Salai na Hagali
16
Salai ʉnkasi gwa Abulamu akaapaapilemo ʉmwana. Looli aalɨ nʉ ntʉmwa ʉnkiikʉlʉ ʉjʉ aalɨ Mmisili, ɨngamu jaake Hagali. 2 Po Salai alɨnkʉmmbʉʉla Abulamu alɨnkʉtɨ, “Ʉmeenye ʉkʉtɨ ɄNTWA aanyiimile ʉbʉpaapi. Po ngʉkʉsʉʉma, ʉmmwege ʉntʉmwa gwangʉ Hagali ajege nkasigo, pamo abagiile ʉkʉtʉpaapɨla abaana.” Abulamu alɨnkwitɨka ɨsi aajobile Salai. 3 Salai alɨnkʉmpapo Abulamu ʉntʉmwa Hagali ʉMmisili, ʉkʉtɨ ajege nkasi. Ɨsi syabombiigwe bo Abulamu atʉʉgeele nkiisʉ kya mu Kaanani ɨfyɨnja kalongo. 4 Po Abulamu alɨnkwenda na Hagali, Hagali alɨnkʉja nɨ kɨfuba. Hagali bo ameenye ʉkʉtɨ alɨ nɨ kɨfuba, alɨnkwanda ʉkʉmmbombela amatingo Salai ʉmwehe gwake. 5 Po Salai alɨnkʉmmbʉʉla Abulamu alɨnkʉtɨ, “Ʉbʉtolwe ʉbʉ ngʉkaba, bʉjege bwako. Ʉne naakʉpeele ʉntʉmwa gwangʉ ʉkʉtɨ aje nkasigo. Looli bo ameenye ʉkʉtɨ alɨ nɨ kɨfuba, alɨnkwanda ʉkʉʉmbombela amatingo ʉne. ɄNTWA jo alamule ɨnongwa ɨjɨ jɨlipo pakatɨ pamyangʉ na nungwe.” 6 Po Abulamu alɨnkwamula alɨnkʉtɨ, “Pɨlɨkɨsya, ʉntʉmwa ʉjo alɨ mmaboko gaako. Ʉmmbombelege ɨsi gwiganile ʉgwe.” Po Salai alɨnkwanda ʉkʉmmbombela kabiibi Hagali mpaka aabopile.Ʉkʉpaapigwa kwa Isimaɨli
7 Po ʉgwandʉmi gwa NTWA alɨnkʉmmbona Hagali bo alɨ kɨfuki nɨ nyiibʉko jaa mɨɨsi ndʉngalangala. Ɨnyiibʉko ɨjo jaalɨ kɨfuki nɨ njɨla ɨjaa kʉbʉʉka kʉ Syuli. 8 Ʉgwandʉmi alɨnkʉnndaalʉʉsya alɨnkʉtɨ, “Hagali, gwe ntʉmwa gwa Salai! Ʉfumile kʉʉgʉ? Kangɨ kʉbʉʉka kʉʉgʉ?” Hagali alɨnkʉmmwamula alɨnkʉtɨ, “Ngʉmmbopa ʉmwehe gwangʉ Salai.”
9 Ʉgwandʉmi gwa NTWA alɨnkʉmmbʉʉla alɨnkʉtɨ, “Gomokela kwa Salai ʉmwehe gwako, kangɨ ʉkiijiisyege kʉmyake.” 10 Alɨnkongelapo ʉkʉjoba alɨnkʉtɨ, “Angʉbabaasya fiijo abaa ndʉjungu lwako, batoligwege ʉkʉbaligwa na bandʉ.
11 Ʉgwe ʉlɨ nɨ kɨfuba,
aakʉpaapa ʉmwana ʉnnyambala.
Ʉmpe ɨngamu jaa Isimaɨli,
paapo ɄNTWA aapɨliikea ɨnguuto jaa kʉtaamigwa kwako.
12 Isimaɨli ʉjo, ikwisa kʉja bo ʉlwa mbunda ɨjaa ndiisʉ,b
ikwisa kʉlwaga na bandʉ boosa,
abandʉ boosa bikwisa kʉmpɨngaga.
Ikwisa kʉkɨndanaga,
na bakamu boosa.”
13 Po Hagali alɨnkʉtɨ, “Nʉmmbwene ʉjʉ ikʉʉmbona ʉne.” Po alɨnkʉmpapo ɄNTWA ɨngamu ɨjaa, “Ʉgwe gwe Kyala ʉjʉ ikʉʉmbona,”c paapo aajobile nagwe pala. 14 Fyobeene ɨnyiibʉko ɨjo jaapeeliigwe ɨngamu jaa Beeli-Lahai-Loi.d Ɨnyiibʉko ɨjo jɨlɨ pakatɨ pa kiisʉ ɨkya mu Katesi nɨ kya mu Belendi.