30
Laheli bo aagile akampaapɨlamo abaana Jaakobo, alɨnkʉja nʉ bʉʉfi kʉ nkʉlʉ. Alɨnkʉmmbʉʉla Jaakobo alɨnkʉtɨ, “Niine ngʉpaapɨle abaana! Lɨnga ndikʉpaapa ngʉfwa!” 2 Jaakobo alɨnkʉkalala, alɨnkʉmmwamula Laheli alɨnkʉtɨ, “Bʉle, ʉne ne Kyala, ʉjʉ akʉpeele ʉbʉgʉmba?” 3 Laheli alɨnkʉtɨ, “Ʉntʉmwa gwangʉ Biliha alipo, gwende nagwe apaape abaana bajege bangʉ. Kʉ njɨla ɨjo na niine ngabe abaana!” 4 Po Laheli alɨnkʉmpa Jaakobo ʉntʉmwa gwake Biliha, Jaakobo alɨnkwenda nagwe.5 Biliha alɨnkʉja nɨ kɨfuba, alɨnkʉmpaapɨla Jaakobo ʉmwana ʉnnyambala. 6 Laheli alɨnkʉtɨ, “Kyala aanosiisye pabʉlongi, apɨliike ʉlwipuuto lwangʉ, ambeele ʉmwana ʉnnyambala.” Kʉnongwa ɨjo alɨnkʉmpa ɨngamu jaa Ndani.a 7 Biliha ʉntʉmwa gwa Laheli alɨnkʉja nɨ kɨfuba kangɨ, alɨnkʉmpaapɨla Jaakobo ʉmwana ʉnnyambala ʉgwa bʉbɨlɨ. 8 Laheli alɨnkʉtɨ, “Ndwile ʉbwite ʉbʉkʉlʉmba nʉ nkʉlʉ gwangʉ, nʉntolile!” Kʉnongwa ɨjo ʉmwana jʉla alɨnkʉmpa ɨngamu jaa Nafutali.b
9 Leeja bo iibwene ʉkʉtɨ alekile ʉkʉpaapa, alɨnkʉmmwega ʉntʉmwa gwake ʉndɨndwana Silipa, alɨnkʉmpa Jaakobo ʉkʉtɨ ende nagwe. 10 Silipa ʉjo alɨnkʉmpaapɨla Jaakobo ʉmwana ʉnnyambala. 11 Leeja alɨnkʉtɨ, “Lʉsako lʉnunu!” Kʉnongwa ɨjo alɨnkʉmpa ɨngamu jaa Gandi.c 12 Silipa ʉntʉmwa gwa Leeja, alɨnkʉmpaapɨla kangɨ Jaakobo ʉmwana ʉnnyambala ʉgwa bʉbɨlɨ. 13 Po Leeja alɨnkʉtɨ, “Nhobwike fiijo! Abakiikʉlʉ biinangʉ bikʉtɨgɨ ahobwike.” Kʉnongwa ɨjo alɨnkʉmpa ɨngamu jaa Aaseli.d
14 Iisikʉ lɨmo nkabalɨlo kaa kʉtondola ɨnganu, Lʉbeni alɨnkʉbʉʉka mu ngʉnda, alɨnkʉkʉmba ɨmisi gɨmo ɨgɨ bikʉtɨ tunguja,e alɨnkʉntwalɨla ʉnna Leeja. Laheli alɨnkʉmmbʉʉla Leeja alɨnkʉtɨ, “Ʉmbepo ɨmisi gɨmo ɨgɨ ʉmwanaako akʉtwaliile.” 15 Looli Leeja alɨnkʉmmwamula alɨnkʉtɨ, “Kwinogona ʉkʉtɨ kandʉ kapepe ʉgwe ʉkʉpoka ʉndʉme gwangʉ? Po ʉlʉ kʉlonda ʉkwega na gɨɨ misi ɨgya mwanangʉ?” Laheli joope alɨnkʉmmwamula alɨnkʉtɨ, “Moomuumo! Looli lɨnga kʉmbapo ɨmisi ɨgya mwanaako, ɨkɨlo ɨkɨ Jaakobo aikʉgona kʉmyako.”
16 Namajolo Jaakobo bo ikʉgomoka ʉkʉfuma kʉ ngʉnda, Leeja alɨnkʉbʉʉka kʉkʉmmwambɨlɨla, alɨnkʉmmbʉʉla alɨnkʉtɨ, “Ɨkɨlo ɨkɨ kʉgona kʉmyangʉ. Ngʉʉlile ʉgwe nɨ misi ɨgya mwanangʉ.” Po Jaakobo alɨnkʉgona kwa Leeja ɨkɨlo kɨla. 17 Kyala alɨnkʉpɨlɨka ʉlwipuuto lwa Leeja. Alɨnkʉja nɨ kɨfuba, alɨnkʉmpaapɨla Jaakobo ʉmwana ʉnnyambala ʉgwa bʉhaano. 18 Leeja alɨnkʉtɨ, “Kyala aahombile ʉne, paapo nʉmpeele ʉndʉme gwangʉ ʉntʉmwa gwangʉ ʉkwenda nagwe!” Kʉnongwa ɨjo alɨnkʉmpa ʉmwana jʉla ɨngamu jaa Isakali.f
19 Leeja alɨnkʉja nɨ kɨfuba kangɨ, alɨnkʉmpaapɨla Jaakobo ʉmwana ʉnnyambala ʉgwa ntandatʉ. 20 Alɨnkʉtɨ, “Kyala ambeele ɨkyabʉpe ɨkɨnunu! Akabalɨlo aka ʉndʉme gwangʉ ikʉʉnyɨɨmɨkaga, paapo nʉmpaapiile abaana abanyambala ntandatʉ.” Kʉnongwa ɨjo ʉmwana jʉla alɨnkʉmpa ɨngamu jaa Sabuloni.g 21 Kʉmmalɨɨkɨsyo Leeja alɨnkʉpaapa ʉmwana ʉnkiikʉlʉ, alɨnkʉmpa ɨngamu jaa Ndina.
22 Po Kyala alɨnkʉnkʉmbʉka Laheli. Alɨnkʉpɨlɨka ʉlwipuuto lwake, alɨnkʉmpa ʉbʉpaapi. 23 Laheli alɨnkʉja nɨ kɨfuba, alɨnkʉpaapa ʉmwana ʉnnyambala. Alɨnkʉtɨ, “Akabalɨlo aka, Kyala aanyeepwisye ʉkʉsʉʉka ʉne!” 24 Alɨnkʉmpa ɨngamu ɨjaa Joosefu,h paapo aatile, “ɄNTWA aanyongele ʉmwana ʉnnyambala ʉjʉngɨ.”
Jaakobo ikʉkaba ʉbʉnoge
25 Laheli bo ampaapile Joosefu, Jaakobo alɨnkʉmmbʉʉla Labani alɨnkʉtɨ, “Ʉʉnyiitɨkɨsye mbʉʉke kʉmyɨtʉ, nkiisʉ kyɨtʉ. 26 Ʉmeenye muno ngʉbombiile ɨmbombo kanunu. Po ʉʉnyiitɨkɨsye mbʉʉke na bakasi bangʉ na baanangʉ, aba ngabile bo ngʉkʉbombela ʉgwe.” 27 Looli Labani alɨnkʉmmbʉʉla alɨnkʉtɨ, “Ʉmbɨlɨkɨsye, ngʉkʉsʉʉma ʉtʉʉgalege papaapa na niine. Namanga nsyageenie nkʉlagʉla, ʉkʉtɨ ɄNTWA aasajile kʉnongwa jaako. 28 Ʉʉmbʉʉle ʉmfwalo ʉgʉ kʉlonda, ngʉkʉhomba.” 29 Jaakobo alɨnkʉmmwamula alɨnkʉtɨ, “Ʉgwe ʉmeenye muno ngʉbombiile, na muno ɨmitiimo gyako gɨbaaliile. 30 Namanga bo ngaalɨ ʉkwisa, ʉntiimo gwako gwalɨ nnandɨ. Looli bo niisile kʉmyako, ɄNTWA akʉsajile, gʉbeele fiijo. Po ʉlʉ ngʉlonda ʉkʉbomba ɨsya nnyumba jangʉ.” 31 Labani alɨnkʉmmwamula alɨnkʉtɨ, “Ngʉpe ɨfiki?” Jaakobo alɨnkʉtɨ, “Ʉkʉʉhomba fimo nemma. Looli lɨnga ʉgwe kʉʉmbombela akandʉ kamo, ngwendelelaga ʉkʉtiima nʉ kʉlɨndɨlɨla ɨmitiimo gyako. 32 Ʉmwisyʉgʉ ʉʉnyiitɨkɨsye ʉkwingɨla mmitiimo gyako, niisalɨlepo ɨngʼoosi ɨngekanie nɨ ndononde nɨ ndiitʉ, pamopeene nɨ mbene ɨngekanie nɨ ndononde. Ɨfyo fikʉjaga go mfwalo gwangʉ. 33 Bo kwisa kʉkʉkeeta ɨmitiimo, po aakʉbʉbona ʉbʉgolofu bwangʉ. Mmitiimo gyangʉ, lɨnga kʉsyaga ɨmbene ɨsi sikaja ngekanie pamo ndononde, kangɨ lɨnga kʉsyaga ɨngʼoosi ɨsi sikaja ndiitʉ, po kʉmanyaga ʉkʉtɨ niibile.” 34 Labani alɨnkʉmmwamula alɨnkʉtɨ, “Nunu, syosa ɨsi ʉjobile ngwitɨka.”
35 Looli iisikʉ lɨlalɨla, Labani kʉ bʉkomu, alɨnkʉbʉʉka kʉkʉsipaagʉla ɨmbongo ɨngekanie nɨ ndononde, ɨmbene syosa sila ɨnyeelu, kangɨ nɨ ngʼoosi syosa ɨndiitʉ. Ɨmitiimo gyosa gɨla alɨnkʉbapa abaanaake ʉkʉgɨtiima. 36 Po Labani alɨnkwepʉkapo, alɨnkʉja pabʉtali bwa kwenda amasikʉ matatʉ. Po Jaakobo alɨnkʉsyala, alɨnkʉtiima ɨmitiimo gya Labani ɨgɨ gyasyele.
37 Po Jaakobo alɨnkwega ʉtʉpiki ʉtʉbɨsi ʉtwa nndobo nʉ tʉpiki ʉtwa mipiki ɨgɨngɨ mibɨlɨ. Alɨnkʉkʉbʉla amakandi mpaka bwaboniike ʉbʉlabanie ʉbwelu nkatɨ. 38 Jaakobo aapɨmbile ʉtʉpiki ʉto, alɨnkʉtʉbɨɨka kʉmbalɨ kʉ fipondo, nkyeni mmitiimo, paapo bo gikʉnwa amɨɨsi, ɨmitiimo ɨgɨ giipɨngwile gɨlɨnkwenda palapala nɨ mbongo, gɨlɨnkʉja nʉ bʉbeele. 39 Ɨmitiimo gyendaga nkyeni ntʉpiki tʉla, gyapaapaga ɨmwana ɨsʉlʉla, ɨndononde nɨ ngekanie.
40 Jaakobo alɨnkʉsipaagʉla ɨngʼoosi bo sikwenda nɨ mbongo, aasilabɨkɨsyaga ʉkʉkeeta kʉ mitiimo gya Labani ɨgɨ gyalɨ mikekanie nɨ mitiitʉ. Kʉ njɨla ɨjo, ɨmitiimo gyake gɨlɨnkwendelela ʉkʉbaala, akaagyonganiaga nɨ gya Labani.
41 Ɨmitiimo ɨgya maka bo giipɨngwile, Jaakobo aabɨɨkaga ʉtʉpiki tʉla nkɨpondo ɨkɨ gyanwelaga amɨɨsi, ʉkʉtɨ gɨkabege ʉbʉbeele nkyeni ntʉpiki tʉla. 42 Looli ɨmitiimo ɨgɨ gɨkaalɨ na maka, akaagɨbɨɨkɨlaga ʉtʉpiki tʉla. Po Labani alɨnkʉkaba ɨmitiimo ɨgɨ gɨkaja na maka, Jaakobo alɨnkʉja nɨ mitiimo ɨgya maka. 43 Kʉmmalɨɨkɨsyo Jaakobo alɨnkʉja nkabi fiijo. Alɨnkʉja nɨ mitiimo mingi, pamopeene na batʉmwa abakiikʉlʉ na banyambala, nɨ ngamila nɨ mbunda.