13
Po Abulamu alɨnkʉsookamo mu Misili nʉ nkasi, nɨ kyʉma kyake kyosa. Looti joope alɨnkʉsookamo nabo. Balɨnkʉgomokelako kangɨ kʉ Negebu.
Abulamu na Looti bikʉtapʉkana
2 Nkabalɨlo ako Abulamu aalɨ nkabi fiijo, aalɨ nɨ mitiimo ɨgya finyamaana, ɨsahabʉ nɨ feesa.
3 Alɨnkʉsookako kʉ Negebu, alɨnkʉsaama saama, mpaka alɨnkʉfika nkaaja akaa mu Beteli. Apo po apa aajengile ɨheema jaake, pakatɨ pa kaaja akaa mu Beteli na kaa mu Ai. 4 Apa po apa aajengile ɨkɨgemo kya kwipuutɨlapo. Po alɨnkʉmmwipuuta ɄNTWA kangɨ.
5 Po Looti, ʉjʉ endaga pamopeene na Abulamu, joope aalɨ nɨ mitiimo ɨgya ngʼoosi, ɨmbene nɨ ngʼombe. Kangɨ aalɨ nɨ heema ɨnyingi. 6 Ɨmitiimo gyabo gyalɨ mingi fiijo, po ɨkiisʉ kɨla kyalɨ kɨnandɨ ʉkʉtʉʉgala pamopeene Abulamu na Looti. 7 Po abatiimi baa Abulamu na Looti balɨnkwanda ʉkʉlwa. Akabalɨlo ako, aBakaanani na Bapelisi baalɨ bo benekaaja baa kiisʉ ɨkyo.
8 Po Abulamu alɨnkʉmmbʉʉla Looti alɨnkʉtɨ, “Tʉlɨngalwaga ʉne na nungwe, boope abatiimi bangʉ na baako balɨngalwaga, paapo ʉswe tʉlɨ banyamundʉ. 9 Kɨkeete ɨkiisʉ kyosa ɨkɨ kɨlɨ nkyeni mmyako. Tʉtapʉkane! Lɨnga kʉbʉʉka kʉ kɨboko ɨkiimama, ʉne mbʉʉke kʉ kiilɨɨlo. Lɨnga kʉbʉʉka kʉ kiilɨɨlo ʉne mbʉʉke kʉ kiimama.”
10 Looti alɨnkʉkeeta kʉbʉtali, alɨnkʉgʉbona ʉntebeela ʉgwa lwɨsi Jolitani mpaka nkaaja akaa mu Soali. Alɨnkwaga ɨkiisʉ kyosa kɨbɨsi bo ʉlwa nkiisʉ kya mu Misili, kangɨ bo ʉlwa ngʉnda gwa NTWA ʉgʉ bikʉtɨ Eteni. Akabalɨlo kala ɄNTWA aakaalɨ ʉkʉtʉpyuta ʉtwaja twa Sotoma na Gomola.
11 Po Looti alɨnkwisalɨla ʉntebeela goosa ʉgwa lwɨsi Jolitani, alɨnkʉbʉʉka kʉkɨbafu ɨkya kʉbʉsookelo. Po balɨnkʉlekaanila. 12 Abulamu alɨnkʉsyala nkiisʉ kya mu Kaanani, looli Looti alɨnkʉbʉʉka kʉkʉtʉʉgala kɨfuki nʉ twaja ʉtʉ twalɨ mu ntebeela gʉla, alɨnkʉsaamikɨsya ɨheema syake mu Sotoma. 13 Looli abandʉ baa mu Sotoma baalɨ babiibi fiijo, baabombaga ʉbʉtʉlanongwa bwingi fiijo kʉ NTWA.
14 Looti na Abulamu bo balekeene, ɄNTWA alɨnkʉmmbʉʉla Abulamu alɨnkʉtɨ, “Ʉkeete apa ʉlipo, kangɨ ʉkelenganie kʉfibafu fyosa, kʉlʉʉlʉ, kwitongo, kʉbʉsookelo na kʉbʉjongelo. 15 Ɨkiisʉ kyosa ɨkɨ kʉkɨbona, angʉkʉpapo ʉgwe na baa ndʉjungu lwako, kikʉjaga kyɨnu bwila na bwila. 16 Angʉbabaasya abaa ndʉjungu lwako bo ʉlwa lʉfumbɨ ʉlwa pakiisʉ. Ʉmundʉ lɨnga aabagiile ʉkʉbala ʉlʉfumbɨ, po ngalɨ abagiile ʉkʉbabala boope abaa ndʉjungu lwako. 17 Po sumuka ʉjaatemo nkiisʉ ɨkɨ, ʉbʉʉke mbʉtali na mbweleefu, paapo ɨkiisʉ ɨkɨ angʉkʉpapo ʉgwe.”
18 Po Abulamu alɨnkʉsaamisya ɨheema syake, alɨnkʉbʉʉka nkiisʉ ɨkya mu Hebuloni, pa mipandapanda ɨgya mu Mamule. Bo afikile kʉla, alɨnkʉnnjengela ɄNTWA ɨkɨgemo kya kwipuutɨlapo.