Ʉbwandɨlo 32

Jaakobo ikwitendekesya ʉkwaganila na Esabu

Jaakobo joope alɨnkwendelela nɨ njɨla jaake. Mu njɨla, alɨnkwaganila na bandʉmi baa Kyala. 2 Bo ababwene, alɨnkʉtɨ, “Ʉbʉ bʉjo bwa basikali baa Kyala.” Alɨnkʉbʉpa ʉbʉjo bʉla ɨngamu jaa Mahanaimu.

3 Jaakobo alɨnkʉbatʉma abandʉ baake ʉkʉtalapo kʉ Seili nkiisʉ ɨkya mu Etomu, kʉ nkʉlʉ Esabu. 4 Jaakobo alɨnkʉbabʉʉla abandʉ bala alɨnkʉtɨ, “Mukammbʉʉle ʉntwa gwangʉ Esabu ʉkʉtɨ, ‘Ʉne Jaakobo ne mbombeli gwako, ndʉʉgeele mbʉheesya kwa Labani mpaka ʉlʉ. 5 Ndɨ nɨ ngʼombe, ɨmbunda, ɨngʼoosi, ɨmbene, ababombi abanyambala na bakiikʉlʉ. Po ngʉkʉtʉmɨla ɨndʉmi ɨjɨ gwe ntwa gwangʉ, ʉkʉtɨ ʉhobokele nʉ kʉʉnyambɨlɨla.’ ”

6 Bo bagomwike, balɨnkʉmmbʉʉla Jaakobo balɨnkʉtɨ, “Tʉfikile kʉ nkʉlʉgo Esabu, joope alɨ mu njɨla ikwisa kʉkʉkwambɨlɨla, alɨ na banyambala 400.”

7 Po Jaakobo alɨnkʉtiila fiijo nʉ kʉnyololoka mu ndumbula, alɨnkʉbajabania abandʉ aba aalɨ nabo mfibugutɨla fibɨlɨ, gyope ɨmitiimo gyosa ɨgɨ aalɨ nagyo, ɨgya ngʼombe, ɨngamila, ɨngʼoosi nɨ mbene, alɨnkʉgɨjabania. 8 Alɨnkwinogona alɨnkʉtɨ, “Esabu lɨnga ikwisa kʉkʉlwa nɨ kɨlʉndɨlo ɨkya kwanda, ɨkɨlʉndɨlo kɨmo kɨbagiile ʉkʉpona.”

9 Po Jaakobo alɨnkwipuuta alɨnkʉtɨ, “Gwe Kyala gwa mwisʉkʉlʉ gwangʉ Abulahamu, ʉgwe gwe Kyala gwa taata Isaka, gwe NTWA gwalɨɨmbʉʉlile ʉkʉtɨ ngomokeleko kʉkiisʉ ɨkya baamyɨtʉ, ʉkʉtɨ ʉʉmbombelege kanunu. 10 Ʉne ngabagɨsya ʉkʉbombeligwa kʉ kɨsa nʉ bwanalooli, ʉbʉ ʉʉmbombiile ne mbombeli gwako. Bo ngʉloboka ʉlwɨsi Jolitani, ngaalɨ nako nakamo looli jeene ɨngili, akabalɨlo aka ndɨ nɨ filʉndɨlo fibɨlɨ ɨfi. 11 Ngʉsʉʉma ʉkʉtɨ ʉmboke kʉ nkʉlʉ gwangʉ Esabu, paapo ngʉtiila ʉkʉtɨ abagiile ʉkwisa kʉkʉngoma, nʉ kʉʉngoga pamopeene na bakiikʉlʉ na baanangʉ. 12 Leelo gwafingile ʉkʉʉmbombela kanunu nʉ kʉbabaasya abaa ndʉjungu lwangʉ ʉkʉja bingi bo ʉlwa nsanga ʉgwa mu nyanja, ʉgʉ najʉmo ʉjʉ abagiile ʉkʉgʉbala.”

13 Ɨkɨlo kɨla, Jaakobo alɨnkʉgona palapala. Ʉkʉfuma ndɨ ɨfi aalɨ nafyo alɨnkʉsala ɨfya kʉmpa ʉnkʉlʉ gwake Esabu. 14 Alɨnkʉsalapo ɨmbene ɨmbɨɨki 200 nɨ mbongo amalongo mabɨlɨ, ɨngʼoosi ɨmbɨɨki 200 nɨ mbongo amalongo mabɨlɨ, 15 ɨngamila ɨmbɨɨki amalongo matatʉ nɨ baana syabo, ɨngʼombe ɨmbɨɨki amalongo mana nɨ ngambakʉ kalongo, ɨmbunda ɨmbɨɨki amalongo mabɨlɨ nɨ mbunda ɨmbongo kalongo. 16 Ɨfinyamaana ɨfyo fyosa alɨnkʉfibɨɨka mmaboko gaa babombi baake, kʉkʉtɨ mbombi aalɨ nʉ ntiimo gwake. Alɨnkʉbabʉʉla alɨnkʉtɨ, “Mutalepo nkyeni mmyangʉ, mulekege ʉntambo pakatɨ pa mitiimo gyɨnu.” 17 Alɨnkʉnndagɨla ʉmbombi ʉjʉ aatalilepo nkyeni alɨnkʉtɨ, “Bo kwaganila nʉ nkʉlʉ gwangʉ Esabu, lɨnga ikʉkʉlaalʉʉsya ikʉtɨ, ‘Ʉgwe ʉlɨ mbombi gwani? Kʉbʉʉka kʉʉgʉ? Ɨmitiimo ɨgyo gyani?’ 18 po ʉgwe ʉkammwamulege ʉkatɨgɨ, ‘Ɨmitiimo ɨgɨ gya mbombeli gwako Jaakobo, fyabʉpe fyake kwa Esabu ʉntwa gwake. Joope aliko kʉ nyuma ikʉtʉkonga.’ ” 19 Alɨnkʉnndagɨla kangɨ ʉmbombi ʉgwa bʉbɨlɨ, nʉ gwa bʉtatʉ, na bangɨ boosa aba baalongoseenie nɨ mitiimo, alɨnkʉbabʉʉla alɨnkʉtɨ, “Bo mukwaganila na Esabu mukajobege sisiisi. 20 Kangɨ mukatɨgɨ, ‘Ʉmbombeli gwako Jaakobo, aliko kʉ nyuma ikʉtʉkonga.’ ” Jaakobo aajobile bo ʉlo paapo iinogonaga ʉkʉtɨ, “Ndʉmile ɨfyabʉpe nkyeni, aafikʉnhobosya. Po angwaganilaga nagwe, pamo aikʉʉhobokela.” 21 Fyatalilepo ɨfyabʉpe fyake, looli ʉmwene ɨkɨlo kɨla aagonile palapala.

Jaakobo ikʉtolana na Kyala

22 Ɨkɨlo kɨla Jaakobo alɨnkʉsumuka, alɨnkʉbeega abakasi bobabɨɨlɨ, na babombi baake abakiikʉlʉ Silipa na Biliha, na baanaake kalongo na jʉmo, alɨnkʉbalobosya pa lwɨsi Jaboki. 23 Abandʉ boosa abo alɨnkʉbalagɨla ʉkʉloboka pamopeene nɨ kyʉma kyosa ɨkɨ aalɨ nakyo.

24 Jaakobo aasyele mwene. Po ʉmundʉ jʉmo alɨnkwisa, alɨnkʉbigana nagwe ɨkɨlo kyosa mpaka kʉbʉkye. 25 Ʉmundʉ jʉla bo aagile akabagɨla ʉkʉntola Jaakobo, alɨnkʉnkola Jaakobo mu nsana apa kiikʉngile ɨkɨlʉndɨ. Jaakobo kɨlɨnkʉfigʉka ɨkɨlʉndɨ kyake. 26 Po ʉmundʉ jʉla alɨnkʉtɨ, “Ʉʉndeke mbʉʉkege, paapo bʉkiile.” Looli Jaakobo alɨnkʉmmwamula alɨnkʉtɨ, “Ndikʉkʉleka mpaka ʉʉsaje taasi!”

27 Ʉmundʉ jʉla alɨnkʉnndaalʉʉsya Jaakobo alɨnkʉtɨ, “Ɨngamu jaako gwe gwani?” Jaakobo alɨnkʉmmwamula alɨnkʉtɨ, “Ɨngamu jangʉ ne Jaakobo.” 28 Ʉmundʉ jʉla alɨnkʉtɨ, “Ʉtikʉkooleligwaga kangɨ ɨngamu jaa Jaakobo, looli kʉjaga gwe Isilaɨli, paapo ʉlwile na Kyala, kangɨ ʉlwile na bandʉ, ʉbatolile.”

29 Po Jaakobo alɨnkʉtɨ, “Ngʉkʉsʉʉma ʉʉmbʉʉle ɨngamu jaako.” Looli ʉmundʉ jʉla alɨnkʉmmwamula alɨnkʉtɨ, “Fiki kʉʉndaalʉʉsya ɨngamu jangʉ?” Po alɨnkʉnsaja. 30 Po Jaakobo alɨnkʉtɨ, “Ngeeteene na Kyala pamaaso, looli ngafwa!” Kʉnongwa ɨjo ʉbʉjo bʉla alɨnkʉbʉpa ɨngamu jaa Penieli.

31 Iisʉba lɨlɨnkʉsooka, bo Jaakobo ikʉsookapo pa Penieli, kʉno ikʉmyonyoka ʉkwenda kʉnongwa jaa kʉfigʉka ɨkɨlʉndɨ. 32 Fyobeene mpaka lɨɨlɨno, aBanyaisilaɨli batikʉlya ɨnyama jaa nkɨkolo nkyɨma, paapo ʉmundʉ jʉla aalɨnkolilepo Jaakobo mu nsana apa kiikʉngile ɨkɨlʉndɨ.