Atamu na Efwa bikʉtʉla ɨnongwa
3
Mfinyamaana fyosa ɨfya ndiisʉ ɨfi ɄNTWA Kyala aafipelile, ɨnjoka jaafikɨndile ʉbʉkomu. Ɨliisikʉ lɨmo ɨnjoka jɨlɨnkʉnndaalʉʉsya ʉnkiikʉlʉ jɨlɨnkʉtɨ, “Baatɨ, nalooli Kyala ajobile ʉkʉtɨ, mulɨngalyaga ɨseke ɨsya mpiki gogoosa ʉgʉ gʉlimo mu ngʉnda?”2 Ʉnkiikʉlʉ alɨnkʉjaamula alɨnkʉtɨ, “Hɨmma, ɨseke sya mipiki ɨgɨ gɨlimo mu ngʉnda, twitɨkɨsiigwe ʉkʉlya. 3 Looli Kyala aatile, ‘Mulɨngasulwa ʉkʉlya pamo ʉkʉpalamaasya ɨseke sya mpiki ʉgwa pakatɨ. Lɨnga mukʉpalamaasya pamo mukʉlya, aamukʉfwa!’ ”
4 Po ɨnjoka jɨlɨnkʉmmbʉʉla ʉnkiikʉlʉ jɨlɨnkʉtɨ, “Nalooli aamutikʉfwa! 5 Kyala ajobile bo ʉlo, paapo ameenye ʉkʉtɨ lɨnga muliile ɨseke sya mpiki ʉgo, mukʉkaba amahala, aamukʉja bo muno ajɨɨliile ʉmwene, ʉkʉsimanya ɨnunu nɨ mbiibi.”
6 Ʉnkiikʉlʉ ʉjo, bo ɨseke sya mpiki ʉgo sinkyeliile ʉkʉsikeeta, alɨnkʉsibona ʉkʉtɨ nunu ʉkʉlya, kangɨ aasikʉntwalɨla amahala, alɨnkʉtʉngʉla, alɨnkʉlya. Po alɨnkʉmpapo ʉndʉme, joope alɨnkʉlya. 7 Palapala balɨnkwigʉligwa amaaso, balɨnkwibona ʉkʉtɨ boosa bakafwala nafimo. Po balɨnkwega amaani gaa nkʉjʉ, balɨnkʉsona, balɨnkʉfwala mu nsana.
8 Bo gafikile amajolo, ʉlʉmu lwapepwike, ʉnnyambala ʉjo nʉ nkasi balɨnkʉpɨlɨka ʉndindo gwa NTWA Kyala bo ikwenda mu ngʉnda ʉmo. Po balɨnkwakwibɨɨlɨla pakatɨ pa mipiki gya mu ngʉnda ʉgo, ʉkʉtɨ alɨngababona. 9 Looli ɄNTWA Kyala alɨnkʉnkoolela Atamu alɨnkʉtɨ, “Ʉlɨ kʉʉgʉ?” 10 Atamu alɨnkʉmmwamula alɨnkʉtɨ, “Ngʉpɨliike ʉlimo mu ngʉnda, ndiilile, niibɨɨliile, paapo ndɨ kɨtali.”
11 ɄNTWA Kyala alɨnkʉnndaalʉʉsya alɨnkʉtɨ, “Jwani akʉbʉʉlile ʉkʉtɨ ʉlɨ kɨtali? Bʉle, ʉliile ɨseke sya mpiki ʉgʉ naakʉkaaniisye ʉkʉlya?” 12 Atamu alɨnkʉmmwamula alɨnkʉtɨ, “Ʉnkiikʉlʉ ʉjʉ gwalɨmbeele ʉkʉtɨ ajege pamopeene na niine, jo ʉjʉ ambeele ɨseke sya mpiki ʉgo, ndiile.” 13 ɄNTWA Kyala alɨnkʉnndaalʉʉsya ʉnkiikʉlʉ ʉjo alɨnkʉtɨ, “Ʉgwe, ʉbombile ɨsya fiki?” Ʉnkiikʉlʉ ʉjo alɨnkʉmmwamula alɨnkʉtɨ, “Ɨnjoka jo ɨjɨ jɨɨsyobile, ndiile.”
Ɨkɨgune kya Kyala kʉ bʉtʉlanongwa
14 Po ɄNTWA Kyala alɨnkʉjɨbʉʉla ɨnjoka alɨnkʉtɨ,
“Paapo ʉbombile bo ʉlo,
ngʉgunile ʉgwe gwimwene,
mfinyamaana fyosa,
ɨfi fikʉtiimigwa nɨ fya ndiisʉ.
Kwendelaga ʉlwanda,
kwafulaga ndʉfumbɨ,
mbʉʉmi bwako boosa.
15 Ngʉbɨɨka ʉbʉlʉgʉ pakatɨ pamyako nʉ nkiikʉlʉ ʉjo,
na pakatɨ pa lʉjungu lwako nʉ lwake.
Ʉlʉjungu lwake aalukʉkʉtajaniaga ʉntʉ gwako,
na nungwe aakʉkɨlʉmaga ɨkɨtende kyake.”
16 Po alɨnkʉmmbʉʉla ʉnkiikʉlʉ ʉjo alɨnkʉtɨ, “Ngʉkongelapo ʉkʉbabigwa bo kʉpaapa. Kʉbabigwaga fiijo bo kʉpaapa. Kangɨ ɨkɨnyonyo kyako kikʉlabɨlaga kʉ ndʉmego, looli ʉmwene ikʉkʉlambɨkaga.”
17 Po alɨnkʉmmbʉʉla Atamu alɨnkʉtɨ, “Paapo ʉmpɨliike ʉnkasigo, ʉliile ɨseke sya mpiki ʉgʉ naakʉkaaniisye ʉkʉlya, ʉmfu gʉguniigwe kʉnongwa jaako. Kʉbombaga ɨmbombo ɨngafu ʉkʉkaba ɨfindʉ ɨfi kʉlyaga mbʉʉmi bwako boosa. 18 Ʉmfu gukʉkʉmekesyaga ɨmiifwa nɨ mitʉlatʉla, looli kʉlyaga ɨfi fikʉmela mu ngʉnda. 19 Kʉkabaga ɨfindʉ ɨfi kʉlyaga kʉ mafuku, mpaka pakabalɨlo aka kwisa kʉgomokelamo mu mfu, paapo gwafumile ʉmo. Ʉgwe ʉlɨ lʉfumbɨ, ndʉfumbɨ kʉgomokelamo kangɨ.”
20 Atamu alɨnkʉmpapo ʉnkasi ɨngamu ɨjaa Efwa, paapo twesa Efwaa jo jʉʉba. 21 ɄNTWA Kyala alɨnkʉbatendekekesya Atamu nʉ nkasi ɨmyenda gya figʉbo, alɨnkʉbafwɨka.
Atamu na Efwa bikʉkagigwa mu ngʉnda
22 Po ɄNTWA Kyala alɨnkʉtɨ, “Lɨɨlɨno ʉmundʉ ʉjʉ afwene bo ʉlwɨtʉ, asimeenye ɨnunu nɨ mbiibi. Ngʉlondigwa nʉnsigɨle, alɨngiisa kʉlya ɨseke sya mpiki ʉgwa kʉbapa abandʉ ʉbʉʉmi, paapo lɨnga aliile, ikʉjangako kʉ bʉʉmi bwila na bwila.” 23 Po ɄNTWA Kyala alɨnkʉnkaga mu ngʉnda gwa Eteni, ʉkʉtɨ Atamu abʉʉke kʉkʉlɨma mu mfu muno aafumile. 24 Bo ankagile mu ngʉnda, alɨnkʉbɨɨka baakelubub mu Eteni kʉkɨbafu kya kʉbʉsookelo, aabɨɨkile nʉ lʉʉbo lwa mooto, ʉlʉ lukʉgalabʉka koosakoosa. Ʉlʉʉbo ʉlo lwalɨndɨlɨlaga ɨnjɨla jaa kʉbʉʉka kʉ mpiki ʉgʉ gukʉbapa abandʉ ʉbʉʉmi.