28
Po Isaka alɨnkʉmmbɨlɨkɨla Jaakobo, alɨnkʉnsaja, alɨnkʉnndagɨla alɨnkʉtɨ, “Komma ʉkwega ʉnkiikʉlʉ ʉgwa nkiisʉ ɨkya mu Kaanani. 2 Ʉbʉʉke nkiisʉ ɨkya mu Pandani-Alamu, mu nyumba ɨjaa Betweli ʉgwise gwa nyoko, ʉkammwege ʉnkiikʉlʉ jʉmo mbaana abaa mwipwago Labani. 3 Kyala ʉMwene maka goosa akʉsaje! Ʉkabe abaa ndʉjungu lwako abingi fiijo, mubaale fiijo. 4 Akʉsajege ʉgwe pamopeene na baa ndʉjungu lwako, akʉpepo ʉlʉsajo ʉlʉ aafingile ʉkʉmpapo Abulahamu, ʉkʉtɨ ʉgwe ʉkabe ɨkɨlɨngo ɨkya kiisʉ ɨkɨ ʉlimo mbʉheesya, ɨkiisʉ ɨkɨ aafingile ʉkʉmpapo Abulahamu.”5 Po Isaka alɨnkʉntʉma Jaakobo kʉ Pandani-Alamu, kʉ nyumba jaa Labani ʉmwana gwa Betweli, ʉgwa nkɨkolo kya Alamu. Labani aalɨ ilʉmbʉ gwa Lebeka, ʉnna gwa baa Jaakobo na Esabu.
Esabu ikwega ʉnkiikʉlʉ ʉjʉngɨ
6 Esabu alɨnkʉsyagania ʉkʉtɨ ʉgwise aalɨnsajile Jaakobo, nʉ kʉntʉma nkiisʉ ɨkya mu Pandani-Alamu, ʉkʉtɨ akeege kʉla ʉnkiikʉlʉ. Kangɨ alɨnkʉsyagania ʉkʉtɨ Isaka bo ikʉnsaja Jaakobo, aalɨnkaaniisye ʉkwega ʉndɨndwana ʉgwa mu Kaanani, 7 nʉ kʉtɨ Jaakobo aabombile ɨsi aalɨmmbʉʉlile ʉgwise nʉ nna, aabʉʉkile kʉkwega mu Pandani-Alamu.
8 Po Esabu alɨnkʉsyagania ʉkʉtɨ ʉgwise Isaka akabagana abalɨndwana abaa nkiisʉ ɨkya mu Kaanani. 9 Po alɨnkʉbʉʉka kwa Isimaɨli ʉmwana ʉgwa Abulahamu, alɨnkʉmmwega ʉmwanaake ɨngamu jaake Mahalati, ʉjʉ aalɨ ilʉmbʉ gwa Nebajoti. Ʉnkiikʉlʉ ʉjo alɨnkʉja nkasi mwinaabo gwa bakiikʉlʉ aba aatalile ʉkʉbeega.
Jaakobo ikʉgogwa ɨnjosi pa Beteli
10 Jaakobo alɨnkʉsookapo pa Beeli-Syeba, alɨnkʉbʉʉka kʉ Halani. 11 Alɨnkʉfika pabʉjo bʉmo nʉ kʉgona pala paapo iisʉba lyajongile. Alɨnkwega iibwe lɨmo ɨlya pabʉjo bʉla, alɨnkwijiinʉlɨla kʉntʉ, alɨnkʉlambalala. 12 Bo agonile ʉtʉlo, alɨnkʉgogwa ɨnjosi. Alɨnkʉgʉbona ʉntandalɨlo gwɨmɨkiigwe pakiisʉ, gʉjile kʉfika kʉmwanya. Abandʉmi baa Kyala baafyʉkaga nʉ kʉsuluka mu ntandalɨlo gʉla. 13 ɄNTWA aalyɨmile pa ntandalɨlo, alɨnkʉtɨ, “Ʉne ndɨ NTWA, Kyala gwa mwisʉkʉlʉgo Abulahamu, na Kyala gwa gʉʉso Isaka. Ɨkiisʉ ɨkɨ ʉlambaleelemo, ngʉkʉpa ʉgwe na baa ndʉjungu lwako. 14 Bikwisa kʉja bingi fiijo bo ʉlwa lʉfumbɨ, bikwisa kʉbalanila mfibafu fyosa ɨfya kʉbʉsookelo, kʉbʉjongelo, kʉlʉʉlʉ na kwitongo. Ɨfikolo fyosa ɨfya bandʉ pakiisʉ, fikwisa kʉsajigwaga ʉkwendela mmyako na bandʉ abaa ndʉjungu lwako. 15 Pɨlɨkɨsya! Ʉne ndɨ pamopeene na nungwe, ngʉkʉlɨndɨlɨlaga poosa apa kʉjaga, ngwisa kʉkʉgomokesyamo nkiisʉ ɨkɨ. Ndikʉkʉleka mpaka ngʉbombele ɨsi mfingile.”
16 Po Jaakobo alɨnkʉlembʉka ntʉlo, alɨnkʉtɨ, “Nalooli ɄNTWA alipo pabʉjo ʉbʉ! Ʉne ngaasyageenie!” 17 Alɨnkʉtiila fiijo, alɨnkʉtɨ, “Ʉbʉjo ʉbʉ bʉsisya fiijo! Nalooli apa jo nyumba jaa Kyala, kyo kɨfigo kya kʉbʉʉkɨla kʉmwanya.”
18 Po Jaakobo alɨnkʉlaabɨla nʉlʉbʉnjʉ, alɨnkwega iibwe ɨlɨ aaliijiinʉliile kʉntʉ, alɨnkʉlɨkʉmbɨla ʉkʉja mbanda, alɨnkʉlyonelela amafuta ʉkʉja bʉjo bwikemo. 19 Ʉbʉjo ʉbo alɨnkʉbʉpa ɨngamu ɨjaa Beteli,a looli kʉbwandɨlo akaaja kala ɨngamu jaake kaalɨ jo Lusu.
20 Po Jaakobo alɨnkʉlapa alɨnkʉtɨ, “Gwe Kyala, lɨnga kʉjaga pamopeene na niine, nʉ kʉʉndɨndɨlɨla mu njɨla ɨjɨ ngwenda, nʉ kʉmbapo ɨfindʉ nɨ myenda, 21 ngomoke kʉkaaja kwa taata kanunu, apo ʉgwe gwe NTWA kʉjaga gwe Kyala gwangʉ. 22 Iibwe ɨlɨ ndɨkʉmbiile apa ʉkʉja mbanda, likʉjaga nyumba jaa kʉmmwipuutɨlapo Kyala. Kangɨ fyosa ɨfi kʉmbaga, nalooli ngʉkʉsookesyaga ɨfya pi ilongo.”