Jaakobo ikʉfika kwa Labani
29
Po Jaakobo alɨnkwendelela nɨ njɨla jaake, alɨnkʉfika nkiisʉ kya bandʉ baa kʉbʉsookelo. 2 Bo afikile kʉla, alɨnkʉkɨbona ɨkiina kya mɨɨsi pa lʉkʉbo, nɨ mitiimo mitatʉ ɨgya ngʼoosi gɨlambaleele kɨfuki. Ɨngʼoosi sila syaguulɨlaga ʉkʉnwela ʉkʉfuma pa kiina ɨkyo ɨkɨ baakɨkupɨkiile ni ibwe iinywamu. 3 Ʉlʉbaatɨko lwa pa kiina pala, ɨmitiimo bo gɨbʉngeene, abatiimi baabungulusyaga iibwe ʉkʉlɨsoosyapo pa kiina kya mɨɨsi, ʉkʉtɨ basinwesye ɨngʼoosi. Bo bamalile ʉkʉsinwesya, baakɨkupɨkɨlaga kangɨ ni ibwe lɨla.4 Po Jaakobo alɨnkʉbalaalʉʉsya abatiimi alɨnkʉtɨ, “Baamyɨtʉ, mufumile kʉʉgʉ?” Balɨnkʉmmwamula balɨnkʉtɨ, “Tʉfumile nkaaja akaa mu Halani.” 5 Alɨnkʉbalaalʉʉsya kangɨ alɨnkʉtɨ, “Bʉle, mummeenye Labani ʉmwisʉkʉlʉ gwa Naholi?” Balɨnkʉmmwamula balɨnkʉtɨ, “Tʉmmeenye.” 6 Po alɨnkʉbalaalʉʉsya alɨnkʉtɨ, “Bʉle, nkafu?” Boope balɨnkʉmmwamula balɨnkʉtɨ, “Nkafu. Ʉmwanaake ʉndɨndwana alipo apa, ikwisa nɨ mitiimo gyake. Ɨngamu jaake jo Laheli.” 7 Jaakobo alɨnkʉbabʉʉla kangɨ alɨnkʉtɨ, “Ʉlʉmu lʉkalɨ, akabalɨlo kaa kʉgɨgomosya ɨmitiimo kʉkaaja kakaalɨ. Po mugɨnwesye, mubʉʉke nagyo kʉkʉgɨtiima.” 8 Abatiimi bala balɨnkʉmmwamula balɨnkʉtɨ, “Tʉkabagɨla ʉkʉgɨnwesya, mpaka ɨmitiimo gyosa gɨbʉngaane pamopeene, iibwe lɨbungulusigwe ʉkʉfuma pa kiina, po tukʉsinwesya ɨngʼoosi.”
9 Jaakobo bo akaalɨ ikʉjoba na batiimi bala, Laheli alɨnkʉfika nɨ ngʼoosi ɨsya gwise, paapo jo ʉjʉ aasitiimaga. 10 Po Jaakobo bo ammbwene Laheli ʉmwana gwa mwipwa Labani pamopeene nɨ mitiimo gya Labani, nakalɨnga alɨnkʉbʉʉka pa kiina, alɨnkʉbungulusya iibwe lɨla, alɨnkʉnwesya ʉntiimo gwa mwipwa. 11 Po Jaakobo alɨnkʉmfipa Laheli ʉkʉmponia, alɨnkʉlɨla kʉ lʉsekelo. 12 Jaakobo alɨnkʉmmbʉʉla alɨnkʉtɨ, “Ʉne ndɨ nkamu gwa gʉʉso! Jʉʉba jo Lebeka!” Laheli alɨnkʉbopa ʉkʉbʉʉka kʉkaaja, alɨnkʉmmbʉʉla ʉgwise ɨnongwa sya Jaakobo.
13 Po Labani bo apɨliike ɨnongwa sya mwipwa Jaakobo, alɨnkʉkʉʉja kʉkʉmmwambɨlɨla. Bo afikile, alɨnkʉmfipa ʉkʉmponia, alɨnkwisa nagwe kʉmyake. Po Jaakobo alɨnkʉmpangɨla Labani ɨnongwa syosa. 14 Labani alɨnkʉmmbʉʉla alɨnkʉtɨ, “Nalooli ʉgwe ʉlɨ nkamu gwangʉ ʉgwa ilopa!” Po Jaakobo alɨnkʉtʉʉgala kwa Labani ʉmwesi gʉmo.
Jaakobo ikʉmmwega Leeja na Laheli
15 Iisikʉ lɨmo Labani alɨnkʉmmbʉʉla Jaakobo alɨnkʉtɨ, “Ʉgwe ʉlɨ nkamu gwangʉ. Sikaja kanunu ʉkʉʉmbombela ɨmbombo itolo! Po ʉlʉ ʉʉmbʉʉle, ngʉhombe ɨfiki?”
16 Labani aalɨ na balɨndwana babɨlɨ, ʉnkʉlʉmba ɨngamu jaake aalɨ jo Leeja, ʉnnandɨ aalɨ jo Laheli. 17 Leeja aalɨ na maaso amanunu, looli Laheli aalɨ mbʉmbe ʉmbɨlɨ, kangɨ aalɨ nnunu kʉmaaso. 18 Jaakobo aalɨnnganile Laheli, alɨnkʉtɨ, “Angʉkʉbombela ɨfyɨnja fihaano na fibɨlɨ, po aakʉmbaga ʉmwanaako ʉnnandɨ Laheli, ʉkʉja nkasi gwangʉ.” 19 Labani alɨnkʉtɨ, “Kʉnunu ʉkʉkɨndapo ʉkʉkwitɨkɨsya ʉkʉmmwega ʉgwe, ʉkʉkɨnda ʉkwegigwa Laheli nʉ nnyambala ʉjʉngɨ. Tʉʉgalaga kʉmyangʉ.” 20 Po Jaakobo alɨnkʉmmbombela ɨmbombo Labani ɨfyɨnja fihaano na fibɨlɨ, ʉkʉtɨ ammwege Laheli. Looli ɨfyɨnja ɨfyo Jaakobo alɨnkʉfibona ʉkʉja finandɨ fiijo, paapo aalɨnnganile fiijo Laheli.
21 Kʉmmalɨɨkɨsyo Jaakobo alɨnkʉmmbʉʉla Labani alɨnkʉtɨ, “Mmalile ɨfyɨnja fyangʉ ɨfya kʉkʉbombela ɨmbombo. Po ʉlʉ ʉmbepo ʉnkasi gwangʉ.” 22 Po Labani alɨnkʉbabɨlɨkɨla abandʉ boosa abaa nkaaja kala, alɨnkʉbɨɨka ʉlʉsekelo. 23 Looli pakɨlo, Labani alɨnkʉmmwega Leeja ʉmwanaake ʉndɨndwana ʉnkʉlʉmba, alɨnkwakʉmpapo Jaakobo ʉkʉja nkasi. 24 Kangɨ Labani alɨnkʉmpa Leeja ʉntʉmwa gwake ʉnkiikʉlʉ, ɨngamu jaake Silipa.
25 Bo bʉkiile, Jaakobo alɨnkʉnyomoka bo aagile ʉkʉtɨ jo Leeja. Alɨnkʉbʉʉka kʉkʉnndaalʉʉsya Labani alɨnkʉtɨ, “Syo sya fiki ɨsi ʉʉmbombiile ʉne? Ngʉbombiile ɨmbombo ʉkʉtɨ nʉmmwege Laheli, fiki ʉʉsyobile?” 26 Labani alɨnkʉmmwamula alɨnkʉtɨ, “Kʉmyɨtʉ kʉno, lʉkaja lwiho ʉkwegigwa ʉnnandɨ, lɨnga ʉnkʉlʉmba akeegigwa. 27 Gʉmalɨke taasi ʉndʉngʉ gʉmo ʉgwa lʉsekelo lwa bwegi, po aatukʉkʉpa Laheli. Looli kʉʉmbombela kangɨ ɨmbombo, kʉ fyɨnja fihaano na fibɨlɨ.”
28 Jaakobo alɨnkwitɨka. Alɨnkʉmala amasikʉ mahaano na mabɨlɨ agaa bwegi bwa Leeja, po Labani alɨnkʉmpa Laheli joope ʉkʉja nkasi. 29 Labani alɨnkʉmpa Laheli ʉntʉmwa gwake ʉnkiikʉlʉ ɨngamu jaake Biliha. 30 Po joope Laheli alɨnkʉja nkasi gwa Jaakobo. Jaakobo aalɨnnganile Laheli ʉkʉnkɨnda Leeja. Jaakobo alɨnkʉmmbombela Labani kangɨ ɨfyɨnja fihaano na fibɨlɨ, kʉnongwa jaa Laheli.
Abaana baa Jaakobo
31 ɄNTWA bo aagile ʉkʉtɨ Leeja mbengwe kʉ ndʉme, alɨnkʉmpa ʉbʉpaapi, looli Laheli alɨnkʉja nngʉmba. 32 Leeja alɨnkʉja nɨ kɨfuba, alɨnkʉpaapa ʉmwana ʉnnyambala, alɨnkʉtɨ, “ɄNTWA abʉbwene ʉbʉtolwe bwangʉ, po ʉlʉ ʉndʉme gwangʉ ikʉʉnganaga.” Kʉnongwa ɨjo alɨnkʉmpa ɨngamu jaa Lʉbeni.a 33 Leeja alɨnkʉja nɨ kɨfuba kangɨ, alɨnkʉpaapa ʉmwana ʉnnyambala, alɨnkʉtɨ, “ɄNTWA ambeele kangɨ ʉmwana ʉnnyambala, paapo apɨliike ʉkʉtɨ mbengiigwe.” Kʉnongwa ɨjo alɨnkʉmpa ɨngamu jaa Simyoni.b 34 Alɨnkʉja nɨ kɨfuba kangɨ, alɨnkʉpaapa ʉmwana ʉnnyambala, alɨnkʉtɨ, “Akabalɨlo aka ʉndʉme gwangʉ ikʉlʉnganaga na niine, paapo nʉmpaapiile abaana abanyambala batatʉ.” Kʉnongwa ɨjo alɨnkʉmpa ɨngamu jaa Leebi.c 35 Alɨnkʉja nɨ kɨfuba kangɨ, alɨnkʉpaapa ʉmwana ʉnnyambala, alɨnkʉtɨ, “Akabalɨlo aka ngʉntuufyaga ɄNTWA.” Kʉnongwa ɨjo alɨnkʉmpa ɨngamu jaa Juuta.d Po alɨnkʉlekela paapo ʉkʉpaapa.