Mádíkì 3

Sèsíì kpekànà nìdo k'òo nɔ̀ku fa̰á̰

¹ Daadí tɔɔ̀di, kà Sèsíì é tṵ́má tón Weèdi wɛmá biɔhà-nàmɔ̀ni mɛhɛká, é tɛ̀i è hɔ̰́tà dɔɔ̀o òcɔ̰́ǹ yè péé k'òo nɔ̀ku fa̰á̰. ² Mɛ̀m̀pà de péé-pa ye Weèdi wɛmá biɔhà-nàmɔ̀ni mɛhɛká, kà p'òò cɔ́ti dɛ́dɛ́í è kó dɛ́há k'ò kó kpekàna ye dɔɔ̀o damuhipàdi daadí, mìì tee-sá pà de pɛhɛ̀ǹta o yetádi-dà è k'óò pṵ́á̰. ³ K'ó caka ye dɔɔ̀o mɛ̀ǹǹ kú nɔ̀ku de fa̰á̰-ko è yɔ̀: Yídá é nɛɛ̀hi miì nìku wɛǹni yìhìka!

⁴ Ye wɔ̀ni, k'ó béka mɛ̀m̀pà de ò wáń-pa è yɔ̀: Damuhipàdi daadí, ti kpɛ̰́ńtìnùka ti pɛ̰ḭ-ḭ́-dà nùdi è yɔ̀ ti té pa̰á̰ suumá nkɛ́ɛ̀ sḭ̀mà? Kà hḭ́n tí fḭ́hìna nìdo nkɛ́ɛ̀ t'óò kɔ̀ù? Kà pà baà yòǹ wá̰m.

⁵ K'ó pà wáńtá pa wɛǹni nà fɔ̰́ɔ̰́di, k'òo yàma cɔ̰ha dɛ́dɛ́í nà pà de kpekànà-ma toùka è pú kpɛ̀i é yekà yècḭ́ḭ̀. Ye wɔ̀ni, k'ó caka ye dɔɔ̀o è yɔ̀: Ca̰à̰na a nɔ̀ku! K'ó kù cà̰na, kà kú tón ku yòǹti. ⁶ Kà Fàdísìpa é cemá é yɛ̀dì ye wɔ̀ni n'ɛ̀ɛ wɔ̀ni ye Weèdi wɛmá biɔhà-nàmɔ̀ni mɛhɛká, é peèta-nà Hèdótì kú nìpa, kà pà kó dɛ́há pà kó hḭmpú óò kɔ̀ù.

Nìku dɔ́ɔ́di tɛ̀ni Sèsíì pesá

⁷ Kà Sèsíì é ka̰há n'ɔ̀ɔ dapàm̀ma Kàdìdéè baàdi nùdi, kà nìku dɔ́ɔ́di óò tṵ̀na. Kù de yɛɛ̀ni-nà-ní Kàdìdéè tempáàku-dà, nà Sùdéè kpɛ́kú, ⁸ nà Sèdìsàdɛ́m̀, nà Ìdùmɛ́ɛ̀, nà yɔtí mɛ̀ǹtì kpɛ̰́dí-ti Sùùtɛ̰́ɛ̰̀ kónnùdi tɔɔ̀di, nà Tíì nà Sìtɔ̰́ɔ̰̀ yɔtí bɛ́ɛ́cí bɛ́ɛ́cí kpɛ́ɛpá. Ye kú nìkù dɔ́ɔ́dì-dà de tɛ̀ni Sèsíì pesá, mìì tee-sá kù de yeèkaà ò pa̰kú-sa wɛǹni-dà. ⁹ Ye wɔ̀ni, k'ó caka o dapàm̀ma è yɔ̀ p'óò dɔ̀hà hà̰à̰pu mùcɔ̰́ k'yé teha kà nìku dá ò nɔ̀ùnà. ¹⁰ Ò há̰ de kpekànì-ma nìpa dɔ́ɔ́di tá, mɛmá-dà kà mɛ̀m̀pà kú wɛnnì de kɔǹ-nà-pa dɔncí mɔkù è kpɛ̀i óò pḭ́ń. ¹¹ Wɛɛ̀kupá de péé-pa kú mɛhɛká wɛǹni de hɔ̰́ ò dɛ́há-ma, è té dɔdi-ho o yìhìka é kpákada è yɔ̀: A yòǹ Weèdi bíitá-dà. ¹² Àmá, k'ò té pà wɛ́dí-nà kpeéma è yɔ̀ pà dá caka mɛnn héé-ko.

Sèsíì bàtà o tɔntɔndipá píì-pàdɛ́ɛ́

¹³ Ye kú dàhàka, kà Sèsíì é dìsi ta̰à̰di hḭ́ǹka é tɛ̀i é yíí nìpa ò kpɛ̀i é yíí-pá, kà pá tɛ̀ni o pesá. ¹⁴ Pa mɛhɛká, k'ó baàta nìpa píì-pàdɛ́ɛ́ [é pà yíí o tɔntɔndipá]. Ò de pà bàtà è kpɛ̀i pá pɛ́ɛ́ óò m'péé-nà-á-ma, k'ó pà n'tɔǹ kà pà cakú Weèdi wɛnaamá, ¹⁵ é pà kɔ̰́ɔ̰́ nɔɔ̀ti kà pá m'bɔɔ̀hu wɛɛ̀kupá. ¹⁶ Ǹtɛ ye tɔntɔndipá píì-pàdɛ́ɛ́ ò de batà-pa: Sìmɔ́ɔ̀, ò de tṵ́mà cetà-ko Píyɛ́ɛ̀^a, ¹⁷ Sàákì n'ɔ̀ɔ kúcàa Ìsá̰à̰, pa dɛ́ɛ̀di kà pà yòǹ Sèbèdéè bííhí. K'ó pà pa̰a̰ yèdi è yɔ̀: Bɔ̀ànɛ̀sɛ́sì, mìì kpɛ̀i é yɔ̀-sa nìpa kà pà yònà tawóhàdi, ¹⁸ nà À̰ǹtìdéè nà Fìdípù nà Bàtèdèmíì nà Màtíyéè nà Tòmáà nà Sàákì, Àdìféè bíitá nà Tàdéè nà Sìmɔ́ɔ̀ mɛ̀ǹǹ yení-ko o yɔtí kpɛ́mú, ¹⁹ nà Sùdásì Ìsìkàdìyɔ́tì mɛ̀ǹǹ kó yɔ́ yɛɛ-kó Sèsíì.

Sèsíì hɔ̰́ɔ̰́tà kpɛ́ɛpá kpɛ̀i óò tódá óò nátá-nà nìku

²⁰ Ye kú dàhàka, k'ó tón é koní hɔ̰́ɔ̰̀ta n'ɔ̀ɔ dapàm̀ma, kà nìku dɔ́ɔ́di é tṵ́má peèta, kà pá mɔ́ńka bòdi bá pà kó dii-má. ²¹ K'òo hɔ̰́ɔ̰́tà kpɛ́ɛpá é mà yèkà é tɛ̀ni o tódápu, mìì tee-sá pà de tonà ò fikadà-á-ma.

Sèsíì tɛ̰́nì mɛ̀m̀p'òò pṵ́ṵ́nì-pa

²² Weèdi kpɛ̰́ńtìnùka biɔhànapá mɛ̀m̀pà de yíì-pa-ní nà Sèdìsàdɛ́m̀ é tɛ̀ni o pesá, kà pà wɛì è tonà: Wɛɛ̀kupá wódo Bɛ̀dìsèbúdì^b-dà péé o mɛhɛká, mɛnń-dà mɛ̀ɛ ò kɔ̰́nì nɔɔ̀ti k'ò bɔ̀hu wɛɛ̀kupá nìpa mɛhɛká.

²³ Kà Sèsíì é pà yíí-ní é pà wɛɛ́-nà wɛbemù yohènamà mɛmà, k'ò yɔ̀: Ntɛ́ Wɛɛ̀kupá wódo kó hḭmà é bɔhà o cɔ̰́ɔ̰̀di? ²⁴ Kà wóoteǹka kàcɔ̰́kà kú nìpa kɔ̰ǹti-nà pa tɔɔ̀pa, ye kú wóoteǹka pú kó n'fòù. ²⁵ Kà hɔ̰́ɔ̰̀ta tàcɔ̰́tà kú nìpa mɛ̀ɛ kɔ̰ǹti-nà pa tɔɔ̀pa, ye kú hɔ̰́ɔ̰̀ta pú kó n'fòù. ²⁶ Kà Wɛɛ̀kupá wódo kɔ̰ǹti-n'ɔ̀ɔ cɔ̰́ɔ̰̀di, k'òo wóoteǹka totà, o wóòti pú kó n'kadí, tì kó nɛɛ̀hi-í-ma.

²⁷ Òcɔ̰́ǹ pú kó nɛɛ́ dúú niìkpedo hɔ̰́ɔ̰̀ta é kodá o káma wɛǹni è pú n'cedí dɛnà óò cɛ̰ɛ̰́ óò dákáná. Àmá, k'òò dákànà è yɔ̀ɔ, ò kó nɛɛ́-ma é kodá mìì péé-sa wɛǹni o hɔ̰́ɔ̰̀ta mɛhɛká.

²⁸ Mɔ́ma-dà n nɛ cakú-ma: Nìpa kó pa̰á̰-ma wɛǹni sḭ̀ḭ̀ma, nà cɔ̀ka pà kó teùnà-ka wɛǹni Weèdi, nì kó nɛɛ́ pà dèda-á-ma ye kú sḭ̀ḭ̀ma. ²⁹ Àmá, nìdo mɛ̀ǹǹ kó tèe-kó Seèwendí, Weèdi pú k'óò dèda ye kú sḭ̀ḭ̀mà-ní daadí yènì, mà baà kó m'péé o yudí hḭ́ǹka-dà k'yé n'kɔ́ɔ́ yɔ̀ɔmá.

³⁰ Sèsíì de pà wɛɛ̀-nà mɛma, mìì tee-sá pà de yɔ̀ wɛɛ̀ko-dà péé o mɛhɛká.

Mɛ̀m̀pà yòǹ-pa Sèsíì màa n'ɔ̀ɔ ya̰nhí

³¹ Ye wɔ̀ni, kà Sèsíì màa n'ɔ̀ɔ ya̰nhí é tɛ̀ni é nɛɛ̀hi tapaàdi é tɔn nìdo è yɔ̀ óò yíí-ní. ³² È hɔ̰́tà nìku dɔ́ɔ́di kaàdi òò yéńtà. Kà p'óò caka è yɔ̀: A màa n'àa ya̰nhí péé tapaàdi àà pɛnti. ³³ K'ó pà tɛ̰́ná è yɔ̀: Wodà héé n màa, m̀mɔ́ḿpa-dà héé n ya̰nhí? ³⁴ K'ó wáńtá mɛ̀m̀pà kàdi-pá òò yéńtà, è yɔ̀: Ǹtɛ n màa nà n ya̰nhí. ³⁵ Kà nìdo pa̰kú Weèdi dɔ́sí-sa, ye yaǹn-dà yòǹ n potɔ̰ɔ̰̀ɔ̰, nà n ya̰ǹta, nà n màa.