Kyala ikʉnngela Abulahamu
22
Akabalɨlo bo kakɨndilepo, Kyala aalɨnngelile Abulahamu. Aalɨnkooliile aatile, “Abulahamu!” Abulahamu alɨnkwitɨka alɨnkʉtɨ, “Gwe NTWA, ndipo apa.” 2 Kyala alɨnkʉmmbʉʉla alɨnkʉtɨ, “Ʉmmwege Isaka ʉmwanaako jʉmojwene ntɨga, ʉjʉ ʉnnganile, ʉbʉʉke nagwe nkiisʉ ɨkya mu Molija, pa kyamba ɨkɨ ngwakʉkʉnangɨsya. Ʉko ʉkaasookesye ʉkʉtɨ aje ikemo ɨlyokye.”3 Po kɨlaabo kyake Abulahamu alɨnkʉlaabɨla nʉlʉbʉnjʉ, alɨnkʉtendekesya ɨmbabʉ sya kʉkokesya iikemo. Alɨnkʉjeega ɨmbunda jaake na batʉmwa baake babɨlɨ, pamopeene nʉ mwanaake Isaka. Po alɨnkwanda ɨnjɨla ɨjaa kʉbʉʉka kʉbʉjo ʉbʉ aalɨnndagiile Kyala. 4 Pi isikʉ lya bʉtatʉ Abulahamu alɨnkʉkeeta kʉbʉtali, alɨnkʉbʉbona ʉbʉjo bʉla. 5 Alɨnkʉbabʉʉla abatʉmwa baake alɨnkʉtɨ, “Musyale apa nɨ mbunda. Ʉne nʉ mwanangʉ, tukʉbʉʉka kʉla kʉkʉmmwipuuta Kyala. Tukwakʉgomoka bo tʉmalile.” 6 Po Abulahamu alɨnkwega ɨmbabʉ sya kʉkokesya iikemo, alɨnkʉntwɨka ʉmwanaake Isaka. Ʉmwene alɨnkwega ʉmooto nʉ lʉʉbo, balɨnkʉbʉʉka bobabɨɨlɨ.
7 Mu njɨla Isaka alɨnkʉjoba nʉ gwise Abulahamu alɨnkʉtɨ, “Taata!” Alɨnkwitɨka alɨnkʉtɨ, “Mwanangʉ! Kʉtɨ fiki?” Isaka alɨnkʉtɨ, “Tʉlɨ nʉ mooto nɨ mbabʉ, akangʼoosi kaa kʉsoosya iikemo ɨlyo kalɨ kʉʉgʉ?” 8 Abulahamu alɨnkʉmmwamula alɨnkʉtɨ, “Mwanangʉ, Kyala jʉʉjo jo ikʉsoosya ɨngʼoosi jaa ikemo.” Po balɨnkwenda ɨnjɨla jaabo. 9 Balɨnkʉfika pabʉjo ʉbʉ Kyala aalɨnnangiisye Abulahamu, po Abulahamu alɨnkʉtendekesya ɨkɨgemo kya kwipuutɨlapo, alɨnkʉbɨɨkapo ɨmbabʉ. Alɨnkʉmpinya ʉmwanaake Isaka, alɨnkʉnndambalɨka pa mbabʉ. 10 Alɨnkʉkwaba ʉlʉʉbo lwake, alɨnkʉgolosya ɨkɨboko kyake ʉkʉtɨ ammboole ʉmwanaake. 11 Looli ʉgwandʉmi gwa NTWA alɨnkʉnkoolela ʉkʉfuma kʉmwanya alɨnkʉtɨ, “Abulahamu, Abulahamu!” Alɨnkwitɨka alɨnkʉtɨ, “Ndipo apa!” 12 Ʉgwandʉmi jʉla alɨnkʉtɨ, “Ʉlɨngamfulasya ʉmwanaako! Ʉlɨngammbombela nakamo! Lɨɨlɨno mmeenye ʉkʉtɨ kʉntiila Kyala, paapo ʉkammwima ʉkʉmpa ʉmwanaako jʉmojwene ntɨga.” 13 Abulahamu alɨnkʉkeetako kʉ nyuma, alɨnkʉjɨbona ɨngʼoosi ɨmbongo jiikolile ɨmbembe nkɨsyanjʉ. Po alɨnkʉbʉʉka kʉkʉjeega, alɨnkʉjɨsoosya ʉkʉja ikemo ɨlyokye pabʉjo bwa mwanaake.
14 Abulahamu alɨnkʉbʉpa ʉbʉjo bʉla ɨngamu jaa Jehoba-Jile kokʉtɨ, ɄNTWA ikʉpa! Fyobeene mpaka lɨɨlɨno abandʉ bikʉtɨ, “Nkyamba kya NTWA abandʉ bikʉpeeligwa.” 15 Po ʉgwandʉmi gwa NTWA alɨnkʉnkoolela Abulahamu ʉlwa bʉbɨlɨ ʉkʉfuma kʉmwanya, 16 alɨnkʉtɨ, “ɄNTWA ikʉtɨ, ‘Paapo ʉkaanyiima ʉmwanaako jʉmojwene ntɨga, ndapile ʉne ʉkʉtɨ, 17 angʉkʉsaja ʉgwe na baa ndʉjungu lwako, angʉbabaasya bo ʉlwa ndondwa sya mu mpaalanga, kangɨ bo ʉlwa nsanga gwa kwa sʉmbɨ. Abaa ndʉjungu lwako bikwisa kʉbatolaga abalʉgʉ ntwaja twabo. 18 Ʉkwendela mmbandʉ baa ndʉjungu lwako, abandʉ boosa abaa pakiisʉ bikʉsajigwaga, paapo gwitiike ɨsi ngʉlagiile.’ ”
19 Abulahamu alɨnkʉgomokelako kʉ batʉmwa baake, alɨnkʉbʉʉka pamopeene nabo kʉ Beeli-Syeba. Po Abulahamu alɨnkwendelela ʉkʉtʉʉgala ʉko.
Abaana baa Naholi
20 Ɨsyo bo simaliike, ʉmundʉ jʉmo aalɨmmbʉʉlile Abulahamu aatile, “Milika joope ampaapiile abaana Naholi ʉnnugunago.”a
21 Ʉmwanaake ʉnnyambala ʉgwa kɨpanda aalɨ jo Usi. Ʉnnuguna ɨngamu jaake aalɨ jo Busi. Ʉgwa bʉtatʉ ɨngamu jaake aalɨ jo Kemueli. Ʉjʉ jo gwise gwa Alamu. 22 Abaana abangɨ ɨngamu syabo syo ɨsi, Kesendi, Haso, Pilundasi, Jindilafu na Betweli. 23 Betweli aalɨ gwise gwa Lebeka. Abaana abo lwele, Milika aalɨmpaapiile Naholi, ʉnnuguna gwa Abulahamu.
24 Naholi aalɨ nʉ nkasi ʉjʉngɨ ʉnnandɨb ɨngamu jaake Leuma. Joope aalɨmpaapiile abaana, ɨngamu syabo syo ɨsi, Teba, Gahamu, Tahasi na Maka.