2
Mo muno kʉmwanya nɨ kiisʉ fyabʉmbiigwe, nɨ fingi fyosa ɨfi filimo. 2 Pi isikʉ lya bʉhaano na bʉbɨlɨ, Kyala alɨnkʉmala ɨmbombo jaake joosa ɨjaa kʉpela, alɨnkʉtʉʉsya. 3 Kyala alɨnkʉlɨsaja iisikʉ lya bʉhaano na bʉbɨlɨ, nʉ kʉlɨpela ʉkʉja liikemo, paapo pi isikʉ ɨlyo aamalile ɨmbombo ɨjaa kʉpela, alɨnkʉtʉʉsya.Ʉngʉnda ʉgwa Eteni
4 Ɨsi syo nongwa ɨsya kʉpeligwa kʉmwanya nɨ kiisʉ.
ɄNTWAa Kyala bo apelile kʉmwanya nɨ kiisʉ, 5 fikaalimo nafimo nkiisʉ, ɨfi fikʉmela nɨ fya kʉbyala, paapo ɄNTWA Kyala aakaalɨ ʉkʉtimɨsya ɨfula. Kangɨ akaalimo najʉmo ʉgwa kʉlɨma ɨkiisʉ. 6 Looli amɨɨsi gaafyʉkaga mu mfu ʉkʉfuma paasi, galɨnkʉkɨbundasya ɨkiisʉ kyosa. 7 Po ɄNTWA Kyala alɨnkwega ʉmfu, alɨnkʉmmbʉmba ʉmundʉ,b alɨnkʉmpuutɨla ʉmʉʉji gwa bʉʉmi mu mbulo, ʉmundʉ ʉjo alɨnkʉja mʉʉmi.
8 Po ɄNTWA Kyala alɨnkʉtendekesya ʉngʉndac mu Eteni, kʉkɨbafu kya kʉbʉsookelo. Ʉmo alɨnkʉmmbɨɨka ʉmundʉ ʉjʉ aalɨmmbʉmbile. 9 ɄNTWA Kyala alɨnkʉmesya ɨmipiki gya lʉko nʉ lʉko, ɨgɨ gyalɨ minunu ʉkʉgɨkeeta, gyapaga ɨseke ɨsya kʉlya. Pakatɨ pa ngʉnda ʉgo, gwalipo ʉmpiki gwa kʉbapa ʉbʉʉmi abandʉ, nʉ mpiki ʉgwa kʉsimanya ɨnunu nɨ mbiibi.
10 Kʉ Eteni, lwaliko ʉlwɨsi ʉlʉ loonaga amɨɨsi mu ngʉnda. Ʉkʉfuma apo, lwaliijabeenie ʉkʉja nyɨɨsi ina. 11 Ʉlwɨsi lwa kwanda ɨngamu jaake jo Pisyoni, lukʉkɨsyʉngʉʉtɨla ɨkiisʉ kyosa ɨkya Habila. Ɨkiisʉ ɨkyo kɨlɨ nɨ sahabʉ, 12 ɨsahabʉ jaake nunu. Kɨlɨ nɨ mipiki ɨgɨ gikʉsoosya ʉbʉlɨmbo ʉbwa mafuta agaa lʉʉma ʉlʉnunu aga bikʉtɨ bendola, kangɨ kɨlɨ na mabwe agaa ntengo aga bikʉtɨ oniki. 13 Ɨngamu ɨjaa lwɨsi ʉlwa bʉbɨlɨ jo Gihoni, lo ʉlʉ lukʉkɨsyʉngʉʉtɨla ɨkiisʉ kyosa ɨkya Kusi. 14 Ʉlwɨsi lwa bʉtatʉ ɨngamu jaake jo Tigilisi, lo ʉlʉ lukoona amɨɨsi ʉkʉlabɨla kʉbʉsookelo nkiisʉ ɨkya mu Asyulu. Ʉlwɨsi lwa bʉna ɨngamu jaake jo Fulati. 15 Po ɄNTWA Kyala alɨnkʉmmbɨɨkamo ʉmundʉ ʉjo mu ngʉnda ʉgwa Eteni, ʉkʉtɨ alɨmege nʉ kʉgʉtendekesya. 16 ɄNTWA Kyala alɨnkʉmmbʉʉla alɨnkʉtɨ, “Mu ngʉnda ʉgʉ, gwitɨkɨsiigwe ʉkʉlya ɨseke sya mipiki ɨgɨ gyosa, 17 looli ʉlɨngalyaga ɨseke sya mpiki ʉgwa kʉsimanya ɨnunu nɨ mbiibi, paapo lɨnga aakʉlya ɨseke sya mpiki ʉgo, nalooli aakʉfwa.”
18 Po ɄNTWA Kyala alɨnkʉtɨ, “Kʉkaja kʉnunu ʉmundʉ ʉjʉ ʉkʉtʉʉgala mwene itolo. Angʉmpelela ʉmundʉ ʉgwa kʉntʉʉla ʉjʉ abagiisye.” 19 Po ɄNTWA Kyala alɨnkʉfibʉmba nʉ mfu ɨfinyamaana fyosa ɨfya ndiisʉ nɨ njʉni syosa. Alɨnkʉfitwala kwa Atamu,d ʉkʉtɨ asimanye ɨngamu ɨsi ikʉfikoolelaga. Ɨngamu ɨsi aafikooliile silɨnkʉja ngamu syabo. 20 Po ɨfinyamaana fyosa ɨfya kʉtiimigwa nɨ fya ndiisʉ, nɨ njʉni syosa, Atamu aafipeele ɨngamu. Looli mfipeligwa ɨfyo kɨkaalipo nakɨmo ɨkya kʉntʉʉla ɨkɨ kɨbagiisye.
21 Po ɄNTWA Kyala alɨnkʉntwalɨla Atamu ʉtʉlo, alɨnkʉgona fiijo ʉtʉlo. ɄNTWA Kyala alɨnkwega ʉlʉbafu lʉmo, pabʉjo apa lwalipo alɨnkʉpiigalɨla. 22 Ʉlʉbafu ʉlʉ aalyegile, alɨnkʉlʉpela ʉkʉja nkiikʉlʉ, alɨnkʉntwalɨla Atamu. 23 Po Atamu alɨnkʉtɨ,
“Ʉlʉ ʉjʉ kɨfupa ʉkʉfuma mfifupa fyangʉ,
kangɨ mbɨlɨ ʉkʉfuma mu mbɨlɨ gwangʉ!
Ikʉjobigwaga ʉkʉtɨ ‘nkiikʉlʉ,’
paapo afumile mu nnyambala.”e
24 Fyobeene ʉnnyambala ikʉnndeka ʉgwise nʉ nna, ikʉlʉngana nʉ nkasi. Bobabɨɨlɨ bikʉja mbɨlɨ gʉmogwene.
25 Atamu nʉ nkasi bakaalɨ nɨ myenda ɨgya kʉfwala, looli sikaabakolaga ɨsoni.