Kyala ikʉbɨɨka ʉlwitɨkano na Nwaka
9
Po Kyala alɨnkʉnsaja Nwaka na baanaake, alɨnkʉbabʉʉla alɨnkʉtɨ, “Mupaapege, mubaalege, mwisʉlege nkiisʉ. 2 Ɨfinyamaana fyosa ɨfya pakiisʉ, ɨnjʉni, ɨfi fikwendela ʉlwanda, nɨ ɨswɨ syosa ɨsya mu nyanja, fyosa fikʉbatiilaga, paapo mbapeele ʉmwe. 3 Ʉkwandɨla akabalɨlo aka, ɨfinyamaana fyosa fikʉjaga findʉ fyɨnu ɨfya kʉlya, bo ʉlʉ naabapeele ɨseke sya mipiki na ɨfi fikʉmela. 4 Looli mulɨngalyaga ɨnyama ɨjɨ lɨkaalɨ lɨlimo iilopa, paapo ʉbʉʉmi bwa kɨnyamaana bʉlɨ mwi ilopa. 5 Ngʉmmbukɨsyaga ʉkoona iilopa lyake kʉkʉtɨ mundʉ ʉjʉ ikʉnngoga ʉnnine. Ngʉkɨbukɨsyaga kyope ɨkɨnyamaana ɨkɨ kikʉnngoga ʉmundʉ. Nalooli, ngʉmelaga iilopa kʉ mundʉ gwesa ʉjʉ ikoona iilopa lya mundʉ. 6 Naabapelile abandʉ nkɨfwanikɨsyo kyangʉ. Po ʉmundʉ gwesa ʉjʉ ikoona iilopa lya mundʉ, joope iilopa lyake likoonigwaga nʉ mundʉ. 7 Po ʉmwe ʉlʉ, mupaapege, mubaalege, mubalanilege nkiisʉ, mujege bingi fiijo.”8 Po Kyala alɨnkʉmmbʉʉla Nwaka na baanaake alɨnkʉtɨ, 9 “Mumbɨlɨkɨsye. Ʉne ngʉbɨɨka ʉlwitɨkanoa na nuumwe, nʉ lʉjungu lwɨnu bwila na bwila, 10 nɨ fipeligwa ɨfyʉmi fyosa, ɨnjʉni, ɨmitiimo, nɨ finyamaana fya ndiisʉ, fyosa ɨfi fyafumile mu ngalaba pamopeene na nuumwe, nɨ fipeligwa fyosa ɨfya pakiisʉ. 11 Ngʉbɨɨka ʉlwitɨkano na nuumwe, ndikwisa kʉfipyutamo kangɨ ɨfipeligwa fyosa kʉ njɨla jaa mweleesyo. Aagʉtikʉjako kangɨ ʉmweleesyo ʉgwa kʉkɨpyuta ɨkiisʉ.”
12 Po kangɨ Kyala alɨnkʉtɨ, “Ɨkɨ kyo kɨmanyilo kya lwitɨkano ʉlʉ ngʉbɨɨka na nuumwe, na kʉkʉtɨ kɨnyamaana ɨkɨ kɨlɨ pamopeene na nuumwe. Ʉlwitɨkano ʉlo lukʉjangako bwila mu sopelo syosa ɨsi sikwisa. 13 Mbɨɨkile ʉlʉlangab lwangʉ mu mpaalanga, lukʉjaga kɨmanyilo kya lwitɨkano lwangʉ nɨ kiisʉ. 14 Lɨnga ngʉkupɨkɨla ɨkiisʉ na mabɨngo nʉ lʉlanga lukʉboneka mu mpaalanga, 15 ngʉkʉmbʉkaga ʉlwitɨkano lwangʉ na nuumwe, nɨ fipeligwa fyosa ɨfyʉmi. Amɨɨsi gatikongelelaga sikʉ, gatikʉjaga mweleesyo ʉgwa kʉpyuta ɨfipeligwa fyosa. 16 Po lɨnga ʉlʉlanga ʉlo aalukʉbonekaga mu mpaalanga, po na niine angʉlʉkʉmbʉkaga ʉlwitɨkano lwa bwila na bwila, ʉlʉ mbɨɨkile nɨ fipeligwa ɨfyʉmi ɨfya lʉko loosa pakiisʉ.” 17 Po Kyala alɨnkʉmmbʉʉla Nwaka alɨnkʉtɨ, “Ɨkɨ kyo kɨmanyilo kya lwitɨkano ʉlʉ mbɨɨkile nɨ fipeligwa fyosa ɨfyʉmi pakiisʉ.”
Abaana baa Nwaka
18 Abaana baa Nwaka aba aasookile nabo mu ngalaba, jo Syemu, Hamu na Jafeti. Hamu jo ʉjʉ aalɨ gwise gwa Kaanani.c 19 Abaana abo batatʉ baalɨ baana baa Nwaka. Ʉkʉfuma ndʉjungu lwabo abandʉ abaa mfikolo fyosa balɨnkʉbalanila pakiisʉ.
20 Nwaka aalɨ ndɨmi, aalɨ mundʉ gwa kwanda ʉkʉbyala ɨmipiki gya maafiilʉ. 21 Iisikʉ lɨmo, alɨnkʉnwa ɨfinga ɨngalɨ, alɨnkʉgaala. Po alɨnkʉlambalala mu heema jaake kɨsita kʉfwala ɨmyenda. 22 Hamu, ʉgwise gwa Kaanani, alɨnkʉmmbona ʉgwise alɨ bwasi itolo, alɨnkʉsooka panja, alɨnkʉbʉʉka kʉkʉbabʉʉla abakʉlʉ, Syemu na Jafeti. 23 Looli Syemu na Jafeti balɨnkʉbɨɨka ɨmyenda pa fibeja, balɨnkwenda ɨkyanyumaanyuma, balɨnkʉnkupɨkɨla ʉgwisabo, kʉno amaaso gaabo gikʉkeeta kʉbʉngɨ, ʉkʉtɨ balɨngammbona ʉgwisabo ʉjʉ aalɨ bwasi itolo.
24 Looli Nwaka bo ʉbʉgaale bʉmaliike, alɨnkʉmanya ɨsi ʉmwanaake ʉnnandɨ aalɨmmbombiile. 25 Po alɨnkʉtɨ,
“Agunigwe Kaanani!
Ikʉjaga ntʉmwa gwa baamyabo.”
26 Nwaka alɨnkwendelela ʉkʉjoba alɨnkʉtɨ,
“Atuufigwege ɄNTWA, Kyala gwa Syemu!
Kaanani ajege ntʉmwa gwa Syemu.
27 Kyala ammbaasyege Jafeti,d ndɨ ɨfi alɨ nafyo,
atʉʉgalege nʉ lʉtengaano pakatɨ pa heema sya Syemu,
Kaanani ajege ntʉmwa gwa Jafeti.”