Abaana abangɨ abaa Abulahamu
25
Abulahamu alɨnkwega ʉnkiikʉlʉ ʉjʉngɨ, ɨngamu jaake aalɨ jo Ketula. 2 Ketula joope alɨnkʉmpaapɨla abaana, ɨngamu syabo syo ɨsi, Simulani, Jokisyani, Mendani, Mityani, Isibaki na Suja. 3 Jokisyani alɨnkʉmpaapa Syeba na Ndetani, ʉgwise gwa Baasyulu, aBaletusi na Baleumi. 4 Mityani joope alɨnkʉmpaapa Efa, Efeli, Hanoki, Abinda na Elinda. Boosa abo baalɨ baa ndʉjungu ʉlwa Ketula.5 Abulahamu alɨnkʉmpa Isaka ɨkɨlɨngo kya kyʉma kyake kyosa. 6 Looli abaana aba aapaapile na bakasi baake abangɨ, alɨnkʉbapa ɨfyabʉpe. Abulahamu bo aliko kʉ bʉʉmi, alɨnkʉbapaagʉlania nʉ mwanaake Isaka. Alɨnkʉbatʉma kʉbʉtali nkiisʉ ɨkɨngɨ ɨkya kʉbʉsookelo.
Ʉbʉfwe bwa Abulahamu
7 Abulahamu aagonile ɨfyɨnja 175. 8 Alɨnkʉfwa bo alɨ nɨ fyɨnja ɨfingi fiijo, aasajiigwe fiijo mbʉʉmi bwake. Aafwile bo ʉlwa biisʉkʉlʉ aba baatalilepo. 9 Abaanaake Isaka na Isimaɨli, balɨnkʉnsyɨla ʉgwisabo mu mbako ɨjaa Makipela, kɨfuki na kʉ Mamule, mu ngʉnda ʉgwa Efuloni, ʉmwana gwa Sohali ʉgwa kɨkolo kya Bahiti. 10 Ʉngʉnda ʉgo, Abulahamu aalyʉlile kʉ Bahiti.a Apo po apa baasyɨliigwe Abulahamu nʉ nkasi Sala. 11 Abulahamu bo afwile, Kyala alɨnkʉnsaja Isaka ʉmwanaake. Akabalɨlo ako Isaka aatʉʉgalaga kɨfuki na kʉ Beeli-Lahai-Loi.
Abaa ndʉjungu lwa Isimaɨli
12 Aba bo baa ndʉjungu lwa Isimaɨli, ʉmwana gwa Abulahamu, ʉnna aalɨ jo Hagali ʉMmisili, ʉntʉmwa gwa Sala. 13 Ɨsi syo ngamu sya baana baa Isimaɨli, ʉkʉkongana nʉ kʉpaapigwa kwabo. Ʉgwa kɨpanda ɨngamu jaake aalɨ jo Nebajoti, balɨnkʉkonga Kendali, Andibeli, Mibusamu, 14 Misima, Ndʉma, Masa, 15 Handali, Tema, Jetuli, Nafisi na Kendema. 16 Abo bo baana kalongo na babɨlɨ abaa Isimaɨli. Kʉkʉtɨ mwana alɨnkʉja ndongosi gwa kɨkolo kyake, kʉkʉtɨ kɨkolo kyalɨ nʉ twaja twake.b
17 Isimaɨli aafwile bo ʉlwa biisʉkʉlʉ aba baatalilepo. Bo ikʉfwa, aalɨ nɨ fyɨnja 137. 18 Abaa ndʉjungu lwa Isimaɨli baatʉʉgalaga ʉkwandɨla nkaaja akaa mu Habila mpaka kʉ Syuli. Ʉbʉjo ʉbo bwalɨ kʉkɨbafu ɨkya kʉbʉsookelo ʉkʉfuma kʉkiisʉ ɨkya mu Misili, ʉkʉlabɨla kʉkiisʉ ɨkya mu Asyulu. Kʉla baabengeene na baamyabo boosa abaa ndʉjungu ʉlwa Abulahamu.
Abaa ndʉjungu lwa Isaka
19 Aba bo baa ndʉjungu lwa Isaka ʉmwana gwa Abulahamu. 20 Isaka bo alɨ nɨ fyɨnja amalongo mana, alɨnkʉmmwega Lebeka, iilʉmbʉ gwa Labani. Ʉgwisabo aalɨ jo Betweli, ʉgwa nkɨkolo ɨkya Alamu, nkiisʉ ɨkya mu Pandani-Alamu.
21 Lebeka aalɨ nngʉmba, po Isaka alɨnkʉnsʉʉma ɄNTWA. ɄNTWA alɨnkʉpɨlɨka ʉlwipuuto lwake, po Lebeka alɨnkʉja nɨ kɨfuba. 22 Ɨkɨfuba ɨkyo kyalɨ kya mapasa. Abaana baagutanaga. Po Lebeka alɨnkʉnndaalʉʉsya ɄNTWA alɨnkʉtɨ, “Fiki silɨ bo ʉlo kʉmyangʉ?” 23 ɄNTWA alɨnkʉmmwamula alɨnkʉtɨ,
“Nkɨfuba kyako, filimo ɨfikolo fibɨlɨ.
Ɨfikolo fibɨlɨ ɨfyo fikwisa kʉtapʉkana ʉkwandɨla pakʉpaapigwa.
Ɨkɨkolo kɨmo kikwisa kʉja na maka fiijo ʉkʉkɨnda ɨkɨngɨ,
ʉmwana ʉnkʉlʉmba ikwisa kʉmmbombelaga ʉnnandɨ.”
24 Akabalɨlo akaa kʉpaapa bo kafikile, Lebeka alɨnkʉpaapa amapasa. 25 Ʉmwana gwa kwanda aalɨ nkeseefu, ʉmbɨlɨ gwake goosa gwafwene nʉ mundʉ ʉjʉ afwele ʉmwenda gwa lʉsyoja. Fyobeene baalɨmpeele ɨngamu jaa Esabu.c 26 Ʉmwana ʉgwa bʉbɨlɨ bo ikʉpaapigwa, aalɨnkolile ɨkɨtende Esabu. Fyobeene baalɨmpeele ɨngamu ɨjaa Jaakobo.d Esabu na Jaakobo bo bikʉpaapigwa, ʉgwisabo Isaka aalɨ nɨ fyɨnja 60.
Esabu ikʉʉlɨsya ʉbʉkʉlʉmba bwake
27 Abaana abo balɨnkʉkʉla. Esabu alɨnkʉja mfwɨmi nnunu fiijo, aaliiganile ʉkʉlɨnda mmatengele. Looli ʉmwene Jaakobo aalɨ mooloolo, aaliiganile ʉkʉlɨnda pakaaja. 28 Esabu antwalɨlaga ʉgwise ɨnyama ɨsi aafwɨmaga, fyobeene Isaka aalɨnnganile Esabu. Looli ʉnnabo Lebeka aalɨnnganile Jaakobo.
29 Iisikʉ lɨmo bo Jaakobo ikʉpɨɨja ɨnandala, Esabu alɨnkʉfika bo afumile nkʉfwɨma, jaalɨnkolile fiijo ɨnjala. 30 Alɨnkʉmmbʉʉla Jaakobo alɨnkʉtɨ, “Ʉmbepo ɨnandala ɨngeseefu ɨsyo ndyepo, paapo ngʉfwa kʉ njala.” Fyobeene baalɨmpeele ɨngamu jaa Etomu.e 31 Jaakobo alɨnkʉmmwamula alɨnkʉtɨ, “Nyʉʉlɨkɨsya taasi ʉbʉkʉlʉmba bwako ʉbwa kʉja mwana gwa kɨpanda, po angʉkʉpa.” 32 Esabu joope alɨnkwamula alɨnkʉtɨ, “Keeta, ndɨ kɨfuki ʉkʉfwa nɨ njala! Ʉkʉja mwana gwa kɨpanda kukʉʉmbʉmbʉlɨlaga ɨfiki kangɨ?” 33 Jaakobo alɨnkʉtɨ, “Lapa taasi kʉmyangʉ.” Esabu alɨnkʉlapa, alɨnkʉmmʉʉlɨkɨsya ɨkɨlɨngo kyake ɨkya kʉja mwana gwa kɨpanda. 34 Po Jaakobo alɨnkʉmpa Esabu ɨkɨsyesye nɨ nandala. Esabu alɨnkʉlya nʉ kʉnwa amɨɨsi, po alɨnkʉsookapo.
Mo muno Esabu aabʉhenuliile ʉbʉkʉlʉmba bwake ʉbwa kɨpanda.