Hèbùdéèpa 6

¹ Ye kú kpɛ́mú-dà tee, ti yònà é ha̰tá-ma biɔhànamá cecemá ti biɔháà-ma-ní Kídísì hḭ́ǹka, é bɔhà kpɛ̰́m̀ma kpɛ́ɛmá. Yè koò pú békú tí tṵ́má nɛ cetá-nà ye biɔhànamà-ní ma yudí, é nɛ caka è yɔ̀ nɛ́ wɛ́í pa̰á̰kpákpààma mɛ̀mà kɔ́dì-nà-ma kṵ́mú mɛhɛká, nɛ́ taàa nɛ dandaní Weèdi hḭ́ǹka. ² Yè koò pú békú tí tṵ́má nɛ kɔ̰́ɔ̰́ biɔhànamá cóǹti boocí hḭ́ǹka, nà nɔ̀hi cɔ̰náma hḭ́ǹka, nà kpíípa yá̰ńdáma hḭ́ǹka, é yídá nà sídàma dèǹdèma hḭ́ǹka. ³ Mɛ̀m̀pà káà ceekú-pa kú kpɛ́ɛsá-dà ye pesà-ní. Tḭ́ńti yònà é sɔ̰kadá é biɔha kpɛ̰́m̀ma kú biɔhàma-dà, kà Weèdi ti pɛ̰ḭ bòdi.

⁴ Nɛ yá̰á̰, mɛ̀m̀pà dɛ́tà-pa-ho wenikú Weèdi cɔ̀ku mɛhɛká, é dɛmpa ni pa̰ká, é dɛ́tá ni Sèdi, ⁵ é yekà ni wɛmá naakú, é dɛ́há pemá mɛ̀mà pení-ma-ní kpɛ́ɛsá kpeèti sá̰á̰pu, ⁶ k'yèe kú yammà fénà pa dandaní, é tón è dɔdi pa fòùmu kpɛ̰́m̀mu mɛhɛká, yè kɔ́ɔ́ a kó hḭmá kà pá tṵ́má é peǹta pa fòùmu dɛ́ɛ̀ma, è yá̰á̰ pà tṵ́mà kpɛ̰́ṵ̀ dɛ́ɛ̀ma-dà Weèdi Bíitá kpíidɔkú hḭ́ǹka, è tà yɔ́kànì nìku yìhìka.

⁷ Teǹka mɛ̀ǹkà sɔ̰̀ni-ká tafà nɛ́ɛmá mɛ̀mà dɔdì-ma ka hḭ́ǹka wɔ̀ka wɛǹni, k'yè yònà ye tenkà pɛní disuutí mɛ̀m̀pà kà ká̰ńtí-pa kpɛ́mú, yè bɛkú è yɔ̀ Weèdi-dà kà kónà. ⁸ Àmá kà kà pɛní poòma túti-dà nà popɛ́íma, kà yòǹ hécí-dà, Weèdi pú kó yóka é kà nɔda, pà mɛ̀ɛ kó kà tɔ̀n ha̰mú-dà.

⁹ N dópòbɔ̀ɔ̀ka-nà, bá kà ti wɛì mɛma kú bookù, ti yá̰á̰-ma sukú è yɔ̀ nɛ péé cɔɔ̀mɔ́nkú hḭ́ǹka, mɛ̀ǹkù kɔ́dì-nà-ku fḭ́hìnamá mɛhɛká. ¹⁰ Weèdi pú yòǹ Weèdi mɛ̀nì pú coó-di. Nì pú kó dúí tɔmú nɛ pa̰à̰-pu ni kpɛ́mú nà dɔ́kàma nɛ bɛkáà-ma ni hḭ́ǹka. Nɛ de bɛkáà ye dɔ́kàma, nà tɔná nɛ de pa̰à̰-na-dà nɛ weèdɔɔ̀tɔ̀pa kpɛ́mú, nɛ mɛ̀ɛ káà sɔ̰ncí-ma è mà hɔ̰n. ¹¹ Àmá ti kpɛ̀i kà bá nɛ mɛ̀ǹǹ dɛ̀ɛ̀-ko é n'káá ye kú wɛ̰́ɛ̰́mà-dà háá é yɔ̀ɔ ta̰ntá nùdi, k'yé teha kà nɛ daḿma kpɛ́ɛsá wɛǹni é cɛ̰ɛ̰̀na. ¹² Nɛ dá teha é hḭn dóócí, àmá nɛ́ tṵṵ̀na mɛ̀m̀pà dań-pa è tṵ́mà ceí nà mùyɔ̰, pa kú pa̰á̰ma. Mɛmpá-dà dɛ́ɛ́kú Weèdi hḭ́n nì kó pà kɔ̰́ɔ̰́-sa.

Weèdi kó pa̰á̰-ma nì hḭ́nà nùdi è yɔ̀ nì kó pa̰á̰-sa.

¹³ Weèdi de hḭ́nà tḭ́ń wɔ̀ni Àbààhám̀ nùdi, nì de wɛ̰́ha-á-ma è yɔ̀ nì kó pa̰á̰ nì hḭ́mpú. Há̰kà, òcɔ̰́ǹ de pú péé è wɛhi-nà Weèdi nì de kó wɛ̰́ha-nà-ko kú yèdi. Mɛmá-dà kà nì de é wɛ̰́ha-nà ni mɔ́nní kpɛ́ɛdí. ¹⁴ Nì de wɛ̰́háà è yɔ̀: Bemú-dà n k'áa kóná-ma tenten, é wɛ́kàna a yaàbíiká kà ká n'wɔ̰ǹti. ¹⁵ Àbààhám̀ há̰ de ceí ye kú niì pa̰á̰ma nà mùyɔ̰-dà, mɛmá-dà k'ò mɛ̀ɛ de dɛ́há Weèdi de hḭ́n nì k'óò kɔ̰́ɔ̰́-sa. ¹⁶ Kà nìpa kó wɛ̰́ha, pà hɔ̰́ wɛ̰́ha nà mɛ̀ǹǹ pà wɛhi-nà-ko kú yèdi-dà. Ye wɔ̀ni ye wɛ̰́hàmà-dà kó n'tee òcɔ̰́ǹ koò pú kó wáńtá nɛɛ́ nɔ̀hì-ma nùdi pà wɛɛ̀-di. ¹⁷ Ma cɔ̰́ɔ̰̀di-dà Weèdi de kpɛ̀i é bɛka-má. Nì de kpɛ̀i é bɛka pópóí mɛ̀m̀pà kó kpàa-pá kááma nì hḭ́n nì kó pà kɔ̰́ɔ̰́-ma è yɔ̀ ni nùdi-dà pú kó ɛ̰̀ḭ̀. Mií-ì tee nì de tuɛhà-ma nùdi nì hḭ́nà-di hḭ́ǹka nà wɛ̰́hàma. ¹⁸ Niìya̰ yèdɛ́ɛ́-dà mɛma Weèdi hḭ́nà-ma ti yìhìka k'yè pú kó nɛɛ́ é peǹta. Ni nùdi hḭ́náma nà ni wɛ̰́hàma nì pú kó nɛɛ́ báńta ye mɛhɛká. Mií-dà mɛ̀ɛ yahikànì ti wɔ̰̀ǹti sàma, tḭ́ńti mɛ̀m̀pà héè-pa niìi wɛǹni, é tɛ̀ni taàa tenten ti daḿma niìya̰ Weèdi hḭ́n nì kó ti kɔ̰́ɔ̰́-sa hḭ́ǹka. ¹⁹ Ye kú daḿmà-dà púsí ti fòùmu kà ti pú sa̰m̀pu, é n'yònà máasàdi mɛ̀nì nɛ̀hìnì-di nɛ́ɛmá dawɛ́ɛ̀ti. Mà kpenì-í-ma, yècḭ́ḭ̀ mɛ̀ɛ pú kó nɛɛ́ mà nampa. Mà hɔ̰́ dúú-ma, hádí é ha̰tá kùdáasàpu mɛ̀mù ca̰ncí-pu Weèdi hɔ̰́ɔ̰̀ta mɛhɛká, é ta̰ntá bɛ̀m̀bɛ̀wentí mɔ́nní mɛhɛká. ²⁰ Mií-dà Sèsíì ti nihí-ma é dúú nà ti kpɛ́mú, è yá̰á̰ mɛnń-dà kpáńtà dɔ̀hàka kpɛ̰́ǹn k'yè kɔ́ɔ́ yɔ̀ɔmá é n'yònà Mɛ̀ɛ̀sìsèdɛ́kì kú tɔɔ̀ma.