Isaka ikʉnsaja Jaakobo
27
Isaka bo akangeele fiijo, amaaso gaake gaapʉʉpeele, alɨnkʉmmbɨlɨkɨla ʉmwanaake ʉgwa kɨpanda Esabu, alɨnkʉtɨ, “Mwanangʉ.” Joope alɨnkʉmmwamula alɨnkʉtɨ, “Ndipo apa.” 2 Isaka alɨnkʉtɨ, “Keeta, lɨɨlɨno ngangeele fiijo, ngalɨmanya ni isikʉ lyangʉ ɨlya kʉfwa. 3 Po gwege ɨfya kʉfwɨmɨla, ɨkya kʉbɨɨkamo ɨmitipʉlo nʉ bʉpɨnde bwako, ʉbʉʉke mmatengele, ʉkaafwɨmɨle ɨkɨnyamaana. 4 Ʉmbɨɨjɨle ɨfindʉ ɨfinyaafu ɨfi mfiganile, ʉndwalɨle ndyemo. Po ngʉsaje bo ngaalɨ ʉkʉfwa.”5 Isaka bo ikʉjoba ɨsyo nʉ mwanaake Esabu, Lebeka aapɨlɨkɨsyaga. Po Esabu bo abʉʉkile mmatengele nkʉfwɨma ɨkɨnyamaana, 6 Lebeka alɨnkʉmmbʉʉla ʉmwanaake Jaakobo alɨnkʉtɨ, “Pɨlɨkɨsya, mbɨliike bo ʉgʉʉso ikʉmmbʉʉla Esabu atile, 7 ‘Bʉʉka ʉkaafwɨmɨle ɨkɨnyamaana, ʉmbɨɨjɨle ndyemo. Po ngʉsaje nkyeni mu NTWA bo ngaalɨ ʉkʉfwa.’ 8 Po mwanangʉ, pɨlɨkɨsya! Ɨsi ngʉkʉbʉʉla, ʉsibombe. 9 Bʉʉka pa ntiimo gwa mbene, ʉndwalɨle ʉtʉpene tʉbɨlɨ ʉtʉnunu, ʉkʉtɨ nʉmpɨɨjɨle ʉgʉʉso ɨfindʉ ɨfinyaafu ɨfi afiganile. 10 Po kʉntwalɨla alyemo, ʉkʉtɨ akʉsaje bo akaalɨ ʉkʉfwa.”
11 Jaakobo alɨnkʉmmbʉʉla ʉnna alɨnkʉtɨ, “Keeta, ʉnkʉlʉ gwangʉ Esabu alɨ nʉ lʉsyoja ʉmbɨlɨ goosa, ʉne ngaja nalo! 12 Pamo taata aikʉmbalamaasya, aikʉmanya ʉkʉtɨ ngʉmmwila. Angʉkaba ɨkɨgune, somma ʉlʉsajo.” 13 Ʉnna alɨnkʉmmbʉʉla alɨnkʉtɨ, “Ɨkɨgune kyako kiise kɨjege kyangʉ. Pɨlɨkɨsya, bʉʉka kabombe, kandwalɨle ʉtʉpene.”
14 Po Jaakobo alɨnkʉbʉʉka kʉkwega ʉtʉpene tʉbɨlɨ, alɨnkʉntwalɨla ʉnna. Ʉnna alɨnkʉpɨɨja ɨfindʉ ɨfinyaafu, bo muno afiganiile ʉgwise. 15 Po Lebeka alɨnkwega ɨmyenda ɨminunu fiijo, ɨgya mwanaake ʉgwa kɨpanda Esabu ɨgɨ gyalimo nnyumba. Po alɨnkʉmfwɨka Jaakobo ʉmwanaake ʉnnandɨ. 16 Alɨnkʉmfwɨka fyope ɨfigʉbo fya tʉpene mmaboko na mmakosi, muno lʉkaalimo ʉlʉsyoja. 17 Po alɨnkʉmpapo ʉmwanaake Jaakobo ɨfindʉ ɨfinyaafu fila, nɨ kɨsyesye ɨkɨ aalɨmpɨɨjiile.
18 Po Jaakobo alɨnkʉntwalɨla ʉgwise alɨnkʉtɨ, “Taata!” Joope alɨnkwamula, alɨnkʉtɨ, “Isaga mwanangʉ. Gwani?” 19 Jaakobo alɨnkʉmmbʉʉla ʉgwise alɨnkʉtɨ, “Ʉne ne Esabu, ne mwanaako ʉgwa kɨpanda. Mbombile bo ʉlʉ ʉʉndagiile. Isaga ʉtʉʉgale, ʉlye ɨfi mfwɨmile, ʉkʉtɨ ʉʉsaje.” 20 Looli Isaka alɨnkʉnndaalʉʉsya alɨnkʉtɨ, “Mwanangʉ, ʉsakile bʉleebʉle mbɨbɨmbɨbɨ bo ʉlo?” Jaakobo alɨnkʉtɨ, “ɄNTWA Kyala gwako andʉʉlile.”
21 Po Isaka alɨnkʉmmbʉʉla alɨnkʉtɨ, “Mwanangʉ, segelela ngʉpalamaasye, ngeete lɨnga nalooli ʉgwe jo mwanangʉ Esabu, pamo jʉngɨ.” 22 Jaakobo alɨnkʉsegelela kʉ gwise, ʉgwise alɨnkʉmpalamaasya, alɨnkʉtɨ, “Iisyʉ lya Jaakobo, looli amaboko gaa Esabu.” 23 Aatoliigwe ʉkʉmmanya paapo amaboko gaake gaalɨ nʉ lʉsyoja bo agaa nkʉlʉ Esabu. Po ʉgwise alɨnkwitɨka ʉkʉnsaja. 24 Alɨnkʉnndaalʉʉsya kangɨ alɨnkʉtɨ, “Nalooli ʉgwe jo mwanangʉ Esabu?” Joope alɨnkwitɨka alɨnkʉtɨ, “Jo ʉne!” 25 Po ʉgwise alɨnkʉtɨ, “Mwanangʉ, segelekesya kʉno ɨfindʉ ɨfi ʉsakile, ʉkʉtɨ ngʉsaje.” Po Jaakobo alɨnkʉnsegelekesya ɨfindʉ, ʉgwise alɨnkʉlya, po alɨnkʉntwalɨla ɨfinga, alɨnkʉnwa.
26 Po ʉgwise alɨnkʉmmbʉʉla alɨnkʉtɨ, “Segelela mwanangʉ, ʉʉnyʉʉbatɨle.” 27 Po Jaakobo alɨnkʉsegelela, alɨnkʉmmʉʉbatɨla. Ʉgwise bo apɨliike ʉlʉʉma lwa mwenda gwa mwanaake, alɨnkʉnsaja alɨnkʉtɨ,
“Keeta, ʉlʉʉma lwa mwanangʉ,
lʉfwene nʉ lʉʉma lwa ngʉnda,
ʉgʉ ɄNTWA agʉsajile!
28 Kyala akʉtimɨkɨsyege ɨndʉngwa ʉkʉfuma kʉmwanya,
nɨ mboto jaa kiisʉ,
kangɨ akʉpe ʉntondolo ʉmwingi nɨ finga ɨnyingi.
29 Ɨfikolo ɨfya bandʉ fikʉbombelege,
fibungulukege nkyeni mmyako.
Ʉjege ndagɨli gwa baamyɨnu,
na banugunago bakʉbungulukɨlege.
Ʉjʉ ikʉkʉguna, ikʉgunigwaga,
ʉjʉ ikʉkʉsaja, joope ikʉsajigwaga.”
Esabu ikʉsʉʉma ʉkʉsajigwa
30 Isaka bo amalile itolo ʉkʉnsaja Jaakobo, nakalɨnga bo asookilepo, Esabu joope alɨnkʉfika bo afumile kʉkʉfwɨma. 31 Alɨnkʉpɨɨja joope ɨfindʉ ɨfinyaafu, alɨnkʉntwalɨla ʉgwise, alɨnkʉtɨ, “Gwe taata! Isaga, ʉtʉʉgale ʉlye ɨfi mfwɨmile, ʉkʉtɨ ʉʉsaje.” 32 Ʉgwise alɨnkʉnndaalʉʉsya alɨnkʉtɨ, “Ʉgwe gwe gwani?” Joope alɨnkʉtɨ, “Jo ʉne Esabu, ne mwanaako ʉgwa kɨpanda.” 33 Nakalɨnga Isaka alɨnkʉtetema fiijo, alɨnkʉtɨ, “Jo jwani jʉla afwɨmile nʉ kʉndwalɨla ɨnyama? Ʉne mmalile ʉkʉlya bo ʉgwe ʉkaalɨ ʉkwisa. Nʉnsajile, nalooli alɨ nʉ lʉsajo.”
34 Esabu bo apɨliike amasyʉ gaa gwise, alɨnkʉkuuta ɨnguuto ɨngʉlʉmba, ɨjaa bʉsulumanie fiijo. Alɨnkʉmmbʉʉla ʉgwise alɨnkʉtɨ, “Gwe taata, ngʉsʉʉma ʉʉsaje na niine!” 35 Looli Isaka alɨnkʉtɨ, “Ʉnnugunago iisile, aasyobile, eegile ʉlʉsajo lwako.” 36 Esabu alɨnkʉtɨ, “Fyobeene ɨngamu jaake jo Jaakobo!a Aasyobile kabɨlɨ! Kʉbwandɨlo aalyegile ʉbwa kɨpanda bwangʉ, lɨɨlɨno eegile ʉlʉsajo lwangʉ!” Po alɨnkʉnndaalʉʉsya ʉgwise alɨnkʉtɨ, “Bʉle, ʉkaandekelapo ʉne ʉlʉsajo nalʉmo?”
37 Ʉgwise alɨnkʉmmwamula alɨnkʉtɨ, “Nʉmmbɨɨkile ʉkʉja malafyale gwako. Abaamyabo boosa boope mbabɨɨkile ʉkʉja babombeli baake. Nʉmpeele ɨfindʉ nɨ finga. Po mwanangʉ, ʉgwe ngʉbombele silɨkʉ?” 38 Esabu alɨnkʉnndaalʉʉsya ʉgwise alɨnkʉtɨ, “Gwe taata, kokʉtɨ ʉlɨ nʉ lʉsajo lʉmolwene itolo? Gwe taata, ʉʉsaje na niine!” Po alɨnkʉkuuta fiijo. 39 Ʉgwise alɨnkʉmmbʉʉla alɨnkʉtɨ,
“Ʉbʉjo bwako bukʉjaga nkiisʉ ɨkɨ kɨkaja nɨ mboto,
kʉbʉtali nɨ ndʉngwa ɨjaa kʉmwanya.
40 Bwila kʉlwaga ʉbwite,
kʉmmbombelaga ʉnnugunago.
Looli iisikʉ lɨmo kwisa kwijaabʉla,
po kwisa kʉsookamo mbʉlagɨli bwake.”
Jaakobo ikʉmmbopa Esabu
41 Po Esabu alɨnkʉmmbenga Jaakobo kʉnongwa jaa lʉsajo ʉlʉ aapeeliigwe nʉ gwise. Alɨnkwinogona, alɨnkʉtɨ, “Akabalɨlo kaa kʉfwa taata kasegeliile. Bo tʉmalile ɨɨfwa jaake, po angʉnngoga ʉnnuguna gwangʉ Jaakobo.”
42 Looli Lebeka bo asyageenie ɨsi Esabu aalondaga ʉkʉbomba, alɨnkʉntʉma ʉmundʉ kʉkʉmmbɨlɨkɨla Jaakobo, alɨnkʉmmbʉʉla alɨnkʉtɨ, “Mwanangʉ, gwitiimege! Ʉnkʉlʉgo Esabu abaatiike ʉkʉkʉbukɨsya ʉbʉbiibi, ikʉlonda ʉkʉkʉgoga. 43 Po mwanangʉ, ʉmbɨlɨkɨsye. Bopela kwi ilʉmbʉ gwangʉ Labani ʉgwa nkaaja akaa mu Halani. 44 Ʉkatʉʉgale kʉmyake kʉkabalɨlo, mpaka ɨngalalɨsi sya nkʉlʉgo simalɨke. 45 Ɨngalalɨsi syake bo simaliike, aikwibwa ɨsi ʉmmbombiile, angwisa kʉntʉma ʉmundʉ gwa kʉkʉbɨlɨkɨla. Fiki mfwɨlɨligwe na nuumwe mwesa kwi isikʉ lɨmolyene?”
46 Po Lebeka alɨnkʉmmbʉʉla Isaka alɨnkʉtɨ, “Ʉne ngʉtaamigwa fiijo mu ndumbula kʉnongwa jaa bakasi baa Esabu, abaa nkɨkolo kya Bahiti. Lɨnga Jaakobo joope aikwega ʉnkiikʉlʉ ʉgwa nkiisʉ ɨkɨ ɨkya Bahiti, kwalɨ kʉnunu ʉkʉsita kʉjako kʉ bʉʉmi.”