Abandʉ bikʉbalanila pakiisʉ
10
Ʉmweleesyo bo gʉkɨndile, Syemu, Hamu na Jafeti abaana baa Nwaka, balɨnkʉpaapa abaana.2 Abaana baa Jafeti jo Gomeli, Magogu, Mandai, Jafani, Tubali, Meseki na Tilasi. 3 Abaana baa Gomeli jo Asekenasi, Lifati na Togama. 4 Abaana baa Jafani jo Elisa, Talisisi, abaa nkɨkolo ɨkya Kitimu nɨ kya Londanimu.
5 Ʉkʉfuma mbaana abo, abandʉ balɨnkʉbalanila mpaka mfiisʉ ɨfi filɨ kɨfuki nɨ nyanja, baalɨ nɨ njobelo syabo, ɨfikolo fyabo nɨ fiisʉ fyabo.
6 Abaana baa Hamu jo Kusi, Misili, Puti na Kaanani. 7 Abaana baa Kusi jo Seba, Habila, Sabita, Lama na Sabuteka. Abaana baa Lama jo Syeba na Ndetani.
8 Kusi alɨnkʉpaapa ʉmwana ʉjʉngɨ, ɨngamu jaake Nimuloti. Alɨnkʉja gwa kwanda pakiisʉ ʉkʉja mundʉ ʉngaasi. 9 ɄNTWA aalɨnsajile ʉkʉja mfwɨmi gwa maka fiijo. Fyobeene bikʉjoba bikʉtɨ, “Ʉgwe ʉlɨ bo ʉlwa Nimuloti, ʉmfwɨmi gwa nalooli ʉjʉ alɨ na maka gaa NTWA.” 10 Ʉtwaja ʉtʉ aalyandiile ʉbʉnyafyale bwake jo Babeli, Eleki, Akati na Kaline nkiisʉ kya mu Sinali.a 11 Ʉkʉfuma nkiisʉ ɨkyo, Nimuloti alɨnkʉbʉʉka nkiisʉ ɨkya mu Asyulu, mo alɨnkʉjenga ʉtwaja ʉtwa mu Ninibe, Lehoboti-Ili, Kala 12 na Leseni. Akaaja akanywamu akaa mu Leseni kalɨ pakatɨ pa kaaja akaa mu Ninibe na kaa mu Kala.
13 Misili alɨnkʉbapaapa aBaluti, aBaanami, aBalehabi, aBanafuti, 14 aBapatusi na Bakasuluhi, muno kyafumile ɨkɨkolo kya Bafilisiti na Bakafutoli.
15 Kaanani aalɨmpaapile Sitoni ʉmwanaake ʉgwa kɨpanda, kangɨ aalɨmpaapile Heti. 16 Kangɨ aalɨ mwisʉkʉlʉ gwa Bajebusi, aBaamoli,b aBagiligasi, 17 aBahifi, aBaaliki, aBasini, 18 aBalafati, aBasemali na Bahamati. Ɨfikolo fyosa ɨfyo ɨfya Bakaananic filɨnkʉbalanila. 19 Ɨkiisʉ kyabo kyalyandiile mu Sitoni, kyafikile kʉ Gelali mpaka kʉ Gasa. Kangɨ kyafikile kʉ Sotoma, Gomola, Atima na Seboimu, mpaka kʉ Lasya.
20 Abo boosa baalɨ baa ndʉjungu lwa Hamu, ʉkʉkongana nɨ njobelo syabo, ɨfikolo fyabo nɨ fiisʉ fyabo.
21 Syemu, ʉnkʉlʉ gwa Jafeti, jo ʉjʉ aalɨ mwisʉkʉlʉ gwa Bahibʉli. 22 Abaana baa Syemu jo Elamu, Asyulu, Alipakisati, Lundi na Alamu. 23 Abaana abaa Alamu aalɨ jo Usi, Huli, Geteli na Masi. 24 Alipakisati alɨnkʉmpaapa Syela, Syela joope alɨnkʉmpaapa Ebeli. 25 Ebeli aapaapile abaana babɨlɨ. Ʉmwana gwa kɨpanda aalɨmpeele ɨngamu ɨjaa Pelegi, namanga mmasikʉ ago abandʉ baatapʉkeened pakiisʉ. Ʉnnuguna aalɨmpeele ɨngamu ɨjaa Jokatani. 26 Jokatani alɨnkʉmpaapa Alimondati, Syelefu, Asamafeti, Jela, 27 Andolamu, Usali, Ndikila, 28 Obali, Abimaili, Syeba, 29 Ofili, Habila na Jobabu. Abo boosa baalɨ baana baa Jokatani. 30 Ɨkiisʉ ɨkɨ abandʉ boosa abo baatʉʉgalaga kyalyandiile pa kyamba Mesa ʉkwakʉfika kʉ Sefali mfyamba ɨfya kʉbʉsookelo.
31 Abo boosa baalɨ baa ndʉjungu lwa Syemu, ʉkʉkongana nɨ njobelo syabo, ɨfikolo fyabo nɨ fiisʉ fyabo.
32 Abo bo baa ndʉjungu lwa Nwaka, ʉkʉkongana nɨ fikolo fyabo nɨ fiisʉ fyabo. Ʉkwandɨla pakabalɨlo aka gwamaliike ʉmweleesyo, ɨfikolo fyosa fyabalaniile pakiisʉ poosa.