Ʉkʉmalɨka kwa mweleesyo
8
Looli Kyala alɨnkʉnkʉmbʉka Nwaka pamopeene nɨ finyamaana fyosa ɨfya ndiisʉ, nɨ fya kʉtiimigwa ɨfi aalɨ nafyo mu ngalaba. Po alɨnkʉtʉma ʉmbelo pakiisʉ, amɨɨsi galɨnkwanda ʉkʉkʉlʉka. 2 Ɨnyiibʉko sya mɨɨsi ɨsya pakiisʉ silɨnkwigaligwa, ɨfula jɨlɨnkʉkya. 3 Amɨɨsi galɨnkwendelela ʉkʉkʉlʉka pakiisʉ panandɨ panandɨ. Bo gakɨndile amasikʉ 150, amɨɨsi gaakʉlwike fiijo. 4 Pi isikʉ lya 17, ʉmwesi gwa bʉhaano na mibɨlɨ, ɨngalaba jɨlɨnkwikinya pa fyamba ɨfya mu Alalati. 5 Amɨɨsi galɨnkwendelela ʉkʉkʉlʉka panandɨ panandɨ, mpaka ʉmwesi gwa kalongo. Pi isikʉ lya kwanda ɨlya mwesi ʉgo, pamwanya pa fyamba palɨnkwanda ʉkʉboneka.6 Amasikʉ amalongo mana bo gakɨndile, Nwaka alɨnkwigʉla iitʉʉlo ɨlɨ aatendekiisye mu ngalaba. 7 Alɨnkʉlɨsoosya iikʉngʉʉlʉ panja. Iikʉngʉʉlʉ ɨlyo lɨlɨnkʉbeeta beeta nʉ kʉgomoka mu ngalaba mpaka pakabalɨlo aka amɨɨsi gaalyʉmile, po lɨlɨnkʉsita kʉgomoka kangɨ. 8 Po Nwaka alɨnkʉjɨsoosya ɨngʉnde, ʉkʉtɨ akeete lɨnga amɨɨsi gʉʉmile pakiisʉ. 9 Looli ɨngʉnde jɨkaapaagile napamo pa bwɨmo paapo amɨɨsi gaakaalɨ gaalipo pakiisʉ, po jɨlɨnkʉgomokelako kwa Nwaka. Nwaka alɨnkʉgolosya ɨkɨboko alɨnkʉjɨkola, alɨnkʉjɨgomokesya mu ngalaba. 10 Alɨnkʉguulɨla amasikʉ agangɨ mahaano na mabɨlɨ, po kangɨ alɨnkʉjɨsoosya panja ɨngʉnde jɨla. 11 Namajolo jɨlɨnkʉgomoka kwa Nwaka nɨ lyani ɨlya nsyʉngʉtɨ iibɨsi nkanwa. Po Nwaka alɨnkʉmanya ʉkʉtɨ amɨɨsi gakʉlwike pakiisʉ. 12 Nwaka alɨnkʉguulɨla kangɨ kʉ masikʉ mahaano na mabɨlɨ, alɨnkʉjɨsoosya kangɨ ɨngʉnde jɨla. Looli akabalɨlo aka ɨngʉnde jɨkaagomwike kangɨ.
13 Pi isikʉ lya kwanda ɨlya mwesi gwa kwanda, Nwaka bo alɨ nɨ fyɨnja 601, amɨɨsi gaalyʉmile pakiisʉ poosa. Alɨnkwigʉla ɨkɨkupɨkɨlɨlo kya ngalaba, alɨnkwaga ɨkiisʉ kyosa kyandile ʉkʉʉma. 14 Po pi isikʉ lya 27 ɨlya mwesi gwa bʉbɨlɨ, ɨkiisʉ kyosa kɨlɨnkʉja kyʉmu.
15 Po Kyala alɨnkʉmmbʉʉla Nwaka alɨnkʉtɨ, 16 “Sooka mu ngalaba, ʉgwe pamopeene nʉ nkasigo, abaanaako na bakasi baabo. 17 Ʉfisoosye ɨfinyamaana fyosa ɨfi gwalɨ nafyo, ɨnjʉni, ɨfi fikʉtiimigwa na ɨfi fikwendela ʉlwanda. Fyosa fiisʉle, fyolokege, fibaale pakiisʉ.”
18 Po Nwaka alɨnkʉsooka mu ngalaba, pamopeene nʉ nkasi, abaanaake na bakasi baabo. 19 Ɨmitiimo, ɨfinyamaana ɨfi fikwendela ʉlwanda nɨ njʉni, fyosa filɨnkʉlongosania ʉkʉsooka mu ngalaba, ʉkʉkongana nʉ lʉko lwabo.
Nwaka ikʉsoosya iikemo kwa Kyala
20 Po Nwaka alɨnkʉnnjengela ɄNTWA ɨkɨgemoa ɨkya kwipuutɨlapo. Alɨnkwegapo ɨfinyamaana fimo ɨfi fibagiile ʉkʉsoosigwa ʉkʉja ikemo nɨ njʉni simo, fyo alɨnkʉfisoosya ʉkʉja ikemo ɨlyokye. 21 ɄNTWA bo apɨliike ʉlʉʉma ʉlʉnunu, alɨnkwikyela nalyo, mu ndumbula alɨnkʉtɨ, “Ndikwisa kʉkɨgunamo kangɨ ɨkiisʉ kʉnongwa jaa bandʉ, na paapo ɨnyiinogono syabo mbiibi ʉkwandɨla mbʉkeke bwabo. Ndikwisa kʉfipyuta kangɨ ɨfipeligwa ɨfyʉmi, bo ʉlʉ mbombile.
22 Akabalɨlo koosa aka ɨkiisʉ kɨliko,
kukʉjaga na kabalɨlo akaa kʉbyala na kaa kʉtondola,
akabalɨlo akaa mbepo na kaa mafuku,
akabalɨlo akaa lʉmu na kaa kɨsikʉ,
akabalɨlo akaa pakɨlo na pamuusi.
Ʉtʉbalɨlo ʉto tʉtikwisa kʉmalɨkamo sikʉ.”