Abulahamu ikʉbambɨlɨla abaheesya
18
Ɨliisikʉ lɨmo pamuusi bo ʉlʉmu lʉkalɨ, Abulahamu aatʉʉgeele pa kɨfigo kya heema jaake. Po ɄNTWA alɨnkʉnsetʉkɨla mu Mamule kɨfuki nɨ mipandapanda.a 2 Abulahamu alɨnkʉbabona abandʉ batatʉ bɨɨmile pabʉtalipo. Alɨnkʉbopa mbɨbɨmbɨbɨ ʉkʉfuma pa kɨfigo kya heema, alɨnkʉbʉʉka kʉkʉbambɨlɨla. Bo afikile apa baalipo, alɨnkʉfugama nʉ kwinama paasi nkyeni mmyabo, 3 alɨnkʉbabʉʉla alɨnkʉtɨ, “Mwe batwa bangʉ! Ʉne ndɨ mbombeli gwɨnu! Lɨnga mwikyeliile na niine mulɨngakɨɨsaniaga, mutʉʉsyepo pamyangʉ. 4 Babatwalɨle amɨɨsi musugusule mmalʉndɨ, po mutʉʉsyepo pa kɨpepo kya mpiki ʉgʉ. 5 Muguulɨle panandɨ mbatendekekesye ɨfindʉ finandɨ, ʉkʉtɨ mulye muje na maka agaa kwendelela nɨ njɨla jɨɨnu, paapo muunyiisiile ne mbombeli gwɨnu.” Abandʉ bala balɨnkʉmmwamula balɨnkʉtɨ, “Kanunu, bombaga bo muno ʉjobiile.”6 Po Abulahamu nakalɨnga alɨnkwingɨla mu heema, alɨnkʉmmbʉʉla ʉnkasi Sala alɨnkʉtɨ, “Gwege mbɨbɨmbɨbɨ ɨfipɨmo fitatʉ ɨfya bʉfu ʉbʉnunu, ʉbatendekekesye ɨfisyesye abaheesya.” 7 Po Abulahamu alɨnkʉbopa mbɨbɨmbɨbɨ ʉkʉbʉʉka kwi itembe lya ngʼombe, alɨnkwega ɨndama ɨndupe, alɨnkʉmpa ʉntʉmwa gwake. Ʉntʉmwa jʉla nakalɨnga alɨnkʉjɨboola nʉ kʉjookya. 8 Po Abulahamu alɨnkʉbatwalɨla ʉlʉkama ʉlʉpape, ʉlʉpyʉ nɨ nyama jɨla, alɨnkʉbategelekesya ʉkʉtɨ balyemo. Bo balɨ pakʉlyamo, Abulahamu aalyɨmile kɨfuki nabo paasi pa mpiki.
9 Abaheesya bala balɨnkʉnndaalʉʉsya balɨnkʉtɨ, “Ʉnkasigo Sala alɨ kʉʉgʉ?” Abulahamu alɨnkʉbaamula alɨnkʉtɨ, “Alimo mu heema.” 10 Ʉnheesya jʉmo alɨnkʉtɨ, “Nalooli, ɨkyɨnja ɨkɨ kikwisa nkabalɨlo bo kakaaka, angʉgomoka, Sala aikʉja nʉ mwana ʉnnyambala.”
Akabalɨlo ako Sala aalɨ kʉ nyuma, aalyɨmile pa kɨfigo ɨkya heema aapɨlɨkɨsyaga. 11 Abulahamu na Sala baalɨ bakangale, Sala akabalɨlo akaa bʉpaapi kaakɨndile. 12 Sala alɨnkʉseka, alɨnkʉjoba mwene alɨnkʉtɨ, “Keeta ʉne ngangeele fiijo! Ʉndʉme gwangʉ joope akangeele. Mbʉkangale ʉbʉ, mbagiile ʉkʉsaala nʉ ndʉme gwangʉ?”
13 Po ɄNTWA alɨnkʉnndaalʉʉsya Abulahamu alɨnkʉtɨ, “Fiki Sala asekile, kangɨ atile, ‘Nalooli angʉpaapa ʉmwana mbʉkangale bwangʉ ʉbʉ?’ 14 Bʉle, siliko ɨngafu simo ɨsi atoliigwe ɄNTWA? Ɨkyɨnja ɨkɨ kikwisa, ngwakwisa kangɨ nkabalɨlo bo kakaaka, Sala bo apaapile ʉmwana ʉnnyambala!” 15 Looli paapo Sala aalɨ nʉ lʉtende, alɨnkʉkaanika alɨnkʉtɨ, “Ʉne ngasekapo!” ɄNTWA alɨnkʉtɨ, “Hɨmma, ʉgwe ʉsekile.”
Abulahamu ikʉbasʉʉmɨla abandʉ abaa mu Sotoma
16 Abaheesya bala balɨnkʉsumuka, po Abulahamu alɨnkʉbasindɨkɨla. Balɨnkʉfika pabʉjo apa bikʉkabona akaaja akaa mu Sotoma. 17 Po ɄNTWA alɨnkʉtɨ, “Fiki nʉmfinde Abulahamu ɨsi ngʉlonda ʉkʉsibomba? 18 Nalooli ʉmwene aikʉja gwise gwa kɨkolo ɨkɨnywamu ɨkɨ kɨlɨ na maka. Ʉkwendela mmyake angʉbasaja abandʉ abaa mfikolo fyosa. 19 Nʉnsʉngwile ʉmwene, abalongosyege abaanaake, na baa ndʉjungu lwake, bandiilege, babombege ɨsya bʉgolofu nʉ bwanalooli. Po na niine ngʉmmbombelaga Abulahamu ɨsi naafingile kʉmyake.”
20 Po ɄNTWA alɨnkʉtɨ, “Mbɨliike ɨnguuto ɨsya mbiibi ɨnyingi fiijo ɨsya bandʉ abaa ntwaja ʉtwa mu Sotoma na mu Gomola. 21 Po ʉlʉ ngʉsuluka ʉkʉtɨ nsibone ɨmbiibi ɨsi bikʉbomba lɨnga sifwene nɨ nguuto ɨjɨ jɨfikile kʉmyangʉ. Lɨnga sikaja bo ʉlo, angʉsyagania.”
22 Po abandʉ abangɨ bala babɨlɨ, balɨnkwenda mu njɨla ɨjɨ jaalabɨlaga kʉ Sotoma, looli Abulahamu alɨnkʉsyala, aalyɨmile nkyeni mu NTWA. 23 Po Abulahamu alɨnkʉsegelela, alɨnkʉnndaalʉʉsya alɨnkʉtɨ, “Nalooli aakʉbapyuta abagolofu pamopeene na babiibi? 24 Lɨnga nkaaja balimo abagolofu amalongo mahaano, bʉle, aakʉkapyuta akaaja kɨsita kʉbapaakɨsya abandʉ abagolofu abo amalongo mahaano? 25 Mma, sikabagɨsya! Aʉtikʉbagoga abagolofu pamopeene na babiibi, ʉkabagɨla ʉkʉbabombela abagolofu bo ʉlwa babiibi! Sikabagɨsya! Ʉlɨ Ndongi gwa pakiisʉ poosa, ʉtikʉlekamo ʉkʉbomba ɨngolofu!” 26 ɄNTWA alɨnkʉmmwamula alɨnkʉtɨ, “Nkaaja akaa mu Sotoma, lɨnga ngʉbaaga abandʉ abagolofu amalongo mahaano, andikʉkapyuta akaaja koosa, kʉnongwa jaabo!”
27 Abulahamu alɨnkʉjoba kangɨ alɨnkʉtɨ, “Na paapo ndɨ lʉfumbɨ, kangɨ ndɨ mfwandɨlo itolo, looli ngʉkʉsʉʉma njobe na gwe Ntwa gwangʉ. 28 Lɨnga balimo abandʉ abagolofu amalongo mana na bahaano, baagiilwe ʉkʉfika amalongo mahaano, bʉle aakʉkapyuta akaaja koosa ako paapo baagiilwe abagolofu bahaano?” ɄNTWA alɨnkʉmmwamula alɨnkʉtɨ, “Sikaja bo ʉlo! Andikʉkapyuta akaaja ako, lɨnga balimo ʉmo abagolofu amalongo mana na bahaano.”
29 Abulahamu alɨnkʉnndaalʉʉsya kangɨ alɨnkʉtɨ, “Lɨnga balimo ʉmo abagolofu amalongo mana itolo?” Joope alɨnkʉmmwamula alɨnkʉtɨ, “Kʉnongwa jaa bagolofu amalongo mana abo, andikʉkapyuta.” 30 Abulahamu alɨnkʉjoba kangɨ alɨnkʉtɨ, “Gwe Ntwa, ngʉkʉsʉʉma ʉlɨngakalalaga! Ʉʉnyiitɨkɨsye kangɨ. Lɨnga balimo abagolofu amalongo matatʉ?” ɄNTWA alɨnkʉmmwamula alɨnkʉtɨ, “Lɨnga ngʉbaagamo abagolofu amalongo matatʉ, andikʉkapyuta akaaja ako.”
31 Abulahamu alɨnkʉjoba alɨnkʉtɨ, “Ngʉkʉsʉʉma njobe na gwe Ntwa gwangʉ. Akabalɨlo aka, lɨnga balimo abagolofu amalongo mabɨlɨ?” ɄNTWA alɨnkʉmmwamula alɨnkʉtɨ, “Kʉnongwa jaa bagolofu amalongo mabɨlɨ, andikʉkapyuta akaaja ako.” 32 Kʉmmalɨɨkɨsyo, Abulahamu alɨnkʉjoba alɨnkʉtɨ, “Gwe Ntwa gwangʉ, ʉlɨngakalalaga naalamba fiijo, njobepo kangɨ kamokeene itolo. Lɨnga balimo abagolofu kalongo itolo?” ɄNTWA alɨnkʉmmwamula alɨnkʉtɨ, “Kʉnongwa jaa bagolofu kalongo, andikʉkapyuta akaaja ako.” 33 ɄNTWA bo ajobile na Abulahamu, alɨnkʉsookapo. Abulahamu joope, alɨnkʉbʉʉka kʉkaaja kaake.