Abulamu ikʉmpoka Looti
14
Nkabalɨlo ako, Amulafeli ʉmalafyale gwa kiisʉ kya mu Sinalia na banyafyale abanine baa Alyoko ʉgwa kiisʉ kya mu Elasali, Kyendolama ʉgwa kiisʉ kya mu Elamu, na Tindali ʉgwa kiisʉ kya mu Goimu, 2 boosa balɨnkʉbʉʉka pamopeene kʉkʉlwa ʉbwite na banyafyale abangɨ. Balɨnkʉlwa na Bela ʉmalafyale ʉgwa mu Sotoma na banyafyale abanine, baa Bilisya ʉgwa mu Gomola, Sinabu ʉgwa mu Atima, Syemebeli ʉgwa mu Seboimu, nʉ malafyale ʉgwa mu Bela, muno ɨngamu ɨjɨngɨ bikʉtɨ Soali. 3 Abanyafyale bahaano abo, balɨnkʉja pamopeene ndʉsooko ʉlwa mu Sitimu, ɨngamu ɨjɨngɨ bikʉtɨ, lʉsooko ʉlwa Nyanja jaa Muunyu, ʉkwitendekesya ʉkʉlwa ʉbwite. 4 Kʉbwandɨlo abanyafyale abo, baalɨ paasi pa bʉlagɨli bwa malafyale Kyendolama kʉ fyɨnja kalongo na fibɨlɨ, looli ɨkyɨnja kya kalongo na fitatʉ balɨnkʉnsambʉkɨla.5 Ɨkyɨnja ɨkya kalongo na fina, ʉmalafyale Kyendolama na banyafyale abanine aba aalɨ pamopeene nabo, balɨnkʉbʉʉka kʉkʉlwa na Balefai abaa nkaaja akaa mu Asitaloti-Kalinaimu, aBasusi abaa mu Hamu, aBaemi abaa mu Syabe-Kilyataimu, 6 na Baholi abaa nkyamba kya mu Seili. Balɨnkʉbatola abo boosa nʉ kʉbakaga mpaka kʉ Eli-Palani, mu mpaka ʉgwa lʉngalangala. 7 Po balɨnkʉgomoka, balɨnkʉfika paa Eni-Misifati, ɨngamu ɨjɨngɨ bikʉtɨ Katesi. Balɨnkʉkɨkoma ɨkiisʉ kyosa ɨkya Baamaleki, nʉ kʉbatola aBaamoli aba baatʉʉgalaga mu Hasasoni-Tamali.
8 Po ʉmalafyale ʉgwa nkiisʉ kya mu Sotoma, ʉgwa mu Gomola, ʉgwa mu Atima, ʉgwa mu Seboimu, ʉgwa mu Bela ɨngamu ɨjɨngɨ bikʉtɨ Soali, balɨnkwitendekesya ʉkʉlwa ʉbwite ndʉsooko ʉlwa mu Sitimu. 9 Baaliitendekiisye ʉkʉlwa nʉ malafyale Kyendolama ʉgwa nkiisʉ kya mu Elamu, Tindali ʉgwa mu Goimu, Amulafeli ʉgwa mu Sinali, na Alyoko ʉgwa mu Elasali. Abanyafyale bana baalwaga na banyafyale bahaano.
10 Ʉlʉsooko ʉlwa mu Sitimu lwalɨ nɨ miina mingi ɨgɨ gyaliiswile ɨlaami. Po abasikali baa banyafyale baa ntwaja ʉtwa mu Sotoma na mu Gomola bo batoliigwe ʉbwite balɨnkʉbopa. Bamo balɨnkʉtumbʉkɨla mmiina gɨla, abangɨ balɨnkʉbopela mfyamba. 11 Po abanyafyale bana bala aba baatolile ʉbwite, balɨnkʉpʉpa ɨkyʉma kya ntwaja ʉtwa Sotoma na Gomola, balɨnkʉpʉpa ɨfindʉ fyabo fyosa, balɨnkʉsookamo. 12 Looti ʉmwana gwa gwamyabo Abulamu joope balɨnkʉnkola, balɨnkʉbʉʉka nagwe pamopeene nɨ kyʉma kyake kyosa, paapo aatʉʉgalaga mu Sotoma.
13 Ʉmundʉ jʉmo alɨnkʉjonga, alɨnkʉbʉʉka kʉkʉmmbʉʉla ɨnongwa ɨsyo Abulamu ʉjʉ aalɨ Nhibʉli. Nkabalɨlo ako Abulamu aatʉʉgalaga kɨfuki ni mipandapanda ɨgya Mamule ʉjʉ aalɨ Mwamoli. Mamule ʉjo, pamopeene na Esikoli na Aneli aba baalɨ bakamu, baafingile ʉbʉmanyaani na Abulamu.
14 Abulamu bo apɨliike ʉkʉtɨ ʉmwana gwa nnuguna bankolile mbwite, alɨnkʉbapa ɨfilwɨlo abasikali baake 318 aba baapaapiigwe nnyumba jaake. Po balɨnkʉbakonga abalʉgʉ bala mpaka nkaaja akaa mu Ndani. 15 Po pakɨlo Abulamu alɨnkʉbajabania abandʉ baake mfibugutɨla mfibugutɨla. Balɨnkʉbakoma abalʉgʉ baabo, balɨnkʉbatola nʉ kʉbakaga mpaka nkaaja akaa mu Hoba, kʉlʉʉlʉ kʉ Ndamasika. 16 Po balɨnkʉgomola fyosa ɨfi baapʉpile. Balɨnkʉnngomola Looti joope, ʉmwana gwa gwamyabo, nɨ kyʉma kyake, pamopeene na bakiikʉlʉ na bandʉ abangɨ aba baakoliigwe mbwite.
Melekiseteki ikʉnsaja Abulamu
17 Abulamu aagomwike ʉkʉfuma kʉ bwite kʉno aalɨntolile ʉmalafyale Kyendolama na banyafyale abanine. Po ʉmalafyale gwa mu Sotoma alɨnkwisa kʉkwaganila na Abulamu pa lʉsooko ʉlwa Syabe, ʉlʉ lo lʉsooko lwa malafyale.
18 Po Melekiseteki ʉmalafyale gwa mu Salemu, ʉmpuuti gwa Kyala ʉNkʉlʉmba, alɨnkʉtwala ɨfisyesye nɨ finga. 19 Alɨnkʉnsaja Abulamu alɨnkʉtɨ,
“Kyala ʉNkʉlʉmba, ʉjʉ aapelile kʉmwanya nɨ kiisʉ,
ansaje Abulamu!
20 Atuufigwege Kyala ʉNkʉlʉmba,
ʉjʉ akʉpeele amaka agaa kʉbatola abalʉgʉ baako!”
Po Abulamu alɨnkʉmpa Melekiseteki ɨfya pi ilongo ʉkʉfuma ndɨ ɨfi aapʉpile mbwite. 21 Ʉmalafyale ʉgwa kiisʉ kya mu Sotoma alɨnkʉmmbʉʉla Abulamu alɨnkʉtɨ, “Ʉmbepo abandʉ bangʉ, looli ɨkyʉma kyosa, gwege ʉgwe.” 22 Looli Abulamu alɨnkʉmmwamula alɨnkʉtɨ, “Ngʉfinga kʉ NTWA, Kyala ʉNkʉlʉmba ʉMpeli gwa kʉmwanya nɨ kiisʉ, 23 ʉkʉtɨ ndikwegapo nakamo, nalɨnga kakoba kaa kʉpinyɨla ɨkɨlato, ʉlɨngiisa kwituufyaga ʉkʉtɨ, ‘Jo ʉne nʉmpeele ʉbʉkabi Abulamu.’ 24 Ndikwambɨlɨlapo nakamo, looli fyene ɨfindʉ ɨfi abandʉ bangʉ baliile, nɨ kɨjabo kya bandʉ aba baabʉʉkile kʉ bwite pamopeene na niine, baa Aneli, Esikoli na Mamule. Abo bapeeligwe ɨkɨjabo kyabo.”