Tɔná 18

Pɔ́dì Kɔ̀dɛ́ńtì yɔtí mɛhɛká

¹ Ye kú dàhàka, kà Pɔ́dì é yídá Àtɛ́nì yɔtí é ka̰há Kɔ̀dɛ́ńtì kpɛ́ɛtí. ² K'ó tɛ̀i ye pesá é peèta-nà Sùwífù òcɔ̰́ǹ kà p'òò toò Àkìdásì, k'ò yòǹ Pɔ̰́ɔ̰̀ tempáàku kóoó. Ò de káà tɔ̀ɔ̀-ní ye pesá n'ɔ̀ɔ poòo Pìdìsíì, nà Ìtàdíì teǹka-dà, mìì tee-sá wóosào Kódótì-dà de denà nùdi è yɔ̀ Sùwífùpa wɛǹni é yɛ̀dì Hɔ̀dɔ́m̀ mɛhɛká. Kà Pɔ́dì é taá pà bátá. ³ Pà tɔmú há̰ de yòǹ-ma mùcɔ̰́ tá, k'ó m'péé pa pesá kà pà pɛ́ɛ̀ mù pa̰kú. Pà de pa̰kàta dɔcí fḭ́ḭná-dà. ⁴ Damuhipàdi wɛǹni, kà Pɔ́dì té tóó wɛmá Weèdi wɛmá biɔhà-nàmɔ̀ni mɛhɛká, é biɔhàna Sùwífùpa nà mɛ̀m̀pà pú yòǹ-pa Sùwífùpa, è kpɛ̀i pá teha ò de pà cakú-sa.

⁵ Kà Sìdásì nà Tìmɔ̀téè é yíí-ní nà Màsèdɔ́nì tempáàku é tɛ̀ni ye pesá, kà Pɔ́dì é dɛ́tá bòdi é kɔ̰́ɔ̰́ o cɔ̰́ɔ̰̀di Weèdi wɛmá cakàpu, è wekànì Sùwífùpa è yɔ̀ Sèsíì-dà yòǹ Weèdi ta̰kadáko. ⁶ Àmá, kà Sùwífùpa é yeda o besípu, òò tèù. K'ò mɛ̀ɛ é pi-pikàda o báatí tá̰pùdùm, é pà caka è yɔ̀: Kà nɛ seǹ, nɛ mɔ́mpá-dà mà tee, yècḭ́ḭ̀ koò pú n'dìi. É cɛ̰ɛ̰́-nà wɔ̀nì mɛnì, n kó taá mɛ̀m̀pà pú yòǹ-pa Sùwífùpa bɛ́ka-dà.

⁷ K'ó yɛ̀dì ye pesá, é taá dɔɔ̀o òcɔ̰́ǹ kú hɔ̰́ɔ̰̀ta, kà p'òò toò Tìtìúsì Sìsìtísì, k'ò káá Weèdi wantafɔ̰̀di, k'òo hɔ̰́ɔ̰̀ta hɛ́dí-nà Weèdi wɛmá biɔhà-nàmɔ̀ni. ⁸ Àmá k'yèe Weèdi wɛmá biɔhà-nàmɔ̀ni kpɛ̰́ǹn, kà p'òò yún Kìdìpúsì é taàa o dandaní Teó hḭ́ǹka n'ɔ̀ɔ hɔ̰́ɔ̰́tà kpɛ́ɛpá wɛǹni. Kà Kɔ̀dɛ́ńtìpa dɔ́ɔ́di, mɛ̀m̀pà kú wɛnnì de besí-pa Pɔ́dì, mɛ̀ɛ té taàa pa dandaní Teó hḭ́ǹka, kà pá pà cóńtá.

⁹ Yèǹka kàcɔ̰́, dɔhɔ̀ti mɛhɛká, kà Teó é bɛka o cɔ̰́ɔ̰̀di Pɔ́dì óò caka è yɔ̀: A dá wampa, baà ní n'sɔ̰ncí é n'wɛì, a dá muhipa, ¹⁰ m'a péé-nà-á-ma. Òcɔ̰́ǹ pú kó nɛɛ́ áa cɛ̰ɛ̰́, áa pa̰á̰ sḭ̀ḭ̀ma, mìì tee-sá mɛ̀m̀pà yòǹ-pa n kpɛ́ɛpá ye yɔtì mɛhɛkà, pà wɛhi-í-ma. ¹¹ Kà Pɔ́dì é pa̰á̰ Kɔ̀dɛ́ńtì yɔtí mɛhɛká, benní nà cḭ̀ma màkɔ̀dì è biɔhànì nìpa Weèdi wɛmá.

¹² Kàdìyɔ̰́ɔ̰̀ yòǹ tḭ́ń wɔ̀ni yìkàǹyìdo Àkàyíì tempáàku, kà Sùwífùpa é yídá Pɔ́dì hḭ́ǹka, é múná nùdi óò cɛ̰ɛ̰́, óò tanà sídàpu hɔ̰́ɔ̰̀ta. ¹³ Kà pá tɛ̀i è yɔ̀: Dɔɔɔ̀ mɛnǹ yɛ̰̀ṵ̀ nìpa-dà, è yɔ̀ pá n'dɔń Weèdi kpɛ̰́ńtìnùka pú hḭ́mpú. ¹⁴ Kà Pɔ́dì é n'kpɛ̀i é wɛdá, kà Kàdìyɔ̰́ɔ̰̀ é caka Sùwífùpa è yɔ̀: K'yè de yònà yetádi nìcɔ̰́nì-dà yoo kpákpààma màcɔ̰́mà-dà ò pa̰à̰-ma, n de kó nɛ besí-ma nɛ́na Sùwífùpa. ¹⁵ Y'àá yòǹ-mà nɛ nɔhù wɛnɔ̀ka hḭ́ǹka, nà yèka hḭ́ǹka, nà nɛ kpɛ̰́ńtìnùka hḭ́ǹka, yè dìi nɛ́na-dà. N pú kó nɛɛ́ é n'yòǹ ye kú wɛmà sídàko. ¹⁶ K'ó pà bɔ̀hà-ní ye sídàpu hɔ̰́ɔ̰̀ta mɛhɛká. ¹⁷ Ye wɔ̀ni, pa wɛǹni kà pá cɛ̰ɛ̰́ Sɔ̀sìtɛ́nì, Weèdi wɛmá biɔhà-nàmɔ̀ni kpɛ̰́ǹn, óò tàa dɔnkú ye sídàpu hɔ̰́ɔ̰̀ta yìhìka, bá Kàdìyɔ̰́ɔ̰̀ pú pà wɛ̰̀ǹtà.

Pɔ́dì tṵ́mà tón À̰ǹtíyɔ́sì yɔtí

¹⁸ Kà Pɔ́dì é tṵ́má cá̰ńtá Kɔ̀dɛ́ńtì yɔtí mɛhɛká é yóka. Ye kú dàhàka, k'ó cɔwa o weèdɔɔ̀tɔ̀pa, é tóó nɛ́ɛmá dawɛ́ɛ̀ku é ka̰há Sìdíì tempáàku è nɔɔ̀-nà Àkìdásì nà Pìdìsíì. K'ò há̰ nɛɛ́ ka̰há, ò de taá é kodí o yùti-dà Sà̰kèdéè, mìì tee-sá ò de hḭ́nà nùdi-dà Weèdi. ¹⁹ Kà pá ta̰ntá Èfɛ́sì yɔtí, kà Pɔ́dì é hédá ye pesá Pìdìsíì nà Àkìdásì. K'ó taá dúú Weèdi wɛmá biɔhà-nàmɔ̀ni mɛhɛká è wɛì-nà Sùwífùpa. ²⁰ Kà p'óò cɔ̀hà è yɔ̀ ó cá̰ńtá é pà pa̰á̰-nà daàka kàcɔ̰́kà, àmá k'ó yeda. ²¹ K'ó n'kɛ̰hidi é pà caka è yɔ̀: [Kúúdì mɛ̀nì peń-dì-ní, yè békú ń nì dii Sèdìsàdɛ́m̀-dà.] Kà Weèdi kpɛ̀i, n kó tóní-ma-ní nɛ pesá. K'ó dìsi nɛ́ɛmá dawɛ́ɛ̀ku Èfɛ́sì yɔtí é ka̰há.

²² K'ó ta̰ntá Sèsàdéè yɔtí, é póńtá Sèdìsàdɛ́m̀ é tɛ̀i é dɔwa weèdɔɔ̀pa hòǹhòni, é yɔ̀ɔ é sḭ́ńtá À̰ǹtíyɔ́sì. ²³ K'ó cá̰ńtá ye pesá é yóka cɛ̰́ma, é yɔ̀ɔ é sɔ̰kadá. K'ó taá Kàdátì tempáàku nà Fìsíì kpɛ́kú, è cèǹtì páàti wɛǹni è tɔ̀hìnì Sèsíì kpɛ́ɛpá dandaní kpeèti.

Àpòdósì Èfɛ́sì nà Kɔ̀dɛ́ńtì yɔtí mɛhɛká

²⁴ Kà Sùwífù òcɔ̰́ǹ, kà p'òò toò Àpòdósì, k'ò yòǹ Àdɛ̀kìsá̰ńtì yɔtí kóoó, é tɛ̀ni Èfɛ́sì. Ò de nɔn wɛmá-dà dɛ́dɛ́í, è tṵ́mà yá̰á̰ sukú pà wà̰haà-sa Weèdi pɔ̀kàta mɛhɛká. ²⁵ Pà de ò biɔhanà-á-ma Teó cɔ̀ku tṵṵ̀namá wɛmá. Nà wɔ̰ǹyahisàti, k'ò cakú è tṵ́mà biɔhànì mámáḿ Sèsíì wɛnaamá. Há̰kà, ò de yá̰á̰ Ìsá̰-Bàtísì kú cóǹti-dà sá̰à̰di. ²⁶ K'ó cetá è biɔhànì Weèdi wɛmá biɔhà-nàmɔ̀ni mɛhɛká, bá o bɔ̀ti pú pudì yècḭ́ḭ̀. Kà Pìdìsíì nà Àkìdásì é besí o bihɔ̀namá, é yɔ̀ɔ óò yíí pa hɔ̰́ɔ̰̀ta, é dɔ̀hà óò wekàna sukú Weèdi cɔ̀ku. ²⁷ Ye kú dàhàka, kà Àpòdósì yɔ̀ ò kpɛ̀i é taá Àkàyíì tempáàku-dà. K'òo weèdɔɔ̀tɔ̀pa é yahikàna o wɔ̰̀ǹti, é wa̰hà pɔ̀kàta weèdɔɔ̀pa mɛ̀m̀pà de péé-pa ka bɛ́ka, è yɔ̀ p'óò codá sukú. K'ó tɛ̀i ye pesá, é tempanà dɛ́dɛ́í weèdɔɔ̀pa, mìì tee-sá Wèedi-dà de ò péé-nà. ²⁸ Nìku wɛǹni yìhìka-dà, ò de yení-ma pépédí Sùwífùpa de cakú-sa, bá kà pà pú kó nɛɛ́ ò nɔ̀hì-nà. Ò de yɛ̰ṵ̀ pà wà̰haà-sa-dà Weèdi pɔ̀kàta mɛhɛká, è pà bɛkú è yɔ̀ Sèsíì-dà yòǹ Weèdi ta̰kadáko.