Ʉbʉtʉlanongwa bwa bandʉ
6
Abandʉ baalyandile ʉkʉbaala nʉ kʉbalanila pakiisʉ, abalɨndwana balɨnkʉpaapigwa na bandʉ bala. 2 Abaana baa Kyalaa balɨnkwaga abalɨndwana baa bandʉ bala banunu, balɨnkwisalɨla abalɨndwana bala babaganile ʉkʉbeega, ʉkʉja bakasi baabo. 3 Po ɄNTWA alɨnkʉtɨ, “Mbepo gwangʉ ʉjʉ ikʉpa ʉbʉʉmi, atikʉjaga mmundʉ bwila na bwila paapo ʉmundʉ gwa kʉfwa. Po ɨfyɨnja fyake ɨfya kʉjako kʉ bʉʉmi fitikʉkɨndaga ɨfyɨnja 120.”4 Mmasikʉ ago na mmasikʉ aga gaakongile, ɨmindʉ ɨminywamu fiijob gyalipo pakiisʉ. Ɨgyo gyapaapiigwe akabalɨlo aka abaana baa Kyala beegaga abaana abalɨndwana abaa bandʉ, nʉ kʉpaapa nabo. Aba baapaapiigwe, baalɨ banyambala abaa maka, baafumwike fiijo ijolo.
5 ɄNTWA aalyagile ʉbʉtʉlanongwa bwa bandʉ bʉbeele fiijo pakiisʉ. Syosa ɨsi biinogonaga mu ndumbula syabo syalɨ mbiibi amasikʉ goosa. 6 Po ɄNTWA alɨnkʉsulumania kʉnongwa jaa kʉmpela ʉmundʉ pakiisʉ, silɨnkʉmmbaba fiijo mu ndumbula. 7 ɄNTWA alɨnkʉtɨ, “Angʉbapyuta loosa abandʉ aba mbapelile pakiisʉ. Kangɨ angʉfipyuta ɨfinyamaana fyope, na ɨfi fikwendela ʉlwanda nɨ njʉni. Nsulumeenie, kalɨ naafipelaga fyaki.” 8 Looli ɄNTWA aaliikyeliile na Nwaka.
Kyala ikʉntʉma Nwaka ʉkʉsongola ɨngalaba
9 Ɨsi syo nongwa sya Nwaka na baa ndʉjungu lwake. Nwaka aalɨ mundʉ ʉngolofu, ʉmundʉ ʉjʉ aalyɨmɨkiigwe fiijo na bandʉ boosa abaa nkabalɨlo kaake, endaga pamopeene na Kyala. 10 Nwaka aalɨ na baana batatʉ abanyambala, Syemu, Hamu na Jafeti.
11 Kyala aalyagile ɨkiisʉ kyonangiike nʉ kwisʉla ʉbʉgaasi. 12 Kyala alɨnkʉkɨbona ɨkiisʉ kyonangiike, paapo kʉkʉtɨ mundʉ aakongaga ɨnjɨla ɨmbiibi ɨjɨ aajɨganile.
13 Po Kyala alɨnkʉmmbʉʉla Nwaka alɨnkʉtɨ, “Ndumwile ʉkʉbapyuta abandʉ boosa, paapo biiswile ʉbʉgaasi pakiisʉ. Nalooli angʉpyuta abandʉ nɨ kiisʉ kyosa! 14 Po ʉgwe ʉkatumule ɨmipiki gya nngwina, ʉjenge ɨngalaba.c Mu ngalaba ʉmo, ʉtendekesye ɨfyumba nʉ kʉpaka ʉmpulya nkatɨ na mu nyuma. 15 Ʉbʉtali bwake bʉje amaboko 150, ʉbweleefu amaboko 25, nʉ kʉfyʉka kʉmwanya amaboko 15.d 16 Ʉjenge ɨngalaba ɨjo, jɨje jaa majʉlʉ matatʉ, ʉbɨɨke ɨkɨfigo kʉkɨbafu kɨmo. Ʉjɨlatɨke, po ʉsyasye ʉbʉtali ʉbwa nuusu (1/2) ɨkɨboko pa ndatɨkɨlo na pi imato.
17 “Nalooli ʉne angʉtʉma ʉmweleesyo pakiisʉ, ʉkʉtɨ mfipyute ɨfipeligwa fyosa ɨfyʉmi. Ɨfipeligwa fyosa ɨfyʉmi pakiisʉ aafikʉfwa. 18 Looli ngʉbɨɨka ʉlʉfingo na nungwe. Ingɨla mu ngalaba pamopeene nʉ nkasigo, abaanaako na bakasi baabo. 19 Ingɨsya ɨfinyamaana ɨfya lʉko loosa fibɨlɨ fibɨlɨ, ɨkɨnyambala nɨ kɨkiikʉlʉ, ʉkʉtɨ fipone pamopeene na nungwe. 20 Ingɨsya ʉlʉko loosa ʉlwa njʉni, nʉ lʉko loosa ʉlwa finyamaana, nʉ lwa ɨfi fikwendela ʉlwanda. Fyosa fikwisa kʉmyako fibɨlɨ fibɨlɨ ʉkʉtɨ fipone. 21 Bɨɨka ɨfindʉ ɨfingi, ɨfya kʉlya ʉgwe nɨ fya kʉfipapo ɨfinyamaana.” 22 Po Nwaka alɨnkʉbomba syosa ɨsi Kyala aalɨnndagiile.