Kyala ikʉmpa Abulamu ɨkɨmanyilo kya lwitɨkano
17
Abulamu bo alɨ nɨ fyɨnja 99, ɄNTWA alɨnkʉnsetʉkɨla, alɨnkʉmmbʉʉla alɨnkʉtɨ, “Jo ʉne, ne Kyala ʉMwene maka goosa. Mbʉʉmi bwako ʉngongege, kangɨ ʉlɨngajaga na kababye nakamo. 2 Ʉne angʉbɨɨka ʉlwitɨkano na nungwe, angʉbabaasya fiijo abandʉ abaa ndʉjungu lwako.”3 Po Abulamu alɨnkʉfugama, alɨnkwinama mpaka paasi. Po Kyala alɨnkʉmmbʉʉla alɨnkʉtɨ, 4 “Ʉlʉ lo lwitɨkano lwangʉ na nungwe, kwisa kʉja gwise gwa fikolo fingi. 5 Ʉkwandɨla ʉmwisyʉgʉ ʉtikʉkooleligwaga kangɨ ɨngamu jaa Abulamu,a looli kʉkooleligwaga Abulahamu,b paapo ngʉbɨɨkile ʉkʉja gwise gwa fikolo fingi. 6 Angʉbabaasya fiijo abandʉ abaa ndʉjungu lwako. Ʉkʉfuma ndʉjungu lwako aafikʉfuma ɨfikolo fingi, kangɨ aabikʉfumaga abanyafyale.
7 “Angʉbɨɨka ʉlwitɨkano ʉlwa bwila na bwila na nungwe mu sopelo syosa. Aasikʉjaga bo ʉlo kʉmyangʉ na baa ndʉjungu lwako. Angʉja ne Kyala gwako na gwa bandʉ baa ndʉjungu lwako mu sopelo ɨsi sikʉkongaga. 8 Angʉkʉpa ʉgwe na baa ndʉjungu lwako ɨkiisʉ kya mu Kaanani, ɨkɨ ʉlɨ nheesya, kikʉjaga kyɨnu bwila. Ʉne ngʉjaga ne Kyala gwabo.”
9 Po Kyala alɨnkʉmmbʉʉla Abulahamu alɨnkʉtɨ, “Ʉgwe pamopeene na baa ndʉjungu lwako mu sopelo syosa, mulʉkolege ʉlwitɨkano lwangʉ. 10 Po kʉkʉtɨ nnyambala mmyɨnu, abuutigwege kʉkyeni.c Ʉlʉ lo lwitɨkano lwangʉ ʉlʉ mukʉlondigwa ʉkʉlʉkola, ʉgwe na baa ndʉjungu lwako. 11 Mubuutigwege kʉkyeni. Ɨkyo kikʉjaga kɨmanyilo kya lwitɨkano lwangʉ na nuumwe. 12 Mu sopelo syosa ɨsi sikwisaga, kʉkʉtɨ mwana ʉnnyambala abuutigwege kʉkyeni pi isikʉ lya lwele ʉkʉfuma pakʉpaapigwa. Somma beene abaa ndʉjungu lwako, looli boope na batʉmwa aba bapaapiigwe nnyumba jaako, boope na aba bʉʉliigwe nɨ ndalama kʉ baheesya. 13 Kʉkʉtɨ nnyambala ʉjʉ apaapiigwe nnyumba jaako pamo ʉjʉ ʉʉliigwe nɨ ndalama syako, ikʉlondigwa abuutigwege kʉkyeni. Ɨkyo kikʉjaga kɨmanyilo mmibɨlɨ gyɨnu, ɨkya lwitɨkano ʉlwa bwila na bwila. 14 Ʉnnyambala gwesa ʉjʉ akabuutigwa kʉkyeni, ikʉsoosigwangamo mmbandʉ baake, paapo oonangile ʉlwitɨkano lwangʉ.”
Kyala ikʉfinga ʉkʉmpa Abulahamu ʉmwana ʉnnyambala
15 Po Kyala alɨnkwendelela ʉkʉmmbʉʉla Abulahamu alɨnkʉtɨ, “Ʉkwandɨla lɨɨlɨno, ʉlɨngankoolelaga kangɨ ʉnkasigo ɨngamu jaa Salai. Ɨngamu jaake jikʉjaga jo Sala.d 16 Angʉnsaja, aikʉkʉpaapɨla ʉmwana ʉnnyambala. Angʉnsajaga, ikʉja nna gwa fikolo fingi. Ndʉjungu lwake ʉlo, mo bikʉfumaga abanyafyale.”
17 Po Abulahamu alɨnkʉfugama, alɨnkwinama mpaka paasi, alɨnkʉseka, alɨnkwinogona alɨnkʉtɨ, “Ʉmundʉ gwa fyɨnja 100, abagiile bʉleebʉle ʉkʉpaapa ʉmwana? Sala ʉgwa fyɨnja 90, joope abagiile ʉkʉpaapa?” 18 Po Abulahamu alɨnkʉnsʉʉma Kyala alɨnkʉtɨ, “Syajaga nunu lɨnga kwitɨka, Isimaɨli akabe ʉlʉsajo lwako ʉlo.”
19 Kyala alɨnkʉmmwamula alɨnkʉtɨ, “Hɨmma! Looli ʉnkasigo Sala aikʉkʉpaapɨla ʉmwana ʉnnyambala, kʉnkoolelaga ɨngamu ɨjaa Isaka.e Ʉne angʉbɨɨka kangɨ ʉlwitɨkano lwangʉ nagwe na baa ndʉjungu lwake, lukʉjako bwila na bwila. 20 Mbɨliike ɨsi ʉnsʉʉmiile Isimaɨli. Joope angʉnsaja, angʉbabaasya abaa ndʉjungu lwake, angʉbongelapo fiijo. Aikʉja gwise gwa banyafyale kalongo na babɨlɨ,f angʉmpela ʉkʉja mpaapi gwa bandʉ bingi fiijo. 21 Looli ʉlwitɨkano lwangʉ lʉla, angʉlʉbɨɨka na Isaka, ʉmwana ʉjʉ aikʉpaapigwa na Sala ɨkyɨnja ɨkɨ kikwisa nkabalɨlo bo kakaaka.” 22 Kyala bo ajobile ɨsyo, alɨnkʉnndeka Abulahamu.
23 Ɨliisikʉ lɨlalɨla Abulahamu alɨnkʉmmwega ʉmwanaake Isimaɨli, na boosa aba baapaapiigwe nnyumba jaake na aba aabʉʉlile nɨ ndalama syake. Abanyambala boosa abaa nnyumba jaake alɨnkʉbabuuta kʉkyeni bo muno Kyala aalɨnndagɨliile.
24 Abulahamu aabuutiigwe kʉkyeni pamopeene nʉ mwanaake Isimaɨli. Abulahamu bo ikʉbuutigwa kʉkyeni aalɨ nɨ fyɨnja 99, 25 ʉmwanaake Isimaɨli alɨ nɨ fyɨnja kalongo na fitatʉ. 26 Abulahamu nʉ mwanaake Isimaɨli, baabuutiigwe kʉkyeni pi isikʉ lɨmolyene, 27 pamopeene na banyambala aba baapaapiigwe nnyumba jaake, na aba baalyʉliigwe nɨ ndalama kʉ baheesya.