Jaakobo ikwaganila na Esabu
33
Jaakobo bo asookilepo pala, alɨnkʉkeeta nkyeni, alɨnkʉmmbona Esabu ikwisa na bandʉ 400. Palapala alɨnkʉbatapʉlania abaanaake, alɨnkʉmpa Leeja abaanaake na Laheli abaanaake, na babombi Silipa na Biliha alɨnkʉbapa abaanaabo. 2 Ababombi abo babɨlɨ, pamopeene na baanaabo baatalilepo nkyeni, po alɨnkʉkonga Leeja na baanaake, kʉ nyuma alɨnkʉkonga Laheli nʉ mwanaake Joosefu. 3 Po ʉmwene Jaakobo alɨnkʉtalapo nkyeni mmyabo boosa, alɨnkʉfika kɨfuki nʉ nkʉlʉ gwake, alɨnkwinama mpaka paasi kahaano na kabɨlɨ. 4 Looli Esabu alɨnkʉbopa ʉkʉbʉʉka kwa Jaakobo, alɨnkʉmmʉʉbatɨla, alɨnkʉmfipa mmakosi, balɨnkwanda ʉkʉlɨla.5 Esabu alɨnkʉkelengania, alɨnkʉbabona abakiikʉlʉ bala na baana, alɨnkʉlaalʉʉsya alɨnkʉtɨ, “Bo baani aba balɨ pamopeene na nungwe?” Jaakobo alɨnkʉmmwamula alɨnkʉtɨ, “Abaana aba Kyala ampeele ʉmbombeli gwako kwi ipyana lyake.”
6 Po ababombi abakiikʉlʉ bala na baanaabo, balɨnkʉsegelela, balɨnkwinama mpaka paasi. 7 Leeja joope na baanaake balɨnkʉsegelela, balɨnkwinama mpaka paasi. Kʉbʉmalɨɨkɨsyo Laheli nʉ mwanaake Joosefu balɨnkʉsegelela, balɨnkwinama.
8 Esabu alɨnkʉlaalʉʉsya alɨnkʉtɨ, “Ɨfilʉndɨlo fyosa ɨfi naaganiile nafyo mu njɨla, fikʉnangɨsya ɨfiki?” Jaakobo alɨnkwamula alɨnkʉtɨ, “Kokʉtɨ ʉʉhobokele nʉ kʉʉnyambɨlɨla, ntwa gwangʉ.”
9 Esabu alɨnkʉtɨ, “Gwe nnuguna gwangʉ, ndɨ nɨ kyʉma kingi. Ɨkyʉma kyako kɨjege kyako jʉjʉʉgwe.” 10 Jaakobo alɨnkʉtɨ, “Hɨmma! Lɨnga nalooli gwitiike ʉkʉʉnyambɨlɨla, mbelile gwambɨlɨle ɨfi ngʉtwaliile. Ngʉbwene kʉmaaso, gʉʉnyambɨliile kanunu, ngʉfwana nkʉbwene kʉmaaso kwa Kyala. 11 Ngʉkʉsʉʉma gwambɨlɨle ɨfyabʉpe ɨfi ngʉtwaliile, paapo na niine Kyala ambeele ɨliipyana, ndɨ nɨ kyʉma ɨkingi.” Jaakobo alɨnkʉsisimɨkɨsya, po Esabu alɨnkwambɨlɨla.
12 Po Esabu alɨnkʉtɨ, “Oko, twendelelege nɨ njɨla jɨɨtʉ, ʉne ngʉkʉlongolela nkyeni.” 13 Looli Jaakobo alɨnkʉtɨ, “Ntwa gwangʉ, ʉgwe ʉmeenye ʉkʉtɨ abaana aba bafyele, nɨ mitiimo gyangʉ gikongesya. Lɨnga ɨmitiimo ngʉgɨbopesya, ʉtwana toosa ʉtwa mitiimo tukʉfwa. 14 Po ngʉkʉsʉʉma ʉtalepo, ʉne ngʉkʉkongaga panandɨ panandɨ ʉkʉkongana na muno ɨmitiimo gyangʉ na baanangʉ bikwendela, mpaka ʉkwakʉfika kʉ Seili.”
15 Esabu alɨnkʉtɨ, “Po ngʉlekele abandʉ bangʉ bamo.” Looli Jaakobo alɨnkʉjoba alɨnkʉtɨ, “Sya fiki ʉkʉbomba bo ʉlo? Kʉfwene kwene ʉkʉʉnyambɨlɨla ʉgwe.”
16 Po iisikʉ lɨlalɨla Esabu alɨnkwanda ʉkwenda ɨnjɨla ʉkʉbʉʉka kʉ Seili. 17 Looli Jaakobo alɨnkwenda ɨnjɨla jaa kʉbʉʉka kʉ Sukoti, ʉko alɨnkwijengela ɨnyumba jaake, nɨ fibaga fya mitiimo gyake. Fyobeene ʉbʉjo ʉbo bikʉtɨ Sukoti.a
Jaakobo ikʉtʉʉgala kɨfuki na mu Syekemu
18 Jaakobo bo asookileko kʉ Pandani-Alamu, alɨnkʉfika kanunu nkaaja akaa mu Syekemu nkiisʉ ɨkya mu Kaanani. Po alɨnkʉjenga kɨfuki na kaaja ako. 19 Alɨnkʉʉla ʉngʉnda kʉ baana baa Amoli, ʉgwise gwa Syekemu, kʉ ntengo gwa ndalama ɨfeesa 100. Po apa aajengile ɨheema jaake. 20 Ʉko alɨnkʉjenga ɨkɨgemo, nʉ kʉkɨkoolela ʉkʉtɨ, “Kyala jo Kyala gwa Isilaɨli.”b