lotani, Syobali, Sibeoni, Ana, 21 Ndisyoni, Eseli na Ndisyani. Abo boosa baalɨ banyafyale baa mfikolo fyabo ɨfya Baholi, abaa ndʉjungu ʉlwa Seili, nkiisʉ ɨkya mu Etomu.
22 Abaana baa Lotani bo aba,
Holi na Hemamu. Timuna aalɨ iilʉmbʉ gwa Lotani.
23 Abaana baa Syobali bo aba,
Alifani, Manahati, Ebali, Syefo na Onamu.
24 Abaana baa Sibeoni bo aba,
Aja na Ana. Ana jo ʉjʉ aajɨbwene ɨnyiibʉko jaa mɨɨsi ɨmbyʉ ndʉngalangala, bo ikʉtiima ɨmbunda sya gwise Sibeoni.
25 Abaana baa Ana bo aba,
Ndisyoni ni ilʉmbʉ Oholibama.
26 Abaana baa Ndisyoni bo aba,
Hemundani, Esibani, Itilani na Kelani.
27 Abaana baa Eseli bo aba,
Bilihani, Saafani na Akani.
28 Abaana baa Ndisyani bo aba,
Usi na Alani.
29 Abalongosi baa Baholi bo aba,
Lotani, Syobali, Sibeoni, Ana, 30 Ndisyoni, Eseli na Ndisyani. Abo boosa baalɨ banyafyale baa mfikolo fyabo ɨfya Baholi, nkiisʉ ɨkya mu Seili.
Abanyafyale baa nkiisʉ ɨkya mu Etomu
31 Aba bo banyafyale aba baalongosyaga nkiisʉ ɨkya mu Etomu, bo akajamo ʉmalafyale najʉmo mu Isilaɨli.
32 Bela ʉmwana gwa Beoli aalyandile ʉkʉlongosya nkiisʉ ɨkya mu Etomu. Ɨkɨtangaalala kyake kyalɨ nkaaja akaa mu Ndinihaba.
33 Bela bo afwile, Jobabu ʉmwana gwa Sela ʉgwa nkaaja akaa mu Bosila, jo alɨnkʉpyanilapo pa bʉlagɨli.
34 Jobabu bo afwile, Husyamu ʉgwa nkiisʉ kya Batemani, jo ʉjʉ alɨnkʉpyanilapo pa bʉlagɨli.
35 Husyamu bo afwile, Handati ʉmwana gwa Bendati alɨnkʉpyanilapo pa bʉlagɨli. Handati ʉjo ɨkɨtangaalala kyake kyalɨ mu Afiti. Jo ʉjʉ aabakomile aBamityani nkiisʉ ɨkya mu Moabu.
36 Handati bo afwile, Samula ʉgwa nkaaja akaa mu Masileka alɨnkʉpyanilapo pa bʉlagɨli.
37 Samula bo afwile, Syauli ʉgwa nkaaja akaa mu Lehoboti aka kalɨ kɨfuki nʉ lwɨsi Fulati, alɨnkʉpyanilapo pa bʉlagɨli.
38 Syauli bo afwile, Baali-Hanani ʉmwana gwa Akiboli alɨnkʉpyanilapo pa bʉlagɨli.
39 Baali-Hanani ʉmwana gwa Akiboli bo afwile, Handati alɨnkʉpyanilapo pa bʉlagɨli. Ɨkɨtangaalala kyake kyalɨ mu Pau. Ʉnkasi aalɨ jo Mehetabeli ʉmwana ʉndɨndwana ʉgwa Mateleti, kangɨ aalɨ mwisʉkʉlʉ gwa Mesahabu.
40 Abanyafyale abaa ndʉjungu ʉlwa Esabu ʉkʉkongana nɨ fikolo fyabo nʉ twaja twabo baalɨ bo aba,
Timuna, Alifa, Jeteti, 41 Oholibama, Ela, Pinoni, 42 Kenasi, Temani, Mibisali, 43 Magalieli na Ilamu. Abo bo balongosi abaa mfikolo ɨfya Etomu. Ʉtwaja ʉtʉ baatʉʉgalaga, twalɨ nɨ ngamu syabo.
Abanyafyale boosa abo baalɨ baa ndʉjungu ʉlwa Esabu, ʉjʉ aalɨ mwisʉkʉlʉ gwa Baetomu.