¹ Múnáma cecemá de káá-ma nùka pà hḭ́nà-ka è kó kà n'tṵ̀nì è dɔń-nà Weèdi, è tṵ́mà káá-nà teǹka hḭ́ǹka hɔ̰́ɔ̰̀ta pà nì dɔń-ta kú mɛhɛká. ² Ye kú kpɛ́mú, pà de pa̰à̰-á̰-ma Weèdi fḭ́ḭkú é kù totá bɛ̀m̀bɛ̀ka kàdɛ́ɛ́. Bɛ̀m̀bɛ̀ni cecedí, pà de nì yún bɛ̀m̀bɛ̀wendí-dà. Ni kú mɛhɛká-dà, ha̰wèdɛ̀màma kpɛ́ɛtá de péé-ma, nà tábídì nà pɛ̰́ɛ̰̀pa pà de kɔ̰́ɔ̰̀-pa Weèdi. ³ Bɛ̀m̀bɛ̀dɛ́ɛ̀di mɛni de péé kùdáasàpu dɛ́ɛ̀pu mɛ̀mù de ca̰ncí-pu kú dàhàka-dà. Ye kú bɛ̀m̀bɛ̀ni-dà pà de yún-má bɛ̀m̀bɛ̀wendí mɔ́nní. ⁴ Ni kú mɛhɛká-dà wúdó cɔ̰̀ǹcɔ̰̀ni de péé-ma kà pà wunì dùko ni hḭ́ǹka. Ni mɛhɛká-dà mɛ̀ɛ tṵ́mà dɛ̀ɛ̀ múnáma totodí de péé-ma kà pà nì dánà wúdó ni wɛnnì. Ye totodí mɛhɛká, kà wúdó cɔ̀ta yè tài kà dipú pà toò-pu màánì péé ta mɛhɛká, é yídá kà Ànɔ́ɔ̀ ya̰kú mɛ̀ǹkù de mɔǹtaà-ku mɛ̀ɛ té tài ni mɛhɛká nà tá̰à̰ka dawɛhí pà de wa̰à̰haà-hi kú hḭ́ǹka múnáma kpɛ̰́ńtìnùka. ⁵ Ye totodí hḭ́ǹka, kà pà de é pa̰á̰ Weèdi tɔntɔndipá pà toò-pa Sèdùpɛ̰́ɛ̰̀, pa dìti tìdɛ́ɛ́ mìì bɛkú-sa è yɔ̀ Weèdi wɛhimú péé ye pesá. K'yèe Tɔntɔndipá fɛ̀tìdi wɛ̰́ma cḭ̀n bɛ̀m̀bɛ̀ni pà de hɔ̰́ hútá-di kú hḭ́ǹka hḭ̀ma è kpɛ̀i Weèdi é deèda nìpa sḭ̀ḭ̀ma. Àmá, n pú kpɛ̀i é fekapa mii kú wɛnnì éè wɛɛ́ sá̰mà.

⁶ Niìi wɛǹni de hḭ́káàma-dà, kà dɔ̀hàka yam̀ma dúù wɔ̀ka wɛǹni bɛ̀m̀bɛ̀ni cecedí mɛhɛká ye fḭ́ḭkú mɛhɛká è pa̰kú pa dɔ̀hàka kákámú. ⁷ Há̰kà bɛ̀m̀bɛ̀dɛ́ɛ̀di mɛni kú mɛhɛká, dɔ̀hàka kpɛ̰́ǹn cɔ̰́ɔ̰̀di-dà hɔ̰́ dúú ni mɛhɛká cɔ̀ku màcɔ̰́ benní mɛhɛká. Ò mɛ̀ɛ hɔ̰́ n'dúti ni mɛhɛká è toó nɔtá hḭ̀ma-dà é tɛ̀i é hútá Weèdi, é cɔhà è yɔ̀ n'ɔ́ɔ̀ dèda o mɔ́nń kú yetáka nà nìku wɛǹni kpɛ́ɛká. ⁸ Weèdi Sèdi de bɛkú ye pesà è yɔ̀ cɔ̀ku mɛ̀ǹkù kɔ́dì-nà-ku bɛ̀m̀bɛ̀wendí mɔ́nní mɛhɛká de mun pú kpetà, Weèdi fḭ́ḭkú cecekú de káà yè péé-mà-ní. ⁹ Yè mɛ̀ɛ yòǹ niìya̰-dà mìì bɛkú-sa mìì pa̰kú-sa wɔ̀nì mɛnì-ní. Yè cakú è yɔ̀ pa̰ká nìdo pɔ̰n-ká Weèdi nà dɔ̀hàka ò pa̰kú-ka ni kpɛ́mú pú kó nɛɛ́ wekàna pópóí nìi mɛ̀ǹǹ pa̰kú-ko ye kú niì-ní o yàma mɛhɛká. ¹⁰ Yè yòǹ nùka-dà nìi hḭ́nà-ka kà kà nɔɔ̀-nà dipú wɛmá, nà naàma, nà pa cɔ̰́ɔ̰̀di wekànamá kákámú dɔ́ɔ́di. Ye kú nùkà wɛnnì de centì-í-ma, hádí kà Weèdi é nɛɛ́ tɛ̀ni peǹta niìya̰ wɛǹni.

¹¹ Àmá Kídísì tɛ̀ni è yòǹ dɔ̀hàka kpɛ̰́ǹn è kó ti pa̰a̰ niìya̰ suusá^a ò dɔ̀haà-sa-dà-ní ti kpɛ́mú. Weèdi fḭ́ḭkú ò yɛ̀ni-kú mɛhɛká wɛhinà-á-ma tenkà kpɛ́kù è tṵ́mà kù suunà. Mɛnku, pà pú kù maá nà nìi nɔ̀hi, mìì cakú-sa è yɔ̀ kù pú yòǹ fòùkù pà pa̰à̰-kù kú kpɛ́kú. ¹² Kídísì dúú ku bɛ̀m̀bɛ̀wendí mɔ́nní mɛhɛká cɔ̀ku màcɔ̰́-dà k'yé n'yɔ̀ɔ. Ò mɛ̀ɛ pú dúú é tɛ̀i kɔ̰́ɔ̰́ bɔdaàka hḭ̀ma yoo naàdapàka hḭ̀ma, àmá ò tɛ̀i é kɔ̰́ɔ̰́ o mɔ́nń kú hḭ̀ma-dà. Mɛmá-dà ò hḭn-má é ti dontá k'yè kɔ́ɔ́ yɔ̀ɔmá. ¹³ Dekáà wɔ̀ni kú pa̰á̰ma, pà de hɔ̰́ tódá bɔdaàka hḭ̀ma-dà, nà naàdaàka hḭ̀ma, nà naànifá pà pṵ́nà-fa kà fá pedá fa tápémú, é siìdi mɛ̀m̀pà de pú weni-pá hḭ́ǹka. Ye kú pa̰á̰mà-dà de hɔ̰́ n'tee kà pa wɔ̰̀ǹti é tón é weka. ¹⁴ K'yè de yòǹ mɛmá-dà, Kídísì kú hḭ̀ma pú dɔɔ̀haà è kpenì é ha̰tá-nà nɔtí kpɛ́ɛmá dò? Nà Weèdi Sèdi mɛ̀nì baà kó m'péé-di kpeèti-dà ò kɔ̰́ɔ̰̀-ma o cɔ̰́ɔ̰̀di Weèdi è pú pa̰à̰ sḭ̀ḭ̀ma màcɔ̰́mà. O hḭ̀ma kó wekàna-á-ma ti yàma sḭ̀ǹya̰ mìì péé-sa ma mɛhɛká è ti kṵnti-nà kṵ́mú mɛhɛká, k'yé teha kà tí deha Weèdi mɛ̀nì fòù-di kpɛ́mú.

¹⁵ Ǹtɛ mìì tee-sá múnáma pààma mɛhɛká, kà Kídísì yòǹ nìdo ti yònà é n'yɛɛ̀hu-kó kú pesá è wɛì-nà Weèdi. Ye wɔ̀ni Weèdi yíí-pa, pà kó dɛ́tá-ma kááma mɛ̀mà kɔ́ɔ́-ma yɔ̀ɔmá ò hḭ́nà nùdi è yɔ̀ ò kó kɔ̰́ɔ̰́-ma mɛ̀m̀pà yòǹ-pa o kpɛ́ɛpá. Pà kó mà dɛ́tá mìì tee-sá ò kpíi é dontá nìpa yetáka pà de pa̰kú-ka múnáma cecemá mɛhɛká. ¹⁶ Kà nìi hḭ́nà nùdi pɔ̀kàta mɛhɛká, è cakáà k'ò kpíi pà yònà é tokamá o kááma, yè hɔ̰́ béka ye yaǹn-dà é kpíí kà pá nɛɛ́ é tṵṵ̀na ye nùdi. ¹⁷ Nùdi nìi hḭ́nà-di pú hɔ̰́ n'káá nɔɔ̀ti k'yèe yaǹn káà fòù. Ni yaǹn-dà hɔ̰́ kpíí kà ní nɛɛ́ deha. ¹⁸ Mií-ì tee bá múnáma cecemá, Weèdi de pú mà kpetà-ma kà hḭ̀ma pú hútà. ¹⁹ Nìku wɛǹni yìhìka, Mɔ̀yísì de dɛnà é kaàn kpɛ̰́ńtìnùka wɛǹni-dà Weèdi de kà pà kɔ̰́káàma kà pá kà yèkà. Ye kú dàhàka, k'ó tódá naàdapàka hḭ̀ma, nà bɔdaàka kpɛ́ɛmá é mà kɔkadá nà nɛ́ɛmá. É yídá pɛha tetá pà toò-ta Ìsɔ́pù ta dɛ̀tàda é tà fḭń hɔ̰ɔ̰̀kpìmu hṵɛ̰mú, è té fɛ̰ǹta ye hḭ̀ma mɛhɛká, é siìdi kpɛ̰́ńtìnùka pɔ̀kàta hḭ́ǹka nà nìku wɛǹni hḭ́ǹka, ²⁰ ye wɔ̀ni è yɔ̀: Miì yòǹ hḭ̀ma-dà Weèdi nɛ pa̰à̰-nà-ma múnáma, nɛ́ púsí ye múnámà sukú. ²¹ Mɛmá kú bookú-dà, ò mɛ̀ɛ té de siìdi-má ye hḭ̀ma Weèdi fḭ́ḭkú, nà nɛǹti pà de pa̰kú-nà-ti wɛǹni dɔ̀hàka. ²² Kpɛ̰́ńtìnùka ti cakú è yɔ̀ hḭ̀ma wekànì niìi dɔ́ɔ́di-dà. Àmá, kà hḭ̀ma pú hútà, sḭ̀ḭ̀ma deèdamá kɔ́ɔ́.

²³ N nɛ yɔ̀ɔ cakàpu-dà è yɔ̀ niìya̰ pà de pa̰kú-sa wɛǹni múnáma kpɛ̰́m̀ma mɛhɛká è dùǹti-nà Weèdi, yè de yòǹ hḭ́ńkà kpɛ́ɛsá dìku-dà. K'yàá de békú pá wekàna ye kú niiyà̰ ma kú bookù nà nɔtí hḭ̀ma, yè bɛkú è yɔ̀ dɔ̀hàka pà kó pa̰á̰-ka ye hḭ́ńkà kpɛ́ɛsá kpɛ́mú yònà é ha̰tá-ma nɔtí hḭ̀ma, ²⁴ è yá̰á̰ Kídísì pú dúú Weèdi hɔ̰́ɔ̰̀ta mɛhɛká pà maá-ta nà nìpa nɔ̀hi, mɛnta de yòǹ hḭ́ńkà kpɛ́ɛtá kú dìku-dà. Àmá, ò dúú hḭ́ǹka mɔ́nká mɛhɛká-dà, é tɛ̀i è wɛì-nà ti kpɛ́mú Weèdi yìhìka. ²⁵ Ò pú dúú é tɛ̀i é kɔ̰́ɔ̰́ o cɔ̰́ɔ̰̀di cɔ̀kumá dɔ́ɔ́di é n'yònà múnáma kpɛ̰́m̀ma mɛhɛká dɔ̀hàka kpɛ̰́ǹn de dúù-ma beeká wɛǹni Weèdi hɔ̰́ɔ̰̀ta mɛhɛká nà hḭ̀ma mɛ̀mà pú yòǹ-ma o kpɛ́ɛmá. ²⁶ Kà mɛmá-dà de dɛɛ̀, yè de kó béka ó dii náńkú cɔ̀kumá dɔ́ɔ́di-dà háá nà fòùku cetáma. Há̰kà, dadèǹdèkà mɛnkà kú mɛhɛká, ò fodà-ní cɔ̀ku màcɔ̰́-dà k'yé n'yɔ̀ɔ, é kɔ̰́ɔ̰́ o cɔ̰́ɔ̰̀di kà p'óò pa̰á̰ dɔ̀hàdi k'ó fíɔ́wá sḭ̀ḭ̀ma. ²⁷ Nìi wɛǹni kó kpíí cɔ̀ku màcɔ̰́-dà, ye kú dàhàka kà Weèdi óò sída. ²⁸ Ma cɔ̰́ɔ̰̀di-dà Kídísì kɔ̰́ɔ̰̀-ma o cɔ̰́ɔ̰̀di kà p'óò pa̰á̰ dɔ̀hàdi cɔ̀ku màcɔ̰́ k'yé n'yɔ̀ɔ, ye wɔ̀ni k'ó deèda nìku dɔ́ɔ́di sḭ̀ḭ̀ma. Ò kó fodá-ma-ní dɛ́ɛ̀ma, há̰kà yè koò pú kó n'yòǹ sḭ̀ḭ̀ma deèdamá kpɛ́mú, àmá ò kó fodá-ní é fḭ́hìna mɛ̀m̀pà ò ceí-pa-dà.