Kyala ikʉmmbɨlɨkɨla Abulamu
12
Po iisikʉ lɨmo, ɄNTWA alɨnkʉmmbʉʉla Abulamua alɨnkʉtɨ, “Ʉsookemo nkiisʉ kyako, ʉbaleke abakamugo, na bandʉ abaa nkɨkolo kya gʉʉso, ʉbʉʉke nkiisʉ ɨkɨ ngwakʉkʉnangɨsya.2 Angʉkʉpela ʉkʉja mpaapi gwa bandʉ bingi,
kangɨ angʉkʉsaja!
Angʉjɨpela ɨngamu jaako ʉkʉja fumuke,
ʉkwendela mmyako abandʉ abangɨ bikʉsajigwaga.
3 Abandʉ aba bikʉkʉsaja na niine ngʉbasajaga,
looli aba bikʉkʉguna na niine ngʉbagunaga.
Ʉkwendela mmyako, ɨfikolo fyosa ɨfya pakiisʉ fikʉsajigwaga!”
4 Po Abulamu alɨnkʉsookamo nkiisʉ ɨkya mu Halani, bo muno ɄNTWA aalɨmmbʉʉliile. Looti joope aasookilepo nagwe. Akabalɨlo ako Abulamu aalɨ nɨ fyɨnja 75. 5 Abulamu alɨnkʉmmwega ʉnkasi Salai na Looti ʉmwana gwamyabo, nɨ kyʉma kyosa ɨkɨ baalɨ nakyo, pamopeene na batʉmwa baake, aba aakabile bo alɨ kʉ Halani. Po balɨnkwendelela nɨ njɨla ʉkʉbʉʉka nkiisʉ ɨkya mu Kaanani. 6 Abulamu alɨnkʉfika nkiisʉ ɨkya mu Kaanani, alɨnkwenda pakatɨ pakiisʉ ɨkyo, alɨnkʉfika nkaaja akaa mu Syekemu, pabʉjo ʉbwikemo pa mpiki ʉmpandapanda, ʉgʉ gwalɨ mu Mole. Nkabalɨlo ako aBakaanani bo aba baalɨ benekaaja baa nkiisʉ ɨkyo.
7 ɄNTWA alɨnkʉnsetʉkɨla Abulamu, alɨnkʉtɨ, “Ʉlʉjungu lwako ndʉpeele ɨkiisʉ ɨkɨ.” Po Abulamu alɨnkʉjenga ɨkɨgemo kya kwipuutɨlapo, paapo ɄNTWA aalɨnsetʉkiile.
8 Po Abulamu alɨnkʉsookako ʉko, alɨnkʉbʉʉka nkiisʉ kya fyamba ɨkya kʉkɨbafu kya kʉbʉsookelo ɨkya nkaaja akaa mu Beteli. Alɨnkʉjenga ɨheema jaake ʉko pakatɨ pa kaaja akaa mu Beteli aka kaalɨ kʉbʉjongelo na kaaja akaa mu Ai aka kaalɨ kʉbʉsookelo. Poope apo alɨnkʉnnjengela ɄNTWA ɨkɨgemo kya kwipuutɨlapo. Po alɨnkʉmmwipuuta ɄNTWA. 9 Po Abulamu alɨnkwendelela nɨ njɨla ʉkʉbʉʉka kwitongo, kʉkɨbafu ɨkya kʉ Negebu.
Abulamu nkiisʉ ɨkya mu Misili
10 Po nkiisʉ ɨkya mu Kaanani jɨlɨnkʉgwa ɨnjala. Po Abulamu alɨnkʉbʉʉka nkiisʉ ɨkya mu Misili paapo ɨnjala ɨjo jaalɨ ngalɨ fiijo. Alɨnkʉtʉʉgala ʉko mbʉheesya kʉkabalɨlo akapimba.
11 Abulamu bo alɨ kɨfuki ʉkwingɨla mu Misili, alɨnkʉmmbʉʉla ʉnkasi Salai alɨnkʉtɨ, “Mmeenye ʉkʉtɨ ʉgwe ʉlɨ nkiikʉlʉ nnunu fiijo. 12 ABamisili bo bikʉkʉbona, bikʉtɨgɨ, ‘Ʉjʉ jo nkasi!’ Po aabikʉʉngoga, ʉgwe aabikʉkʉleka. 13 Po ʉkatɨgɨ ʉgwe ʉlɨ ilʉmbʉ gwangʉ, ʉkʉtɨ baambombelege ɨnunu kʉnongwa jaako, njeko kʉ bʉʉmi.”
14 Po Abulamu na Salai bo bafikile kʉ Misili, aBamisili balɨnkʉmmbona Salai ʉkʉja nkiikʉlʉ nnunu fiijo. 15 Ababombi baa nkɨtangaalala kya malafyaleb bo bammbwene, balɨnkwakʉmpangɨla ʉmalafyale ʉbʉnunu bwa Salai. Po balɨnkʉntwala Salai kʉ nyumba jaake. 16 Po ʉmalafyale jʉla alɨnkʉmmbombela ɨnunu Abulamu kʉnongwa jaa Salai. Alɨnkʉmpapo Abulamu ɨngʼoosi, ɨngʼombe, ɨmbunda, ɨngamila na batʉmwa abanyambala na bakiikʉlʉ.
17 Looli ɄNTWA alɨnkʉmfunda fiijo ʉmalafyale na bandʉ boosa abaa mu nyumba jaake, paapo aalɨmmwegile Salai ʉnkasi gwa Abulamu. 18 Po ʉmalafyale alɨnkʉnkoolela Abulamu, alɨnkʉnndaalʉʉsya alɨnkʉtɨ, “Ʉgwe! Fiki ʉʉmbombiile ɨsi? Fiki ʉkaambʉʉlaga ʉkʉtɨ ʉnkiikʉlʉ ʉjʉ nkasigo? 19 Fiki gwatile ilʉmbʉgo, ndɨnkʉmmwega ʉkʉja nkasi gwangʉ? Po mmwege ʉnkasigo, ʉsookepo apa!”
20 Po ʉmalafyale alɨnkʉbalagɨla abandʉ baake ʉkʉtɨ, bansindɨkɨle Abulamu nʉ nkasi pamopeene nɨ kyʉma kyake kyosa.