Mádíkì 2

Sèsíì kpekànà hɔ̀ùta

¹ K'yé hḭn daàka cɛ̰́ma, kà Sèsíì é tóní Kàpɛ̀ɛ̀nàúm̀ yɔtí. Kà nìpa é yekà è yɔ̀ ò péé hɔ̰́ɔ̰̀ta mɛhɛká. ² Kà nìku dɔ́ɔ́di é peèta ye hɔ̰́ɔ̰̀ta mɛhɛká, kà bòdi é dóńtá é yó pɛ́ɛ́-nà-hɔ̰ tapàadi, k'ò pà cakú Weèdi wɛmá. ³ K'ó pà n'cakú Weèdi wɛmá, kà nìpa pàcɔ̰́pà é tɛ̀ni o pesá, pa mɛhɛká kà nìi pànàhì toó-ní hɔ̀ùta. ⁴ Kà pá tɛ̀ni é n'hɔ̰́tà pà pú kó nɛɛ́ tà ta̰hìna o pesá nà nìku dɔ́ɔ́di kpɛ́mú. Kà pá dìsi nàmɔ̀ǹfiùwadí hḭ́ǹka, ò de péé-di kú mɛhɛká, é beé-nà ò péé-sa mɔ́ḿ-mɔ́nyá̰, é wíkádá bòdi. N'ɛ̀ɛ bòdi, kà pá cúhìna-hɔ̰ ye hɔ̀ùta, kà tà dɔɔ́ ta dɔɔdí hḭ́ǹka. ⁵ Ò hɔ̰́tà-ma mɛ̀m̀pà tà toó-pa-ní káá-dà dandanní, k'ó cemá caka ye hɔ̀ùta è yɔ̀: N bidà, a sḭ̀ḭ̀ma dedà-á-dà.

⁶ È hɔ̰́tà Weèdi kpɛ̰́ńtìnùka biɔhànapá pàcɔ̰́ kaàdi ye pesá, kà pá cemá mahà pa yàma mɛhɛká è yɔ̀: ⁷ Yè cèǹkaà k'ó wɛdá mɛma kú bookú? Ò tèù Weèdi-dà. Weèdi cɔ̰́ɔ̰̀di bààsí, wodà kó nɛɛ́ é deèda nìdo sḭ̀ḭ̀ma? ⁸ Ye wɔ̀ni n'ɛ̀ɛ wɔ̀ni, k'òo sèdi é cem'ɔ́ɔ̀ caka pà màhu-sá pa yàma mɛhɛká. K'ó pà béka è yɔ̀: Badà tee kà nɛ káá ye kú yam̀màhàkà kú bookù-ní nɛ yàma mɛhɛká? ⁹ M̀mɔ́ńya̰-dà dɔǹ-nà ye tɔɔ̀sa: M'a n'yɔ̀-ma m'a dedà a sḭ̀ḭ̀ma, nà m'a hḭ́n-má yídá é tódá a dɔɔdí é cèn? ¹⁰ N kpɛ̀i nɛ́ n'yá̰á̰-ma è yɔ̀ mmí *Niìfòùo bíitá n káá-ma nɔɔ̀ti è kó nɛɛ́ deèda nìdo sḭ̀ḭ̀ma tenkà hḭ́ńkà. ¹¹ Ye wɔ̀ni k'ó caka ye hɔ̀ùta è yɔ̀: Yídá é tódá a dɔɔdí é kòǹ, mmí-dà mà n'àà hḭ́n!

¹² K'ó cemá é yíí-ní ye wɔ̀ni n'ɛ̀ɛ wɔ̀ni é tódá o dɔɔdí é yɛ̀dì nìpa wɛǹni yìhìka. K'yé pà dii pa wɛǹni, kà pà dùǹti Weèdi è tonà: Ti mum pú dɛ́hà pa̰á̰mà mɛmà kú tɔɔ̀ma daadí yènì!

Sèsíì yíí Dèfí è yɔ̀ óò tṵ̀na

¹³ Kà Sèsíì é tón Kàdìdéè baàdi nùdi bɛ́ka, kà nìku dɔ́ɔ́di tɛɛ̀hu-ní o pesá k'ò kù biɔhànì. ¹⁴ K'ó n'kɛ̰hɛdi é dɛ́há Dèfí, Àdìféè bíitá k'ò kàdi o kaàcáhà-tɔmú pesá. K'óò caka è yɔ̀: N tṵṵ̀na-ní! Kà Dèfí é yídá óò tṵ̀na.

¹⁵ Ye kú dàhàka, kà Sèsíì n'ɔ̀ɔ dapàm̀ma é taá Dèfí hɔ̰́ɔ̰̀ta, é tɛ̀i é pɛ́ɛ́ è yon-nà kaàcáhàpa nà niìsḭ̀m̀ma tɔɔ̀pa dɔ́ɔ́di, mìì tee-sá ye kú nìpà bookù de sṵ́n-ń-ma òò tṵ̀n. ¹⁶ Kà Weèdi kpɛ̰́ńtìnùka biɔhànapá yè péé è yòǹ Fàdísìpa kpɛ́ɛpá. Pà dɛ́hà-ma k'ò yon-nà ye kú nìpà wɛnnì-ní, kà pá béka o dapàm̀ma è yɔ̀: Badà tee k'ò pɛ́ɛ̀ yon-nà kaàcáhàpa nà niìsḭ̀m̀ma? ¹⁷ Kà Sèsíì é mà yèkà é pà caka è yɔ̀: Nìpa mɛ̀m̀pà kpenì-pa pú pɛnti dòkòtódo, mɛ̀m̀pà mɔn-pá-dà h'ɔ̰́ɔ̰̀ m'pɛnti. N pú tɛ̀ni è kó yíí niìcoópa, àmá n tɛ̀ni è kó yíí niìsḭ̀m̀ma-dà è yɔ̀ pá n tṵṵ̀na.

Sèsíì cakú-sa num̀boóma hḭ́ǹka

¹⁸ Daadí yènì, kà Ìsá̰-Bàtísì dapàm̀ma nà Fàdísìpa boú nùdi. Ye wɔ̀ni, kà nìpa pàcɔ̰́pà é tɛ̀ni é béka Sèsíì è yɔ̀: Badà tee kà Ìsá̰-Bàtísì dapàm̀ma nà Fàdísìpa kpɛ́ɛpá boonì nùdi k'àa kpɛ́ɛpá há̰ pú boonì? ¹⁹ Kà Sèsíì é pà tɛ̰́ná è yɔ̀: Nɛ maàhu è tonà pà yíí-pa-ní potóóma kó nɛɛ́-dà é bowá nùdi k'yèe podɔɔ̀o káà pà péé-nà? Pà pú kó nɛdá. Ò káà pà péé-nà tḭ́ń wɔ̀ni, pà pú kó nɛɛ́ héé dipú è pú n'dii. ²⁰ Àmá, wɔ̀ni pení-ma-ní kà pà kó tódá podɔɔ̀o óò ka̰hàna. Ye kú daadí, pà kó bowá-ma nùdi.

²¹ Òcɔ̰́ǹ pú hɔ̰́ tódá báapàǹku pɛ̀tàda é taá pɔ̰ná báakpɛ̰́nkú. Kà nìi mà hḭn, ye báapàǹkù pɛ̀tàdà kó dɔ̀hà é cɛ́tá-ma ye báakpɛ̰́ńkù, kà ku bòdi é dɔ̀hà é pɛkà. ²² Òcɔ̰́ǹ mɛ̀ɛ pú hɔ̰́ cɔ̰dí dìfɛ̰́ɛ̰̀ pàǹn *dɔcí yúukpɛ̰́ǹka mɛhɛká. Kà nìi hḭn mɛma, ye dìfɛ̰́ɛ̰̀ kó kà pɔ́dá-ma é sèǹ n'ɛ̀ɛ yúùka. Àmá, pà hɔ̰́ cɔ̰dí dìfɛ̰́ɛ̰̀ pàǹn yúupàka mɛhɛká-dà.

Sèsíì yòǹ damuhipàdi kpɛ́ǹn

²³ Damuhipàdi nìcɔ̰́nì, kà Sèsíì é n'ka̰hù pɛ̰́ɛ̰̀ yɔ̀ka yoǹna nàcɔ̰́nà è nɔɔ̀-n'ɔ̀ɔ dapàm̀ma. Pà nà dèèku-má, k'òo dapàm̀ma ka̰dì pɛ̰́ɛ̰̀ yoòfá̰à̰ti cɔ̀ku bɛ́ɛ́kú. ²⁴ Kà Fàdísìpa é caka Sèsíì è yɔ̀: Wáńtá a dapàm̀ma pa̰kú-se-è! Badà tee kà pà pa̰kú kpɛ̰́ńtìnùka yeéè-sa damuhipàdi daadí^a?

²⁵ Kà Sèsíì é pà tɛ̰́ná è yɔ̀: Nɛ mum pú kaàn-kaàn daadí yènì kòni de cɛ̰ɛ̰́ Dàfítì n'ɔ̀ɔ nìpa k'ó hḭmpú kà pà mɔ́ńkáà pà kó dii-sá? ²⁶ Ò de tɛ̀i é dúú Weèdi hɔ̰́ɔ̰̀ta mɛhɛká-dà é tódá pɛ̰́ɛ̰̀pa pà kɔ̰́ɔ̰̀-pa Weèdi é cécí. Ye kú wɔ̀ni, kà Àbìàtáà-dà yòǹ *dɔ̀hàka yam̀ma kpɛ̰́ǹn^b. Ti Weèdi kpɛ̰́ńtìnùka há̰ hḭ́n dɔ̀hàka yam̀ma cɔ̰́ɔ̰̀di-dà yònà é cécí ye kú pɛ̰́ɛ̰̀pà-ní. K'ò de é pà cécí, é pa̰a̰-nà o nìpa.

²⁷ K'ó tɔhɛ̀na è yɔ̀: Weèdi hḭ́nà damuhipàdi nìdo kpɛ́mú-dà, nì pú pa̰à̰ nìdo damuhipàdi kpɛ́mú. ²⁸ Mɛmá-dà tee mmí Niìfòùo bíitá, n yòǹ-ma bá damuhipàdi kpɛ̰́ǹn.