Ʉmweleesyo
7
Nwaka bo amalile ʉkʉbomba ɨsyo syosa, ɄNTWA alɨnkʉmmbʉʉla alɨnkʉtɨ, “Ingɨla mu ngalaba, pamopeene na baa nnyumba jaako boosa. Mmbandʉ boosa abaa nkabalɨlo aka, ʉgwe gwimwene ngʉbwene ʉkʉja ngolofu. 2 Gwege ɨfinyamaana ɨfya lʉko loosa ɨfi fibagiile ʉkʉsoosigwa ʉkʉja ikemo,a ɨfinyambala fihaano na fibɨlɨ nɨ fikiikʉlʉ fihaano na fibɨlɨ ɨfya lʉko nʉ lʉko. Looli ɨfinyamaana ɨfi fikabagɨla ʉkʉsoosigwa ʉkʉja ikemo, gwege kyene ɨkɨnyambala nɨ kɨkiikʉlʉ kɨmokyene. 3 Kangɨ gwege ɨnjʉni sya lʉko nʉ lʉko, ɨnyambala ihaano na ibɨlɨ, nɨ ngiikʉlʉ ihaano na ibɨlɨ, ʉsitiime sisyale pakiisʉ. 4 Gasyele amasikʉ mahaano na mabɨlɨ, angʉtimɨsya ɨfula pakiisʉ. Ɨfula aajikʉtima amasikʉ amalongo mana, pakɨlo na pamuusi. Fyosa ɨfyʉmi ɨfi naafipelile, angʉfipyuta pakiisʉ.” 5 Nwaka aabombile syosa bo muno aalɨnndagɨliile ɄNTWA.6 Nwaka aalɨ nɨ fyɨnja 600, lʉla ʉmweleesyo gwisege pakiisʉ. 7 Po Nwaka nʉ nkasi, abaanaabo na bakasi baabo, boosa balɨnkwingɨla mu ngalaba, ʉkʉtɨ bapone kʉ mweleesyo. 8 Ɨfinyamaana ɨfi fibagiile ʉkʉsoosigwa ʉkʉja ikemo nɨ finyamaana ɨfi fikabagɨla ʉkʉja ikemo, ɨnjʉni nɨ fipeligwa fyosa ɨfi fikwendela ʉlwanda, 9 fyosa filɨnkwisa, ɨfinyambala nɨ fikiikʉlʉ, filɨnkwingɨla mu ngalaba jaa Nwaka fibɨlɨ fibɨlɨ, bo muno Kyala aalɨnndagɨliile Nwaka. 10 Bo gakɨndile amasikʉ mahaano na mabɨlɨ, ʉmweleesyo gʉlɨnkwanda ʉkʉkɨkupɨkɨla ɨkiisʉ.
11 Nwaka bo alɨ nɨ fyɨnja 600, pi isikʉ lya 17 ɨlya mwesi gwa bʉbɨlɨ, ʉmweleesyo gʉlɨnkʉfika. Iisikʉ ɨlyo, ɨnyiibʉko syosa ɨsya mɨɨsi ʉkʉfuma paasi, syasoosyaga amɨɨsi kʉ maka. Ʉmpaalanga goosa gwaliigwike, ɨfula ɨnyingi fiijo jɨlɨnkʉtima. 12 Ɨfula jɨlɨnkʉtima amasikʉ amalongo mana, pakɨlo na pamuusi.
13 Ɨliisikʉ ɨlɨ ɨfula jaalyandile ʉkʉtima, lyo ɨlɨ Nwaka nʉ nkasi baalingiile mu ngalaba, pamopeene na baanaabo Syemu, Hamu, Jafeti, na bakasi baabo. 14 Baalingiile pamopeene nʉ lʉko loosa ʉlwa finyamaana, ɨfya ndiisʉ, ɨfi fikʉtiimigwa, ɨfi fikwendela ʉlwanda, ɨnjʉni na fyosa ɨfya mapɨko. 15 Ɨfinyamaana ɨfya lʉko loosa filɨnkwisa fibɨlɨ fibɨlɨ, filɨnkwingɨla mu ngalaba jaa Nwaka. 16 Fyosa fyalɨ finyambala nɨ fikiikʉlʉ, bo muno Kyala aalɨnndagɨliile Nwaka. Po ɄNTWA jʉʉjo alɨnkwigalako ʉlwigi.
17 Ʉmweleesyo gʉlɨnkwendelela pakiisʉ kʉkabalɨlo kaa masikʉ amalongo mana. Amɨɨsi galɨnkʉjiinʉla ɨngalaba, jɨlɨnkwanda ʉkweleela. 18 Amɨɨsi galɨnkongelela ʉkwisʉla nʉ kʉteeka, po ɨngalaba jɨlɨnkweleela. 19 Amɨɨsi galɨnkʉkɨndɨlɨla ʉkwisʉla, galɨnkwibɨsya ɨfyamba fyosa ɨfitali, 20 ʉkwakʉfika ʉbʉtali bwa maboko mahaano na mabɨlɨ, ʉkʉfuma pamwanya pa fyamba. Po ʉlo amɨɨsi galɨnkwibɨsya loosa ɨfyamba fyosa. 21 Fyosa ɨfi fyendaga pakiisʉ fyapyutiigwe, ɨnjʉni, ɨfinyamaana ɨfi fikʉtiimigwa, ɨfinyamaana ɨfya ndiisʉ, ɨfi fikwendela ʉlwanda, na bandʉ boosa. 22 Kʉkʉtɨ kandʉ akaa nkiisʉ ɨkyʉmu kaafwile. 23 Kyala aakɨpyutile kʉkʉtɨ kɨpeligwa ɨkyʉmi ɨkya nkiisʉ ɨkyʉmu, abandʉ, ɨfinyamaana, ɨfi fikwendela ʉlwanda nɨ njʉni. Looli alɨnkʉpona mwene Nwaka na bandʉ aba aalɨ nabo mu ngalaba, nɨ fipeligwa ɨfi fyalimo mula. 24 Ʉmweleesyo ʉgo gʉlɨnkʉja pakiisʉ amasikʉ 150.