Tɔná 17

Pɔ́dì nà Sìdásì Tɛ̀sàdòníkì yɔtí mɛhɛká

¹ Pɔ́dì nà Sìdásì de cɛ̰tà À̰ǹfìpòdísì nà Àpòdòníì yɔtí-dà, é nɛɛ́ ta̰ntá Tɛ̀sàdòníkì kpɛ́ɛtí. Ye pesá, kà Sùwífùpa de káá Weèdi wɛmá biɔhà-nàmɔ̀ni. ² Kà Pɔ́dì é taá ye Weèdi wɛmá biɔhà-nàmɔ̀ni mɛhɛká. Yè de yòǹ o mantáma-dà. K'ó tukaná Sùwífùpa damuhipàka kàta̰a̰, nà ni nìpa kà pà nɔ̀hìni Weèdi wɛmá pɔ̀kàhi hḭ́ǹka. ³ K'ó pà wekàna è pà bɛka è yɔ̀ Weèdi Ta̰kadáko de yònà é dii náńkú-dà, é yá̰ńtá-ní kpíípa mɛhɛká. Ò de pà cakú è tonà: Ye Sèsíì n nɛ cakú-kò kú wɛmà, mɛnń-dà héé Weèdi ta̰kadáko.

⁴ Mɛ̀m̀pà de ò besí-pa, pa mɛhɛká k'yèe wɛmá pḭ́ń pa pàcɔ̰́, kà pá tón Pɔ́dì nà Bànàbásì bɛ́ka. Kà Kɛ̀dɛ́kìpa dɔ́ɔ́di mɛ̀m̀pà de duǹti-pá Weèdi mɛ̀ɛ té mà hḭn, nà poòpa dɔ́ɔ́di kà pà de pà kɛ̀hi dɛ́dɛ́í.

⁵ Àmá kà Sùwífùpa é yídá yantimú, é tíkáná niìyoǹti pà de dɛ́tà-pa cɔ̀ci mɛhɛká, kà pá pa̰á̰ hodí, é buupa ye yɔtí. Kà pá taá yéńtá Sàsɔ̰́ɔ̰̀ hɔ̰́ɔ̰̀ta, è pɛnti Pɔ́dì nà Sìdásì, è kó pà tanà nìku yìhìka. ⁶ Kà pá tɛ̀i pà pú pà dɛ́hà. Ye wɔ̀ni, é yɔ̰́ɔ̰́pa-ní Sàsɔ̰́ɔ̰̀, nà weèdɔɔ̀pa pàcɔ̰́ yɔtí sídàpa yìhìka, è toó hodí è toò: Ye nìpà mɛmpà buupáà-ní teǹka wɛǹni-dà, sá̰mà-ní é ta̰ntá-ni miì, ⁷ kà Sàsɔ̰́ɔ̰̀ há̰ pà codá o hɔ̰́ɔ̰̀ta. Pa wɛnnì, pà pú tṵ̀n Hɔ̀dɔ́m̀ wóosào kpɛ̰́ńtìnùka. Pà cakú è yɔ̀ wódo tɔɔ̀ɔ-dà péé, kà p'òò toò Sèsíì. ⁸ K'yèe wɛmá é kɔkapa dɛ́dɛ́í nìku, n'ɛ̀ɛ sídàpa. ⁹ Kà Sàsɔ̰́ɔ̰̀ n'ɛ̀ɛ weèdɔɔ̀pa tɔɔ̀pa é bodá dící ye sídàpa kà pá nɛɛ́ pà wɛ́í.

Pɔ́dì nà Sìdásì Bèdéè yɔtí mɛhɛká

¹⁰ Kà yèǹka é bóka, kà weèdɔɔ̀pa é héé kà Pɔ́dì nà Sìdásì é ka̰há Bèdéè yɔtí. Kà pá tɛ̀i, é taá Sùwífùpa Weèdi wɛmá biɔhà-nàmɔ̀ni mɛhɛká. ¹¹ Ye pesá kú kpɛ́ɛpá mɛmpa de nɔń-ma cà̰m̀ma codápu é ha̰tá-nà Tɛ̀sàdòníkì yɔtí kpɛ́ɛ́pá. Pà de ta̰ntà Weèdi wɛmá nà yàma màcɔ̰́-dà. Daàka wɛǹni, è biɔhú Weèdi wɛmá pɔ̀kàhi è kó dɛ́há kà Pɔ́dì de cakú-sa yòǹ bemú-dà. ¹² Kà pa dɔ́ɔ́di é hḭn weèdɔɔ̀pa. Kɛ̀dɛ́kìpa mɛhɛká, kà poòpa pà de kɛɛ̀hi-pá nà daapá dɔ́ɔ́di mɛ̀ɛ té hḭn weèdɔɔ̀pa. ¹³ Àmá, kà Tɛ̀sàdòníkì Sùwífùpa é yekà è yɔ̀ Pɔ́dì cakú Weèdi wɛmá Bèdéè yɔtí, kà pá tɛ̀ni é kɔkapa, é fucí nìku. ¹⁴ Kà Bèdéè weèdɔɔ̀pa é héé kà Pɔ́dì é ka̰há ye wɔ̀ni n'ɛ̀ɛ wɔ̀ni Dàmɛ́dì bɛ́ka. Kà Sìdásì nà Tìmɔ̀téè mɛmpa é cá̰ńtá Bèdéè yɔtí. ¹⁵ Mɛ̀m̀pà de bɛ́hìǹta-pá Pɔ́dì, kà p'óò tanà háá Àtɛ́nì yɔtí. Kà pá n'tóńti è kṵnti-ní, k'ó pà nàǹci è yɔ̀ pá taá é caka Sìdásì nà Tìmɔ̀téè è yɔ̀ p'óò hɔ̰́tá-ní fen-fem̀ma.

Pɔ́dì Àtɛ́nì yɔtí mɛhɛká.

¹⁶ Kà Pɔ́dì é m'péé Àtɛ́nì yɔtí mɛhɛká è ceí Sìdásì nà Tìmɔ̀téè, k'òo yàma é cɔ̰ha dɛ́dɛ́í, mìì tee-sá wàci-dà de sṵ́nà ye yɔtí. ¹⁷ Ò de hɔ̰́ n'nɔhù-nà Sùwífùpa-dà nà mɛ̀m̀pà pú yòǹ-pa Sùwífùpa è há̰ dɔń Weèdi, Weèdi wɛmá biɔhà-nàmɔ̀ni mɛhɛká. É yídá, daàka wɛǹni, ye yɔtí tíká-bɛ̀m̀bɛ̀ni mɛhɛká, k'ò té n'wɛì-nà ò pèèku-nà-pa. ¹⁸ Kà pɔkàyá̰sàpa pàcɔ̰́pà, pà yún-pá *Èpíkídì kpɛ́ɛpá nà *Sìtòyísì kpɛ́ɛpá é tɛ̀ni òò nɔ̀hù-nà. Kà pa pàcɔ̰́ toò: Ye wɛsàkù yaǹn mɛnǹ kpɛ̀i é n'yɔ̀ badà? Kà tɔɔ̀pa toò: Yè yònà ò wɛì-ma-dà teǹka tɔɔ̀ka kú wàci wɛmá. Pà de hḭ́n mɛma, mìì tee-sá Pɔ́dì de cakú Sèsíì wɛnaamá-dà nà kpíípa yá̰ńtáma wɛmá.

¹⁹ Kà p'óò tódá óò tanà yɔtí kpɛ̰́m̀ma hɔ̰́ n'kaàdi-sá è wɛì yɔtí wɛmá, é tɛ̀i óò caka è yɔ̀: Ti kpɛ̀i é yá̰dá biɔhànamá pààma a biɔhànì-ma-dà. ²⁰ A ti cakú-sa yòǹ cà̰ǹya̰-dà, kà ti dɔ́sí éè yèkà sukú. ²¹ Yè há̰ de hɔ̰́tà Àtɛ́nì yɔtí yam̀ma nà cà̰m̀ma mɛ̀m̀pà de tì péé-pa de hɔ̰́ tódá pa wɔ̀ni wɛǹni-dà é té n'wɛì yoo é m'bekù niìi cà̰ǹya̰ wɛmá.

²² Kà Pɔ́dì é yíí é nɛɛ̀hi ye yɔtí kpɛ̰́m̀ma cɔhɔ̀ka è yɔ̀: Àtɛ́nì yam̀ma-nà, n cɔ́dí é n'hɔ̰́tà niìi wɛǹni hḭ́ǹka, nɛ tṵ̀n wàci cɔ̀ku-dà dɛ́dɛ́í. ²³ N cetà cèǹtì nɛ yɔtí mɛhɛká, è demù nɛ wàci naàdeèka, é yɔ̀ɔ taá dɛ́há-ma nìcɔ̰́ kà pà wà̰tà ni hḭ́ǹka è yɔ̀: Ti pú yá̰á̰-di weèdi kú wɛmá. Nɛ duǹti-dí è pú nì yá̰á̰, n tɛ̀ni è kó nɛ caka ni kú wɛmá-dà. ²⁴ Weèdi mɛ̀nì pa̰à̰-di fòùku nà mìì péé-sa wɛǹni ku mɛhɛká, mɛní mɛ̀nì yòǹ-di hḭ́ǹka nà teǹka Teó, pú wenti nàmɔ̀ka mɛhɛká nìpa maá-ka nà pa nɔ̀hi. ²⁵ Nì mɛ̀ɛ pú bɔhɔ̀ta nìpa é nì n'yoǹ yècḭ́ḭ̀, è yá̰á̰ yìcḭ́ḭ̀ pú nì dóńtà. Mɛní-dà pɔ̰n nìpa wɛǹni fòùmu, nà fuehèmu nà tɔɔ̀sa wɛǹni. ²⁶ Nà nìi òcɔ̰́-dà nì pa̰à̰-ma boocí wɛǹni, é héé kà cì fòù teǹka wɛǹni hḭ́ǹka. Mɛní-dà kɔ́tà bookú bá mɛ̀ǹkù dɛ̀ɛ̀-ku teǹka, é hḭ́ná-nà benní wɔ̀ka. ²⁷ Nì pa̰à̰ mii kú wɛnnì, è kpɛ̀i nìpa-dà é nì pɛha, bá kà pà poti poti pa pɛhàma mɛhɛká, k'yè nadi kà pá nì dɛ́tá. Nì há̰ pú dɛu-nà t'oòcɔ̰́ǹ, ²⁸ è yá̰á̰ mɛní-dà tee kà ti fòù, è nampú, è péé. Nɛ wɛyáńtàpa pàcɔ̰́ yɔ̀ɔ wɛɛ́pu-dà è yɔ̀: Ti mɛ̀ɛ té yòǹ ni bííhí-dà. ²⁹ Ti há̰ yòǹ-mà ni bííhí, ti pú yònà é mahà è yɔ̀ nì yònà wàfa pà mɛ́í-fa-dà nà wúdó yoo nà díimáàti, yoo nà tá̰à̰ka. Miya̰, nìi-dà hɔ̰́ mahà o yàma mɛhɛká éè yáńta. ³⁰ Weèdi de pú kaǹ nìpa pa̰kú-sa, pà de mun pú yá̰á̰ tḭ́ń wɔ̀ni ni cɔ̀ku. Àmá sá̰mà, nì pà yún-ń-ma pà péé-sa wɛǹni è yɔ̀ pá peǹta pa fòùmu. ³¹ Nì hḭ́nà daadí-dà nì kó wáńtá síi-dí nìpa wɛǹni nà coóma. Nì ta̰kadà nìi-dà ye kú kpɛ́mú, óò yá̰hìna kpíípa mɛhɛká. Ma kú bookú-dà nì bɛkáà-ma nìpa wɛǹni è yɔ̀ mɛnń-dà yòǹ sídàko nì ta̰kadà-ko.

³² Pà yèkaà-ma k'ó wɛdá kpíípa yá̰ńtáma wɛmá, kà pàcɔ̰́ é púsí o dɛkèti, kà tɔɔ̀pa mɛmpa yɔ̀: Datɔɔ̀di-dà ti kó tṵ́m'áa besí-ma ma hḭ́ǹka.

³³ Ye wɔ̀ni, kà Pɔ́dì é yídá é pà hédá. ³⁴ Nà mɛma, kà pàcɔ̰́ taàa pa dandaní o wɛmá hḭ́ǹka, óò tṵ̀na. Pa mɛhɛká, kà dɔɔ̀o òcɔ̰́ǹ yè péé, kà p'òò toò Dèníì, k'ò de péé ye yɔtí kpɛ̰́m̀ma mɛhɛká, nà poòo òcɔ̰́ǹ k'òo yèdi toò Dàmàdísì, nà tɔɔ̀pa tṵ́màkaà.