Jaakobo ikʉnjonga Labani
31
Jaakobo alɨnkʉpɨlɨka ʉkʉtɨ abaana baa Labani bikwibuneesya bikʉtɨ, “Keeta Jaakobo eegile ɨkyʉma kyosa ɨkya taata, mo muno akabiile ʉbʉkabi.” 2 Jaakobo alɨnkwaga Labani atikwangala nagwe bʉnunu bo ʉlʉtasi.3 Po ɄNTWA alɨnkʉmmbʉʉla Jaakobo alɨnkʉtɨ, “Ʉgomokeleko kʉkiisʉ ɨkya biisʉkʉlʉgo, ɨkya bakamugo. Ʉne angʉja pamopeene na nungwe.”
4 Po Jaakobo alɨnkʉbabɨlɨkɨla abakasi, Laheli na Leeja, ʉkʉtɨ baaganile kʉ lʉkʉbo, bo ikʉtiima ɨmitiimo gyake. 5 Bo bafikile, alɨnkʉbabʉʉla alɨnkʉtɨ, “Ngeetile ʉkʉtɨ ʉgwiseemwe atikʉngeeta bʉnunu bo muno angeetelaga kʉbwandɨlo. Looli Kyala gwa taata alɨ pamopeene na niine. 6 Ʉmwe mumeenye ʉkʉtɨ kʉ maka gangʉ goosa nʉmmbombiile ʉgwiseemwe. 7 Looli ʉgwiseemwe aasyobile, andwile ʉmfwalo gwangʉ kalongo, leelo Kyala akaalɨmmwitɨkiisye ʉkʉʉmbombela kabiibi.
8 “Ʉgwiseemwe bo atile, ‘Ɨmitiimo ɨmikekanie gyo gikʉjaga mfwalo gwako,’ po ɨmitiimo gyosa gɨlɨnkʉbɨɨka ʉtwana ʉtʉkekanie, kangɨ bo atile, ‘Ɨmitiimo gyosa ɨmisʉlʉla gyo gikʉjaga mfwalo gwako,’ po ɨmitiimo gyosa gɨlɨnkʉbɨɨka ʉtwana ʉtʉsʉlʉla. 9 Mo muno Kyala eegile ɨmitiimo gya gwiseemwe, ambeele ʉne. 10 Po nkabalɨlo kamo aka ɨmitiimo gikwipɨngʉla, ndɨnkʉgogwa ɨnjosi. Mu njosi ɨjo ndɨnkʉsibona ɨmbongo ɨsi sikwendesya syalɨ sʉlʉla, ɨndononde kangɨ nɨ ngekanie. 11 Po ʉgwandʉmi gwa Kyala alɨnkʉtɨ, ‘Jaakobo!’ Ndɨnkwamula ndɨnkʉtɨ, ‘Ndipo apa!’ 12 Alɨnkʉtɨ, ‘Ʉsikeete ɨmbongo syosa ɨsi sikwendesya, sʉlʉla, ndononde nɨ ngekanie, paapo nsibwene syosa ɨsi akʉbombiile Labani. 13 Jo ʉne Kyala ne naakʉsetʉkiile ʉgwe kʉla kʉ Beteli, pabʉjo ʉbʉ gwalyɨmiike iibwe nʉ kʉlyonela amafuta nʉ kʉfinga ʉlʉfingo kʉmyangʉ. Po ʉlʉ, ʉsookemo nkiisʉ ɨkɨ, ʉgomokeleko kʉkiisʉ ɨkya bakamugo.’ ”a
14 Po Laheli na Leeja balɨnkʉmmwamula balɨnkʉtɨ, “Fikajapo kangɨ ɨfya kwingɨlapo ʉswe ɨkɨlɨngo mu nyumba jaa taata. 15 Ʉmwene atʉbɨɨkile ʉswe ʉkʉja baheesya, paapo atʉʉliisye nʉ kʉlya ɨkyʉma kyosa ɨkɨ aalyambɨliile. 16 Nalooli ɨkyʉma kyosa ɨkɨ Kyala eegile kwa taata, nalooli kyɨtʉ ʉswe na baanɨɨtʉ. Po ʉbombe syosa ɨsi Kyala akʉlagiile.”
17 Po Jaakobo alɨnkwitendekesya ʉkʉsumuka, alɨnkʉbakwesya pa ngamila abakasi na baanaake. 18 Alɨnkʉgɨlongosya nkyeni ɨmitiimo gyake gyosa, pamopeene nɨ kyʉma kyosa ɨkɨ aakabile nkiisʉ ɨkya mu Pandani-Alamu. Alɨnkwanda ɨnjɨla jaa kʉgomokelako kʉ gwise Isaka, nkiisʉ ɨkya mu Kaanani. 19 Laheli aaliibile ɨfifwani fya gyabaakyalab gya gwise, paapo Labani aabʉʉkile kʉkʉseenya ʉlʉsyoja lwa ngʼoosi syake. 20 Jaakobo aalɨnsyobile Labani ʉgwa kɨkolo kya Alamu, aasookilepo kɨsita kʉmmbʉʉla.
21 Jaakobo alɨnkʉjonga nɨ kyʉma kyosa ɨkɨ aakabile. Alɨnkʉloboka ʉlwɨsi Fulati, alɨnkʉlabɨla kʉ fyamba ɨfya mu Giliati.
Labani ikʉnkonga Jaakobo
22 Amasikʉ matatʉ bo gakɨndile, Labani alɨnkʉbʉʉligwa ʉkʉtɨ Jaakobo ajongile. 23 Po Labani alɨnkʉbeega abakamu, balɨnkʉnkonga Jaakobo kʉ masikʉ mahaano na mabɨlɨ, balɨnkwakʉmmwaga nkiisʉ kya mfyamba ɨfya mu Giliati. 24 Looli pakɨlo, Kyala alɨnkʉmmwisɨla Labani ʉgwa nkɨkolo ɨkya Alamu mu njosi, alɨnkʉmmbʉʉla alɨnkʉtɨ, “Ʉje maaso, somma ʉkʉmmbʉʉla Jaakobo ɨnongwa kʉ bʉkalale!”
25 Labani alɨnkwakʉmmwaga Jaakobo apa aajengile ɨheema mfyamba ɨfya mu Giliati, po joope na bakamu balɨnkʉjenga ɨheema palapala. 26 Labani alɨnkʉnndaalʉʉsya Jaakobo alɨnkʉtɨ, “Syo sya fiki ɨsi ʉʉmbombiile? Keeta ʉʉsyobile? Ʉbeegile abaanangʉ abalɨndwana ʉkʉfwana ngatɨ ʉbapʉpile mbwite! 27 Fiki gʉʉnjongile kɨsita kʉʉndaga? Lɨnga gwalɨɨmbʉʉlile, ngalɨ ngʉlagile nʉ lʉsekelo, nɨ nyɨmbo nɨ ndingala na mapango! 28 Fiki ʉkaalɨmbeele akabalɨlo akaa kʉbalaga abaanangʉ abalɨndwana na biisʉkʉlʉ bangʉ? Ʉbombile ɨsya bʉkonyofu! 29 Naabagiile ʉkʉkʉfulasya, looli pakɨlo, Kyala gwa biisʉkʉlʉgo aambʉʉlile mu njosi atile, ‘Ʉje maaso, somma ʉkʉmmbʉʉla Jaakobo ɨnongwa kʉ bʉkalale!’ 30 Mmeenye ʉkʉtɨ gwisyʉkilwe fiijo ʉkʉgomokelako kʉ gʉʉso. Looli fiki gwibile ɨfifwani fya gyabaakyala gyangʉ?”
31 Jaakobo alɨnkʉmmwamula Labani alɨnkʉtɨ, “Njongile paapo naatiilaga, ʉlɨngiisa kʉbapoka abaanaako kʉmyangʉ. 32 Looli lɨnga kʉmmwaga ʉmundʉ ʉjʉ alɨ nɨ fifwani ɨfya gyabaakyala gyako, agogigwege papaapa! Nkyeni mbakamu bɨɨtʉ, londa ntʉndʉ twangʉ ʉtʉ ndɨ nato. Lɨnga kʉfyaga, ega.” Akabalɨlo ako, Jaakobo akaameenye ʉkʉtɨ Laheli iibile ɨfifwani fya gyabaakyala ɨgya gwise. 33 Po Labani alɨnkʉlonda ɨfifwani fyake ɨfya gyabaakyala mu heema ɨjaa Jaakobo, ɨjaa Leeja, nɨ jaa babombi baake babɨlɨ, leelo akaafyagile. Kʉmmalɨɨkɨsyo alɨnkwingɨla mu heema jaa Laheli. 34 Laheli jo ʉjʉ aapɨmbile gyabaakyala gɨla, aafisile apa aatengile ʉkʉtʉʉgalapo pa ngamila. Aatʉʉgeelepo palapala. Labani alɨnkʉlonda mu heema, akaafyagile. 35 Po Laheli alɨnkʉmmbʉʉla ʉgwise alɨnkʉtɨ, “Ʉʉhobokelege taata, ʉlɨngakalalaga, ngabagɨla ʉkwɨma nkyeni mmyako, paapo ndɨ mbʉbiibi bwa twe bakiikʉlʉ.” Labani alɨnkʉlonda gyabaakyala gyake gɨla, poope alɨnkʉsita kʉgyaga.
36 Po Jaakobo alɨnkʉkalala, alɨnkʉʉmana na Labani, alɨnkʉnndaalʉʉsya alɨnkʉtɨ, “Naasobile silɨkʉ apa kʉngongeesya bo ʉlʉ? 37 Ʉpetʉseenie fiijo ʉtʉndʉ twangʉ toosa. Po ʉkaagile kalɨkʉ aka ko kaako ʉgwe? Lɨnga kalipo kamo, katwale papaapa nkyeni mbakamu bangʉ, na mbakamugo, po boosa batʉlamule ʉswe twe babɨɨlɨ!
38 “Ndʉʉgeele na nungwe ɨfyɨnja amalongo mabɨlɨ. Nkabalɨlo koosa ako, jɨkajapo ɨmbene jaako pamo ɨngʼoosi ɨjɨ jɨsopwilemo, kangɨ ngalyamo nɨ ngʼoosi ɨmbongo najɨmo mu ntiimo gwako. 39 Lɨnga ɨkɨnyamaana kɨmo mu ntiimo gwako kɨgogiigwe mmatengele nɨ finyamaana, naahombaga jʉjʉʉne! Kangɨ lɨnga ɨkɨnyamaana kɨmo kiibiigwe pakɨlo pamo pamuusi, gwamelelaga ʉne ʉkʉtɨ ngʉhombe.
40 “Akabalɨlo koosa, pamuusi naakʉbɨlwaga nʉ lʉmu, pakɨlo nɨ mbepo ɨngalɨ, ngaagonaga ʉtʉlo. 41 Naatʉʉgeele bo ʉlo kʉmyako ɨfyɨnja amalongo mabɨlɨ. Naakʉbombiile ɨfyɨnja kalongo na fina ʉkʉtɨ mbeege abaanaako abalɨndwana babɨlɨ. Po kangɨ ɨfyɨnja ntandatʉ naatiimile ɨmitiimo gyako. Looli kalongo gwalyandwile ʉmfwalo gwangʉ. 42 Kyala gwa mwisʉkʉlʉ gwangʉ Abulahamu, Kyala ʉjʉ taata Isaka antiilaga, lɨnga akaalɨ kʉkɨbafu kyangʉ, nalooli gwangagaga maboko matʉpʉ ʉkʉbʉʉka kʉmyɨtʉ. Looli Kyala asibwene ɨngʉbɨlo syangʉ nɨ mbombo ɨsi naabombaga na maboko gangʉ, akʉkemiile nkɨlo.”
Jaakobo na Labani bikwitɨkana
43 Labani alɨnkʉmmwamula alɨnkʉtɨ, “Abalɨndwana aba bangʉ, abaana aba biisʉkʉlʉ bangʉ, ɨmitiimo ɨgɨ gyosa gyangʉ. Fyosa ɨfi kʉfibona apa fyangʉ. Po leelo mbagiile ʉkʉbomba sya fiki kʉ baanangʉ na baanaabo? 44 Isaga tʉfwane, tʉbɨɨke ʉlwitɨkano. Ʉlwitɨkano lo lʉjege bʉkeeti bwɨtʉ ʉne na nungwe.”
45 Po Jaakobo alɨnkwega iibwe, alɨnkʉlyɨmɨka ʉkʉja mbanda jaa kʉkʉmbʉkɨlamo. 46 Alɨnkʉbabʉʉla abakamu alɨnkʉtɨ, “Mulʉndɨke amabwe.” Boosa balɨnkʉlʉndɨka amabwe. Po balɨnkʉlya ɨfindʉ kɨfuki na mabwe aga baalʉndiike. 47 Labani aabʉpeele ʉbʉjo bʉla ɨngamu jaa Jegali-Sahanduta, looli Jaakobo aabʉpeele ɨjaa Galeti. 48 Labani alɨnkʉmmbʉʉla Jaakobo alɨnkʉtɨ, “Ʉbʉlʉndɨke bwa mabwe ʉbʉ, bʉkeeti bwa ʉne na nungwe.” Syo ɨsi syapelile ʉkʉpeeligwa ɨngamu jaa Galeti.c 49 Ʉbʉjo ʉbo kangɨ bwapeeliigwe ɨngamu jaa Misipa, paapo Labani aatile, “ɄNTWA jo ajege mwɨmɨlɨli gwɨtʉ, ʉkʉtʉkeeta bo tʉsookilepo apa.d 50 Lɨnga aakʉbataamya abaanangʉ abalɨndwana, pamo aakwega abakiikʉlʉ abangɨ, nalɨnga poope ʉne ngamanya, looli ʉkʉmbʉkege ʉkʉtɨ Kyala jo nkeeti gwɨtʉ ʉne na nungwe.”
51 Labani alɨnkʉmmbʉʉla kangɨ Jaakobo alɨnkʉtɨ, “Apa galʉndɨkiigwe amabwe, apa palɨ nɨ mbanda ɨjɨ njɨɨmiike pakatɨ pamyangʉ na nungwe. 52 Ʉbʉlʉndɨke bwa mabwe nɨ mbanda bʉkeeti. Ʉne ndikʉkɨndaga ʉbʉlʉndɨke bwa mabwe aga ʉkwisa nkʉkʉfulasya ʉgwe, nungwe ʉtikʉbʉkɨndaga ʉbʉlʉndɨke bwa mabwe nɨ mbanda ɨjɨ ʉkwisa kʉmyangʉ kʉkʉʉfulasya ʉne. 53 Kyala gwa Abulahamu na Naholi, Kyala gwa biisʉkʉlʉ bɨɨtʉ, jo ajege ndamuli gwɨtʉ!”
Po Jaakobo alɨnkʉlapɨla ɨngamu jaa Kyala ʉjʉ ʉgwise Isaka antiilaga. 54 Po Jaakobo alɨnkʉsoosya iikemo pa kyamba pala, nʉ kʉbabɨlɨkɨla abakamu ʉkʉtɨ biise pakʉlya ɨfindʉ pamopeene. Bo baliilemo, balɨnkʉgona palapala.
55 Kɨlaabo kyake Labani alɨnkʉlaabɨla, alɨnkʉbafipa abaanaake abalɨndwana na biisʉkʉlʉ baake, alɨnkʉbasaja, po alɨnkʉgomoka ʉkʉbʉʉka kʉkaaja.