Ʉkʉpaapigwa kwa Isaka
21
ɄNTWA alɨnkʉmpaakɨsya Sala, alɨnkʉbomba ɨsi aafingile.a 2 Po Sala alɨnkʉja nɨ kɨfuba, alɨnkʉmpaapɨla Abulahamu ʉmwana ʉnnyambala mbʉkangale bwake, pakabalɨlo kalakala aka aajobile Kyala. 3 Abulahamu alɨnkʉmpa ʉmwana ʉjo ɨngamu ɨjaa Isaka. 4 Isaka bo alɨ na masikʉ lwele, Abulahamu alɨnkʉmmbuuta kʉkyeni, bo muno aalɨnndagɨliile Kyala. 5 Abulahamu aalɨ nɨ fyɨnja 100, bo Isaka ikʉpaapigwa.6 Sala alɨnkʉtɨ, “Kyala apelile ʉne ʉkʉseka.b Gwesa ʉjʉ ikʉpɨlɨkaga ɨsi, ikʉsekaga bo ʉlwangʉ.” 7 Kangɨ alɨnkʉtɨ, “Jwani aabagiile ʉkʉmmbʉʉla Abulahamu ʉkʉtɨ, na niine Sala ngʉmmongesyaga ʉmwana? Keeta! Nʉmpaapiile ʉmwana ʉnnyambala mbʉkangale bwake!”
Hagali na Isimaɨli bikʉkagigwa
8 Isaka alɨnkʉkʉla. Pi isikʉ ɨlɨ baalɨnndekiisye ʉkonga, Abulahamu aapɨɨjile ɨfindʉ ɨfya lʉsekelo ʉlʉkʉlʉmba. 9 Iisikʉ lɨmo, Sala alɨnkʉmmbona Isimaɨli, ʉmwana gwa Abulahamu ʉjʉ aapaapiigwe na Hagali ʉMmisili, ikʉmmʉʉgɨɨlɨla ʉmwanaake Isaka. 10 Po Sala alɨnkʉmmbʉʉla Abulahamu alɨnkʉtɨ, “Ʉnkage ʉntʉmwa ʉjʉ nʉ mwanaake! Akabagɨla ʉmwana gwa ntʉmwa ʉkʉkaba ɨkɨlɨngo pamopeene nʉ mwanangʉ Isaka.” 11 Ɨsyo silɨnkʉmfulasya fiijo Abulahamu, paapo Isimaɨli joope aalɨ mwanaake. 12 Looli Kyala alɨnkʉmmbʉʉla Abulahamu alɨnkʉtɨ, “Ʉlɨngasulumaniaga kʉnongwa jaa ntʉmwa gwako nʉ mwanaake. Syosa ɨsi Sala ikʉkʉsʉʉma, ʉbombege, paapo ʉkwendela kwa Isaka kʉkaba ʉlʉjungu ʉlʉ lukʉjaga lwako. 13 Ʉmwana gwa ntʉmwa gwako joope angʉmpela ʉkʉja gwise gwa kɨkolo ɨkɨnywamu, paapo mwanaako joope.”
14 Kɨlaabo kyake Abulahamu alɨnkʉlaabɨla nʉlʉbʉnjʉ, alɨnkwega ɨfindʉ nʉ lʉpaale lwa mɨɨsi, alɨnkʉfibɨɨka pa kɨbeja kya Hagali, alɨnkʉnkaga pamopeene nʉ mwanaake. Po balɨnkʉsookapo, balɨnkʉbʉʉka ndʉngalangala ʉlwa Beeli-Syeba, balɨnkwembeela mula.
15 Amɨɨsi bo gamaliike, Hagali alɨnkʉnndambalɨka ʉmwanaake pa kɨpepo ɨkya kɨsyanjʉ. 16 Po alɨnkʉsemela pabʉtali, ʉbʉtali ʉbwa kʉsopa iibwe, alɨnkʉtʉʉgala alɨnkʉtɨ, “Ndikʉlonda ʉkʉnkeeta ʉmwanangʉ bo ikʉfwa.” Apa aatʉʉgeele, alɨnkwanda ʉkʉlɨla kʉ bʉsulumanie. 17 Kyala alɨnkʉmpɨlɨka ʉmwana jʉla ikʉlɨla. Po ʉgwandʉmi gwa Kyala alɨnkʉnndaalʉʉsya Hagali ʉkʉfuma kʉmwanya alɨnkʉtɨ, “Siliko ɨsya fiki ɨsi sikʉkʉtaamya? Ʉlɨngatiilaga! Kyala ampɨliike ʉmwana pala ikʉlɨla. 18 Sumuka, ʉkampɨmbe ʉmwanaako, ʉmmbɨɨke kanunu mmaboko gaako. Ʉne angʉmpela ʉkʉja mpaapi gwa kɨkolo ɨkɨnywamu.”
19 Kyala alɨnkʉmmwigʉla amaaso Hagali, po alɨnkʉkɨbona ɨkiina kya mɨɨsi. Alɨnkʉbʉʉka kʉkʉnega amɨɨsi, alɨnkwisʉsya ndʉpaale, alɨnkʉnnwesya ʉmwana.
20 Kyala anndɨndɨlɨlaga ʉmwana jʉla, aakʉlile. Aatʉʉgalaga ndʉngalangala, aalɨ mmangʼanyi gwa kʉfwɨmɨla ʉbʉpɨnde nɨ mitipʉlo. 21 Bo alɨ ndʉngalangala ʉlwa mu Palani, ʉnna aalɨmmwegiile ʉnkiikʉlʉ ʉjʉ aafumile nkiisʉ ɨkya mu Misili.
Abulahamu na Abimeleki bikʉlapa
22 Iisikʉ lɨmo Abimeleki pamopeene nʉ nkʉlʉmba gwa basikali baake, ɨngamu jaake Fikoli, balɨnkʉbʉʉka kwa Abulahamu. Abimeleki alɨnkʉtɨ, “Silɨ pabwelu, Kyala alɨ pamopeene na nungwe ndɨ syosa ɨsi kʉsibomba. 23 Po lɨɨlɨno ʉlape mu ngamu jaa Kyala ʉkʉtɨ, ʉtikwisa kʉʉsyobamo ʉne, na boosa abaa ndʉjungu lwangʉ. Bo ʉlʉ ʉne ngʉbombiile ɨsya bwanalooli, bo lʉlʉʉlo nungwe ʉʉmbombele ɨnunu ʉne, nɨ kiisʉ ɨkɨ ʉjengilemo gwe nheesya.” 24 Abulahamu alɨnkʉtɨ, “Eena, ngʉlapa.” 25 Looli alɨnkwijaaja kwa Abimeleki ɨkiina kya mɨɨsi, ɨkɨ abatʉmwa baa Abimeleki baapokile kʉmyake. 26 Abimeleki alɨnkʉmmwamula alɨnkʉtɨ, “Ngammanya ʉjʉ asibombile ɨsyo, ʉkaambʉʉlamo sikʉ. Ʉmwisyʉgʉ lwa kwanda ʉkʉpɨlɨkamo ɨnongwa ɨsyo.”
27 Po Abulahamu alɨnkʉtwala ɨngʼoosi, ɨmbene nɨ ngʼombe, alɨnkʉmpapo Abimeleki, balɨnkʉfinga ʉlwitɨkano bobabɨɨlɨ. 28 Abulahamu alɨnkʉsalapo ʉtʉmwana twa ngʼoosi ʉtʉlama, tʉhaano na tʉbɨlɨ. 29 Abimeleki alɨnkʉnndaalʉʉsya alɨnkʉtɨ, “Fiki ʉsalile twene tʉhaano na tʉbɨlɨ?” 30 Abulahamu alɨnkʉmmwamula alɨnkʉtɨ, “Gwege ʉtʉngʼoosi ʉtʉ tʉhaano na tʉbɨlɨ ʉkʉfuma kʉmyangʉ, ʉkʉtɨ kɨjege kɨmanyilo kya kʉnangɨsya ʉkʉtɨ jo ʉne naakʉmbile ɨkiina kya mɨɨsi ɨkɨ.” 31 Jo nongwa ɨjɨ ɨkiina kya mɨɨsi kɨla balɨnkʉkɨpa ɨngamu jaa Beeli-Syeba,c paapo abandʉ abo baalapile.
32 Bo bamalile ʉkʉlapa pa Beeli-Syeba, Abimeleki alɨnkʉsookapo pamopeene na Fikoli, ʉnkʉlʉmba gwa basikali baake, balɨnkʉgomokelamo nkiisʉ ɨkya Bafilisiti. 33 Abulahamu alɨnkʉbyala ʉmpandapanda pa Beeli-Syeba, apo alɨnkwipuuta kʉ NTWA, Kyala gwa bwila na bwila. 34 Abulahamu alɨnkʉtʉʉgala mbʉheesya nkiisʉ kya Bafilisiti amasikʉ mingi.