Hèbùdéèpa 7

Mɛ̀ɛ̀sìsèdɛ́kì yòǹ wódo-dà nà dɔ̀hàka yaǹn.

¹ Ye Mɛ̀ɛ̀sìsèdɛ́kì de yòǹ Sàdɛ́m̀ teǹka wódo-dà, è tṵ́mà yòǹ Weèdi mɛ̀nì wɛhi-nà-di niìi wɛǹni dɔ̀hàka yaǹn. Àbààhám̀ de taá dii-má-ní wóópa ta̰à̰pu, é n'kṵnti-ní k'yèe mɛnń-dà é taá o peètanàpu é tɛ̀i óò kóná. ² Ye mɛnń-dà mɛ̀ɛ dɛɛ̀ Àbààhám̀ de bodà-ma ò de feè-sa-ní wɛǹni taà̰pu mɛhɛká, niìya̰ píta mɛhɛká k'ó deèda yècɔ̰́. Múńdìkaà, ye Mɛ̀ɛ̀sìsèdɛ́kì-ní, o yèdì kpɛ̀i é n'yɔ̀ coóma wódo-dà. Tṵ́màkaà, ò de yòǹ Sàdɛ́m̀ wódo-dà, mìì kpɛ̀i é n'yɔ̀-sa wɛ̀ɛ̀di wódo. ³ Òcɔ̰́ǹ pú yá̰á̰ o báàa n'ɔ̀ɔ màa, òcɔ̰́ǹ mɛ̀ɛ pú yá̰á̰ o yààpa yèka. Òcɔ̰́ǹ pú wɛdà kàcɔ̰́kà bɛ́kà o pɛdáma wɛmá, n'ɔ̀ɔ kṵ́mú wɛmá. Ò yònà Weèdi bíitá-dà, è yòǹ dɔ̀hàdi yaǹn k'yè kɔ́ɔ́ yɔ̀ɔmá.

⁴ Nɛ́ cɔ́ɔ́ é dɛ́há ye dɔɔɔ̀ o wɛhimú de sá̰á̰-ma! Bá ti yàdo Àbààhám̀ d'oò kɔ̰́ɔ̰̀-ɔ̰́-ma ò de feè-sa-ní ta̰à̰pu mɛhɛká, niìya̰ píta mɛhɛká k'óò kɔ̰́ɔ̰́ yècɔ̰́. ⁵ Há̰kà, kpɛ̰́ǹtinùka de kɔ̰́ɔ̰̀ nùdi Dèfí yaàbíiká-dà mɛ̀ǹkà yòǹ-ka dɔ̀hàka yam̀ma, è yɔ̀ kà té deèda Ìsìdàyɛ́dì nìku káá-sa wɛǹni hḭ́ǹka, niìya̰ yècɔ̰́ niìya̰ píta mɛhɛká. Kà de yònà éè dèda ka kúcàpa pesá-dà, nà pà mɛ̀ɛ té baà de yòǹ-sà Àbààhám̀ yaàbíiká é n'yònà mɛnká. ⁶ Mɛ̀ɛ̀sìsèdɛ́kì mɛnn há̰ de pú yòǹ Dèfí yaàbíidí, nà mɛma baàkaà, k'ò de ta̰ǹta Àbààhám̀ de feè-sa-ní ta̰à̰pu mɛhɛká é tɛ̀ni óò kɔ̰́ɔ̰́ niìya̰ píta mɛhɛká yècɔ̰́. Ye wɔ̀ni, kà Mɛ̀ɛ̀sìsèdɛ́kì é kóná Weèdi de hḭ́nà-ko nùka. ⁷ T'aá yá̰á̰-dà dɛ́dɛ́í, è yɔ̀ mɛ̀ǹǹ wɛhi-kó-dà hɔ̰́ kóná sḭ̀mɔ́ǹn. ⁸ Mɛ̀ɛkà, ye pa̰á̰mà cecemà-ní, Dèfí yaàbíiká mɛ̀ǹkà tà̰ni-ká Ìsìdàyɛ́dì nìku kááma hḭ́ǹka niìya̰ píta mɛhɛká yècɔ̰́, kà yòǹ nìpa-dà è kɔ̰́n. Pa̰á̰ma dɛ́ɛ̀mà-ní, Mɛ̀ɛ̀sìsèdɛ́kì mɛ̀ɛ té ta̰ntà-á-ma niìi píta mɛhɛká yècɔ̰́, àmá mɛnn fòù-ú-ma é n'yònà Weèdi pɔ̀kàhi hḭ́mpú. ⁹ Ti kó nɛɛ́-ma mà kɔ̀ù é n'yɔ̀, bá Dèfí mɛ̀ǹǹ kú yaàbíiká sɔ̰ncí-ka è tà̰ni niìya̰ píta hḭ́ǹka yècɔ̰́, ò mɛ̀ɛ t'éè bodà-á-ma Mɛ̀ɛ̀sìsèdɛ́kì n'ɔ̀ɔ yàdo Àbààhám̀ de ò bodà-sa kú kpɛ́mú. ¹⁰ Miya̰ kpɛ̀i é caka è yɔ̀, bá nà pà de mun pú pɛɛ̀-mà Dèfí, ò de yɔ̀ɔ péépu-dà o yàdo Àbààhám̀ wɔ̰̀ǹti mɛhɛká, Àbààhám̀ de petà-nà tḭ́ń wɔ̀ni Mɛ̀ɛ̀sìsèdɛ́kì.

¹¹ Ìsìdàyɛ́dìpa kpɛ̰́ńtìnùka Weèdi de pà kɔ̰́ɔ̰̀-ka de cakú è yɔ̀ Dèfí yaàbíiká mɛhɛká-dà pà de yònà é n'ta̰kù-ma dɔ̀hàka yam̀ma. Pà de yòǹ dɔ̀hàka yam̀ma, nà Ànɔ́ɔ̀ kú pa̰á̰ma cɔ̀ku-dà. Há̰kà, kà pa dɔ̀hàka pa̰á̰ma de sà-á-dà tenten, è yenì yè pú békáà dɔ̀hàka yaǹn tɔɔ̀o k'òo kú pa̰á̰ma cɔ̀ku yònà Mɛ̀ɛ̀sìsèdɛ́kì kpɛ́ɛ́kú. ¹² Há̰kà, kà pà cèhènà fùdi pà cɛ̰hú-di kú mɛhɛká dɔ̀hàka yam̀ma, kpɛ̰́ńtìnùka mɛ̀ɛ té yònà é cehèna-á-ma. ¹³ Wɛmá ti há̰ kɛdà-ma-ní hḭ́ńkà wɛì ti Teó-dà. Mɛnn yòǹ nahàku tɔkú kóoó-dà. Ye nahàku mɛ̀ɛkà, ku nìdo òcɔ̰́ǹ mun pú pa̰à̰ daadí yènì dɔ̀hàka yam̀ma tɔmú dɔ̀hàdi cɔ̰̀ǹcɔ̰̀ni hḭ́ǹka. ¹⁴ Ti mɛ̀ɛ yá̰á̰-ma sukú, è yɔ̀ ti Teó yòǹ Sùdáà nahàku kóoó-dà. Mɔ̀yísì de wɛì tḭ́ń daadí dɔ̀hàka yam̀ma wɛmá, ò de pú wɛɛ̀ màcɔ̰́mà ye nahàkù hḭ́ǹka.

Sèsíì yòǹ dɔ̀hàka yaǹn-dà Mɛ̀ɛ̀sìsèdɛ́kì kú tɔɔ̀ma.

¹⁵ Ǹtɛ pa̰á̰ma mɛ̀mà dɔ̀haà è wekànì-ma miì kú wɛnnì: Dɔ̀hàka yaǹn tɔɔ̀o-dà pà hḭ́nà-ma k'ò yònà Mɛ̀ɛ̀sìsèdɛ́kì. ¹⁶ Ò pú hḭn dɔ̀hàka yaǹn mìì tee-sá ye kú pa̰á̰mà péé-nà-ní o yààpa pesá. Ò hḭn dɔ̀hàka yaǹn, nà fòùmu mɛ̀mù káá-pu kpeèti è pú kó yɔ̀ɔpú kpɛ́mú-dà, ¹⁷ è yá̰á̰ Weèdi pɔ̀kàhi cakú o hḭ́ǹka è yɔ̀:

A kó n'yòǹ dɔ̀hàka yaǹn-dà,

k'yé n'kɔ́ɔ́ yɔ̀ɔmá,

Mɛ̀ɛ̀sìsèdɛ́kì kú tɔɔ̀ma.

¹⁸ Ye wɔ̀ni, Weèdi kpíà kpɛ̰́ńtìnùka kpɛ̰́ɛ̰̀ka, mìì tee-sá kà de pú káá kpeèti, è péé hécí. ¹⁹ Mɔ̀yísì kpɛ̰́ńtìnùka de pú nɛɛ̀ é ta̰hìna nìpa wekànamá sàma mɛhɛká. Àmá sá̰mà-ní, daḿma mɛ̀mà ha̰tà-ma kpɛ̰́ńtìnùka-dà Weèdi ti pɛ̰ḭ-má. Nà mɛma kú kpɛ́mú, ti kó nɛɛ́ tɔ́ká-ma Weèdi pesá.

²⁰ Mɛ̀ɛkà, Weèdi de wɛ̰́háà-á-ma é nɛɛ́ pa̰á̰ miì kú wɛnnì. Tɔɔ̀pa mɛmpa hɔ̰n dɔ̀hàka yam̀ma k'yèe kú wɛ̰́hàmà kɔ́ɔ́. ²¹ Àmá Sèsíì mɛnn, Weèdi de wɛ̰́háà-á-ma é nɛɛ́ óò hḭ́ná k'ó hḭn dɔ̀hàka yaǹn. Nì de wɛ̰́háà óò caka è yɔ̀:

Mmí Bateó-dà wɛ̰́hú,

n mɛ̀ɛ pú kó peǹta n wɛɛ̀-sa (hḭ́ǹka):

A kó n'yòǹ dɔ̀hàka yaǹn-dà

k'yé n'kɔ́ɔ́ yɔ̀ɔmá.

²² Mií-ì tee, múnáma Weèdi ti pa̰à̰-nà-ma ha̰tà-ma kpɛ̰́ɛ̰̀ma, Sèsíì-dà mɛ̀ɛ péé ma cɔhɔ̀ka è bɛkú è yɔ̀ mà mà yòǹ-ń-ma.

²³ Tɔɔ̀sa mìì tṵ́mà ceń-sa, mií-dà héé dɔ̀hàka yam̀ma tɔɔ̀pa, mɛmpa de sṵ́n dɔ́ɔ́di-dà è tà̰ni pa tɔɔ̀pa, mìì tee-sá kṵ́mú de pà kpanì pà kó m'pa̰kú-ma pa tɔná k'yé n'kɔ́ɔ́ yɔ̀ɔmá. ²⁴ Àmá Sèsíì mɛnn há̰ fòù-ú-ma k'yè kɔ́ɔ́ yɔ̀ɔmá, yè mɛ̀ɛ kɔ́ɔ́ tɔɔ̀o óò tà̰ǹta daadí yènì o dɔ̀hàka tɔmú mɛhɛká. ²⁵ Ye kú kpɛ́mú-dà tee, ò kó nɛɛ́-ma é fḭ́hìna dɛ́dɛ́í mɛ̀m̀pà ò dídì-nà-pa è kɔ́dì Weèdi pesá. Ò mɛ̀ɛ fòù-ú-ma è mɛ̀ɛ baà kó n'fòù, é n'cɔɔ̀hu pa kpɛ́mú Weèdi pesá.

²⁶ Sèsíì yòǹ dɔ̀hàka kpɛ̰́ǹn yè de ti békú-ko-dà. Ò weni-í-ma, è kɔ́ɔ́ yetádi, è kɔ́ɔ́ sḭ̀ḭ̀ma. Ò de pú yònà niìsḭ̀m̀ma pa pa̰á̰ma hḭ́ǹka. Weèdi ò yòhònà óò kɔ̰́ɔ̰́ kàdìdi sàdi-dà ni pesá. ²⁷ Ò pú yònà dɔ̀hàka kpɛ̰́m̀ma tɔɔ̀pa. Mɛmpa de hɔ̰́ cedí pa̰á̰ dɔ̀hàka-dà pa mɔ́mpá kú sḭ̀ḭ̀ma kpɛ́mú, é yídá è há̰ nɛɛ́ pa̰á̰ nìku kú kpɛ́ɛmá kpɛ́ɛká. Yè de pú békú Sèsíì mɛnn é hḭn mɛma, è yá̰á̰ ò kɔ̰́ɔ̰̀ o cɔ̰́ɔ̰̀di-dà, é pa̰á̰ dɔ̀hàdi cɔ̀ku màcɔ̰́ k'yé n'yɔ̀ɔ. ²⁸ Dɔ̀hàka kpɛ̰́m̀ma Mɔ̀yísì kpɛ̰́ńtìnùka de hḭ́nì-pa de yòǹ nìpa mɛ̀m̀pà káá-pa-dà yetáka. Àmá kpɛ̰́ńtìnùka dàhàka, Weèdi wɛ̰́háà é hḭ́ná-ko k'ò yòǹ dɔ̀hàka kpɛ̰́ǹn, mɛnń-dà héé ni bíitá mɛ̀ǹtà pa̰à̰-ta tà de yònà é pa̰á̰-sa wɛǹni dɛ́dɛ́í.