Ɨkɨsonge kya mu Babeli
11
Kʉbwandɨlo abandʉ boosa pakiisʉ baajobaga ɨnjobelo jɨmojeene, na masyʉ galagala. 2 Abandʉ bo bikʉsaama ʉkʉbʉʉka kʉkɨbafu ɨkya kʉbʉsookelo, balɨnkʉkɨbona ɨkiisʉ ɨkya mu ntebeela ɨkya mu Sinali, balɨnkʉjenga mula.3 Balɨnkʉjobesania balɨnkʉtɨ, “Oko, tʉfyatʉle amapamba, tʉgakosye kanunu fiijo.” Mmasikʉ ago, abandʉ baajengelaga amapamba nɨ laami pabʉjo bwa kʉjengela amabwe nʉ mpanya. 4 Po kangɨ balɨnkʉtɨ, “Oko, tʉjenge akaaja akakʉlʉmba nɨ kɨsonge kyake kɨkafike kʉmwanya. Tʉbombe bo ʉlo ʉkʉtɨ tʉkabe ʉbʉfumuke nʉ kʉmanyigwa, tʉlɨngiisa kʉbalanila pakiisʉ.”
5 Po ɄNTWA alɨnkʉsuluka paasi, ʉkʉtɨ akakeete akaaja akakʉlʉmba nɨ kɨsonge ɨkɨ baajengaga abandʉ. 6 ɄNTWA bo akabwene alɨnkʉtɨ, “Abandʉ aba balɨ kɨkolo kɨmokyene, bikʉjoba ɨnjobelo jɨmojeene, ɨmbombo ɨjo bwandɨlo itolo bwa ɨsi bikʉbombaga. Ʉlʉ syosa ɨsi bikʉlonda ʉkʉbomba, batikʉtoligwaga. 7 Oko tʉsuluke, tʉkajoonange ɨnjobelo jaabo, ʉkʉtɨ balɨngapɨlɨkɨsaniaga kangɨ.” 8 Po ɄNTWA alɨnkʉbabalania pakiisʉ poosa, balɨnkʉleka ʉkʉjenga akaaja akakʉlʉmba kala. 9 Po akaaja ako kalɨnkʉpeeligwa ɨngamu jaa Babeli, paapo apo po apa ɄNTWA aajoonangilea ɨnjobelo jaa pakiisʉ poosa. Ʉkwandɨla apo, aababaleenie abandʉ pakiisʉ poosa.
Abandʉ abaa nkɨkolo kya Syemu
10 Ɨsi syo nongwa sya Syemu na baa ndʉjungu lwake. Ɨfyɨnja fibɨlɨ bo ʉmweleesyo gʉmaliike, Syemu alɨnkʉja nɨ fyɨnja 100, alɨnkʉmpaapa Alipakisati. 11 Syemu bo ampaapile Alipakisati aagonile ɨfyɨnja 500, aapaapile abaana abangɨ abanyambala na bakiikʉlʉ.
12 Alipakisati bo alɨ nɨ fyɨnja 35, alɨnkʉmpaapa Syela. 13 Bo ampaapile Syela, aagonile ɨfyɨnja 403. Mfyɨnja ɨfyo, aapaapile abaana abangɨ abanyambala na bakiikʉlʉ.
14 Syela bo alɨ nɨ fyɨnja amalongo matatʉ, alɨnkʉmpaapa Ebeli. 15 Bo ampaapile Ebeli, aagonile ɨfyɨnja 403. Mfyɨnja ɨfyo, aapaapile abaana abangɨ abanyambala na bakiikʉlʉ.
16 Ebeli bo alɨ nɨ fyɨnja 34, alɨnkʉmpaapa Pelegi. 17 Bo ampaapile Pelegi, aagonile ɨfyɨnja 430. Mfyɨnja ɨfyo, aapaapile abaana abangɨ abanyambala na bakiikʉlʉ.
18 Pelegi bo alɨ nɨ fyɨnja amalongo matatʉ, alɨnkʉmpaapa Leu. 19 Bo ampaapile Leu, aagonile ɨfyɨnja 209. Mfyɨnja ɨfyo, aapaapile abaana abangɨ abanyambala na bakiikʉlʉ.
20 Leu bo alɨ nɨ fyɨnja 32, alɨnkʉmpaapa Selugi. 21 Bo ampaapile Selugi, aagonile ɨfyɨnja 207. Mfyɨnja ɨfyo, aapaapile abaana abangɨ abanyambala na bakiikʉlʉ.
22 Selugi bo alɨ nɨ fyɨnja amalongo matatʉ, alɨnkʉmpaapa Naholi. 23 Bo ampaapile Naholi, aagonile ɨfyɨnja 200. Mfyɨnja ɨfyo, aapaapile abaana abangɨ abanyambala na bakiikʉlʉ.
24 Naholi bo alɨ nɨ fyɨnja 29, alɨnkʉmpaapa Tela. 25 Bo ampaapile Tela, aagonile ɨfyɨnja 119. Mfyɨnja ɨfyo, aapaapile abaana abangɨ abanyambala na bakiikʉlʉ.
26 Tela bo alɨ nɨ fyɨnja 70, aabapaapile abaana batatʉ. Abaana abo bo baa Abulamu, Naholi na Halani.
Abandʉ abaa ndʉjungu lwa Tela
27 Ɨsi syo nongwa sya Tela na baa ndʉjungu lwake. Tela alɨnkʉmpaapa Abulamu, Naholi na Halani. Halani joope alɨnkʉmpaapa Looti. 28 Halani aatalile ʉkʉfwa bo ʉgwise akaalɨ mʉʉmi. Aafwɨliile nkaaja akakʉlʉmba akaa Ulu, nkiisʉ ɨkya Bakalitai, muno aapaapɨliigwe. 29 Abulamu na Naholi boope balɨnkwega abakiikʉlʉ. Ʉnkasi gwa Abulamu ɨngamu jaake aalɨ jo Salai, nʉ nkasi gwa Naholi ɨngamu jaake aalɨ jo Milika. Milika ʉjo, pamopeene nʉ nnuguna ʉjʉ ɨngamu jaake aalɨ jo Isika, bobabɨɨlɨ ʉgwisabo aalɨ jo Halani. 30 Salai aalɨ nngʉmba, akaalɨ nʉ mwana najʉmo.
31 Po iisikʉ lɨmo, Tela alɨnkʉmmwega ʉmwanaake Abulamu, na Salai ʉnkamwana gwake, pamopeene nʉ mwisʉkʉlʉ Looti ʉmwana gwa Halani. Alɨnkʉsookamo nabo boosa nkaaja akakʉlʉmba akaa Ulu, nkiisʉ ɨkya Bakalitai, balɨnkʉjɨkonga ɨnjɨla ɨjɨ jikʉbʉʉka kʉ Kaanani. Looli bo bafikile mu Halani, balɨnkʉtʉʉgala mula. 32 Tela alɨnkʉfwa mu Halani bo alɨ nɨ fyɨnja 205.