6
Yesus ne niane hahae openeso tanui
Yesus ihanu ia iki pina rei pusi oyo, ieu arihoni otoe rei. Inuniki poe ruai ne niane ikata ne mampusua. 2 Hoka poe oyo, iatuhete tau ranie hatae wani iaranahata pani sio Yahudiu no numa manoune. Sio panesi wasoni pani rei. Iatuheteso, oyo sio wasoni oatinu rei, osira. Oasei, “Ia reini mo, isupu ne maunauna rai on supa? Ianei rai pusire on supa? Sapani na imaha iuna sima-simana rai? 3 Ia reini mo, ia mamnana numa. Maria anai. Yakobus, Yoses, Yudas, runa Simon kakai. Nea hotau iae orue mai rei oi.” Reiso sio rei openeso tanui. Openeso oatinu tau ia nea.
4 Iahata, “Ia mamsima runa Anahatana ne maunauna, sio oamuirai sui supani. Hasae ia ruai ne niane, ne ipane taue, nea enau sahoro oamuirai tewa.” 5 Noi niane rei, Yesus iuna sima-simane isa tewa oi. Hasae isuisene sio kupua mkana. Iahusieso mani oyo iake rei sirinia. 6 Reiso isira ata sio oparisaa tanui tewa. Oyo ieui. Ieu iatuhete neka niana-niana.
Yesus iaisosi sio hutusa rahana ua oaunau
7 Yesus ianaha runa ne mampusua hutusa rahana ua rei. Pusiso oamanouso oyo, iaisosiso oeu sana ua-ua. Irui kawasa osiso na onei sakahatena. 8 Iaisosiso iahata, “Pene orori sae mani. Pene orori muaine te, tasi te, kepeni te. Pene oi. Hasae orori toka-toka mani. 9 Oausahu sandaliu. Ne pene orori papita ua. Orori hasae osa mani. 10 Sani munata onusu pani numa isa, orue tau numa rei rotu-tu oeu oarihoni niane rei. 11 Ne munata ohoka noi niane isa, oyo oapusaamo tewa, areimo oeu oarihoni niane rei. Ne munata openeso oatinu tanumo, areimo oeu oarihoniso. Oroho heu tapuna arihoni aimo atua na sio oanei ata Anahatana inooso osana. Sio osana tau sio oatinu tau ne maunaune tewa.”
12 Reiso, Yesus ne mampusua hutusa rahana ua rei, oeu oaunau. Oahata, “Ita kahurae iarihoni re rosau.” 13 Oeu onei sakahatena panesi runa ososa sio kupua tau wekatisie na osuiseneso.
Yohanes ia mamsohue imatai
14-29 Tau Yesus sio oeu osuisene rei, Herodes sahoro iuna aia. Inana wanini Filipus sahai nea waini nanai Herodias. Aikee Filipus mo, imata tewasi. Reiso Yohanes mamsohue iaunaui sui osa. Iahata, “Anahatana itapia tewa na anana wanimu sahai.”
Reiso, Herodes iaisosi sio umau na osota Yohanes na onusui pani pui anoe. Herodias iakapuku tau Yohanes reiso nanie ihunui. Ne Herodes inetei na pene ihunui. Iaisosi sio umau osaka Yohanes ia-ia na pene sio umau oakaremai. Tea mo, Herodes ikaitau Yohanes. Ianei ata Yohanes mo, anoi manisate. Ia manisate onate. Sani Yohanes iaunau mo, Herodes ne suka iatinu. Masike anoi eresama-samai tau Yohanes ne maunauna rai iae, ne suka iatinu tanui sirinia.
Ne Herodias isupu arena sirinia na ihunu Yohanes. Herodes ne musum manisata oyo, iuna karisaa. Ianaha runa sio onata arihoni kupania, sio soratatua, runa sio onata pusiso sui otoe Galilea. Tau karisaa rei, Herodias anai pina imarae. Herodes runa sio onata wasoni ianaha runaso rei pusiso no suka oasumatai. Reiso Herodes iasau osi ia pina hehuke rei. Iahata, “Nanie ainisi sae arihoniku na uruiki osia? Areimo asau mai!”
Oyo Herodes isopa sanrei, “Sae mani wani ainisiki arihoniku rei, mka uruiki osia. Masike ainisi we tuamane samatihue iae, mka uruiki osia sirinia.”
Oyo ia pina hehuke rei ihokai arihoni sio panesi rei na nanie iasei tau inai. Iahata, “Ina. Nene iake uainisi sae?”
Iahata, “Ainisi Yohanes mamsohue unui.”
25 Mata huni tewa oi, oyo inuniki mai Herodes honu. Oyo iahata, “Nanie uainisi Yohanes ia mamsohue unui. Aroriki san-sana mai. Aunutui roe loyan anoe!”
26 Herodes iatinu ne mainisie rei oyo, anoi mtinte. Nanie ipenei, ne isopa nea. Sio wasoni opusu karisaa rei iae oatinui nea oi. 27 Reiso iaisosi ia mamhunue isa inana Yohanes mamsohue unui. Reiso ia mamhunue rei, ieui poe pui, oyo iroto roha Yohanes tionai. Iroto roha tionai oyo irori unuke rei tau loyan, oyo iruiki osi ia pina hehuke rei. Oyo ia pina hehuke rei irui unuke rei osi inai honu.
Yohanes ne mampusua oatinu sanrei oyo, oeu onana Yohanes hatai, samatoro oaunutui pani hatu nohue.
Oyo Herodes iatinu rerihoni Yesus ne atata. Tea mo, sio panesi oanei Yesus nanai sui supani mani. Sio umau oasau oahata, “Yohanes ia mamsohue mo, waini iamahaiki honu! Reiso ne kawasa iuna sima-simana rai.”
Ne sio umau honu oasau sanrei, “Ia mo, Elia.” Sio umau honu oasau, “Ia mo, ia mamsima runa Anahatana ne maunauna isa sani sio mamsimana naone.”
Herodes iatinu sanrei oyo, iahata, “Manisate, ia reini mo, Yohanes ia mamsohue, waini naone uaisosi sio oroto roha unui rei tea! Waini iamahaiki honu.”
Yesus ne kawasa ipana sio panesi
30 Yesus ne mampusua oeu oaunau oyo, ne maisosia rei onuniso. Hoka mai, oyo oamanouso. Oamanouso na osima osi Yesus rerihoni sio no atata pusire runa sio oaunau sapani. 31 Ne sio panesi onusu ohoka mai Yesus, rotu-tu ia runa ne mampusua oai mosa tewa. Reiso Yesus iasau osiso. Iahata, “Mai, na ieuta pani otoe huie isa na oaranahamo mkane.”
32 Reiso osaa arupae, oeuso pani otoe huie. 33 Ne sio oeuso rei, sio panesi onoo. Oationaso. Reiso, sio panesi arihoni niana pusire pani otoe reipa oruma oanaoneso pusu kaimenne, nanie osupu Yesus runa ne mampusua.
34 Yesus sio ohoka on nau hae nanie osipuso arihoni no arupae rei, inoo sio hutue rei. Anoi runaso. Tea mo, sio sani rompau no ia mamsakae tewa. Reiso iatuhete panesi osiso.
35 Tau ranie manne nea, sio mampusua oasau osiki oahata, “Upu. Haineke pumono nea. Otoe reini mo, huie. 36 Nene iake mo, aisosi sio hutue rei oeuso na ohane muaine sui niana mai otoe reini.”
37 Ne iahata, “Omi sahoro opanaso.”
Oahata, “Ira oe! Mka ahane poroti osi sio panesi rei sapani? Arai ranana kepeni panesi.”
38 Iahata, “Oeuo onoo. Porotiu hua ina waromo?”
Oeu onoo, oyo osima oahata, “Porotiu hua nima waroni runa ika use ua mani.”
39 Oyo Yesus iaisosi sio pusiso orue tumun-tumun poe monota hutua. 40 Sio pusiso orue tumun-tumun. Sio utuni oamanouso tau osa. Sio hutu nima oamanouso tau osa. 41 Oyo Yesus inana porotiu hua nima rai runa ikaya use ua rai. Ikatare oyo iarinaa na roe nante. Iahata, “Amaku Anahatana ano mo, ano iake. Arui muaina raini osima.”
Iasau sanrei oyo, ikuparehi porotiu rai mkana-mkana tau hanai, oyo iruire osi ne mampusua, inina na osamare osi sio panesi rei. Oyo isama ikaya use ua rai osi pusiso oi. 42 Oyo sio pusiso oaiso rotu-tu tiao pokona nea. 43 Oaiso suka, oyo sio mampusua oamanou porotiu runa ikaya nesia rai. Nesia rai, oamanoure tau pakuna hutusa rahana ua rotu-tu taua. 44 Tau sio hutue rei mo, sio hanaia, sio mainaya nihu nima oai muaina rai runa sio pinau runa sio ikina oi.
Yesus ne kawasa ieui roe waene hahae
45 Yesus ipana sio hutue rei pusi, mata hun oyo, mata hun oyo, iaisosi ne mampusua oeuso oanaone tau arupae pani nia Betsaida, pani hae. O, ia ruai iaisosi sio hutue rei onuniso. 46 Pusiso onuniso samatoro Yesus ieu roe pupue, nanie ianamana runa Anahatana.
47 Nene pumono pani sanrei oyo, ne mampusua runa no arupae rei wasonau waenae tihue nea. Ne Yesus ruai waira kaimenne asi. 48 Inoo ata omankaeso, osai kua no arupae tewa nea tau ihute on pani uae. Oyo nene kinoke sanrei, ieui pani tanuso. Ieu tau aini roe nakane hahae. Hoka pani oyo, ieui sani nanie inikuso. 49 Onooi ieui ipusu waene hahae sio ata sakahatene. Reiso oasanoata. 50 Tea mo, onooi, oyo okaitau hunu ruao. Oyo sira tau iasau iahata, “Apamese anomo. Au ruaku reini tea! Pene okaitau.”
51 Oyo isaa pani tanuso, pani arupae rei. Isaa oyo, ihute rei remene. Sio mampusua osira hunu ruao. 52 Osira hunu ruao, tea mo, potusi Yesus inana porotiu hua nima iunare panesi. Oanei tewasi ata sima-simane rei nene manariti sapani. Oanei sae isa tewasi.
53 Reiso ohokaso pani hae, oyo opesi hatu aie pani tihue wani nanae Genesaret. 54 Hoka pani oyo, osipuso arihoni arupae rei. Osipu poe, oyo sio pusiso pani rei oationa Yesus. 55 Reiso ohori otoe rei, orori sio kupua mai Yesus tau kinoa. Munata oatinu ata Yesus wai pani otoe isa, orori sio kupua pani otoe rei. 56 Sui supani mani Yesus ihokai, pani niana, noi nisiu, orori sio kupua pani naniai. Sio oamanouso sui osa. Oyo oainisi tanui. Oahata, “Upu. Pene asopo sio kupua osii ne papite aie. Masike hasae ne papite aie iae, pene asoposo.”