Mádíkì 5

Sèsíì kpekànà dɔɔ̀o wɛɛ̀kupá fá̰kápú-ko

¹ Kà pá deèta ye baàdi sóìdi tɔɔ̀di, é ta̰ntá Sèdàsáàpa^a teǹka mɛhɛká. ² Kà Sèsíì n'cúti-ní hà̰à̰pu hḭ́ǹka, kà dɔɔ̀o òcɔ̰́ǹ é cemá yɛɛ̀ni híùka mɛhɛká, é tɛ̀ni o peètanàpu kà wɛɛ̀kupá péé o mɛhɛká. ³ Ye dɔɔ̀o de wentí híùka mɛhɛká-dà. Òcɔ̰́ǹ de koò pú kó nɛɛ́ óò dákáná bá nà dákáti. ⁴ Pà de hɔ̰́ dákáná máàka-dà o tàka, é bowá dákáti o nɔ̀hi, àmá k'ò té tɔ̰ɔ̰̀ta ye dákáti, é cédá ye máàka. Òcɔ̰́ǹ de koò kɔ́ɔ́ nɔɔ̀ti è kó nɛɛ́ óò nɛ̀hìna yɔkàma. ⁵ Ò de hɔ̰́ m'péé wɔ̀ka wɛǹni, yèǹka nà wèǹku, híùka mɛhɛká-dà, nà ta̰à̰ka hḭ́ǹka, è té n'toó hodí, è pa̰kàta o cɔ̰́ɔ̰̀di bòka nà tá̰à̰ka.

⁶ K'ó dɛ́há Sèsíì nà dɛùma, é cocí-ní é tɛ̀ni é hìu-ho o yìhìka, ⁷ é wɛdá kpeéma è yɔ̀: Sèsíì, Sàwèǹku bidà, a n kpɛ̀i-nà badà? M'a sɛ́úkú-ma nà Weèdi yèdi, dá n diá náńkú.

⁸ Ò de wɛi mɛma, mìì tee-sá Sèsíì-dà de kɔ̰́nì nùdì ye wɛɛ̀kupá è tonà: Yɛ̀ɛ̀-nà dɔɔò mɛnǹ kú mɛhɛká, wɛɛ̀kupà nɛ́na!

⁹ Kà Sèsíì óò béka è yɔ̀: A yèdi héé ba? K'óò tɛ̰́ná è yɔ̀: N yèdi-dà Dɔ́ɔ́di mìì tee-sá ti yòǹ dɔ́ɔ́di-dà.

¹⁰ Kà wɛɛ̀kupá é yɛ̰̀ḭ ye dɔɔ̀o k'ó kpɛ̰hìkà sukú mɔ́nkú Sèsíì è yɔ̀ ò dá teha é pà dèna yɔtì mɛntì kú mɛhɛká.

¹¹ Yè há̰ de hɔ̰́tà fa̰nkàdɔ́ɔ́di nìcɔ̰́nì-dà péé ye pesá, è càu ta̰à̰di hḭ́ǹka è pɛnti dimá. ¹² K'yèe wɛɛ̀kupá é sɛ́uka Sèsíì è yɔ̀: Ti hédá kà tí taá dúú fà̰ǹkàtì mɛntì kú mɛkɛká.

¹³ K'ó pà caka è yɔ̀ tɔɔ̀ta-nà. Ye wɔ̀ni, k'yèe wɛɛ̀kupá é yɛ̀dì ye dɔɔ̀o mɛhɛká é taá dúú ye fà̰ǹkàti. K'yèe fa̰nkàdɔ́ɔ́di wɛǹni, kà nì yɔ̀ɔ tòhìka kàdɛ́ɛ́ kpɛ́ɛmá, é dɔtìna-ní n'ɛ̀ɛ ta̰à̰di hḭ́ǹka, é n'káá-ho n'ɛ̀ɛ baàdi mɛhɛká, é kpíí fɛ́.

¹⁴ Mɛ̀m̀pà de cɛ̰nti-pá ye fà̰ǹkàti, kà pá cocí é dúú yɔsàti nà yɔsḭ̀m̀mɔ́ǹti mɛ̀ǹtì tì yéńtà-ti é tɛ̀i é caka ye wɛmá. Kà nìpa é tɛ̀ni é dɛ́há mìì pa̰à̰-sa. ¹⁵ Kà pá ta̰ntá-ní Sèsíì pesá, é tɛ̀ni é dɛ́há ye dɔɔ̀o wɛɛ̀kupá dɔ́ɔ́di de yɛ̀ɛ̀-ko kú mɛhɛká k'ò kàdi, è báá báatí, k'òo yàma weni. Kà wantafɔ̰̀di é pà cɛ̰ɛ̰́. ¹⁶ Mɛ̀m̀pà de péé-pa ye pesá é dɛ́há mìì de pa̰à̰-sa nà pa nɔ̀ǹci, kà pá pà caka mìì de tɛ̀ni-sá-ní ye dɔɔ̀o wɛɛ̀kupá de péé-ko kú mɛhɛká, nà ye fà̰ǹkàti. ¹⁷ Ye wɔ̀ni, kà pá cemá sɛ́uka Sèsíì è yɔ̀ ó yɛ̀dì pa teǹka.

¹⁸ K'ó n'dikìdì hà̰à̰pu hḭ́ǹka, k'yèe dɔɔ̀o wɛɛ̀kupá de yɛɛ̀-ko kú mɛhɛká óò sɛ́uka è yɔ̀ ó héé k'óò tṵ̀na. ¹⁹ K'ó yeda, óò caka è yɔ̀: Tón é kòǹ a hɔ̰́ɔ̰̀ta, é tɛ̀i é caka a hɔ̰́ɔ̰́tà kpɛ́ɛpá Teó a pa̰à̰-sa wɛǹni, nà w'àà kɔnkáàma kú bookú séèma.

²⁰ K'yèe nìdo é yíí dɛɛ̀da yɔtí píta tempáàku mɛhɛká, é caka nìpa Sèsíì pa̰à̰-sa wɛǹni o kpɛ́mú, k'yé pà dii pa wɛǹni.

Poòo òcɔ̰́ǹ kpekànamá nà Sàyìdísì sepàm̀bíitá foukànamá

²¹ Kà Sèsíì é tóní ye baàdi sóìdi tɔɔ̀di nà hà̰à̰pu. Kà nìku dɔ́ɔ́di é tíká o pesá k'ò péé nɛ́ɛmá nùdi. ²² Kà Weèdi wɛmá biɔhà-nàmɔ̀ni kpɛ̰́ǹn òcɔ̰́ǹ é tɛ̀ni, kà p'òò toò Sàyìdísì. K'ó tɛ̀ni é dɛ́há Sèsíì, é dɔɔ-ho o tàka fɔ̰̀di, ²³ òò kpɛ̰̀hḭ̀ku dɛ́dɛ́í è tonà: N sepàm̀bíitá-dà mɔ̀dì-nà-ní kṵ́mú. Wɛ̰́ɛ̰́ ya̰ní é cɔ̰ná a nɔ̀hi ta hḭ́ǹka, k'yé teha kà tá kpeka é foùda.

²⁴ Kà Sèsíì óò tṵ̀na kà pá ka̰há ka bɛ́ka, kà nìku dɔ́ɔ́di ò tṵ̀n òò pɛ̰́ɛ̰̀ǹta o pḭ̀ǹdicí wɛǹni.

²⁵ Y'àá de hɔ̰́tà ye nìku mɛhɛká, poòo òcɔ̰́ǹ-dà péé è mɔn poòma, è yòǹ beeká píì-kàdɛ́ɛ́ mà pú yɔ̀ɔ. ²⁶ K'ó taá dòkòtóòpa dɔ́ɔ́di pesá é dii náńkú sàma nà pa teepàma, é sehèna o dící wɛǹni, yècɛ̰́ɛ̰̀ pú tɔ̰káà, k'yé múńtá dɔ̀hà é pɛtá-ní. ²⁷ Ò yèkaà-ma Sèsíì wɛmá, k'ó tɛ̀ni é fɛ̰kapa ye nìku mɛhɛká, o dàkàbɛ́kàma, é pḭ́ń o tókédi, ²⁸ mìì tee-sá ò de maàhu è tonà: Bá kà n nɛɛ̀ pḭ́ń o báatí, n kó kpeka-á-ma. ²⁹ Ye pesá n'ɛ̀ɛ pesá, k'òo poòma é cɛ̰́ṵ́dá, k'ó bantá o wɔ̰̀ǹku mɛhɛká è yɔ̀ ò kpekáà-á-ma. ³⁰ Ye wɔ̀ni ni cɔ̰́ɔ̰̀di mɛhɛká, kà Sèsíì é bantá è yɔ̀ nɔɔ̀ti yɛdì o mɛhɛká. K'ó fitá-ní ye nìku cɔhɔ̀ka é béka è yɔ̀: Wodà pḭ́ń n tókédi?

³¹ K'òo dapàm̀ma óò tɛ̰́ná è yɔ̀: A mádí kà nìku aa pɛ̰́nì a pḭ̀ǹdicí wɛǹni k'àá tṵ́mà békú wod'àà pḭ́ń?

³² K'ó wáńtá wáńtá o pḭ̀ǹdicí wɛǹni è kó dɛ́há mɛ̀ǹǹ hḭn-kó mɛma. ³³ Kà wantafɔ̰̀di é cɛ̰ɛ̰́ ye poòo, k'ò cèùdi, mìì tee-sá ò de yá̰á̰-ma mìì pa̰à̰-sa o wɔ̰̀ǹku mɛhɛká. K'ó tɛ̀ni é dɔɔ-ho o tàka fɔ̰̀di, óò caka wɛbeèdi wɛǹni. ³⁴ Kà Sèsíì óò caka è yɔ̀: N sepàǹ, a dandaní-d'àà fḭ́hìnà. Ka̰há nà wɛ̀ɛ̀di, a dɔnkú yɔ̀ɔ-ɔ́-ma dɛ́dɛ́í.

³⁵ Ò de káà wɛì mɛmá-dà, kà nìpa pàcɔ̰́pà é tɛɛ̀ní tɔntɔnkú, è yɛ̀ni-nà ye dapàǹkpɛ̰́ǹn Sàyìdísì hɔ̰́ɔ̰̀ta, é tɛ̀n'ɔ́ɔ̀ caka è yɔ̀: A sepàm̀bíitá koò pú kadí. A koò dá n'sɔ̰ncí è kɔkapú dakpɛ̰́ǹn.

³⁶ Kà Sèsíì é mà yèkà, àmá ò pú mà kàn yècɛ̰́ɛ̰̀. K'ó caka ye dapàǹkpɛ̰́ǹn è yɔ̀: Dá n'wani, ní n'dań sá̰nì! ³⁷ K'ó tódá Píyɛ́ɛ̀, nà Sàákì n'ɔ̀ɔ ya̰ǹn Ìsá̰à̰ sá̰à̰di, kà p'óò bɛ́hìna. Ò de pú teháà kà tɔɔ̀o òcɔ̰́ǹ óò tṵ̀na. ³⁸ Kà pá ta̰ntá Sàyìdísì hɔ̰́ɔ̰̀ta, é tɛ̀i k'ó n'hɔ̰́tà ta wɛǹni yòǹ hodí-dà, kà nìpa toó kpíidawòka sàma k'yè yòǹ wɛ̀ù. ³⁹ K'ó dúú-ho hɔ̰́ɔ̰̀ta mɛhɛká, é tɛ̀i é pà béka è yɔ̀: Badà tee kà nɛ toó ye kú hódikù n'ɛ̀ɛ kú dawòkà-ní? Ye bíítà pú kpíi-má, tà dɔɔ́-dà-ma. ⁴⁰ Pà yèkaà-ma mɛma, kà pá púsí o dɛhípu. K'ò mɛ̀ɛ pà dèna pa wɛǹni. K'ó tódá bíitá báàa, nà ta màa, n'ɔ̀ɔ dapàm̀ma mɛ̀m̀pà d'oò bɛ́hìnà-pa-ní, kà pá dúú ye sepàm̀bíitá de dɔɔ́-sa. ⁴¹ K'ó tɛ̀i é cɛ̰ɛ̰́ ta nɔ̀ku, è yɔ̀: Tàdìtá kṵ́m̀! Mìì kpɛ̀i é n'yɔ̀-sa: Yíí-ní sepàǹtà, mmí-dà mà n'àà hḭ́n!

⁴² Ye wɔ̀ni nà ye wɔ̀ni, k'yèe sepàm̀bíitá é yídá-ní, é púsí cèmu. Yè de hɔ̰́tà tà káá beeká píì-kàdɛ́ɛ́-dà. Pà dɛ́hà-ma mɛma, pa wɛǹni k'yé pà dii sàma mɔ́ma. ⁴³ K'ó pà caka è yɔ̀ pà dá te-teha k'òòcɔ̰́ǹ é mà yèkà. Ye kú dàhàka, k'ò yɔ̀ pá tà pa̰a̰ dipú kà tá dii.