Ʉbwandɨlo
Ɨsyakʉtalapo
Kalata ʉjʉ ikʉlɨngaania ʉbwandɨlo bwa tʉndʉ toosa pakiisʉ. Ikʉlɨngaania muno Kyala aapelile ɨkiisʉ na fyosa ɨfi filimo, pamopeene nɨ ndondwa, iisʉba nʉ mwesi. Piitaasi Kyala aabapelile abandʉ nʉ kʉbapa ʉbʉlagɨli ʉbʉkʉlʉmba pakiisʉ apa.
Kalata ʉjʉ ikwamula ɨsi, “Fiki tʉlipo pakiisʉ apa?” Kyala jʉʉjo aatʉpelile ʉkʉtɨ tʉjepo. “Fiki tʉlɨ nʉ bʉtolwe fiijo pakiisʉ apa?” Silɨ bo ʉlo kʉnongwa jaa kɨgune kya bʉtʉlanongwa.
Kalata ʉjʉ alɨ mfijabo fibɨlɨ ɨfikʉlʉmba. Ɨkɨjabo ɨkya kwanda ikʉpanga ɨsya bwandɨlo bwa tʉndʉ toosa, ʉkʉpeligwa kwa kiisʉ na muno ʉbʉtʉlanongwa bwalingiile nkiisʉ (ʉlʉtʉʉlo ʉlwa 1–11). Nkabalɨlo akaa Nwaka abandʉ abaa kwanda baaliijɨbile fiijo, boosa baapyutiigwe nʉ mweleesyo ʉnnywamu. Ɨkɨjabo ɨkya bʉbɨlɨ kɨkʉpanga ɨsya biisʉkʉlʉ abaa Banyaisilaɨli, ʉkwandɨla fiijo na Abulahamu (ʉlʉtʉʉlo ʉlwa 12–50).
Kangɨ ikʉlɨngaania muno ɨfikolo nɨ njobelo ɨsya lʉko nʉ lʉko syalyandiile. Kangɨ na muno Kyala aalɨnsalile ʉmundʉ jʉmo, ɨngamu jaake Abulahamu, pamopeene nʉ lʉjungu lwake, ʉkʉja bandʉ baake.
Kangɨ kalata ʉjʉ ikʉlɨngaania ɨnongwa ɨsya Abulahamu nʉ mwanaake Isaka. Po ikʉtʉbʉʉla ɨnongwa ɨsya Jaakobo ʉmwana gwa Isaka na baanaake kalongo na babɨlɨ. Ɨnongwa ɨsya ndʉjungu lwa Jaakobo, nɨ sya mwanaake ʉnkʉndwe Joosefu sikʉnangɨsya muno Kyala aabaganile abandʉ baake, na paapo baalɨ kɨlʉndɨlo kɨnandɨ ɨkɨ kyasyʉngʉʉtɨliigwe na bandʉ aba biipuutaga kwa gyabaakyala.
Kalata ʉjʉ pamopeene na baakalata abaa Ʉkʉsooka, Abanyaleebi, Ɨmbalɨlo nʉ Ʉkʉkʉmbʉka Ɨngomeelesyo bikʉkooleligwa ɨngamu ɨjaa, “Ɨndagɨlo sya Moose.”
1: Ʉbwandɨlo bwa kiisʉ
Ʉkʉpeligwa kwa kiisʉ 1:1–2:3
Ʉbwandɨlo bwa bʉtʉlanongwa 2:4–4:26
Ʉlʉjungu lwa Atamu 5:1-32
Ɨnongwa sya Nwaka 6:1–9:29
Ʉlʉjungu ʉlwa baana baa Nwaka 10:1-32
Ʉkʉloganika kwa njobelo 11:1-9
Ʉlʉjungu lwa Syemu 11:10-26
2: Ɨnongwa sya biisʉkʉlʉ abaa Banyaisilaɨli
Ɨnongwa sya Abulahamu 11:27–25:11
Ʉlʉjungu lwa Isimaɨli 25:12-18
Ɨnongwa sya Isaka 25:19–26:35
Ɨnongwa sya Jaakobo 27:1–35:29
Ʉlʉjungu lwa Esabu 36:1-43
Ɨnongwa sya Joosefu 37:1–50:26