Abulahamu ikʉnsyoba Abimeleki
20
Abulahamu alɨnkʉsookamo mu Mamule, alɨnkʉbʉʉka kwitongo kʉ lʉngalangala ʉlwa mu Negebu. Bo afikile kʉla, alɨnkʉjenga ɨheema pakatɨ pa twaja ʉtwa mu Katesi na mu Syuli. Po alɨnkwakʉtʉʉgala nkaaja akaa mu Gelali, alɨnkʉja nheesya mula. 2 Po Abulahamu alɨnkʉbabʉʉla ʉkʉtɨ ʉnkasi Sala akaja nkasi gwake, looli ilʉmbʉ gwake. Po ʉmalafyale gwa nkaaja ako, ɨngamu jaake Abimeleki, alɨnkʉbatʉma abandʉ ʉkʉtɨ bakantwale Sala mu nyumba jaake.3 Looli Kyala pakɨlo alɨnkʉmmwisɨla Abimeleki mu njosi, alɨnkʉmmbʉʉla alɨnkʉtɨ, “Ʉgwe kʉja pakʉfwa, paapo ʉnkiikʉlʉ ʉjʉ ʉmmwegile, nkasi gwa mundʉ!” 4 Akabalɨlo ako Abimeleki aakaalɨ ʉkʉmmanya Sala, alɨnkʉmmwamula alɨnkʉtɨ, “Gwe Ntwa, bʉle, kʉgoga abandʉ aba bakatʉla ɨnongwa? 5 Abulahamu jʉʉjo jo ʉjʉ atile ʉnkiikʉlʉ ʉjo ilʉmbʉ! Sala joope atile Abulahamu ilʉmbʉ gwake! Ɨsi mbombile, mbombile nɨ ndumbula ɨnyeelu, ngaja nʉ bʉtʉlanongwa nabʉmo!”
6 Po Kyala alɨnkʉmmbʉʉla mu njosi ɨjo alɨnkʉtɨ, “Mmeenye ʉkʉtɨ ʉbombile ɨsyo nɨ ndumbula ɨnyeelu. Jo ʉne ngʉsigiile ʉkʉbomba ʉbʉtʉlanongwa, fyobeene ngʉsigiile ʉkʉmpalamaasya ʉnkiikʉlʉ ʉjo. 7 Po lɨɨlɨno ʉnngomokesye ʉndʉme ʉnkiikʉlʉ ʉjo. Abulahamu nkunguluka, aikʉkʉsʉʉmɨla ʉkʉtɨ ʉjeko kʉ bʉʉmi. Looli lɨnga ʉtikʉnngomokesya ʉnkasi, ʉmanye ʉkʉtɨ nalooli kʉfwa ʉgwe, pamopeene na bandʉ baako boosa.”
8 Kɨlaabo kyake Abimeleki alɨnkʉtemeelela nʉlʉbʉnjʉ, alɨnkʉbakoolela abalongosi boosa, alɨnkʉbapangɨla ɨnongwa syosa, balɨnkʉtiila fiijo. 9 Po Abimeleki alɨnkʉnkoolela Abulahamu, alɨnkʉnndaalʉʉsya alɨnkʉtɨ, “Ʉtʉbombiile ɨsya fiki? Ndʉlile ɨnongwa jɨlɨkʉ kʉmyako, mpaka ʉpelile ʉne na bandʉ abaa mbʉnyafyale bwangʉ ʉkʉbomba ʉbʉtʉlanongwa? Ʉʉmbombiile ɨsi sitikʉlondigwa ʉkʉbombigwa.” 10 Kangɨ Abimeleki alɨnkʉnndaalʉʉsya Abulahamu alɨnkʉtɨ, “Ʉbɨngɨliile silɨkʉ ʉkʉbomba bo ʉlʉ?”
11 Abulahamu alɨnkʉmmwamula alɨnkʉtɨ, “Mbombile bo ʉlo paapo naagile ʉkʉtɨ pabʉjo ʉbʉ akajapo ʉmundʉ ʉjʉ ikʉntiila Kyala. Naatiilaga ʉkʉtɨ mwabagiile ʉkʉʉngoga nʉ kwega ʉnkasi gwangʉ. 12 Kangɨ, nalooli ʉjo ilʉmbʉ gwangʉ. Tʉlɨ baa gwise jʉmo, looli tʉkaja baa nna jʉmo, fyobeene naalɨmmwegile ʉkʉja nkasi gwangʉ. 13 Kyala bo aasoosiisye nnyumba jaa taata ʉkʉtɨ nsyʉngʉʉtɨlege, naalɨmmbʉʉlile ʉnkasi gwangʉ naatile, ‘Koosa kʉno tukwendaga, ʉnangɨsyege ʉlʉgano lwako kʉmyangʉ, ʉtɨgɨ ʉne ndɨ ilʉmbʉgo.’ ”
14 Po Abimeleki alɨnkʉmpa Abulahamu ɨngʼoosi, ɨngʼombe na batʉmwa abanyambala na bakiikʉlʉ, alɨnkʉnngomokesya nʉ nkasi Sala. 15 Abimeleki alɨnkʉmmbʉʉla Abulahamu alɨnkʉtɨ, “Keeta, ɨkiisʉ kyosa ɨkɨ kɨlɨ nkyeni mmyako, kyangʉ. Ʉtʉʉgalege poosa apa ʉpaganile.” 16 Abimeleki alɨnkʉmmbʉʉla Sala alɨnkʉtɨ, “Nʉmpeele iilʉmbʉgo ɨndalama 1,000, sya kʉkʉnosya kʉ bandʉ baako boosa, kangɨ ʉkʉtɨ abandʉ boosa bamanye ʉkʉtɨ ʉgwe ʉkatʉla ɨnongwa.”