Isaka nʉ malafyale Abimeleki
26
Pakabalɨlo akangɨ, ɨnjala ɨngalɨ jɨlɨnkʉgwa nkiisʉ ɨkyo ɨkya mu Kaanani. Jaalegeene na ɨjɨ jaagwile nkabalɨlo akaa Abulahamu.a Isaka alɨnkʉsaamɨla nkaaja akaa mu Gelali, kwa Abimeleki ʉmalafyale gwa Bafilisiti.2 ɄNTWA aalɨnsetʉkiile Isaka, alɨnkʉmmbʉʉla alɨnkʉtɨ, “Ʉlɨngabʉʉkaga kʉ Misili, looli ʉtʉʉgalege nkiisʉ ɨkɨ ngʉkʉbʉʉlaga. 3 Ʉtʉʉgalege nkiisʉ ɨkyo, po ʉne ngʉjaga pamopeene na nungwe, kangɨ angʉkʉsaja, paapo angʉbomba ɨsi naalapile kʉ gʉʉso Abulahamu, ʉkʉkʉpa ʉgwe na baa ndʉjungu lwako ɨfiisʉ ɨfi fyosa.b 4 Angʉbabaasya abaa ndʉjungu lwako, aabikʉja bingi bo ʉlwa ndondwa ɨsya kʉmwanya, kangɨ angʉbapa ɨfiisʉ ɨfi fyosa. Ʉkwendela mmbandʉ abaa ndʉjungu lwako, abandʉ boosa abaa pakiisʉ bikʉsajigwaga. 5 Ngʉbasajaga paapo Abulahamu ambɨlɨkaga nʉ kʉkonga ɨndagɨlo syangʉ, ɨngomeelesyo syangʉ nʉ bʉlongi bwangʉ.” 6 Po Isaka alɨnkʉtʉʉgala nkaaja akaa mu Gelali.
7 Abandʉ abaa nkaaja kala bo bikʉnndaalʉʉsya Isaka ɨsya nkasi, alɨnkʉbaamula alɨnkʉtɨ, “Ʉjʉ ilʉmbʉ gwangʉ.” Alɨnkʉtiila ʉkʉjoba ʉkʉtɨ nkasi, aabapaasyaga abenekaaja kala ʉkʉnngoga kʉnongwa jaa Lebeka, paapo aalɨ nnunu fiijo. 8 Isaka bo agonilemo fiijo nkaaja kala, Abimeleki ʉmalafyale gwa Bafilisiti, alɨnkʉtendeela pi itʉʉlo, alɨnkʉmmbona Isaka ikʉkina nʉ nkasi Lebeka. 9 Abimeleki alɨnkʉmmbɨlɨkɨla Isaka, alɨnkʉnndaalʉʉsya alɨnkʉtɨ, “Ngɨmba ʉjo nkasigo! Fiki gwatile ilʉmbʉgo?” Isaka alɨnkʉmmwamula alɨnkʉtɨ, “Naajobile bo ʉlo, paapo naatiilaga abandʉ ʉkʉʉngoga kʉnongwa jaake.”
10 Po Abimeleki alɨnkʉnndaalʉʉsya alɨnkʉtɨ, “Fiki ʉtʉbombiile ɨsi? Lɨnga ʉmundʉ jʉmo aagonaga nʉ nkasigo, bʉle, ʉkaatʉpelaga ʉkʉja batʉlanongwa?” 11 Po Abimeleki alɨnkʉbalagɨla abandʉ baake boosa, alɨnkʉtɨ, “Gwesa ʉjʉ aikʉmmbombela ɨmbiibi simo ʉmundʉ ʉjʉ pamo ʉnkasi, aikʉgogigwa!”
12 Ɨkyɨnja ɨkyo Isaka aalɨmile fiijo nkiisʉ kɨla, aakabile fiijo paapo ɄNTWA aalɨnsajile. 13 Isaka alɨnkʉja nkabi, ɨkyʉma kyake kɨlɨnkʉbaala, alɨnkʉja nnoge fiijo. 14 Alɨnkʉja nɨ ngʼoosi, ɨngʼombe na batʉmwa abingi, aBafilisiti balɨnkʉmmbonela ʉbʉʉfi. 15 Po aBafilisiti balɨnkʉsyɨla ɨfiina fya mɨɨsi fyosa ɨfi fyakʉmbiigwe na batʉmwa nkabalɨlo akaa gwise Abulahamu. 16 Abimeleki alɨnkʉmmbʉʉla Isaka alɨnkʉtɨ, “Ʉsookemo nkiisʉ kyɨtʉ, paapo ʉgwe ʉlɨ nkabi ʉkʉtʉkɨnda.”
17 Po Isaka alɨnkʉsookapo apo, alɨnkwakʉjenga ɨheema mu ntebeela gwa Gelali, alɨnkʉtʉʉgala ʉko. 18 Isaka alɨnkʉfisyʉla ɨfiina fya mɨɨsi ɨfi fyakʉmbiigwe nkabalɨlo akaa Abulahamu ʉgwise. Ɨfiina fila fyasyɨliigwe na Bafilisiti bo Abulahamu afwile. Isaka bo amalile ʉkʉfisyʉla, alɨnkʉfipapo ɨngamu silasila ɨsi aafipeele ʉgwise.
19 Iisikʉ lɨmo ababombi baa Isaka balɨnkʉkʉmba mu ntebeela gʉla, balɨnkʉjaaga ɨnyiibʉko jaa mɨɨsi. 20 Po abatiimi abaa mu Gelali balɨnkwanda ʉkʉlwɨlanila na batiimi abaa Isaka, balɨnkʉtɨ, “Amɨɨsi aga gɨɨtʉ!” Po Isaka alɨnkʉkɨpa ɨkiina ɨkyo ɨkya mɨɨsi ɨngamu ɨjaa Eseki,c paapo abatiimi abaa mu Gelali baalwɨlanilaga nagwe. 21 Po abatiimi baa Isaka balɨnkʉkʉmba ɨkiina ɨkɨngɨ ɨkya mɨɨsi, kyope balɨnkʉlwɨlanila. Ɨkyo alɨnkʉkɨpa ɨngamu jaa Sitina.d 22 Po Isaka alɨnkʉsookako kʉla, alɨnkwakʉkʉmba ɨkiina ɨkɨngɨ. Ɨkyo bakaalwɨlaniilepo. Po alɨnkʉkɨpa ɨngamu jaa Lehoboti,e paapo aatile, “Akabalɨlo aka ɄNTWA atʉpeele ʉbʉjo ʉbweleefu, aatukʉbaalaga nkiisʉ.”
23 Isaka alɨnkʉsookapo apo, alɨnkʉbʉʉka kʉ Beeli-Syeba. 24 ɄNTWA alɨnkʉnsetʉkɨla ɨkɨlo kɨlakɨla, alɨnkʉmmbʉʉla alɨnkʉtɨ, “Ʉne ne Kyala gwa gʉʉso Abulahamu. Ʉlɨngatiilaga, paapo ʉne ndɨ pamopeene na nungwe, ngʉkʉsaja nʉ kʉbabaasya abaa ndʉjungu lwako, kʉnongwa jaa lwitɨkano lwangʉ ʉlʉ naafingile na Abulahamu ʉmbombeli gwangʉ.” 25 Po Isaka alɨnkʉjenga kʉla ɨkɨgemo kya kwipuutɨlapo, alɨnkʉmmwipuuta ɄNTWA. Alɨnkʉjenga kʉla ɨheema jaake, po ababombi baake balɨnkʉkʉmba ɨkiina ɨkɨngɨ ɨkya mɨɨsi.
26 Isaka bo ikʉtʉʉgala kʉla, Abimeleki alɨnkʉfuma kʉ Gelali aalongoseenie ni ifumu gwake Ahusati, na Fikoli ʉnkʉlʉmba gwa basikali baake, balɨnkʉbʉʉka kwa Isaka. 27 Isaka alɨnkʉbalaalʉʉsya alɨnkʉtɨ, “Mubɨngɨliile ɨfiki kʉmyangʉ? Keeta mwalɨɨmbengile nʉ kʉngaga kʉmyɨnu?” 28 Balɨnkʉmmwamula balɨnkʉtɨ, “Tʉsyageenie ʉkʉtɨ ɄNTWA alɨ pamopeene na nungwe. Po kanunu tʉfinge ʉkʉja nʉ lʉtengaano na nungwe. Tʉbɨɨke ʉlwitɨkano, 29 ʉkʉtɨ ʉgwe ʉtikʉtʉbombelaga ɨmbiibi, bo ʉlʉ ʉswe tʉkaakʉpalamaasiisyepo. Twakʉbombiile ɨnunu, twakʉlekile ʉkʉtɨ ʉbʉʉkege nʉ lʉtengaano. Ʉlʉ ʉgwe ʉlɨ nsajigwa gwa NTWA.” 30 Po Isaka alɨnkʉbapɨɨjɨla ɨfindʉ ɨfingi, balɨnkʉlya nʉ kʉnwa. 31 Balɨnkʉlaabɨla nʉlʉbʉnjʉ fiijo, balɨnkʉlapa. Po Isaka alɨnkʉbasindɨkɨla, balɨnkʉbʉʉka kʉmyabo nʉ lʉtengaano. 32 Iisikʉ lɨlalɨla, ababombi baa Isaka balɨnkwisa kʉkʉmmbʉʉla ɨnongwa sya kʉkʉmba ɨkiina ɨkyo ɨkya mɨɨsi, balɨnkʉtɨ, “Tʉgaagile amɨɨsi!” 33 Ɨkiina ɨkyo Isaka alɨnkʉkɨpa ɨngamu jaa Syeba.f Po akaaja ako ɨngamu jaake jo Beeli-Syeba mpaka ʉlʉ.
Esabu na bakasi baake aBahiti