Simyoni na Leebi bikʉbukɨsya ʉbʉbiibi
34
Po iisikʉ lɨmo Ndina ʉmwana ʉndɨndwana ʉgwa Jaakobo ʉjʉ aapaapiigwe na Leeja, alɨnkʉbʉʉka kʉkʉbajaatɨla abalɨndwana baa nkiisʉ ɨkyo. 2 Syekemu ʉmwana gwa Amoli ʉNhifi, ʉnkʉlʉmba gwa kiisʉ ɨkyo bo ammbwene, alɨnkʉnkola kʉ maka nʉ kwenda nagwe, alɨnkʉmmoonanga. 3 Po alɨnkʉnnyonywa fiijo Ndina ʉmwana gwa Jaakobo, alɨnkwanda ʉkʉnhaha nʉ kʉntengʉlɨla. 4 Syekemu alɨnkʉmmbʉʉla ʉgwise Amoli alɨnkʉtɨ, “Taata, ngʉsʉʉma muunyeegele ʉndɨndwana ʉjʉ ajege nkasi gwangʉ.”5 Po Jaakobo alɨnkʉpɨlɨka ʉkʉtɨ, Syekemu ankolile ʉmwanaake Ndina kʉ maka nʉ kʉmmoonanga. Paapo abaanaake baalɨ nʉ ntiimo ndʉkʉbo, po Jaakobo alɨnkʉsita kʉjoba nalɨmo mpaka bo biisile. 6 Amoli ʉgwise gwa Syekemu, alɨnkʉbʉʉka kwa Jaakobo kʉkʉjoba nagwe. 7 Abaana baa Jaakobo balɨnkwisa ʉkʉfuma ndʉkʉbo. Bo basipɨliike ɨsyo, balɨnkʉsulumania fiijo nʉ kʉkalala fiijo, paapo aabombile ɨnyali ɨsi sikabagɨsya ʉkʉbombigwa mu Isilaɨli, ʉkʉnkola kʉ maka ʉmwana ʉndɨndwana ʉgwa Jaakobo nʉ kʉmmoonanga.
8 Looli Amoli alɨnkʉbabʉʉla alɨnkʉtɨ, “Ʉmwanangʉ annganile fiijo ʉmwanaako, mbelile mummwitɨkɨsye ammwege. 9 Tweganege na nuumwe, tukwegaga abaanɨɨnu abalɨndwana, na nuumwe mukwegaga abaanɨɨtʉ abalɨndwana. 10 Mutʉʉgalege na nuuswe pabʉjo boosa ʉbʉ mwiganile, ɨkiisʉ ɨkɨ kikʉjaga kyɨnu. Mʉʉlɨsyege ʉtʉndʉ, muje bakabi.”
11 Syekemu alɨnkʉmmbʉʉla ʉgwise gwa Ndina na balʉmbʉ baake alɨnkʉtɨ, “Ngʉbasʉʉma muunyiitɨkɨsye, fyosa ɨfi mukʉlonda ngʉbapapo. 12 Muumbʉʉle ɨfi fikʉlondigwa ʉkʉkwa nɨ fyabʉpe, angʉsoosya ʉkʉkongana na muno muumbʉʉliile, leelo mumbepo ʉndɨndwana ʉjʉ aje nkasi gwangʉ.”
13 Po abaana abaa Jaakobo balɨnkʉmmwamula Syekemu nʉ gwise Amoli kʉ bʉsyobi, namanga aalɨmmoonangile iilʉmbʉ gwabo Ndina. 14 Balɨnkʉbabʉʉla balɨnkʉtɨ, “Tʉkabagɨla ʉkʉmmwitɨkɨsya iilʉmbʉ gwɨtʉ ʉkwegana nʉ mundʉ ʉjʉ akabuutigwa kʉkyeni. Ʉkʉbomba bo ʉlo kʉmyɨtʉ sya soni! 15 Tʉbagiile ʉkwitɨkana na nuumwe lɨnga mubombile ɨsi. Abanyambala boosa pakatɨ pamyɨnu babuutigwege kʉkyeni bo ʉswe. 16 Apo po aatukweganilaga abaanɨɨtʉ na baanɨɨnu, aatukʉtʉʉgalaga pamopeene na nuumwe, aatukʉja bandʉ aba balɨ pamopeene. 17 Looli lɨnga mutikwitɨkana na nuuswe nʉ kʉbuutigwa kʉkyeni, po ʉswe tʉsumwike ni ilʉmbʉ gwɨtʉ.”
18 Amasyʉ ago galɨnkʉbahobosya Amoli nʉ mwanaake Syekemu. 19 Ʉndʉmyana jʉla akaakaabiile ʉkʉsibomba ɨsyo, paapo annyonywaga fiijo ʉmwana gwa Jaakobo. Syekemu jo ʉjʉ aalyɨmɨkiigwe ʉkʉkɨnda boosa pakaaja pamyabo.
20 Po Amoli na Syekemu ʉmwanaake, balɨnkʉbʉʉka pa kɨpata kya kaaja apa bikʉbombela ɨngomaano. Ʉko balɨnkʉjoba na bandʉ baabo balɨnkʉtɨ, 21 “Abandʉ aba bamanyaani bɨɨtʉ. Tʉbambɨlɨle batʉʉgasyege nkiisʉ kyɨtʉ, bʉʉlɨsyege ʉtʉndʉ, paapo tʉlɨ nɨ kiisʉ ɨkya kʉtʉfwana ʉswe na beene. Po aatukwegaga abaanaabo boope aabikwegaga abaanɨɨtʉ. 22 Looli abeene aabikwitɨka ʉkʉtʉʉgala pamopeene na nuuswe kwene lɨnga tʉbombile ɨsi, kʉkʉtɨ nnyambala pakatɨ pamyɨtʉ abuutigwe kʉkyeni bo abeene. 23 Bʉle, ɨmitiimo gyabo, nɨ kyʉma kyabo kyosa, fitikʉjaga fyɨtʉ? Oko, twitɨkane nabo ʉkʉtɨ batʉʉgalege pamopeene na nuuswe.”
24 Abanyambala boosa aba baabʉngeene pa kɨpata kya kaaja ako balɨnkwitɨkana na Amoli nʉ mwanaake Syekemu. Po abanyambala boosa balɨnkʉbuutigwa kʉkyeni.
25 Amasikʉ matatʉ bo gakɨndile, aba baabuutiigwe kʉkyeni bo ɨfilonda fikaalɨ fikʉbaba, Simyoni na Leebi abaana babɨlɨ mbaana abaa Jaakobo, aba baalɨ balʉmbʉ baa Ndina, balɨnkwega ɨnyʉʉbo syabo, nakalɨnga balɨnkʉbʉʉka nkaaja kala kʉ bʉkifu nʉ kʉbagoga abanyambala boosa. 26 Balɨnkʉbagoga nʉ lʉʉbo Amoli nʉ mwanaake Syekemu, balɨnkʉnsoosya Ndina nnyumba jaa Syekemu, balɨnkʉsookapo nagwe.
27 Bo babagogile abo, abaana abangɨ abaa Jaakobo balɨnkʉbʉʉka mu nyumba sya aba baabagogile, balɨnkʉpʉpa ɨkyʉma kyabo kyosa paapo baalɨmmoonangile iilʉmbʉ gwabo. 28 Balɨnkʉpʉpa ɨngʼoosi, ɨmbene, ɨngʼombe nɨ mbunda, na fyosa ɨfi fyalɨ nkaaja na mmigʉnda. 29 Balɨnkwega ɨkyʉma kyabo kyosa, abaana na bakiikʉlʉ boosa, na fyosa ɨfi fyalɨ nnyumba syabo.
30 Po Jaakobo alɨnkʉbabʉʉla Simyoni na Leebi alɨnkʉtɨ, “Ʉmwe mundwaliile ʉbʉtolwe. Abenekaaja baa nkiisʉ ɨkɨ, aBakaanani na Bapelisi bikʉngalalɨlaga. Ʉne ngaja na bandʉ bingi, lɨnga babʉngeene ʉkʉlwa na niine bikʉmbyuta ʉne na bandʉ boosa abaa nnyumba jangʉ.”
31 Looli abeene balɨnkʉtɨ, “Bʉle, kwalɨ kʉnunu ʉkʉmmbombela iilʉmbʉ gwɨtʉ ngatɨ gwamalaja?”