Kyala ikʉbɨɨka ʉlwitɨkano na Abulamu
15
Bo sikɨndile ɨsyo, Abulamu alɨnkʉmmbona ɄNTWA nkɨsetʉka, ɄNTWA alɨnkʉmmbʉʉla alɨnkʉtɨ, “Gwe Abulamu! Ʉlɨngatiilaga! Ʉne ngʉkʉlɨndɨlɨlaga bo ʉlwa ngʉlʉ, kangɨ angʉkʉpa ɨfinunu fiijo.”2 Po Abulamu alɨnkʉtɨ, “Gwe NTWA Kyala, aakʉmbapo ɨfiki, ʉne bo ngʉfwa kɨsita mwana? Elieseli ʉgwa kʉ Ndamasika, jo ʉjʉ aikwingɨlapo pa kɨlɨngo kyangʉ.” 3 Abulamu alɨnkwendelela ʉkʉjoba alɨnkʉtɨ, “Ʉkambapo abaana, po ʉmbombeli ʉgwa nnyumba jangʉ jo aikwingɨlapo pa kɨlɨngo kya kyʉma kyangʉ!”
4 Po ɄNTWA alɨnkʉjoba nagwe kangɨ alɨnkʉtɨ, “Ʉjo atikwingɨlapo pa kɨlɨngo kya kyʉma kyako, looli ʉmwana ʉjʉ aakʉmpaapaga ʉgwe, jo aikwingɨlapo.” 5 Po alɨnkʉnsoosya panja, alɨnkʉtɨ, “Keeta kʉmwanya! Bala ɨndondwa lɨnga nalooli ʉbagiile ʉkʉsibala.” Po alɨnkʉmmbʉʉla alɨnkʉtɨ, “Bo ʉlo aabikʉjaga ʉbwingi abandʉ abaa ndʉjungu lwako!” 6 Abulamu alɨnkʉmmwitɨka ɄNTWA, po ɄNTWA alɨnkʉmmbala ʉbʉgolofu.
7 ɄNTWA alɨnkʉmmbʉʉla Abulamu alɨnkʉtɨ, “Ʉne ndɨ NTWA! Jo ʉne ngʉtwele kʉno ʉkʉfuma kʉ Ulu, nkiisʉ kya Bakalitai, ʉkʉtɨ ngʉpepo ɨkiisʉ ɨkɨ, kɨjege kɨlɨngo kyako.” 8 Looli Abulamu alɨnkʉnndaalʉʉsya alɨnkʉtɨ, “Gwe NTWA Kyala, angʉmanya bʉleebʉle ʉkʉtɨ ɨkiisʉ ɨkɨ kɨlɨngo kyangʉ?” 9 ɄNTWA alɨnkʉmmwamula alɨnkʉtɨ, “Ʉndwalɨle ɨndama ɨjaa fyɨnja fitatʉ, ɨmbene ɨmbɨɨki ɨjaa fyɨnja fitatʉ, ɨngʼoosi ɨmbongo ɨjaa fyɨnja fitatʉ, ɨngʉnde nɨ ngʉngʉbɨja.” 10 Po Abulamu alɨnkʉntwalɨla ɨfyo fyosa. Alɨnkʉfiboola, alɨnkʉfipandʉla mfibalali fibɨlɨ fibɨlɨ, alɨnkʉfibɨɨka ɨfibalali ʉkʉningana ɨkɨ na ɨkɨ. Looli ɨnjʉni akaasipandwile mfibalali fibɨlɨ fibɨlɨ. 11 Bo ɨminombo gikwisa pakʉgwa pa nyama ɨsyo, Abulamu alɨnkʉgɨkaga.
12 Iisʉba bo likʉjonga, ʉtʉlo ʉtwingi tʉlɨnkʉnkola Abulamu. Nakalɨnga ɨngiisi ɨsisya ɨjaa kʉtiilɨsya fiijo jɨlɨnkʉnkupɨkɨla. 13 Po ɄNTWA alɨnkʉmmbʉʉla alɨnkʉtɨ, “Ʉgwe ʉbʉmanye ʉbwanalooli ʉkʉtɨ, abaa ndʉjungu lwako bikwisa kʉja baheesya nkiisʉ ɨkɨngɨ. Bikwisa kʉja batʉmwa kangɨ bikwisa kʉfundigwa kʉ fyɨnja 400.a 14 Looli ɨkiisʉ ɨkɨ kikwisa kʉbabɨɨka mbʉtʉmwa, ngwisa kʉkɨfunda. Bikwisa kʉsookamo nkiisʉ ɨkyo nɨ kyʉma ɨkingi fiijo. 15 Looli ʉgwe kwisa kʉfwa nʉ lʉtengaano, kwisa kʉsyɨligwa kanunu, bo ʉkangeele fiijo. 16 Abaa ndʉjungu lwako bikwisa kʉgomokelaga nkiisʉ kɨkɨɨkɨ mu sopelo ɨjaa bʉna,b paapo ʉbʉbiibi bwa Baamoli bʉkaalɨ ʉkʉfikapo pa bʉbafundɨlo.”
17 Iisʉba bo lɨjongile, kangɨ ɨngiisi bo jɨgwile, nakalɨnga ɨndeko ɨjɨ jaafuukaga ɨlyosi, nɨ ndapɨ sya mooto silɨnkʉboneka, silɨnkwenda pakatɨ pa fibalali fya nyama sila. 18 Iisikʉ ɨlyo ɄNTWA alɨnkʉbɨɨka ʉlwitɨkano na Abulamu alɨnkʉtɨ, “Mbapeele ɨkiisʉ ɨkɨ abaa ndʉjungu lwako, ʉkwandɨla ndwɨsi ʉlwa nkiisʉ kya mu Misili, ʉkwakʉfika kʉ lwɨsi ʉlʉkʉlʉmba ʉlwa Fulati. 19 Mbapeele ɨkiisʉ ɨkɨ abenekaaja bo Bakeni, Bakenisi, Bakandimoni, 20 Bahiti,c Bapelisi, Balefai, 21 Baamoli, Bakaanani, Bagiligasi na Bajebusi.”