Kaini na Abeli
4
Po Atamu alɨnkʉmmanya ʉnkasi Efwa, ʉnkasi alɨnkʉja nɨ kɨfuba, alɨnkʉpaapa ʉmwana, alɨnkʉmpa ɨngamu ɨjaa Kaini. Alɨnkʉtɨ, “Ngabilea ʉmwana ʉnnyambala kʉ bʉtʉʉli bwa NTWA.” 2 Po Efwa alɨnkʉja nɨ kɨfuba kangɨ, alɨnkʉpaapa ʉnnuguna gwa Kaini, alɨnkʉmpa ɨngamu jaa Abeli. Abeli alɨnkʉja ntiimi gwa ngʼoosi, na Kaini alɨnkʉja ndɨmi. 3 Po akabalɨlo bo kakɨndile, Kaini alɨnkʉnsookesya ɄNTWA iikemo,b lya ɨfi aalɨmaga. 4 Abeli joope alɨnkʉtwala ɨfinyamaana ɨfinunu ɨfya kwanda ʉkʉpaapigwa mu ntiimo gwake. ɄNTWA alɨnkwikyela na Abeli, ni ikemo lyake. 5 Looli akaaliikyeliile ni ikemo lya Kaini. Po Kaini alɨnkʉkalala fiijo, alɨnkwilʉka kʉmaaso. 6 ɄNTWA alɨnkʉnndaalʉʉsya Kaini alɨnkʉtɨ, “Fiki ʉkaleele bo ʉlo? Fiki gwilwike kʉmaaso? 7 Lɨnga kʉbomba kanunu, kwitɨkigwa. Lɨnga kʉtoligwa ʉkʉbomba kanunu, ʉbʉtʉlanongwa bukʉkʉtegelela, bukʉlonda ʉkʉkʉkola. Ʉgwe kʉlondigwa ʉkʉbʉtola.”8 Po Kaini alɨnkʉmmbʉʉla ʉnnuguna Abeli alɨnkʉtɨ, “Tʉbʉʉke kʉ ngʉnda.” Bo balɨ mu ngʉnda, Kaini alɨnkʉnkoma ʉnnuguna, alɨnkʉnngoga. 9 Po ɄNTWA alɨnkʉnndaalʉʉsya Kaini alɨnkʉtɨ, “Ʉnnugunago Abeli alɨ kʉʉgʉ?” Kaini alɨnkʉmmwamula alɨnkʉtɨ, “Ngamanya kʉno aliko! Ʉne ngaja ndɨndɨlɨli gwa gwamyɨtʉ.” 10 ɄNTWA alɨnkʉtɨ, “Ʉbombile sya fiki? Iilopa lya nnugunago likʉʉndɨlɨla ʉkʉfuma mu mfu. 11 Po ʉlʉ ʉgwe ʉguniigwe! Ʉmfu gʉtikʉjaga nɨ mboto, gʉnwile iilopa lya nnugunago, ʉjʉ ʉgwe gʉnngogile. 12 Bo kʉlɨma ʉmfu ʉgo, ʉtikʉkabaga ɨseke. Kʉjaga mundʉ gwa kʉbeeta beeta, ʉtikʉkabaga ʉbʉjo pakiisʉ.”
13 Kaini alɨnkʉmmbʉʉla ɄNTWA alɨnkʉtɨ, “Ʉlʉfundo ʉlʉ ʉmbeele lʉkʉlʉmba fiijo, ngabagɨla ʉkʉlʉtola! 14 Keeta! Lɨɨlɨno ʉngagile nkiisʉ ɨkya mboto, ndikʉbonekaga kangɨ nkyeni mmyako. Ngʉja mundʉ gwa kʉbeeta beeta pakiisʉ. Ʉmundʉ gwesa ʉjʉ aikʉʉnyaaga, aikʉʉngoga.” 15 ɄNTWA alɨnkʉmmwamula alɨnkʉtɨ, “Hɨmma, sikaja bo ʉlo. Gwesa ʉjʉ aikʉkʉgoga, aikʉbukɨsigwa kahaano na kabɨlɨ.” Po ɄNTWA alɨnkʉmmbɨɨka ɨkɨmanyilo Kaini, ʉkʉtɨ ʉjʉ ikʉmmwaga, alɨnganngogaga. 16 Po Kaini alɨnkʉsookamo nkyeni mu NTWA, alɨnkʉbʉʉka kʉkʉtʉʉgala nkiisʉ ɨkya mu Nondi,c ɨkɨ kɨlɨ kʉbʉsookelo ʉkʉfuma mu Eteni.
Ʉlʉjungu lwa Kaini
17 Po Kaini alɨnkʉmmanya ʉnkasi, alɨnkʉja nɨ kɨfuba, alɨnkʉpaapa ʉmwana, ɨngamu jaake Enoki. Po Kaini alɨnkʉjenga akaaja, alɨnkʉkapapo ɨngamu jaa Enoki, ɨjaa mwanaake. 18 Enoki alɨnkʉmpaapa Ilati, Ilati alɨnkʉmpaapa Mehujaleli, Mehujaleli alɨnkʉmpaapa Metusyaleli, Metusyaleli alɨnkʉmpaapa Lameki. 19 Lameki alɨnkʉbeega abakiikʉlʉ babɨlɨ, jʉmo ɨngamu jaake Anda, ʉjʉngɨ ɨngamu jaake Sila. 20 Anda alɨnkʉmpaapa Jabali, ʉjʉ jo gwise gwa bandʉ aba baagonaga mu heema nʉ kʉtiima ɨmitiimo. 21 Ʉnnuguna, ɨngamu jaake Jubali, jo ʉjʉ aalɨ gwise gwa bakʉba mapango na malonge. 22 Sila joope alɨnkʉpaapa ʉmwana, ɨngamu jaake Tubali-Kaini, jo ʉjʉ aalɨ mpoosi gwa tʉndʉ ʉtwa kɨbʉngʉ nʉ twa kyela. Aalɨ ni ilʉmbʉ ʉnnandɨ, ɨngamu jaake Naama.
23 Lameki alɨnkʉbabʉʉla abakasi alɨnkʉtɨ, “Ʉmwe baa Anda na Sila, mumbɨlɨkɨsye! Mwe bakasi bangʉ, mutege ɨmbʉlʉkʉtʉ bo ngʉjoba. Naalɨnngogile ʉntubwa bo aafuleesye, naalɨnngogile bo aangʼwalile. 24 Lɨnga Kaini ikʉbukɨsigwa ʉbʉbiibi kahaano na kabɨlɨ, ʉne Lameki ngʉbukɨsigwa ʉbʉbiibi 77.”
Ʉkʉpaapigwa kwa Seti na Enosi
25 Atamu alɨnkʉmmanya kangɨ ʉnkasi Efwa, alɨnkʉpaapa kangɨ ʉmwana ʉnnyambala, ʉnna alɨnkʉmpa ɨngamu ɨjaa Seti. Alɨnkʉtɨ, “Kyala ambeeled ʉmwana ʉjʉngɨ, pabʉjo bwa Abeli, ʉjʉ Kaini aalɨnngogile.” 26 Seti joope alɨnkʉpaapa ʉmwana ʉnnyambala, alɨnkʉmpapo ɨngamu jaa Enosi.
Ʉkwandɨla apo, abandʉ balɨnkwanda ʉkʉmmwipuuta Kyala kʉ ngamu ɨjaa NTWA.