Ʉkʉpyutigwa ʉkwa twaja ʉtwa mu Sotoma na mu Gomola
19
Namajolo, abandʉmi babɨlɨ bala balɨnkʉfika nkaaja akaa mu Sotoma. Akabalɨlo ako Looti aatʉʉgeele pa kɨpata kya kaaja ako. Bo ababwene, alɨnkʉbʉʉka kʉkʉbambɨlɨla, alɨnkʉfugama, alɨnkwinama nkyeni mmyabo. 2 Alɨnkʉbabʉʉla alɨnkʉtɨ, “Mwe batwa bangʉ, mwise mu nyumba jangʉ, ne mbombeli gwɨnu. Musugusule mmalʉndɨ, mugone pamyangʉ ɨkɨlo ɨkɨ. Nʉlʉbʉnjʉ fiijo, mukwendelelaga nɨ njɨla jɨɨnu.” Looli abeene balɨnkʉmmwamula balɨnkʉtɨ, “Hɨmma, ʉswe tukʉgona pa mpʉʉlo apa.” 3 Looti alɨnkʉbalamba fiijo mpaka baaliitiike, balɨnkwingɨla nnyumba jaake. Po Looti alɨnkʉbabɨɨkɨla ʉlʉsekelo, alɨnkʉbatendekekesya ɨfisyesye ɨfisita nkese, alɨnkʉbapa balɨnkʉlya.4 Looli bo bakaalɨ ʉkʉlambalala, abanyambala ʉkʉfuma mu mbeto syosa ɨsya nkaaja akaa mu Sotoma, abalʉmyana na bakangale, balɨnkʉjɨsyʉngʉʉtɨla ɨnyumba jaa Looti. 5 Balɨnkʉnkoolela balɨnkʉtɨ, “Gwe Looti! Abanyambala aba bingiile mu nyumba jaako ɨjɨ, balɨ kʉʉgʉ? Basoosye panja! Tukʉlonda baje bakasi bɨɨtʉ.” 6 Looti alɨnkʉsooka panja, alɨnkwigala ʉlwigi kʉ nyuma kʉmyake. 7 Alɨnkʉbabʉʉla alɨnkʉtɨ, “Mwe baamyɨtʉ, namuleke! Abandʉ aba mulɨngababombela ɨmbiibi ɨsyo! 8 Keeta! Ndɨ nabo abalɨndwana babɨlɨ aba bakammanyamo sikʉ ʉnnyambala. Namuleke mbasookesye abo, mubabombele ɨsi mwiganile. Looli abanyambala aba, mulɨngababombela ɨmbiibi, paapo abo baheesya bangʉ.”
9 Looli abeene balɨnkʉmmwamula balɨnkʉtɨ, “Sookapo apa! Ʉgwe ʉlɨ nheesya apa, fiki kʉlonda ʉkʉja ndamuli gwɨtʉ? Aatukʉkʉbombela ɨmbiibi ʉkʉkɨnda ɨsi aatukʉbabombela abaheesya baako abo!” Po balɨnkʉnnguta Looti, balɨnkʉlonda ʉkʉpangʉla ʉlwigi. 10 Po abaheesya bala aba baalimo nnyumba balɨnkwigʉla ʉlwigi, balɨnkʉnnduusɨla nnyumba Looti, balɨnkwigala ʉlwigi. 11 Po balɨnkʉbapʉʉpasya amaaso abandʉ bala boosa, abalʉmyana na bakangale, balɨnkʉtoligwa ʉkʉkyaga ɨkɨfigo.
12 Po abandʉmi bala balɨnkʉnndaalʉʉsya Looti balɨnkʉtɨ, “Bʉle, balipo abakamugo aba kʉtʉʉgala nabo nkaaja aka? Pamo abakoogo, abaanaako abanyambala na bakiikʉlʉ? Nakalɨnga ʉbeege, musookemo nkaaja aka! 13 Ɨmbiibi sya benekaaja aka nyingi fiijo, ɄNTWA asimeenye. Fyobeene atʉtʉmile ʉswe kʉkʉkapyuta akaaja aka.” 14 Po Looti alɨnkʉbʉʉka kʉ bako, aba baabasingiile abaanaake abalɨndwana. Alɨnkʉbabʉʉla alɨnkʉtɨ, “Nakalɨnga namusookemo nkaaja aka, paapo ɄNTWA ikʉlonda ʉkʉkapyuta.” Looli abalʉmyana bala balɨnkʉmmbona ngatɨ ikʉʉgɨɨla itolo.
15 Kʉbʉkye abandʉmi bala balɨnkʉnkʉʉjɨsya Looti balɨnkʉtɨ, “Kʉʉjaga! Ʉmmwege ʉnkasigo na baanaako abalɨndwana babɨlɨ, musookemo nkaaja muno, mulɨngapyutigwa, akaaja aka bo kikʉpyutigwa.” 16 Looti alɨnkwilabaasya, looli ɄNTWA alɨnkʉmpelela ɨkɨsa. Po abandʉmi bala balɨnkʉbakola ɨfiboko Looti, ʉnkasi na baanaake abalɨndwana, balɨnkʉbasoosyamo nkaaja. 17 Bo bansoosiisyemo nkaaja, ʉgwandʉmi jʉmo alɨnkʉbabʉʉla alɨnkʉtɨ, “Mubopege, mwiponesye! Mulɨngakeetaga kʉ nyuma nʉ kwɨma pamo, mu ntebeela ʉgo. Mubopele mfyamba, mulɨngapyutigwa.”
18 Looli Looti alɨnkʉbalamba alɨnkʉtɨ, “Hɨmma, batwa bangʉ! 19 Keeta! Mwikyeliile na ne mbombeli gwɨnu, mumbeliile fiijo ɨkɨsa ʉkʉmboka. Looli ngabagɨla ʉkʉbopela mfyamba, paapo filɨ kʉbʉtali fiijo. Ʉlʉpyuto lɨnga lukwisa bo ngaalɨ ʉkʉfika kʉla, angʉgogigwa. 20 Keeta akaaja akanandɨ kala! Ngʉsʉʉma mbopelemo paapo kalɨ kɨfuki, angʉpona.” 21 Ʉgwandʉmi jʉmo alɨnkʉmmwamula alɨnkʉtɨ, “Moomuumo, ngwitɨkiisye na ɨlyo lyope. Andikʉkapyuta akaaja aka ʉkajobile. 22 Nakalɨnga bopela mula! Ngabagɨla ʉkʉbomba simo mpaka ʉfike mula.” Fyobeene akaaja kala kalɨnkʉkooleligwa ɨngamu jaa Soali.a
23 Looti alɨnkʉfika nkaaja akaa mu Soali, iisʉba bo lɨsookile. 24 Po ɄNTWA alɨnkʉlagasya ʉmooto ʉnkalɨ ʉgwa mabwe aga gikwaka, ntwaja ʉtwa mu Sotoma na mu Gomola. 25 Alɨnkʉtʉpyuta ʉtwaja ʉto totʉbɨɨlɨ nʉ ntebeela goosa, pamopeene na bandʉ nɨ mipiki gyosa. 26 Ʉtwaja tʉla bo tukʉpya, ʉnkasi gwa Looti alɨnkʉkeetako kʉ nyuma. Palapala alɨnkʉsanuka ʉkʉja mbanda jaa muunyu.
27 Po kʉbʉkye Abulahamu alɨnkʉbʉʉka pabʉjo ʉbʉ aalyɨmilepo nʉ NTWA. 28 Alɨnkʉkeeta kʉ Sotoma na kʉ Gomola, na kʉ ntebeela goosa. Alɨnkʉlɨbona ɨlyosi ɨlingi likʉfuuka, bo ʉlwa lyosi ɨlya nkɨgemo.
29 Kyala bo ikʉtʉpyuta ʉtwaja ʉtwa mu ntebeela gʉla, aasikʉmbwike ɨnyiipuuto sya Abulahamu. Aalɨnsoosiisyemo Looti ʉkʉtɨ alɨngapyutigwa ntwaja ʉtʉ aatʉʉgalangamo.
Abaana abalɨndwana abaa Looti bikʉlambalala nʉ gwisabo
30 Looti alɨnkʉtiila ʉkʉtʉʉgala mu Soali. Po alɨnkʉfyʉka mfyamba, aalongoseenie na baanaake abalɨndwana, alɨnkʉtʉʉgala mu mbako. 31 Iisikʉ lɨmo ʉmwanaake ʉndɨndwana ʉnkʉlʉmba, alɨnkʉmmbʉʉla ʉnnuguna alɨnkʉtɨ, “Taata akangeele, kangɨ akajapo ʉnnyambala najʉmo ʉgwa kʉtwega nkiisʉ ɨkɨ, bo ʉlʉ bikwegigwa abakiikʉlʉ boosa pakiisʉ. 32 Po isaga tʉnnwesye ɨfinga ɨngalɨ, tʉlambalale nagwe, tʉkabe abaana, po ɨkɨkolo kyɨtʉ aakɨtikʉfwa.”
33 Po ɨkɨlo kɨlakɨla balɨnkʉnnwesya ɨfinga ʉgwisabo mpaka aagaalile, ʉmwanaake ʉndɨndwana ʉnkʉlʉmba alɨnkʉlambalala nagwe. Ʉgwisabo akaameenye muno aalingɨliile nʉ kʉsooka ʉmwanaake ʉndɨndwana ʉjo. 34 Bo bʉkiile, ʉmwanaake ʉndɨndwana ʉnkʉlʉmba alɨnkʉmmbʉʉla ʉnnuguna alɨnkʉtɨ, “Ʉne ndambaleele na taata pakɨlo. Po lɨɨlɨno tʉnnwesye kangɨ ɨfinga ɨngalɨ, po ʉgwe ʉlambalale nagwe. Po twesa aatukʉkaba abaana, ʉlʉjungu lwɨtʉ lukʉbaalaga.” 35 Po ɨkɨlo kɨla, balɨnkʉnnwesya kangɨ ɨfinga ʉgwisabo, alɨnkʉbʉʉka ʉndɨndwana ʉnnandɨ, alɨnkʉlambalala nagwe. Ʉgwisabo akaameenye muno aalingɨliile nʉ kʉsooka ʉndɨndwana jʉla.
36 Mo muno abaanaake abalɨndwana bobabɨɨlɨ baakabiile ɨfifuba ʉkwendela kʉ gwisabo. 37 Ʉndɨndwana ʉnkʉlʉmba alɨnkʉpaapa ʉmwana ʉnnyambala, alɨnkʉmpa ɨngamu ɨjaa Moabu. Ʉjo jo gwise gwa Bamoabub mpaka lɨɨlɨno. 38 Ʉndɨndwana ʉnnandɨ joope alɨnkʉpaapa ʉmwana ʉnnyambala, alɨnkʉmpa ɨngamu ɨjaa Benami. Ʉjo jo gwise gwa Baamonic mpaka lɨɨlɨno.