Mádíkì 4

Dibɔɔ̀ti yahípu Wɛbemú yohènamá.

¹ Kà Sèsíì é tṵ́má cetá è biɔhànì Kàdìdéè baàdi bɛ̀ni. Kà nìku dɔ́ɔ́di é peèta kɔ́ù háá k'ó dìsi hà̰à̰pu hḭ́ǹka é kaàdi, kà mù péé ye baàdi mɛhɛká, kà nìku mɛnku péé teǹka nɛ́ɛmá nùdi. ² K'ó pà biɔhàna niìya̰ dɔ́ɔ́di nà wɛbemú yohènamá. Ò de pà cakú o biɔhànamá mɛhɛká, è tonà: ³ Besí-nà é yekà! Dɔɔ̀o òcɔ̰́ǹ-dà de taá o yɛ̀di dibɔɔ̀ti yahípu. ⁴ K'ó tɛ̀i é tì n'yahù, kà bíimá màcɔ̰́ dɔdi cɔ̀ku bɛ́ɛ́kú, kà nɛ̀hi é tɛ̀ni é mà dii fɛ́. ⁵ Kà tɔɔ̀ma dɔdi teǹka mɛ̀ǹkà káá-ka tá̰à̰ka è pú cṵmpu bá cɛ̰́ma. Kà má yɛɛ̀ni ye wɔ̀ni n'ɛ̀ɛ wɔ̀ni mìì tee-sá ye teǹka de pú cṵmpu. ⁶ Kà wèǹku é náá-ní é mà tɔ̀n, kà má kpɛ-kpɛí mìì tee-sá ma cɛ̰̀ǹci de pú cútà. ⁷ Kà bíimá tɔɔ̀ma dɔdi poòma cɔhàka. K'yèe poòma é kpɛ̰́ń é mà fḭń, bá mà pú pɛdà yècɛ̰́ɛ̰̀. ⁸ Àmá, kà tɔɔ̀ma é dɔdi tenyṵhùka hḭ́ǹka, é yɛ̀dì é kpɛ̰́ń dɛ́dɛ́í é pɛdá bíimá. Kà màcɔ̰́ é pɛdá bíimá púta̰a̰, tɔɔ̀ma bíimá púkɔɔ̀, tɔɔ̀ma bíimá kɔ̀ta.

⁹ Kà Sèsíì é tɔhɛ̀na è yɔ̀: Kà mɛ̀ǹǹ káá-ko toòka è kó yekà, k'ó yekà.

Mìì tee-sá kà Sèsíì wɛì-nà nìpa wɛbemú yohènamá

¹⁰ Sèsíì nátà-nà tḭ́ń wɔ̀ni nìku, k'òo tɔntɔndipá píì-pàdɛ́ɛ́ nà mɛ̀m̀pà de péé-pa o pesá óò béka è yɔ̀ ó pà wekàna ye wɛbemú yohènamá. ¹¹ K'ó pà tɛ̰́ná è yɔ̀: Weèdi-dà nɛ pɛ̰ḭ nɛ́na è yɔ̀ nɛ́ yá̰dá ni wóòti kpɛ́ɛsá mìì de sɔ̀ɔ-sá. Àmá, nìpa tɔɔ̀pa mɛmpa, pà you niìya̰ wɛǹni nà wɛbemú yohènamá cɔ̰́ɔ̰̀di-dà,

¹² k'yé teha kà pá n'wań p'àá bá dɛ́há,

é n'you p'àá bá yekà yècɛ̰́ɛ̰̀,

kà pà dá yetá é kɔ̰́ɔ̰́ pa cɔ̰́ɔ̰̀di Weèdi kà ní pà dèda pa sḭ̀ḭ̀ma^a.

Sèsíì wekanì dibɔɔ̀ti yahípu wɛbemú yohènamá

¹³ K'ó pà béka è yɔ̀: Nɛ pú yeèkaà ye wɛbemù yohènamà kpɛ̀i é n'yɔ̀p'aa? Ntɛ́ n'aá kó hḭmà é yekà wɛbemú yohènamá tɔɔ̀ma wɛǹni? ¹⁴ Ye diyahíkò-ní, ò yahù Weèdi wɛmá-dà. ¹⁵ Nìpa pàcɔ̰́ yònà cɔ̀ku bɛ́ɛ́kú dibòòti dɔɔ-kú kú hḭ́ǹka-dà, è té yekà Weèdi wɛmá kà Wɛɛ̀kupá wódo té cemá tɛ̀ni é mà dèda pa yàma mɛhɛká. ¹⁶ Kà tɔɔ̀pa yònà tá̰à̰ka teǹka dibɔɔ̀ti dɔɔ-ká kú hḭ́ǹka, è té yekà Weèdi wɛmá é mà teha ye wɔ̀ni n'ɛ̀ɛ wɔ̀ni nà yaǹnaakú. ¹⁷ Àmá, pà pú kó hédá kà má kaàdi pa mɛhɛká. Pà hɔ̰́ mà tà̰ǹta wɔ̀ni cɛ̰́masí mɛhɛká-dà, kà náńkú wɔ̀ni tɛ̀ni yoo kà pà pà yàǹti nà Weèdi wɛmá kpɛ́mú, kà pà té cemá é bútá Weèdi. ¹⁸ Kà tɔɔ̀pa yònà poòti teǹka dibɔɔ̀ti dɔɔ-ká kú mɛhɛká, è té yekà Weèdi wɛmá, ¹⁹ àmá, kà fòùku yam̀màhàka, nà káma bándàfa, nà bìnɔ cɔ̰náma tɔɔ̀sa tɔɔ̀sa hḭ́ǹka, té dúú pa yàma mɛhɛká é mà fḭntá, mà koò bá nɛɛ́ peǹta pa fòùmu. ²⁰ Tɔɔ̀pa mɛmpa yònà tenyṵhṵ̀ka dibɔɔ̀ti dɔɔ-ká kú hḭ́ǹka-dà, è té yekà Weèdi wɛmá é mà tà̰ǹta, kà má pɛdá suusá pa yàma mɛhɛká, é n'yònà bíimá pà bɔɔ́-ma hɔ̰́ pɛkamá bíimá: Màcɔ̰́ púta̰a̰, tɔɔ̀ma púkɔdì é yídá tɔɔ̀ma kɔ̀ta.

Wɛbemú yohènamá nà ha̰wèta

²¹ Kà Sèsíì tṵ́má pà caka è yɔ̀: Pà hɔ̰́ tɔɔ̀n-ń-ma ha̰wèta é taá tà tàa yúúdi mɛhɛká-a, yoo é taá tà hḭ́ná dɔɔdí fɔ̰̀di-a? Pà pú hɔ̰́ taá tà cɔ̰ná cɔ̰̀ǹcɔ̰̀ni hḭ́ǹka-à? ²² Mìì kú wɛnnì sɔ̀ɔ-sá, pà kó wáńtá éè fohìna-á-ma. Nìpa mɛ̀ɛ pú yá̰á̰-sa wɛǹni sá̰mà-ní, pà kó wáńtá éè dèna-á-ma-ní wenikú mɛhɛká. ²³ Kà mɛ̀ǹǹ káá-ko toòka è kó yekà k'ó yekà.

²⁴ K'ó tṵ́má pà caka è yɔ̀: Pa̰á̰-nà yɔkàma nɛ yeèku-sá hḭ́ǹka. Waǹni nɛ beé-nà-di é pa̰a̰ tɔɔ̀pa, Weèdi kó wáńtá beé-nà mɛní-dà é nɛ pa̰a̰, é tɔhɛ̀na-nà, ²⁵ è yá̰á̰, mɛ̀ǹǹ káá-ko yècḭ́ḭ̀, pà k'óò tɔ̀hɛ̀na-á-ma k'ó dɔ̀hà é kádá. Mɛ̀ǹǹ mɛ̀ɛ kɔ́ɔ́-ko yècḭ́ḭ̀, pà kó feèda-á-ma bá ye cɛ̰́masí ò màhu è tonà ò káá-sa.

Wɛbemú yohènamá nà dibɔɔ̀ti mɛ̀ǹtì yɛ̀ɛ̀-ti ti cɔ̰́ɔ̰̀di

²⁶ Kà Sèsíì tṵ́mà yɔ̀: Weèdi wóòti teǹka yònà nìdo hɔ̰́ bɔɔ́-ma-dà dibɔɔ̀ti o yɛ̀di mɛhɛká. ²⁷ Kà yèǹka té bóka k'ó kòǹ é tɛ̀i é dɔɔ́, k'yé weka k'ò té heǹta, ye wɔ̀ni kà dibɔɔ̀ti yɛɛ̀hu, è kpɛ̰́ǹ, ò pú yá̰á̰ tì hɔ̰mpú. ²⁸ Teǹka mɔ́nká-dà hɔ̰́ deèna-ní yom̀pɔ̰́ɔ̰cí é cì kpɛ̰́ńkàna, kà cí póń é pukàda, é pɛdá bíimá kà má bii. ²⁹ Bíimá bii tḭ́ń daadí, k'ó tɛ̀ni é kɔ̰ṵ o dití, mìì tee-sá dikɔ̰ṵmá wɔ̀ni-dà tɛ̀i.

Wɛbemú yohènamá nà kṵ̀ǹsɔ̰̀pu bíifá

³⁰ Kà Sèsíì tṵ́mà yɔ̀: M̀mɔ́ńya̰-dà ti kó nɛɛ́ yohèna-nà-ma Weèdi wóòti? Nà wɛbemú yohènamá m̀mɔ́ńma-dà ti kó wɛɛ́-ma ti wɛmá? ³¹ Tì yònà kṵ̀ǹsɔ̰̀pu bíifá-dà, pà hɔ̰́ fà m'bɔɔ̀ tḭ́ń wɔ̀ni teǹka, kà fà yòǹ sìm̀mɔ́ǹfa-dà tebíící wɛǹni mɛhɛká. ³² Àmá kà pà fà bɔdí è yɔ̀ɔ, kà fà yɛ̀ni kà fà té kpɛ̰́ń é hḭn tesàpu é ha̰tá-nà tená tɔɔ̀na. Mù hɔ̰́ yɛ̀ɛ̀ dɛ̀ɛcí sàci mɔ́ncí-dà kà nɛ̀hi té tɛ̀ni é yɛ̰ná mu hḭ́ǹka.

³³ Nà ye kú wɛbemú yohènamà mɛmà kú bookú dɔ́ɔ́di-dà ò de pà cakú-ma Weèdi wɛmá, è behú-nà pa yekàma sá̰pu. ³⁴ Ò de pú hɔ̰́ pà wɛɛ́-nà kà wɛbemú yohènamá kɔ́ɔ́. Àmá, kà pà péé tḭ́ń wɔ̀ni pa cɔ̰́ɔ̰̀di mɛnń n'ɔ̀ɔ dapàm̀ma, k'ò té mà pà wekàna ma wɛǹni páí.

Sèsíì nɛ̀hìnà yakùkùdi

³⁵ Ye daadí ni cɔ̰́ɔ̰̀di kú yohokú, kà Sèsíì é caka o dapàm̀ma è yɔ̀: Yàà tí deèta-nà baàsàdì sóìdi tɔɔ̀di. ³⁶ Kà pá hédá nìku, k'òo dapàm̀ma óò tódá nà hà̰à̰pu ò de péé-pu kú mɛhɛká kà pá ka̰há, kà hà̰à̰na tɔɔ̀na pà nɔɔ̀-nà. ³⁷ Pà tɔ̀dì-ma, kà yakpeèku é kpetá-ní, kà nɛ́ɛsa̰nhí podì è húdi-ho nɛ́ɛmá ye hà̰à̰pu mɛhɛká, háá kà mù kɔ́dí sṵ́nápu. ³⁸ È hɔ̰́tà Sèsíì mɛnn péé dàhàka è dɔɔ́ è cesí o yudí yucekadádi. K'òo dapàm̀ma óò hèǹta è yɔ̀: Ti dakpɛ̰́ǹn, a pú dìi ti kó kpíí-mà? Yè p'áa káá kɔkapàma màcɔ̰́mà nkɛ́ɛ̀? ³⁹ K'ó heǹta-ní, é wɛɛ́-nà kpeéma ye yakú, é caka ye baàdi nɛ́ɛmá è yɔ̀: Hḭn wá̰mu! Nɛɛ̀hi mɛma! K'yèe yakú é nɛɛ̀hi, ye wɛǹni k'yè yɔ̀ cèù. ⁴⁰ Ye wɔ̀ni, k'ó pà béka è yɔ̀: Badà tee kà nɛ wani mɛma? Nɛ mum pú káá dandan'áa? ⁴¹ K'yé pà hḭn-nà wantafɔ̰̀di sàdi, kà pà békú pa tɔɔ̀pa è tonà: Nìi wodà mɛmà, k'ò té wɛɛ́-nà yakú nà nɛ́ɛmá k'yé ò yèkà-nà toodí?