Ʉbwandɨlo
Ʉkʉpeligwa ɨkiisʉ
1
Kʉbwandɨlo Kyala aapelile kʉmwanya nɨ kiisʉ. 2 Akabalɨlo ako ɨkiisʉ kɨkaalɨ nafyo nafimo, kɨkaalɨ nʉ bʉbʉmbe nabʉmo. Ɨngiisi jaakupɨkiile pamwanya pa mɨɨsi amasolofu. Mbepo gwa Kyala aalɨ pamwanya pa mɨɨsi.3 Po Kyala alɨnkʉtɨ, “Lʉjeko ʉlʉmuli.” Ʉlʉmuli lʉlɨnkʉjako. 4 Kyala alɨnkʉlʉbona ʉlʉmuli ʉlo ʉkʉja lʉnunu, alɨnkʉpaagʉlania ʉlʉmuli nɨ ngiisi. 5 Po ʉlʉmuli alɨnkʉlʉpa ɨngamu ɨjaa “muusi,” ɨngiisi alɨnkʉjɨpa ɨngamu ɨjaa “kɨlo.” Kʉlɨnkʉja majolo, kʉlɨnkʉja lʉbʉnjʉ, lɨlɨnkʉja lyo isikʉ lya kwanda.
6 Po Kyala alɨnkʉtɨ, “Gʉjeko ʉmpaalanga pakatɨ pa mɨɨsi, gʉgatapʉlanie amɨɨsi agaa kʉmwanya na gaa pakiisʉ.” 7 Po alɨnkʉgʉpela ʉmpaalanga ʉgo, alɨnkʉgatapʉlania amɨɨsi. Gamo galɨnkʉja kʉmwanya, agangɨ galɨnkʉja pakiisʉ, silɨnkʉja bo ʉlo. 8 Kyala alɨnkʉgʉpa ʉmpaalanga ʉgo ɨngamu ɨjaa “kʉmwanya.” Kʉlɨnkʉja majolo, kʉlɨnkʉja lʉbʉnjʉ, lɨlɨnkʉja lyo isikʉ lya bʉbɨlɨ.
9 Po Kyala alɨnkʉtɨ, “Amɨɨsi agaa pakiisʉ giibʉngaanie pamopeene, ʉkʉtɨ ɨkiisʉ ɨkyʉmu kɨbonekege.” Silɨnkʉja bo ʉlo. 10 Pabʉjo ʉbʉʉmu, alɨnkʉpapa ɨngamu ɨjaa “kiisʉ,” amɨɨsi aga gaabʉngeene pabʉjo bʉmobwene, alɨnkʉgapa ɨngamu ɨjaa “nyanja.” Kyala alɨnkʉsikeeta sisiisi, alɨnkwaga nunu.
11 Po Kyala alɨnkʉtɨ, “Ɨkiisʉ kɨmesyege ɨfya kʉmela, ɨfi fikʉpa ɨseke ɨsya lʉko nʉ lʉko, nʉ kʉmesya gyope ɨmipiki ɨgɨ gikʉpa ɨseke, ɨsi silɨ nɨ mbeju nkatɨ.” Silɨnkʉja bo ʉlo. 12 Ɨfya kʉmela ɨfi filɨ nɨ mbeju ɨsya lʉko nʉ lʉko, nɨ mipiki ɨgya seke ɨsi silɨ nɨ mbeju nkatɨ, filɨnkʉmela pakiisʉ. Kyala alɨnkʉkeeta sisiisi, alɨnkwaga nunu. 13 Kʉlɨnkʉja majolo, kʉlɨnkʉja lʉbʉnjʉ, lɨlɨnkʉja lyo isikʉ lya bʉtatʉ.
14 Po Kyala alɨnkʉtɨ, “Sijeko ɨmuli mu mpaalanga, ʉkʉtɨ ɨmuli ɨsyo sijabanie ʉmuusi nɨ kɨlo, sinangɨsyege ʉtʉbalɨlo, amasikʉ nɨ fyɨnja. 15 Ɨmuli ɨsyo sijege mu mpaalanga, sikɨmulɨkege ɨkiisʉ.” Silɨnkʉja bo ʉlo. 16 Kyala alɨnkʉpela ɨmuli ibɨlɨ ɨngʉlʉmba, iisʉba lɨmulɨkege pamuusi, ʉmwesi gʉmulɨkege pakɨlo. Kangɨ alɨnkʉpela ɨndondwa. 17 Alɨnkʉsibɨɨka ɨmuli ɨsyo mu mpaalanga, ʉkʉtɨ sikɨmulɨkege ɨkiisʉ, 18 silagɨlege ʉmuusi nɨ kɨlo, sipaagʉlaniege ʉlʉmuli nɨ ngiisi. Kyala alɨnkʉsikeeta sisiisi, alɨnkwaga nunu. 19 Kʉlɨnkʉja majolo, kʉlɨnkʉja lʉbʉnjʉ, lɨlɨnkʉja lyo isikʉ lya bʉna.
20 Po Kyala alɨnkʉtɨ, “Mmɨɨsi fijemo ɨfipeligwa ɨfyʉmi, nɨ njʉni sipululukege mu mpaalanga.” 21 Po alɨnkʉfipela ɨfipeligwa ɨfinywamu ɨfya mu nyanja nɨ fipeligwa ɨfyʉmi fyosa ɨfi fikwenda mmɨɨsi, ʉkʉkongana nʉ lʉko lwabo. Alɨnkʉpela ɨnjʉni syope, ʉkʉkongana nʉ lʉko lwabo. Kyala alɨnkʉsikeeta sisiisi, alɨnkwaga nunu.
22 Kyala alɨnkʉfisaja alɨnkʉtɨ, “Mupaapege, mubaalege, mwisʉle mu nyanja ni njʉni sibaalege pakiisʉ.” 23 Kʉlɨnkʉja majolo, kʉlɨnkʉja lʉbʉnjʉ, lɨlɨnkʉja lyo isikʉ lya bʉhaano. 24 Po Kyala alɨnkʉtɨ, “Ɨkiisʉ kɨje nɨ fipeligwa ɨfyʉmi, ʉkʉkongana nʉ lʉko lwabo, ɨfinyamaana ɨfi fikʉtiimigwa na ɨfi fikwendela ʉlwanda, nɨ finyamaana ɨfya ndiisʉ.” Silɨnkʉja bo ʉlo. 25 Po Kyala aapelile ɨfinyamaana fyosa ʉkʉkongana nʉ lʉko lwabo, ɨfinyamaana ɨfya ndiisʉ, ɨfinyamaana ɨfi fikʉtiimigwa, na fyosa ɨfi fikwendela ʉlwanda. Kyala alɨnkʉsikeeta sisiisi, alɨnkwaga nunu.
26 Po Kyala alɨnkʉtɨ, “Tʉmpele ʉmundʉ nkɨfwanikɨsyo kyɨtʉ, afwanege na nuuswe. Basilambɨkege ɨswɨ, ɨnjʉni, ɨfinyamaana, ɨkiisʉ na fyosa ɨfi fikwendela ʉlwanda.” 27 Po Kyala alɨnkʉmpela ʉmundʉ nkɨfwanikɨsyo kyake. Nkɨfwanikɨsyo kyake alɨnkʉmpela. Aabapelile ʉkʉja nnyambala nʉ nkiikʉlʉ. 28 Alɨnkʉbasaja, alɨnkʉbabʉʉla alɨnkʉtɨ, “Mupaapege, mubaalege, mwisʉle nkiisʉ nʉ kʉkɨlambɨka ɨkiisʉ. Musilambɨkege ɨswɨ, ɨnjʉni nɨ finyamaana fyosa ɨfi fikwenda pakiisʉ.”
29 Po kʉmmalɨɨkɨsyo Kyala alɨnkʉtɨ, “Keeta, mbapeele fyosa ɨfi filɨ pakiisʉ ɨfi fikʉmela, ɨfi filɨ nɨ mbeju, pamopeene nɨ mipiki ɨgɨ gikʉpa ɨseke. Ɨfyo fyo fikʉjaga findʉ fyɨnu ɨfya kʉlya. 30 Ɨfinyamaana fyosa ɨfya pakiisʉ, ɨnjʉni syosa ɨsya mu mpaalanga, nɨ fipeligwa fyosa ɨfyʉmi ɨfi fikwenda pakiisʉ, mfipeele fyosa ɨfi fikʉmela ʉkʉja findʉ fyabo.” Silɨnkʉja bo ʉlo.
31 Kyala alɨnkʉfikeeta fyosa ɨfi afipelile, alɨnkwaga finunu fiijo. Kʉlɨnkʉja majolo, kʉlɨnkʉja lʉbʉnjʉ, lɨlɨnkʉja lyo isikʉ lya ntandatʉ.