Jaakobo ikʉgomoka kʉ Beteli
35
Kyala alɨnkʉmmbʉʉla Jaakobo alɨnkʉtɨ, “Fyʉka kʉ Beteli, ʉkatʉʉgalege ʉko nʉ kʉʉnjengela ɨkɨgemo. Ʉne ne Kyala ne naakʉbonekiile bo kʉmmbopa Esabu ʉnkʉlʉgo.” 2 Po Jaakobo alɨnkʉbabʉʉla abandʉ abaa nnyumba jaake na boosa aba aalɨ pamopeene nabo alɨnkʉtɨ, “Amugɨsoosyepo gyabaakyala gyɨnu ɨmiheesya ɨgɨ gɨlɨ pakatɨ pamyɨnu, amwijeelʉsye, mwandʉle ɨmyenda gyɨnu. 3 Tʉbʉʉke, tʉfyʉke kʉ Beteli ʉkʉtɨ ʉne ngannjengele Kyala ɨkɨgemo ʉko ʉjʉ andʉʉlaga pakabalɨlo akaa kʉtaamigwa kwangʉ. Ʉmwene aalɨ pamopeene na niine popoosa apa naabʉʉkaga.”4 Po balɨnkʉmpa Jaakobo ɨfifwani fya gyabaakyala ɨmiheesya nʉ tʉkʉba ʉtʉ baalɨ nato mu mbʉlʉkʉtʉ syabo, aalɨnkʉfisyɨla paasi pa mpiki ʉmpandapanda ʉgʉ gwalɨ kɨfuki na mu Syekemu. 5 Po balɨnkʉsookapo, ʉlʉtende lwa Kyala lʉlɨnkʉbakola abandʉ abaa ntwaja toosa ʉtʉ twabasyʉngʉʉtiile, akaalipo najʉmo ʉgwa kʉbakongeesya.
6 Jaakobo na bandʉ baake balɨnkʉfika mu Lusu nkiisʉ ɨkya mu Kaanani. Ɨngamu ɨjɨngɨ ɨjaa Lusu jo Beteli. 7 Alɨnkʉjenga ɨkɨgemo, alɨnkʉbʉpa ʉbʉjo ʉbo ɨngamu ɨjaa Eli-Beteli,a paapo po apa Kyala aaliinangiisye kʉmyake bo ikʉmmbopa ʉnkʉlʉ.
8 Ndebola ʉjʉ answɨlaga Lebeka alɨnkʉfwa,b alɨnkʉsyɨligwa paasi pa mpandapanda kʉkɨbafu ɨkya kwitongo ɨkya mu Beteli. Po ʉbʉjo ʉbo bʉlɨnkʉkooleligwa ɨngamu jaa Aloni-Bakuti.c
9 Bo Jaakobo agomwike ʉkʉfuma kʉ Pandani-Alamu, Kyala alɨnkʉmmbonekela kangɨ, alɨnkʉnsaja. 10 Kyala alɨnkʉmmbʉʉla Jaakobo alɨnkʉtɨ, “Ɨngamu jaako gwe Jaakobo. Ʉtikʉkooleligwaga kangɨ Jaakobo, looli ɨngamu jaako kʉjaga gwe Isilaɨli.” Po alɨnkʉkoolela ɨngamu jaa Isilaɨli. 11 Kyala alɨnkʉmmbʉʉla alɨnkʉtɨ, “Ʉne ne Kyala ʉMwene maka goosa. Ʉkabe abaa ndʉjungu lwako abingi fiijo, mubaale fiijo. Paapo ʉkʉfuma ndʉjungu lwako aafikʉfuma ɨfikolo fingi, kangɨ aabikʉfumamo abanyafyale. 12 Ɨkiisʉ ɨkɨ naabapeele Abulahamu na Isaka, ngʉkʉpapo ʉgwe, na baa ndʉjungu lwako.” 13 Po Kyala alɨnkʉfyʉka kʉmwanya ʉkʉfuma pabʉjo bʉla ʉbʉ aajobaga na Jaakobo.
14 Jaakobo alɨnkwɨmɨka ɨmbanda jaa ibwe pabʉjo bʉla ʉbʉ Kyala aajobaga nagwe, alɨnkoonelapo pamwanya iikemo ɨlya fya kʉnwa, alɨnkoonelapo amafuta pamwanya.
15 Po Jaakobo alɨnkʉbʉkoolela ʉbʉjo ʉbʉ aajobaga na Kyala, ɨngamu ɨjaa Beteli.d
Ʉkʉpaapigwa kwa Benjamini nʉ kʉfwa kwa Laheli
16 Po ʉkʉfuma kʉ Beteli balɨnkwenda ɨnjɨla. Bo pasyele panandɨ ʉkʉfika kʉ Efulati, Laheli alɨnkʉbabigwa fiijo bo ikʉpaapa. 17 Bo akaalɨ ikʉbabigwa fiijo, ʉjʉ antʉʉlaga ʉkʉpaapa alɨnkʉtɨ, “Ʉlɨngatiilaga, ʉkabile ʉmwana ʉjʉngɨ ʉndʉmyana.” 18 Laheli bo alɨ kɨfuki ʉkʉfwa, alɨnkʉmpa ʉmwana ʉjo ɨngamu jaa Benoni.e Looli ʉgwise alɨnkʉmpa ʉmwana ʉjo ɨngamu jaa Benjamini.f 19 Alɨnkʉfwa Laheli, alɨnkʉsyɨligwa kʉmbalɨ mu njɨla ɨjɨ jikʉbʉʉka kʉ Efulati, mo mu Betelehemu. 20 Jaakobo alɨnkwɨmɨka ɨmbanda pamwanya pi ipʉmba, ɨjɨ jɨlipo mpaka lɨɨlɨno. 21 Po Isilaɨlig alɨnkwendelela nɨ njɨla jaake nʉ kʉjenga ɨheema jaake bo akɨkɨndile ɨkɨsonge kya mu Endeli. 22 Isilaɨli bo ikʉtʉʉgala nkiisʉ kɨla, Lʉbeni alɨnkwenda na Biliha ʉnkasi ʉnnandɨ gwa gwise, Isilaɨli alɨnkʉsipɨlɨka ɨsyo.
Jaakobo aalɨ na baana abanyambala kalongo na babɨlɨ.
23 Abaana abanyambala abaa Leeja jo Lʉbeni, ʉmwana gwa kɨpanda gwa Jaakobo, Simyoni, Leebi, Juuta, Isakali na Sabuloni.
24 Abaana abanyambala abaa Laheli, jo Joosefu na Benjamini.
25 Abaana abanyambala abaa Biliha, ʉmbombi gwa Laheli, jo Ndani na Nafutali.
26 Abaana abanyambala abaa Silipa, ʉmbombi gwa Leeja, jo Gandi na Aaseli. Abo bo baana abanyambala aba aabapaapile bo alɨ kʉla kʉ Pandani-Alamu.
Ʉkʉfwa kwa Isaka
27 Jaakobo alɨnkwisa kʉ gwise Isaka, ʉko kʉ Mamule, nkaaja akaa mu Kilyati-Alaba, mo mu Hebuloni, apa Abulahamu na Isaka baatʉʉgeele mbʉheesya. 28 Isaka aagonile ɨfyɨnja 180. 29 Aalɨ nkangale gwa fyɨnja fingi, aafwile bo ʉlwa biisʉkʉlʉ aba baatalilepo. Abaanaake Esabu na Jaakobo balɨnkʉnsyɨla ʉgwisabo.