Abulahamu ikʉʉla ʉbʉjo bwa kʉnsyɨlapo ʉnkasi
23
Sala aagonile ɨfyɨnja 127. 2 Aafwile bo alɨ nkaaja akaa mu Kilyati-Alaba, akaaja ako mmasikʉ aga bikʉtɨ Hebuloni, nkiisʉ ɨkya mu Kaanani. Abulahamu alɨnkʉnndɨlɨla ɨɨfwa ɨngʉlʉmba. 3 Po Abulahamu alɨnkʉgʉleka ʉmfimba gwa nkasi, alɨnkwakʉjoba na Bahiti, abenekaaja baa nkiisʉ kɨla, alɨnkʉtɨ, 4 “Ʉne ndɨ nheesya nkiisʉ kyɨnu. Ngʉbasʉʉma muunyʉʉlɨkɨsye ʉbʉjo bwa kʉnsyɨlapo ʉnkasi gwangʉ.”5 Po aBahiti balɨnkʉmmwamula balɨnkʉtɨ, 6 “Gwe ntwa gwɨtʉ, ʉtʉpɨlɨkɨsye! Ʉgwe gwɨmɨkiigwe fiijo mmyɨtʉ muno. Gwisalɨlepo iipʉmbaa iinunu ɨlɨ kʉlonda ʉkʉnsyɨlamo ʉnkasigo. Akajapo ʉjʉ abagiile ʉkʉkwima iipʉmba ɨlya kʉnsyɨlamo.” 7 Po Abulahamu alɨnkʉsumuka, alɨnkʉfugama nʉ kwinama mpaka paasi nkyeni ndʉkomaano lwa Bahiti, abenekaaja baa nkiisʉ kɨla. 8 Alɨnkʉbabʉʉla alɨnkʉtɨ, “Lɨnga muunyiitɨkɨsye ʉkʉnsyɨla ʉnkasi gwangʉ, mumbɨlɨkɨsye, mukambyelekesye kwa Efuloni ʉmwana gwa Sohali, 9 ʉkʉtɨ aanyʉʉlɨkɨsye ɨmbako jaake ɨjaa pa Makipela ɨjɨ jɨlɨ kʉbʉmalɨɨkɨsyo bwa ngʉnda gwake. Mummbʉʉle aanyʉʉlɨkɨsye nkyeni mmyɨnu kʉ ntengo ʉgʉ iiganile, ʉkʉtɨ ngabe ʉbʉjo bwangʉ ʉbwa kʉsyɨlapo.”
10 Ʉmwene Efuloni aalipo, aatʉʉgeele pamopeene na Bahiti abanine pa kɨpata kya kwingɨlɨla nkaaja. Po alɨnkʉmmwamula Abulahamu nkyeni mmyabo boosa, alɨnkʉtɨ, 11 “Hɨmma ntwa gwangʉ, ʉmbɨlɨkɨsye. Ngʉkʉpapo itolo ʉngʉnda gʉla nɨ mbako jaake. Ngʉkʉpapo nkyeni mBahiti biinangʉ, ʉnsyɨle ʉnkasigo.” 12 Abulahamu alɨnkʉfugama nʉ kwinama kangɨ nkyeni mBahiti bala. 13 Alɨnkʉmmbʉʉla Efuloni bo abandʉ bala bikʉpɨlɨkɨsya, alɨnkʉtɨ, “Ngʉkʉsʉʉma ʉmbɨlɨkɨsye. Angʉkʉpa ɨndalama ɨsi sifwene nʉ ntengo gwa kʉʉla ʉngʉnda ʉgo. Ambɨlɨla ʉkʉtɨ ngabe ʉbʉjo bwa kʉnsyɨlapo ʉnkasi gwangʉ.” 14 Efuloni alɨnkʉmmwamula Abulahamu alɨnkʉtɨ, 15 “Gwe ntwa gwangʉ, ʉmbɨlɨkɨsye. Ʉngʉnda gʉla gwalyʉliigwe kʉ ntengo ʉgwa ndalama 400, leelo ʉne na nungwe tʉmanyeene. Ʉgwe kansyɨlemo ʉnkasigo.”
16 Po Abulahamu na Efuloni balɨnkwitɨkana. Abulahamu alɨnkʉmpɨmɨla Efuloni ʉbʉsito bwa ndalama ɨsi biitɨkeene nkyeni mBahiti abanine. Ʉbʉsito bʉla bwalɨ bo bʉla abakyulusi baa nkabalɨlo kala baapɨmaga bo bikʉʉlɨsya.
17 Mo muno Abulahamu aakabiile ʉngʉnda gwa Efuloni ʉgʉ gwalɨ kʉ Makipela kɨfuki na kʉ Mamule, pamopeene nɨ mbako jaake nɨ mipiki gyosa, ʉkʉtɨ fijege fyake. 18 Ɨsyo syabombiigwe nkyeni mbalongosi abaa Bahiti, aba baabʉngeene pa kɨpata kya kaaja kala.